Episode 25: Uwo nkesha igeno yifuje uwo nyesha umugisha

Nikanze mbona mpfukamye imbere y’ umuryango usohoka uva mu cyumba nari ndimo muri urwo rukerera, mu gihe nari nkibanza kuri izo nzozi hari uwakinguye, ndikanga cyane ndahahamuka,

Njyewe-“Billy! Billy! Mbabarira! Nta mutima mubi, wishaka kunkubita utangiza iyi sura yanjye ngo ukunde ugire agaciro n’ icyubahiro ushaka iwanyu, humura humeka undeke ntabwo niteguye guhangana”

Muri ako kanya Billy yacanye itara,

Billy-“Man! Wasaze?”

Nongeye kwireba neza aho nari mpfukamye, ndahaguruka nikoraho ngo ndebe ko mpari, koko nasaga nuwasaze,

Njyewe-“None se ubundi ni njyewe cyangwa si njye, Songa njyewe ngapfukama ntari gusenga? Imbere y’ urugi? Bandoze?…nta kabuza ni uburozi, njyewe Songa mpfukamye imbere y’ urugi”

Billy-“Wavuze se ko wari uri kuvuga amagambo acurikiranye, umuntu w’ umugabo asinda atanyoye?”

Billy nta kindi yavuze yahise asohoka ansiga mu cyumba, nabonye neza ko nari natannye kandi ntabwo nari nabigambiriye, nagombaga kwiyakira ngaha agaciro izo nzozi.

Izo nzozi nakomeje kuziha agaciro ubwo nari ndi ku kazi, abakiriya bose bazaga batumaga nshiguka, bakabyibazaho bambaza nkabura icyo mvuga, ngakomeza akazi nta kundi.

Mu gihe nari nicaye nitekerezaho nanone, urugi rwarakingutse nakubise amaso Manager ndikanga, nahise nibuka akabaye nitegura kwakira impinduka mu kazi, njye na Teta umwe ukwe undi ukwe kandi kure.

Manager-“Songa! Bite se? Amakuru yawe?”

Njyewe-“Ni meza Boss! Ni kalibu murisanga iwanyu”

Manager-“Hhhhh! Songa niba ariko usanzwe wakira abakiriya ni byiza, ndumva ukora neza cyane rwose”

Muri ako kanya nibajije niba ari impuhwe cyangwa ikindi cyatumaga Manager anshimagiza, byaranyobeye ndatuza ndamwumva,

Njyewe-“Mwari muje kungenzura se cyangwa mwari muje kumpa igisubizo…ariko rwose ibyanjye na Teta ntabwo ari ibisenya Company yanyu, ahubwo kuko Teta ariwe rufunguzo rw’ agaciro mpfite ubu, ni ukuri ntabwo tubayeho hano kubangamira company yanyu ari nayo yacu nk’ abakozi,

Nyakubaha Manager mpfasha unyumve, urabishobora, kandi birashoboka ko nakorana na Teta, ariko agakomeza gufata inshingano ampfiteho, nta kibyihishe inyuma nyakubahwa”

Manager-“Aaaah! Humura ibyo biroroshye, niba ibyo natekerezaga atari byo ahubwo nari njye kukubwira ko…nshaka kukwitabaza nk’ umusore….wishimiwe nako nyine buriya nta kuntu waba ufunze gato tukajya gusangira ibya saa sita”

Njyewe-“Njyewe na Manager ! Ubu njyewe nawe twakwicara tukaganira koko?”

Manager-“Bitwaye iki se? Hhhhh!”

Njyewe-“Ahubwo se nkinge kandi ari amasaha y’ akazi, Boss! Ndabizi neza muri kunyinja ngo murebe neza ko ndi tayali, nyine ndi tayali, ntabwo nakinga ngo nze tujye kurya? Na manager?”

Manager-“Ngwino ahubwo tugende, nari nashyirishijeho na comande”
Njyewe-“Comande?”

Manager-“Yego! Nashyizeho Comande! Ubu agakwavu kameze neza, nari mbizi ko utari bwemere kubera ko….erega dusa nkabahondanye imitwe kubera Teta, nk’ umusore nkawe wagize amahirwe yo guhobera umwana nkuriya ukumva ko bimeze neza buriya wandenganya kandi ndi Boss we?”

Njyewe-“Eeeeh! Mushatse kuvuga iki se Boss? None se buriya Teta mwaba mumukunda mu buryo bumwe cyangwa ubundi simbe mbizi, ahubwo se mwampfashe nkamenya ukuri kuri kiriya cyemezo mwafashe kitoroshye cyo kunyimura mukadutandukanya? Rwose niba ari impamvu yuko mwaba mwifuza Teta mu buryo bwihariye ndabasabye reka mbaharire rwose pe! Ntabwo najya mu marushwanwa namwe murabizi kandi…..

Manager-“Ariko se waje tukajyana ahantu tukareba icyo dufata tukabirangiriza aho hantu ko ntawe uvugira ku busa cyane cyane ku bantu bavuga ikiri kumutima nkanjye, ngwino erega si njye njyenyine, Clever ashaka kunyiba umugono kandi ndashaka kumutanga”

Njyewe-“Clever?? Clever muri gutanguranwa iki Boss?”

Manager-“Wowe kinga uze tugende, turagira akanya ko kuganira neza twitonze kandi ntugire ikibazo, ibyo kukwimura cyangwa kwimura Teta umuntu ashobora kubihigika nta kidashoboka erega”

Muri ako kanya natuje gato, ntekereza kubyo Manager yambwiraga, nigisubizo cyari kimwe, ntabwo nari kwitesha ayo mahirwe nubwo bwose nta nari maze kumenya ko nta kindi yanshaga atari Teta, ndahaguruka turasohoka ndakinga.

Nakurikinga turasohoka, nkomeza kumukurikira kugeza tugeze hafi aho ahantu nari ninjiye bwa mbere nabonaga ko bacuruza ibyo kunywa nibyo kurya, tumaze kwicara haje umusore umwe kutwakira,

Manager-“Bigeze hehe se ko nari nje ngo….”

Wa musore yahise amusubiza,

We-“None se umuntu wambwiraga mugiye kuzana nuyu musore?”

Manager-“Yego nuyu bwana! Ahubwo gira vuba, urwo rukwavu rwahiye se cyangwa….”

We-“Ndumiwe kabisa, nari nzi ko uzanye n’ umutegarugori naho se uyu musore koko? Nako nta kundi ubwo…..”

Yahise agenda adusiga aho, hashize akanya agaruka azanye koko urukwavu, bwari ubwa mbere ngiye kurya kuri ako gatungo gato nakuze numva ko kagira ubwenge bwinshi kubera inkuru nasomaga.

Twatangiye kurya tuganira ndetse bazana n’ agafanta ngo dusomeze, manager akomeza kumbwira akomeje,

Manager-“Naho ubundi, nari nabitekerejeho, buriya njye na Clever turaziranye cyane, usibye ibindi buriya twabanye mu buzima bumwe kandi bwiza, namubereye umukozi ntarabona aka kazi ndiho”

Njyewe-“Eeeh! Wa mugani ndumva muziranye”

Manager-“Sasa rero nagiraga ngo ubinyemerere, umpfashe ubigemo ntabone Teta kuko niwe ahoza mu kanwa, kandi nanjye buriya nari mufitiye umushinga wo kuba twakundana ndetse tukabana aramutse abinyemereye”
Njyewe-“Uuuh? Gute se?”

Manager-“Ariko se wowe hari icyo utumva, nyine nawe uri umugabo, iyo umuntu yakunze aba yakunze, kandi Clever yarakunze nanjye ndakunda, twaraganiye abimbwiye numva yantanga, buriya abagabo duhurije ku kintu kimwe cyo gufuha, naramufuhiye kabisa…nako ibyo ambwira aba agira ngo ndamwumva kandi ntakamenye ko aba ari gucurangira abahetsi”

Njyewe-“None ubwo urashaka ko ngufasha iki?”

Manager-“Ndashaka ko unkundisha Teta! Nawe urabyumva uzaba umutoni kuri Boss wawe ariwe njyewe, ntiwaje ushaka akazi se?”

Njyewe-“Yego niko naje nshaka kandi ubu ku ivuko ntabwo bazi aho ndi, buriya hari ubwo ufata inzira yawe kugira ngo wenda uzagaruke uri undi, erega akanyoni katagurutse ntikamenya iyo bwera, kandi nanone umushonji niwe umenya aho bahumuje, ubwo se nakwanga kugufasha iki?”

Manager-“Ahooo! Sasa rero banza urye iryo tako ubundi unyemerere ibi bikurikira, erega mba nateguye”

Njyewe-“Kurirya gusa, buriya si nirarira mu buzima mvugisha ukuri, ni ubwa mbere ngatamiye”

Manager-“Hhhhh! Uzatamira n’ akandi wowe ha agaciro kuba usangira nanjye”
Muri ako kanya nongeye gutekereza njya kure, uw’ abandi nahaye agaciro uwo mwanya mwiza nari ndimo, byari ukubera Teta bambi, si yari njye nongeye guha agaciro amahirwe nkayo nakeshaga Teta…muri make si byari ku bwanjye, byari ukubera Teta.

Nyuma yo kwijuta no kwica amenyo twihaganyura,

Manager-“Uzabikora se? ngire ikizere cyangwa sha nawe uri mu mahiganwa uri kunyumvira ubusa? Buriya abakobwa ni abana beza, ashobora kugukunda akakurutisha undi kandi ufite byose nkanjye kubera akantu kamwe gusa, ariko niba akwizera akagera aho agufata ibiganza ndakwizeye uzabikora”

Njyewe-“Boss! Ntabwo nakwizeza ibitangaza, buriya ntabwo nkunda kwemera ibyo ntazi neza ko ntazashobora, wanzanye aha ngo ungushe neza ngufashe mu mahitamo yawe, ntabwo nategeka umuntu gukunda undi, umuntu niwe ukunda kandi nkuko wabimbwiye ufite impamvu nyinshi uhamya ko Teta yagukunda ariko se wowe urabyizeye ko ijambo ryanjye ryakorosa byose akanyumvira akagukunda nkuko ubyifuza?”

Manager-“Umvugiye ibintu! Niyo mpamvu erega turi kumwe, mbabarira umpfashe nawe uzabyungukiramo, ntacyo uzabura, njya numva ngo ufite ibibazo byinshi aho uba…ngo umusore mubana baramufunga…ese ubundi ubwo washatse uko uza tukabana ko mpfite ibigufa nkeneye imbwa…..nako mpfite inyama nkeneye abazirya…nako nanone nari nifuje kukubwira ko ntacyo mbuze ahubwo ngukeneye kuko Teta agukunda byaba byoroshye ko nanjye yankunda kuko namumenyera ibyo wamuburiye”

Nongeye kwikanga kuri ayo magambo Manager yari avuze, nibaza inyama n’ ibindi nanga kumusubiza nongera kumubaza nanone ntuje,

Njyewe-“None se Boss! Koko ukunda Teta by’ ukuri?”

Manager-“Cyane! Uriya mukobwa ndamukunda, nibaza impamvu mufitanye ubucuti burenze kandi mpari?”

Njyewe-“Erega urukundo n’ ikintu gikomeye utashobora kumva aho kiva, kuba ufite byose ntabwo bikwemerera gukundwa, ariko wa mugani ibyo uvuga banza ari byo, ndibuka Belinda”

Manager-“Uganiye nabi muvandi, ubwo se ushatse kuvuga iki?”

Njyewe-“Eeeh! Kwari ukuri kwanjye ariko ndabizi ko kuryana, nzagarira na Teta! Ni umubikamabanga yanjye nkaba undi, niwe uzampa igisubizo… ariko ubundi ko wiyizeye, ukaba ushoboye niyihe mpamvu yo kunshaho umbwira kugufasha kandi wigererayo?”

Manager-“Erega ndi mu marushwanwa kandi mpfite umukozi nkawe, nubu erega uri mu kazi bitekerezeho”

Muri ako kanya nkibyibaza numvishe ijwi rimpamagara ndarimenya…ryari ijwi rya Teta ntabwo niriwe mpindukira nibajije uko ahageze tumuvuga, nahise mpfata umwanzuro wo gushyira hanze byose nkanga amazimwe, nkava mu mabanga, nkabandwa habona…nanjye si yari njye…ni ukubera Teta wantegeye ibiganza atanzi………………………..

Ntuzacikwe na Episode ya 26 yiyi nkuru “Nanjye si njye” ku munsi w’ejo

Genesisbizz

Related Articles

Ibitekerezo

  • - Bemeriki

    Songa haranira icyo teta yakugizecyo maze numuteze abo bagabo bamwifuza aho kubeshya ngo baramukunda oya ryose shira ukuri kose hanze songa umenye neza ko urawa gaciro gakomeye mu mutima wa teata ureke manager na clever bitiranya ibintu.

  • - Kabera

    Songa biramugoye kurekura teta ariko nanone icyo yaje ashaka ni amafaranga rero narekere bene agafaranga nibo bakwiye umukobwa nka teta iyo nsomye umusogongero wiyi nkuru nibwo mbibona neza agahinda ka songa umunsi mwiza genesis numwanditsi

  • - Bella

    Songa ihangane abarya ibihiye nababa bafite inkwi ntiwahangana na boss muhe teta wenda bwacyakabiri billy ndumva atangiyr guhinduka courage eddy

Igitekerezo cyawe kirashyirwaho aruko gisusumwe

TANGA IGITEKEREZO