Episode 37: Ngisimbura Teta, Juma na Jolie banteze iminsi

Nahamageye Teta ubwa mbere, ubwa kabiri ndetse n’ ubwa gatatu atitaba, mbura amahoro, intekerezo nzituma kure ntangira kwibaza ko wenda ataba yabonye telephone ye, ubundi nkibaza ko yaba yaheranywe n’ agahinda, nongeye kubaza umutima n’ Imana impamvu bitemeye ko iryo joro mutura ibyo byishimo byo guhindura ubuzima bushya buzira kubara ubukeye.

Narihebye nirambika ku buriri ngerageza guhindura intekerezo, nongeye gutekereza ku ivuko, nibuka za nzozi numva nazinduka ngenda ariko kandi ntabwo byari gushoboka, natangiye gupanga uko nzagenda vuba ndetse ntangira gutekereza kubyo nzabashyira ngo babonere impamvu yamperanye mu byishimo.

Agatotsi karantwaye ndasinzira, nongeye gukanguka mu gitondo mpfata telephone nongera guhamagara nimero ya Teta ariko nanone ntiyacamo, ndabyuka nshyira ibintu ku murongo nditegura nerekeza ku kazi ariko mu by’ ukuri umutima wanjye ntabwo wari uri hamwe ntazi amakuru ye.

Nageze mu biro…. cyari icyumba twari twicayemo turi batatu, njyewe n’ umukobwa witwaga Jolie ndetse nundi mugabo witwaga Juma, twari tugiye gutangira gukora akazi kamwe, nsimbuye Teta.

Bakomeje kujya baganira buhoro buhoro njyewe nkomeza kubura uko nisanga, Manager yazaga kunyereka ibyo ngomba gukora akongera akagenda, hashira nk’ isaha akagaruka, gutyo gutyo.

Si njye wabonye amasaha ya saa sita ageze navuye ku kazi jugujugu mpfata moto ijya kwa Teta, ntibyatinze nagezeyo nkomanga ubugira kenshi ariko habura uza gukingura ari nako nkomeza guhamagara nimero ye ikanga gucamo.

Mu gihe nari ngihagaze ku muryango hari umusore waje ahansanga, nawe arakomanga,

Njyewe-“Erega nta muntu urimo, maze umwanya hano nkomanga ariko wapi, niba bari kunyumva bakanyihorera nibyo ntazi”

We-“Uuuh? Bagiye hehe se? Ubusanzwe nzi ko hano hatajya habura umuntu, Teta we ndabizi ko aba yagiye mu kazi, niyo bakuru be bagira gahunda ariko ntabwo hano hakunda kubura umuntu"

Njyewe-“Teta aba yagiye mu kazi? Iyaba wari uzi….”

Nagarukiye aho sinamubwira ko ibintu byahindutse ubwo twavuganaga Teta ari umushomeri, mpita mubwira,

Njyewe-“None se ujya ukunda kugenda hano?”

We-“Yego njya mpagenda cyane, ahubwo wowe?”

Njyewe-“Nanjye nuko njya mpagenda gusa ntabwo ari cyane”

Yahise ampereza ikiganza maze arambwira,

We-“Nitwa Kalim!”

Njyewe-“Nanjye nitwa Songa”

Kalim-“Nishimiye kukumenya! Hhhhh! Buriya abasore bahuriye mu muryango ujya iwabo w’ inkumi bose baba bafite icyo bajyanye, kandi ndatekereza atari inabi ari ineza”

Njyewe-“Eeeh! Nta nabi indangwaho pe, ahubwo se wari uje kureba nde wowe?”

Kalim-“Urebye, hano nkunda kuhagenda cyane, ntawe ngira mba nje kureba by’ umwihariko, yaba Teta na bakuru be n’ inshuti zanjye muri rusange mbese bampfata nka musaza wabo nanjye nkabafata nka bashiki banjye”

Njyewe-“Koko se?”

Kalim-“Cyane rwose, mbere twari duturanye bataratugurira ngo twimuke, ubu nsigaye naragiye kure yabo ariko nkunze kuza hano tukiganirira nkabasetsa ngataha bishimye”

Njyewe-“Eeeh! Ni byiza! Nanjye uwampa ayo mahirwe”

Kalim-“Hhhhhh! Hanyuma se wowe ninde muziranye hano?”

Njyewe-“Ni Teta! Niwe nari nje kureba”

Kalim-“Ni wowe se bajya bambwira ngo Teta ahora arata, ngo umusore w’ umwana mwiza bakorana?”

Kalim yavuze atyo numva hari akantu kiyongereye ku biro, musubiza mwenyurana ibyishimo,

Njyewe-“Hhhhh! Wasanga ari njyewe…nako ntawamenya kuko burya ntawimenya”

Kalim-“Ni wowe nahise mbyibwira ahubwo ushatse wampfata neza kuko ntawe ugera kuri bashiki banjye atanyuzeho”

Njyewe-“Hhhhh! Koko se?”

Kalim-“Hhhh! Natebyaga humura uzigerereyo kandi Teta ndamugushimiye ni umwana mwiza imbere n’ inyuma…..ariko se aba bantu bagiye hehe ra? Cyangwa nurire igipangu…..”

Njyewe-“Wahamagaye se nawe ukagerageza ko njyewe mpfite nimero imwe ya Teta kandi kuva ejo yanze gucamo?”

Kalim-“Kuva ejo? Ubwo se habaye ikihe kibazo?”

Kalim yahise afata telephone atangira kureba nimero, ashyira ku gutwi, hashize akanya katali gato,

Kalim-“Bite Deni! Ko twaruheze inyuma…..cyangwa sha uyu munsi mwatetse inyama nta bashyitsi mushaka?.....uraza kumpamagara?.....kwa muganga hehe se?.....ok! Sawa!”

Numvishe Kalim avuga kwa muganga ubwoba burantaha, akuye telephone ku gutwi ahita ambwira,

Kalim-“Ngo mbe nihanganye gato bari kwa muganga”

Njyewe-“Kwa muganga nicyo numvishe, nta kabuza ni Teta urembye…”

Kalim-“Oya tuza, ndakeka bagiye kureba mukuru wa mama wabo, niwe umaze igihe mu bitaro”

Njyewe-“Ahwiiii! Birabe ibyo ahubwo wenda, nubwo ntishimiye ko uwo mubyeyi ari mu bitaro ariko nanone igikuba ntigicike”

Kalim-“Ariko banza wa mugani wa Teta afite impamvu yo kuvuga ko uri umusore w’ umwana mwiza, mbonye ukuntu mvuze kwa muganga ukikanga ukabura amahoro, umuntu ufite umuhangayikira bene ako kageni ntiyabura kumuratira abandi”

Njyewe-“Hhhhh! Ibyo kundatira abandi byose urakabije kuko ayo ari amahirwe numva ntari nagira ndetse ari kure yanjye ariko kandi nifuza….gusa byo si ibanga Teta ndamuhangayikira ni nayo mpamvu ndi hano”

Kalim-“Rero nukuba witahiye ukaza kugaruka nimugoroba bavuye kwa muganga, njyewe ubu ndagiye buriya tuzongera ubutaha ndabona tuzajya dukubitana imitwe kenshi”

Njyewe-“Ahubwo se wambwiye aho barwarije nkaza kunyarukirayo nimva ku kazi?”
Kalim yandangiye aho barwarije uwo mubyeyi kuko yari asanzwe ahazi, ndamushimira ndetse kuva ako kanya duhana nimero ndetse ampa niza mukuru wa Teta ngo ninza kugera kwa muganga muhamagare, burya ngo inshuti iva ku nzira koko.

Nageze ku kazi amasaha yarenzeho gato, nasanze Juma na Jolie bahageze hashize akanya gato bacecetse,

Juma-“Musore akazi se urabona bimeze bite?”

Njyewe-“Birumvikana imihini mishya itera amabavu ariko bizagenda biza buhoro buhoro”

Juma-“Ndabona rwose rwose widegembya ugakererwa kugaruka mu kazi ntacyo wikanga, mbese umeze nk’ umwami mu bwatsi bwe”

Njyewe-“Ubu se iminota irenzeho ni myinshi kuburyo wabikabiriza kugeza aho? Nawe wikabya!”

Juma-“Ibyo tubyihorere, hanyuma se Manager ni mukuru wawe cyangwa ni mwene wanyu?”

Njyewe-“Kubera iki umbajije icyo kibazo se?”

Juma-“Mbwira ariko niba muraziranye cyane, impamvu nuko twese twibajije impamvu wahawe umwanya udakoze ikizami?”

Njyewe-“Buriya se hari hakwiye gukorwa ikizami?”

Jolie-“Umva nawe ra, ahubwo tubwire nyine aho muziranye naho ikimenyane cyo twese twarabibonye ko aricyo cyaguhaye uyu mwanya wicayemo”

Bakomeje kumbaza ibyo ntangira kubona neza ko banyishisha, burya aho ugeze nuko bakwakiye bikwereka akari ku mutima, erega natangiye kwisobanura ngo wenda batuza bagatekana,

Njyewe-“Ariko ubusanzwe murabizi ko nari ndi umukozi ukorera ku ishami ry’ i nyamirambo, kuba ari njye wasimbura Teta sinzi impamvu mubibona nk’ ikibazo, naje kuziba icyuho cye nkuko nundi wese ashobora kugirirwa ikizere akicazwa mu mwanya mushya”

Juma-“Eeeeh! Kuba ari wowe nyine waje ni ikibazo, none se kuki Manager yirukanye Teta kandi nta makosa yagiraga?”

Jolie-“Si nkibyo byose se?”

Njyewe-“Ariko rero ibyo ndumva atari njyewe mwabibaza, mubaye mufite ikibazo mwari kukivuga ejo mu nama, ikindi kandi Teta abaye yararengenyijwe yari gutanga ikirego akarenganurwa,

Ntabwo nzi ikibazo mu byukuri gihari, ndabona mutishimiye ko nicarana namwe kandi nta mpamvu nimwe yagakwiye kubibatera”

Juma-“Hmmm! Nzaba ndeba imikorere yawe, abantu baterekwa mu kazi nkawe ubundi nta nubwo baba bazi gukora, uba usanga ari abanebwe”

Jolie-“Ntuzaba ubibona se uzaba umbwira”

Juma-“Ubu se kuva mu gitondo wakoze iki?”

Njyewe-“Ariko se uri umukoresha wanjye? Ko numva mwabuze amahoro mwatuje mugatekana tugakorana”

Juma-“Reka reka njye ntabwo njya ndipfana, ariko ntacyo nuhomba kabiri nibwo uzamenya ko….”

Jolie-“Mureke ariko akomeze yidoge azengurutse intebe ntazi ko na Teta yari umukozi sha”

Njyewe-“Twubahane sibyo, ibyo kuntega iminsi si akazi kanyu, mbaye ntaranacyura umubyizi mutangiye kuntega iminsi?”

Jolie-“Wowe n’ ivuzivuzi ufite byo ntabwo uzahamara kabiri, ndabona nta mahoro uzagira kuko Teta wasimbuye yagiye ari umuziranenge, uzabona ko kwicara mu mugisha wundi ari nko kwicara kw’ itanura ryaka”

Nakomeje kumva ayo magambo mu matwi yanjye, Juma na Jolie baranyeruriye banyereka ko batishimiye kwicarana nanjye ndetse ko bitazampira, naricecekeye ndatuza, amasaha yo gutaha aragera.

Narasohotse nerekeza ku muhanda ngo nshake ikingeza kwa muganga aho bari bambwiye ko Teta na bakuru be bari bari, ntabwo natinze narahageze mpagarara mu cyapa aho bus zihagarara.

Nyuma y’ akanya katari gato bus yaraje ninjiramo ndicara, hashize akanya sinzi uko nahindukiye iruhande rwanjye,

Njyewe-“Yeeeeee? Ntibishoboka! Oya…oya? Ni wowe nzi cyangwa ndarota………………………………………………

Ntucikwe na Episode ya 38 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - Umuhoza

    Ariko ntabwo mperutse amakuru ya mushiki wa wa musore wo muruhengeri di, nabonaga yikundira songa, teta we ndabona aho yataye phone yari yagiye kwisayidira, uriya musore simushira amakenga ngo yamubikiye telephone?

  • - Bella

    Ubwo se ninde Songa abonye, nizere ko ari Leon wa musore biganye

  • - Tonny

    Yooooo Songa aguye mu mutego wabagambanyi, ubwo se ntabwo Manager abizi, reka tubitege amaso

  • - K.Joseph Vinny

    Uri rutica umugambi Koko gusa Songa yihangane akore akazi neza nkuko yabyijeje teta

  • - Nshimiyimana j damascene abs

    Sintakurikiranye neza ibyiyonkuru ark buriya mwazatsobanturiraho gatoya gusa nibyiza

  • - Nick

    Yoooo ndumva Songa atorohewe!!!

Igitekerezo cyawe kirashyirwaho aruko gisusumwe

TANGA IGITEKEREZO