Episode 46: Belinda yasesekaye iwabo, imbabazi z’ umubyeyi zinkumbuza iwacu

Mukuru wa Belinda yahise amwegera atangira guhoza uwo mubyeyi byagaragaraga ko yaheranwe n’ intimba, ngira intimba mbona mama Belinda arira, muri ako kanya ndikoroza, mpfunga umwuka numvaga ko ngiye kuvuga ibyo nzi k’ umwana wabo, uw’amateka nzi, nkaraga ururimi karindwi, ngiye kuvuga hari uwakomanze ahita yinjira atungwa gitumo Mama Belinda n’ umukobwa we barikanga cyane ibintu biba ibindi aho ahantu.

Natunguwe no kubona Belinda nzi wo mu kahise yinjiye iwabo, Mama we na mukuru we bamuhuriraho, n’ amarira menshi,

Mama Belinda-“Mana yanjye wee! Beli! Umwana wanjye! Ni umwana wanjye ni ukuri, uziko ari we?”

Ibyishimo byinshi byari aho byatumye nanjye numva nizihiwe ndahaguruka ndabasanga ndabahobera, nyuma y’ akanya katali gato nibwo twarekuranye Mama we akomeza kumufata njye na mukuru we turicara buri wese avuga ibye atangara kubera Belinda wari usesekaye aho hantu,

Mama Belinda-“Ndagushimiye uwiteka Mana ishobora byose kuba wongeye kumpa umwana wanjye mu maboko yanjye! Ubu se mvuge iki ko ibyishimo binsabye? Beli! Ni wowe?”

Belinda-“Ni njyewe Mama! Mbabarira….”

Mama Belinda yahise amuca mu ijambo,

Mama Belinda-“Banza wicare mwana wanjye, ndabona neza impamvu yo kubura kwawe”

Belinda aho kwicara yarahindukiye arandeba atambuka aza ansanga nanjye ndahaguruka ndamuhobera, turebana mu maso yihanagura amarira mu maso asanga mama we bicarana mu ntebe,

Mama Belinda-“None se? Nako naba mbaza ubusa, Songa! Belinda muziranye hehe?”
Njyewe-“Belinda se? Belinda tuziranye ku ishuri, twize ku kigo kimwe”

Mama Belinda-“Ese? Suko abantu babana bakamenyana bikarangira banahuje isano? Beli! Songa amaze iminsi mike atangiye kuba hano, ariko ibyo tubireke, urisanga mwana wanjye”

Belinda wihanaguraga amarira yasubije mama we n’ ikiniga kinshi mu ijwi ridasohoka neza,

Belinda-“Urakoze Mama”

Mukuru wa Belinda wakomeje guceceka, naramurebaga nkamubonamo igisa n’ uburakari, areba Belinda byagaragaraga ko atwite koko, byamwanze mu nda maze ahita avuga,

We-“Ariko Mama! Garukira aho gukomeza gushimagiza umukobwa wawe wigize ikirara, ubwo se biragushimishije? Biragushimishije ra? Ubwo ntubona icyo akuzaniye?”

Mama Belinda-“Tuza mwana wanjye! Tuza wivugana umujinya, ibyishimo mfite ubu nuko nongeye kubona umwana wanjye, ibyo kuba aje atwite byo nabibonye ariko kandi menye neza ko ariyo mpamvu yamuteye guhunga aho yavukiye, akava mu maboko y’ uwamubyaye kubera gutinya guhamya ko yaguye mu cyaha, umutima iyo uguciriye urubanza urahungabana ugahunga, icyo twashimira Imana kuri ubu nuko twongeye kumubona ahumeka”

Mukuru wa Belinda yakomeje kubwira mama we avuga cyane,

We-“Mama! Ntugashyigikire amafuti, ntugahingire ku rwiri, ubwo se ushaka kugaragaza ko ibyo Belinda yakoze aribyo? Ntabwo wakagombye gushyigikira uburara n’uburaya bwe, ngo nuko ari umwana wawe, ubu se ni irihe shema ufite nk’ umubyeyi we?”

Mama Belinda-“Tuza mwana wanjye…..”

We-“Ntuza ntuza iki?”

Ako kanya mukuru wa Belinda yarahagurutse, afata ishakoshi huti huti arikubita asohoka yihuta, Mama we yagerageje kumukurikira ariko biranga, adusiga aho agenda atyo….nyuma y’ akanya Mama Belinda yaragarutse,

Mama Belinda-“None se koko ubu nagira nte? Igendere nyine nta kundi, uko wabifata kose Belinda ni umwana wanjye, genda warubatse nawe uzamenya neza uko ibyaye ikiboze bigenda,

Beli! Ntabwo ushonje? Nako ngwino ubanze ukarabe wisige umere neza ubundi bazane ibiryo nkugaburire, uje usanga umunsi mukuru hano, Imana yari yamenye ko iri joro ndashyitsa agatima mu nda itegura amafunguro n’ ibyo kunywa ngo nkwakire mwana wanjye”

Mama Belinda yahagurukije umukobwa we baragenda, aho nasigaye nongeye kubona neza impuhwe z’ umubyeyi.

Nongeye gutangazwa nuko Mama Belinda yirengagije amakosa y’ umukobwa we akamwakirana ubwuzu, ntangira kwitekerezaho nibaza niba bishoboka ko nanjye umunsi nzasubira iwacu bazanyakira……numvishe kuri njye bidashoboka nitsa umutima za nzozi zikomeza kungaruka mu ntekerezo, nongeye kwikanga hari ukozeho nshigukira hejuru, yari Kamanzi.

Kamanzi-“Bite wangu? Uri gusinzira utariye? Ni wowe muntu wambere mbonye ushobora gusinzira yumva inkoko ihumura?”

Njyewe-“Oya ntabwo nasinziye ahubwo nari nagiye kure mu bitekerezo nibaza kuri Belinda”

Kamanzi-“Belinda! Wamubonye uwo nakubwiraga? Aje do….inda ni nyarwego, uwanyereka umusore wayimuteye namugurira”

Njyewe-“Uuh! Ndabona byagushimishije”

Kamanzi-“Kunshimisha gusa se ahubwo? Ahari wenda yaciye bugufi ntazongera kwiterera hejuru ansuzugura uko yiboneye, biriya babyita gucubya umuhengeri, uwo musore uwamunyereka weeee!”

Nakomeje kureba ukuntu Kamanzi yari yishimiye ibyabaye kuri Belinda, nongera kwibuka ku ishuri njye nawe, ngarukira hafi ndabyirengagiza muri ako kanya we na Mama we baragaruka.

Ibyo kurya no kunywa byaraje, turasangira ari nako tuganira, amasaha yakomeje kwicuma ndasezera ngo njye kuruhuka mbone uko nzinduka mu gitondo, umubyeyi mwiza aransezera ntera intambwe nke nkingura iwanjye ndakinga negeka ibondo.

Mu gitondo nazindutse kare nditegura nerekeza ku kazi, mu nzira nagiye nibaza ukuntu ntawamenya inzira ya muntu, muri ako kanya ntwabo nari nzi ko nzacumbika kwa Belinda w’ amateka, uwatumye mpiga umuhigo natewe n’ akahise kanjye nawe kubwa Teta ngahindura ingendo.

Bidatinze nageze ku kazi, noneho nasanze ndi uwa mbere, mu gihe ninjiraga mu biro wa musore ukora isuku yahise yinjira,

We-“Boss! Noneho ndabona wazindutse ngo batagukingirana, ariko se mbwira byakemutse bite?”

Njyewe-“Gukemuka se….gukemuka ntabwo byari byakemuka, ahubwo nkubonye nari ngukeneye, ndifuza kugushimira ko wakuye mu makuba, ni ukuri iyo bitaza kuba wowe ngo unkure mu rungabangabo aho nibazaga uwandengera ubu mba ndi ahandi handi”

We-“Ubwo se ni ngombwa kunshimira ra? Kuvugisha ukuri gusa?”

Njyewe-“Ni ngombwa kugushimira kuko buriya ukuri kwawe kwaje gusenya ibinyoma kandi nta wundi nari nteze wankura hariya hantu, warakoze cyane Imana iguhe umugisha”

We-“Tuwusangire Boss!Usibye ko nanawutangiye ejo”

Njyewe-“Uuuuh? Koko se?”

We-“Hhhhh! Ejo nakuririye ikitwa umureti nywa na jus, ndawukubita ndawurya ndawurya numva uko mbaye, burya abakorera inoti barya neza koko!”
Njyewe-“Reka? Mbwira neza se?”

We-“Nyine, ejo nagiye kumva numva Juma arampamagaye, nari nibereye hariya kuri stock, ubwo aba arambwiye ngo nta nzara mfite? Ndamusubiza ngo ndayihorana, ubwo aba arambwiye ngo ninze anyereke,

Naramukurikiye tugera hano mbona amasahani hano mu mwanya wawe, arambwira ngo natake, ntacyo nitayeho nataka umureti, ndawurya ndijuta ndenzaho na jus ntura umubu ubundi njya koza ibyombo mbitarura hariya kuri cantine, ubu ndumva nabyibushye niyongereyeho nk’ ibiro bitatu n’ inusu”

Muri ako kanya nahise menya neza ko ibyo Juma na Jolie bari banteguriye byariwe nuwo musore, ntangira kwibaza uko babifashe ariko kandi nanjye si njye.

sinabasuzuguye ahubwo n’ ubundi usibye ko nahamagawe byihutirwa sinzi niba hari aho nari kubishyira kuko nari mpaze.

Uwo musore yongeye kumbwira,

We-“Ahubwo, naketse ko babikoreye kumpa ruswa ngo sinzongere kubarega, icyampa buri munsi bakajya banzanira nkirira, yewe, ntabwo nazabarega pe!”

Muri ako kanya ntabwo nabwije ukuri uwo musore muto ngo mubwire ko ibicuruzwa byanze gusubizwa mu iduka, nabitse ibanga ndaseka Juma yinjiye ahita asohoka.
Juma yaricaye akuramo agatambaro yihanagura mu maso, nkomeza gutuza hashize akanya,

Njyewe-“Good morning Mr Juma!”

Juma-“Good morning too!”

Njyewe-“Ko winjiye utavuga se ni amahoro?”

Juma-“Amahoro ya hehe se kandi wasinye kutwirukanisha?”

Njyewe-“None se niki kiguteye kuvuga utyo bwana?”

Juma-“Iyo usuzuguye umuntu erega ntacyo uba utamweretse, basi niyo ubitubwira ukadukurira inzira ku murima ko iwanyu bakubujije kurya mu gasozi tukabimenya, ariko wa mugani ntiwari kurya ibiryo byacu cyane ko turi abanyamakosa badakwiye kubabarirwa”

Njyewe-“Juma! Ndabizi neza mwabifashe ukundi, ariko nk’ ibisanzwe mporana ukuri, ntabwo nabasuzuguye ahubwo gahunda nahamagariwe zaranzitiye nongeye kwibuka ko nasize imyaka ku isahani ngeze mu rugo,

Rwose mwarakoze kandi nta mutima mubi undangwaho, ibyahise biba byarahise ntabwo nigeze mbyubakiraho ngo nange kurya ibyo mwanteguriye ahubwo se buriya agatima kavuye kuri inde? Ni wowe cyangwa ni Jolie?”

Juma-“Ibyo uvuga ni ukunyikiza Songa! Ahubwo waketse ko wenda dushaka kukugirira nabi ariko siko bimeze, iyo umuntu aguye mu cyaha urubwa rukamubera umutima ukamucira urubanza agasanga uwo yahemukiye agaca bugufi ngo abone kuvuga ariko nyagucirwa bugufi ntamwumve ntaho wahera,

Buriya wanze kubirya uziko wenda twateguye kukuroga ariko Imana ireba no munda yisi yabihamya, n’ ikimenyimenyi uriya musore mbasanganye niwe wabiriye, gusa niba ushaka kutwikiza tukakuva iruhande nkuko twabigambiriye kubera akababaro twatewe no kugenda kwa Teta, ntaho twaba dutaniye kandi twatekereje kabiri n’ ubundi natwe kukwikiza ntacyo byari kutumarira, ushatse watubabariira.

Muri ako kanya naratuje, mu gihe nari ngiye gusubiza Juma telephone yanjye yarasonnye, mu kuyikura mu mufuka natunguwe no gusanga ari Teta, sinzi uko byaje umutima waransimbutse utera cyane imbaraga zo gukanda yes ngo nitabe zirabura…………………………………….

Ntuzacikwe na Episode ya 47 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - Egide

    Mwaramutseho! Mumbabarire uriya mukecuru ntabe ashizemo umwuka! Ahubwo habe habonetse uburyo butazagira ingaruka bwo kujya kumuvuza hanze kandi azakire ashyingire Teta kwa Songa. Ku mushahara w'uku kwezi umuhungu wanjye azajye gusura ababyeyi.

Igitekerezo cyawe kirashyirwaho aruko gisusumwe

TANGA IGITEKEREZO