Episode 39: Natangajwe n’umubyeyi w’ umutima mwiza w’aho nimukiye

Ayo magambo yambereye impamba ntandukana na Teta nuzuye ibyishimo, nerekeza aho nari natangiye kuba mu buzima bushya bw’ ikizere nifuzaga, aho nari ntangiye gutaha ntikandagira nkuko natahaga kwa Billy, ibyashimishije Teta ngasesa ibinezaneza mumaso.

Nuriye imodoka mpfata umuhanda nerekeza mu rugo, mu nzira nagendaga ntekereza Teta, nkanyuzamo nkisanga namwenyuye, ntabwo nari nitaye kubari bari impande zanjye ahari wenda abambonaga bagiraga ngo nahanzweho.

Nageze i Gikondo aho naviragamo manuka gato hepho y’ ikibuga cy’ umupira, aho nari natangiye kuba mu buzima bushya buzira kwikanga Billy, ibyo nakeshaga Manager wihimuraga kuri Teta ngo azicuze, nyamara ntamenye ko ndi ku rugamba rwo kuzabimurinda we wabonye atishoboreye agahigama nanjye nkemera gutambuka mu kimbo cye.

Nagezeyo bidatinze, ndakingura mpagarara muri salon, ntangira kwibaza inzu itarangwamo intebe nimwe, ameza n’ ibindi, harimo matela n’ amashuka, ibase n’ ijerekani, n’ utundi tuntu nagiye mpfa kugura nk’ umuntu ugiye gutangira ubuzima numvaga ko ibindi nzagenda mbishaka buhoro buhoro.

Nyuma y’ akanya katari gato ntekereza byinshi, hari uwankomangiye ndakingura nasanze ari mabuja, nyir’ inzu nari ntangiye kubamo, ndasohoka ndamusuhuza,

Njyewe-“Eeeh! Mabuja! Mwiriwe neza?”

We-“Reka reka ntabwo nitwa mabuja, nitwa Mama Belinda”

Njyewe-“Belinda???”

Mama Belinda-“Ko wikanze se?”

Njyewe-“Nari…oya narisubiragamo ngo ntazaryibagirwa”

Muri ako kanya nibajije niba aho nari natangiye kuba yaba ari kwa Belinda nzi, gusa haba iwabo hataba iwabo ntacyo nari kubihinduraho, Mama Belinda yahise akomeza kumbwira,

We-“Eeeeh! Naho ubundi buriya ntabwo nkunda umuntu unyita mabuja, n’abandi babaye hano bose barabizi”

Njyewe-“Ntabwo bizongera, nari nzi ko biba ari itegeko kubapangayi bose aho bava bakagera”

Mama Belinda-“Oya! Ayo mazina buriya ntiyagakwiye rwose, unyita mabuja se ute ko utari umucakara wanjye cyangwa umukozi ngo mbe nguhemba, ko utabera hano ubuntu, niyihe mpamvu koko?”

Njyewe-“Ntabwo bizongera rwose ndasonanukiwe”

Mama Belinda-“Hanyuma se urabona bimeze bite? Nta kibazo wagize cyangwa icyo waba ukeneye?”

Njyewe-“Urebye se ko…erega ni ubwa mbere ngiye gukodesha, ubu byanshanze, ntimugire ngo nabaheje aho mwisanga mu nzu nta kintu kirimo pe! Nta ntebe ngo mbicaze, kandi ntabwo nakwicaza Mama Belinda ku ijerekani”

Mama Belinda-“Yoooh, none se wari usanzwe uba iwanyu none wafashe umwanzuro wo kuza kwibana nk’ abandi basore cyangwa?”

Njyewe-“Ibyanjye ko ari birebire ra? Buriya umunsi umwe igihe muzaba mwabonye umwanya nzabaganiriza mbibwire wa mugani ni byiza kumenya neza uwo ucumbikiye uwo ari we”

Mama Belinda-“Nibyo rwose ndumva ahubwo wowe tuzabana neza, hanyuma se ubu….uwagutiza ziriya ntebe ziri ku rubaraza ko tutazikoresha byibura umuntu uzajya uza ukajya ubona aho umwicaza”

Njyewe-“Eeeh! Oya nta kibazo si ngombwa cyane, nta bashyitsi ngira umushyitsi wenda navuga numwe kandi…..”

Mama Belinda-“None se nta nshuti cyangwa abandi bantu nkabo mukorana cyangwa abo mumuryango wawe isaha ku isaha bagusura?”

Nabuze icyo mvuga muri ako kanya, nongeye kubyibazaho ariko kuko nari ndi imbere ya Mama Belinda nahise nemera icyo nitaga kumugora,

Njyewe-“Mama Beli! Muzintije koko mwaba mukoze, wenda nazo mukajya muzibara mu bukode mu gihe ntari niyubaka”

Mama Belinda-“Oya nta kibazo, erega buriya uko undeba uku ntabwo mpa agaciro ko ubahano ukodesha, mbifata nk’ icumbi, kandi ntiwacumbikira umuntu ngo ureke kumuha amazi yo gukaraba, isabune cyangwa ibindi bishoboka, erega nanjye ejo nejobundi byambaho, ubu se ntagufashije ko isi yizenguruka, ikazanzengurukana ikansiga iwawe ntiwazabyibuka, ahubwo reka nze mbwire wa musore aze aguteruze”

Natangajwe cyane na Mama Belinda, wagiye ahamagara Kamanzi, hitaba umusore ndetse araza,

Mama Belinda-“Kama! Teruza uno musore izi ntebe muzishyire mu nzu iwe”
Kamanz-“Uuuh? Urazigurishije se mabuja …..nako Mama Beli? Ubu se nzajya nduhukira hehe maze kurya ko zatumaga numva uko mbaye”

Mama Belinda-“Ariko narumiwe koko! Ngo nizo zatumaga wumva uko ubaye? Terura, mufashe muterure ureke ya mashyengo yawe”

Nafatanyije nuwo musore duterura intebe tuzijyana iwanjye, wa musore amaze kugenda,

Njyewe-“Murakoze cyane rwose ndabona aha hantu nzahagirira ibihe byiza, banza iyi ari imirabyo inkuba ziratakubita”

Mama Belinda-“Oya ibi se urumva bikomeye? Ni ibintu bisanzwe mu buzima ni ugufashanya, ahubwo se watetse? Cyangwa wariye mu kabari?”

Narebye gusubiza ko ntariye, burya birizana kwemera ko utariye cyangwa kwemera ko bakongera ibyo kurya bigora benshi, nahise nsubiza vuba,

Njyewe-“Eeeeh! Nariye! Nariye rwose ubu ndumva nta kibazo”

Mama Belinda-“Eeeh! Nari ngize ngo kuko utarashyika hamwe neza wabuze umwanya ngo uze dusangire ibyo Kamanzi yatetse”

Njyewe-“Oya nta kibazo murakoze nzabirya ubutaha buriya, ko mpari wese n’ amano se!”

Mama Belinda-“Sawa ramuka! Ugize ikindi ukenera ubwo wambwira cyangwa ukabwira Kamanzi niwe umenya ibintu byose bya hano, ni umukozi wacu tumaranye igihe kirekire”

Njyewe-“Eeee! Ndizera ko nta kibazo ndi buze kugira, murakoze pe! Murakoze ni ukuri”

Mama Belinda yagiye atyo nsubira mu nzu ndicara nitsa umutima, ntangira kwivugisha,

Njyewe-“Ko mbona aha hantu hari umugisha? Gukodesha bakaguha n’ intebe zo kwakira abashyitsi bakakwingingira no kukukugaburira? Aha niho nkwiye kuba ureke kwa Billy,

Ahubwo se ko numva inzara indya kandi nanze kurya? Ariko ni bwa bupfura kun da wa mugani Mama Belinda wenda yari kuvaho anshishamo ijisho….ariko ntacyo reka ngere ku muhanda ndebe icyo nshyira mu nda, ubundi nze ndyame”

Niko byagenze navuye ku muhanda gushaka icyo ndarira ndaryama ndaruhuka, agatotsi kantwaye ntekereza iwacu ku ivuko, mbona Data na Mama bihebye umwe aganyira undi,

Mama-“Ariko se uragira ngo dukore iki ko twabaye iciro ry’ imigani kuri uyu musozi ngo abana bacu ngaho nibo basabiriza mu isoko”
Papa-“Ibyo se bitwaye iki? Nibashaka bazabe insigamugani, none se ko basabiriza kuko bashonje”

Mama-“Ubu se koko amaherezo azaba ayahe? Umukobwa wanjye Mwiza nawe agiye nkuko Songa yagiye ngiye gupfana agahinda”

Papa-“Yewe, ni akumiro koko,niba nawe yagiye agiye gushaka imibereho, Songa natanzeho amasambu n’ amatungo ngo azaduteturure niwe wambabaje nkaba nshaje nsaba, erega no ku kabari ntawe ukinsomya”

Mama-“Ahaa! Wowe uravuga ku kabari, ubu se njyewe ko njya guca inshuro nkirirwa nzenguruka hose ngatahira aho, ngo ntambaraga, ngo sinishoboreye, Mana y’ I Rwanda koko….”

Papa-“Ariko rero n’ ubundi nitwe twagondoje Imana, iyo dukomeza kubura urubyaro ntabwo twari gusaza uku”

Mama-“Oya sigaho! Utangiye no kwifuza kuba twarabuze urubyaro koko? Aka kanya wibagiwe amajoro twaraye dutakamba dusaba Imana ngo nanjye nzashyire I mugongo?”

Nashigukiye hejuru, nkabakaba aho nari ndi nsanga ntahazi, ako kanya nibwo nibutse ko nimutse ndiruhutsa nshana itara mbura amahoro, byarisubiye ndota izindi nzozi.

Iryo joro ryabaye rirerire ntabwo nongeye gutora agatotsi bwarinze bucya bya bindi biba kuwarose nabi, nongeye kwicara ndatekereza nashigutse amasaha y’ akazi abura iminota mike ndashiguka nirukira muri douche mpfata umuhanda.

Nkigera mu biro nasanze Juma yicaye, ndamusuhuza ariko ntiyanyikiriza…ntabwo naripfanye nahise mubwira,

Njyewe-“Bite ko ngusuhuza ukanyihorera ntabwo wanyumvishe?”

Juma-“Eeeh! Uravuze?”

Njyewe-“Ko ngusuhuza ukanyihorera ntabwo wanyumvishe?”

Juma-“Eeeeh! Ntabwo nabyitayeho, nari mpfite ibyo mpugiyemo”

Njyewe-“Intebe yanjye se ninde wayitije ko ntayo mbona hano?”

Juma-“Intebe yawe? Intebe yawe se hano wowe ugira intebe? Cyangwa urayimbaza nshinzwe kugucungira intebe?”

Muri ako kanya Jolie yarinjiye, asuhuza Juma amwenyura aricara batangira kubazanya uko ijoro ryagenze.

Hashize akanya byanshanze ndasohoka ntangira gushaka intebe ahantu hose, mu kuyishaka nakubitanye n’ umusore wakoraga isuku ndamubaza,

Njyewe-“Bite se?”

We-“Ni sawa”

Njyewe-“Nta ntebe wambonera aha hafi ko iyo nicaragaho hariya nje nkayibura”

We-“Uuuh! Ubwo se si ya yindi maze kubika muri stock ra?”

Njyewe-“Ntibishoboka?”

We-“Hari intebe Juma yampaye ngo njye kubika nta nyirayo ifite, ngo iri gutwara umwanya w’ ubusa”

Njyewe-“Ariko ibi niki?”

Muri ako kanya namenye ko bya bintu koko bitoroshye, urugamba Teta yambwiraga kurwana rugoye ndetse atari urwa njyenyine.

Nakomeje kwibaza impamvu yabyo ndayibura, ntangira gutekereza ko ahari koko nicaye hejuru y’ itanura ryaka, kwemera kujya mu mwanya wa Teta nahubutse…. ako kanya nihuta njya mu biro bya Manager…………………………………………….

Ntuzacikwe na Episode ya 40 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - Mujyambere Emmanuel

    Ko numva amahoro waburiye kwa Billy uzayabonera Kwa Mamma Belinda Arko nanone ndaabona kukazi bakumerey 4

  • - Kami

    Songa fata intebe ugende wicare kurega noneho birarushaho kuba bibi.

  • - Fils

    Ariko buriya nta kintu mubonamo? Manager abiri inyuma nta kabuza, gute se adashaka kubabaza Songa wamutwaye Teta? abiziranyeho na juma na jolie

  • - Bemeriki

    Songa warwanye urugamba rwa Billy ndizera neza KO nurwa juma na Jolie uzarutsinda nakabuza nahubundi hari abantu batishimira umugisha undi yagize daaaaa.

Igitekerezo cyawe kirashyirwaho aruko gisusumwe

TANGA IGITEKEREZO