Episode 24: Nanjye nti: “Ndi imbeba Billy akaba injangwe, ntitwabana”

Nakomeje gutegereza kugeza igihe ndambiwe ari nakomekomeza guhamagara, namenye neza ko yabikoze abishaka, akanyumvza ariko akanyihorera, ibyatumye menya neza ko ari impamvu y’ icyemezo cyari cyafashwe.

Nakomeje gutegereza amasaha aba atatu, mpfata icyemezo cyo guhamagara mushiki we Michou ngo mubwire ibyambayeho.

Nkimuhamagara yahise anyitaba vuba,

Michou-“Helloo!”

Njyewe-“Mwiriwe neza? Ni Songa ubahamagaye”

Michou-“Eeeeh! Bite Songa! Ni amahoro se ko umpamagaye amasaha akuze?”
Njyewe-“Bya he se ko naruheze inyuma?”

Michou-“Ngo waruheze inyuma?”

Njyewe-“Naruheze inyuma da! Dore mbaye nkigera mu rugo mvuye guherekeza Teta….”

Mu gihe nari nkiregera Michou musaze Billy yahise akingura umuryango, ahita avuga cyane nkunyitakana, menya neza ko ibyo navugaga byose yabyumvaga,

Billy-“Ariko se waretse kubeshya njyewe nigeze nguheza hanze, ariko wagiye ureka ubugome Songa, ubwo ibyo byose urumva ushaka kugera kuki? Mpereza! Mpereza telephone mvugane na mushiki wanjye”

Billy yanyatse telephone ku ngufu arinjira nanjye mwinjiraho atangira kuvuga atuje muri make yari yiyorobetse,

Billy-“Sister! Ngo bimeze bite ko numva mumvuga?”

Telephone Billy yahise ayishyira muri bwa buryo bwo kwerekana ko nta banga, ibyo mushiki we yavugaga ntangira kubyumva,

Michou-“Billy! Koko? Urumva wifuza iki cyatuma ureka kuba utyo? Uratinyuka ugaheza Songa inyuma y’ urugi? Harya ngo nuko namuhaye inshingano nshya? Nta soni?”

Billy-“Ariko se ibi niki koko? Ubu se naba namukingiranye tukaba turi kuvugana kuri telephone ye? Umva ukuntu bimeze, njyewe nari ndi muri salon, Songa arasohoka ambwira ko agiye kwihagarika, ngiye kumva numva ari kukubwira ngo namukingiranye? Noo! Michou! Kuki mudashobora kumva ko nanjye nagira ukuri?”

Muri ako kanya nashatse kwaka telephone Billy ngo mvuge neza ukuri kwanjye ariko Billy akomeza kuyitsimbabaraho, ari nako akomeza kuvuga cyane abwira Michou ibyo ntari niteze kumva nyuma yo kuruhera inyuma,

Billy-“Sister! Ndabubaha urabizi, kuba wampfunguje ukemera no kunyishyurira ndabigushimira cyane, kandi rwose nemeye kwisubiraho nubwo utanyumvishe, ariko uyu musore wanyu mwahaye ikizere cyo kunyobora arambeshyera, arashaka kuririra ku ikosa rimwe ryabaye ariko ntabwo naguhisha kandi duhuje amaraso,

Niba wenda mutakingirira ikizere mukemera n’ akagambane kuwatwinjiyemo agashaka kungambanira mureba ndiki kuri mwe? Njyewe ndemera ko nakoze ikosa ariko se munte? Ikizere cyose mukinkureho, ngaburirwe nuwo tudafitanye isano kandi muhari?

Sister! Reka nkubwire niba ari aho ngiye kuruvamo, kandi muzantunga munyishyurire inzu niba mudashaka ko mba iwacu, mugashyira imbere amafaranga kuruta uko naba aho navukiye, njyewe ndanabirambiwe kandi umwanzuro nawufashe, ibihanga bibiri ntabwo bitekwa mu nkono imwe, kandi nta njangwe ibana n’ imbeba, hano ntabwo turi mu ijuru aho intare izakikira umwana w’ intama, nibyo kandi…”

Billy yahise ansubiza telephone arakaye ngiye kuyifata iranshika yikubita hasi, akomeza ajya no mu cyumba cye, arafunga.

Nta kundi nari kubigenza nasubiye inyuma ntora telephone nsanga yazimye, ndayatsa maze ndahamagara….nongeye guhamagara Michou, ntiyatinze yanyitabye vuba,

Michou-“Songa! Koko ibyo Billy avuga nibwo?”

Njyewe-“Reka reka ntabwo ari byo, nanjye mbuze icyo ndenzaho, buriya yakomeje kunyumva yanga kunkingurira yumvishe nguhamagaye ahita akingura…”
Michou yanshiye mu ijambo ahita avuga ,

Michou-“Ndumva ibyaho bitoroshye, Papa wacu…ndavuga umugabo wanjye araje kandi ngomba kumwitaho, reka mbe nkuretse ejo nzaza kubareba, kwemera ukuri kwanyu biragoye kuko wa mugani wa Billy injangwe ntabwo ibana n’ imbeba”

Njyewe-“Ndabizi ndi imbeba Billy akaba injangwe, twabana dute? Ni musaza wawe njyewe wambonye nkuze, ntiyakwihanganira ko unyumva we ntumwumve, nyemerera unkure muri izi nshingano wampaye kuko n’ ubundi aho kugira ngo aho nzajya nsha ahakurikize umuriro, namurinda kumenya aho naciye nkaryama ngasinzira”

Michou nijwi rituje yikije umutima maze arambwira,

Michou-“Songa! Ihangane! Nkubonamo umunyakuri, kandi Billy ndamuzi kuva mu buto bwe, icyo yambwira si musubiza mbanza kubitekerezaho kuko ntamwizera, ariko wowe kuko nkwizera mbanza kwemera mbere yo kubitekerezaho gusa kuko muhuriye hagati reka mbashyire mu mwanya umwe mbanze ntekereze ngishe n’ inama n’ abavandimwe nzakubwira ejo, nibiba ngombwa nzaza mbakoreshe inama ibidashoboka biba bidashoboka usibye ko ibyo ntabyemera, nziko ibintu byose bishoboka, ariko iby’ iwacu….”

Mu gihe Michou yari akivuga numvishe ijwi ry’ umugabo ryavugaga cyane ndikanga, uwo mugabo yavugaga ngo,

We-“Cherie! Ko bidasanzwe, uwo ninde muri kuvugana kuburyo udashobora kumva ko naje ntubihe agaciro? Nta nubwo ushobora kumva ko nta n’ umukozi dufite ngo uze unkingurire igipangu? Ndashaka kumenya uwo muntu nako mpereza telephone yawe ndebe uwo ariwe”

Aho nari mpagaze nasazwe n’ ubwoba, ndatitira nkupa mbere yuko banyumva, nyuma y’ akanya gato ubwenge n’ umutima byagiye iwabo wa Michou Billy yakinguye umuryango w’ icyumba ke, aza aseka ambwira neza yishimye mbona nta mutima mubi atangira kumbwira….

Billy-“Bro! Ariko ngo hari ikibazo? Wowe na Michou ngo nababereye ikibazo kweli? Man, washyize ibintu byose ufite mu mutwe hasi tukabana neza? Kunteranya n’ abavandimwe banjye byakumarira iki? Urifuza iki se ahubwo kirenze uko nakwakiye ntakuzi, ibizaza nyuma tukazabivuganaho nyuma?”

Njyewe-“Bro! Ni ukuri kuba ucishije make ndabikunze ahubwo se wa mugani nakora iki ngo nkore inshingano zanjye nk’ akazi ariko twibanire neza ntaruhera inyuma? Cyangwa nigire kwishakira ahandi mba wa mugani wa Teta?”

Billy-“Ariko Teta uhoza mu kanwa uramukunda cyangwa ni wa mugambi wawe watangiye kubera Belinda? Uri umusore mugenzi wanjye, reka twicare tuganire”

Njyewe-“None se ko amasaha akuze, waretse ejo tukazashaka umwanya tukaganira ko nanjye mbikeneye? Nta mpamvu yo kubana nawe mu nzu nk’ injangwe n’ imbeba kanndi warampaye amahirwe ukanyakira umunsi umwe ndetse ukansaba ko twatangira kuba hamwe nta kiguzi unsabye”

Billy-“Iby’ ikiguzi byo….nawe urabizi ko biba bitoroshye, akaciyemo ni akantu gato ariko kacyemuka, ahubwo wowe ngirira ikizere, unyumvire gusa kandi unshyigikire, ibindi ubundi”

Billy yambwiye ayo magambo numva umutima wanjye usazwe n’ ibyishimo, nabonye ari Billy mushya ndetse aramwenyura nanjye biba uko, ikizere burya kirarema yahise ampereza ikiganza nanjye ndacyakira.

Twaganiriye gato ambwira iby’ ubuzima bwo muri gereza, dutandukana agiye kuryama nanjye njye gusemba akajisho kuko ejo byari akazi.

Iryo joro nararyamye ndasinzira, nirengagije byose burya gutuza umutima ntibigorana, bisaba kugera mu ndiba yawo, ukahakora ukahasigiriza, nibyo biha ikizere ubwenge bukayobora ingingo zose zigize umubiri.

Maze kwirambika….nisanze ndi kumwe na Teta, dufatanye ibiganza ndatobora…ndatobora ndabivuga kuko wari umwanya wacu, maze ndavuga nti…..

Mbabarira! Mbabarira….Mutima wanjye tuza tera udasiganwa, uyu mwanya ndakwinginze, ndakwikije, ndagusabye reka mvuge unyumve kuko ari wowe Rurema yantujemo ngo ujye unganiriza mu gihe mpugana.

Mutima wanjye, dore aho ndi ntihabona, ariko kukubona ntibinsaba urumuri kuko umurikira intambwe zanjye, ubwenge bwanjye n’ amaso yanjye ni wowe ubireba…..ni wowe ubitse agahinda, ibyishimo ndetse n’ amaganya…. igira hino tuganire.

Kuva aho navukiye ntabwo nigeze nifuza kugutera kwiheba no kwigaya kuko wantujwemo, ntabwo nigeze nkwinuba kubw’ amahitamo yawe, wowe wanganirije ukambwira uti nukosa nzatera cyane mvubure amaranga njye y’ agahinda, ngutere kwicuza no kwiheba, isura yawe nyisasire ikugaragaze wijimye, ujye ugira isoni zo guhinguka mu bandi kuko bose bazakubaza icyo wabaye,

Uzampatira kubeshya ariko sinzemera, nzagutegeka kuvuga ukuri ngo nduhuke, nzagutegeka gusaba imbabazi nutabikora nzakomeza ntere cyane ubure amahoro ngutitirize amarangamutima yanjye ntatuze mpaka wemeye icyo nifuza.

Nukora ibyiza nzavubura amarangamutima yanjye y’ ibyishimo, ngusubize mu bandi, wa mucyo utame mu bawe, isura yawe itakwe n’ ibyishimo ntera umubiri wawe, erega ni njye nkugize! Uziko mpagaze utakomeza kwitwa wowe?

Hmmm! Mbabarira niryo jambo mpora nkubwira, nkunda ko urivuga kenshi, ari yo mpamvu bakubaza ngo urasaba imbabazi ziki? Ibyo ndabigukundira niyo mpamvu nakugumyemo, iyo urivuze mba nduhutse nkirengagiza ingaruka zibyo wakoze, ari nayo mpamvu nubu turi kumwe.

Yoooh! Mutima wanjye! Urakoze kunkomeza, nanjye niyo mpamvu nshimira Imana yankutujemo, ndibuka wa munsi , ubwo nari nicaye mbona akana keza gato kanyungutaga bombo kaza kansanga, karambaza ngo harya ni wowe witwa….?

Naciye bugufi ngo ndeshye nako, nkabwira ko ari njye, maze karambwira ngo akira ibahasha yawe, nyakirana ubwuzu, nibyo umukono wawe nari nkuzi, nkora mu mufuka nkuramo agaceri ndagahereza, nti ngaho ugende ugure akandi kabombo, urakoze utashye abo mu rugo.

Nari mbizi neza ko nta wundi wantekereza akanyandikira, namenye ntashidikanya ko ari wowe, ibahasha nyibika kure nsiganirwa kugera mu rugo, ndagafungura ngo nsome ibaruwa ye’

Naragafunguye maze nicara hasi ntangira gusoma,

"Ndabizi neza nubona iyi baruwa uriheba gusa uyakire niwo mwanzuro nafashe, ndagushimira uko twabanye mu kahise, ndabizi uraza kwiheba ariko bibaye ngombwa, wakoze ibyiza mu bushobozi bwawe ariko kandi wakoze ibibi mu bihe byawe, hari ibyo nakubonyeho bibi byarenze amarangamutima yanjye ntashobora kwihanganira, reka ngusezere kuko utakiri ishema ryanjye, tubyihorere ugire amahoro, utuze utekane, nabonye abandi duhuza urabizi sinzabura abazanyitaho...."

Nagarukiye aho gusoma kuko ibyo byonyine byatumye ntonganya umutima, nkawubaza impamvu yatumye nkwubaha nkawumvira nkemera mbabarira wantegetse, ariyo nabwiraga uwo nakunze buri kanya kabone nubwo ntacyo nabonaga nzi.

Nibutse wa munsi nagusanze maze nkakubwira nti,

“Mbabarira ndagusabye, ntiza amatwi y’ umutima wawe, wumve uwanjye umenetse dore nteze ibiganza ngo nganze amakosa nakoze antera guhungabana, nkaba inganzwa y’agahinda , ndeba ni ukuri nambaye isura ntigeze nifuza gususa nayo mu maso yawe.

Nkundira unyumve nkuko wamye umbona ukishima, nyabuna girira ko wankunze wongere utuze, wibuke rya joro rimwe ryampaye ikizere cy’ ubuzima, ubwo wampoberaga untunguye, ukambwira gahoro uti, ndagukunda, icyo amatwi yanjye yari asonzeye.

Ibuka bambe duterana intambwe, amagana akaturangarira, ibuka ko nifuzaga kukugira igitego kitwinjiza mu byishimo, tukaba ikitegererezo mu rukundo, tukazamanika ibendera benshi bazarangarira bakariha icyubahiro”
Mutima wanjye, uribuka ibi? Nako ubitse byinshi, mbabarira wambwiye ko ntayikwiye uzatuza ute?

Ko ukomeza utera cyane nkumva ushaka kumvamo, ushaka ko nzima? Ese ikigutera gutuza ko nkibuze, kandi warampaye amategeko nkayakurikiza aho noneho wandenganya?

Ahwiiii! Nta kundi reka unteremo, umvuburemo ibikuranga by’ agahinda, aho ngera hose bampinde gusa nakurikije ibyo wambwiye, nabwirwaga ko Imbabazi zidatangwa na bose ariko gukosa bigakorwa na bose.

Mutima wanjye Sinzasubira, sinshaka ko umvamo ngo nzime! Mbabarira, mbabarira nzabarira nkubu utuje, nanjye ntuze nkuganirize, ningira amahirwe ukanyumva nzagutuza, uzambere wenda nzabona urwibutso rw’ amateka yanjye.

Wowe wantoje kwishima, ese koko umutima wantujwemo uracyanyumvira ko ijambo riwuha ituze ndihoza mu kanwa? Yoooh koko Imbabazi ntizitangwa na bose ariko gukosa bigakorwa na bose, Mbabarira….mbabarira

Nikanze mbona mpfukamye imbere y’ umuryango usohoka uva mu cyumba nari ndimo muri urwo rukerera, mu gihe nari nkibanza kuri izo nzozi hari uwakinguye, ndikanga cyane ndahahamuka………………………………………..

Ntuzacikwe na Episode ya 25 yiyi nkuru “Nanjye si njye” ejo mu gitondo

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO