Episode 48: Nasezeye Teta agiye i Mahanga, amenera ibanga ntari niteze

Njyewe-“Teta! None se ni wowe ugiye guherekeza umurwayi cyangwa….?”
Ibyo nabivugaga mu by’ ubukuri mpabye, Teta yambwiye ibyo kwitegura urugendo umutima utera insigane, ntangira kumva igisa n’ ikiniga muri njye, ntabwo nifuzaga ko ariwe ugenda akajya kure.

Ntitaye kukimujyanye natangiye kwibaza uko nzasigara nta wundi nkawe, ntangira kumva ko aho agiye atazagaruka, ntangira gushavuzwa nuko aho agiye aziheba akabura uwo atura amarira nanjye nkabura uko mugeraho ngo muhumurize.

Mu gihe nari nkibaza byinshi Teta yongeye kumbwira,

Teta-“Nicyo nari nguhamagariye Songa! Uyu niwo mwanya wo kugusezera, ejo nimugoroba nibwo nzagenda, ibyangombwa byose by’urugendo ndacyeka ejo mbere ya saa sita nzaba nabibonye”

Muri ako kanya nahamije ntashidikanya ko Teta agiye ntakabuza, nongera kwitsa umutima ndamubwira,

Njyewe-“Ubu se koko uragiye Teta?”

Teta-“Ko mbona ubivuga ubabaye se nkudashaka ko ngenda? Songa! Mbwiza ukuri ubabajwe nuko ari njye watoranyijwe guherekeza maama wacu?”

Njyewe-“Teta! Ntakubeshye kumva ko ari wowe ugiye guherekeza umurwayi birantunguye kandi binsha intege, ndikwibaza aho ngiye gusigara nkibaza aho ugiye utazi n’ umuntu numwe uko uzahaba, nkibaza aho nzasigara”

Teta-“Oya Songa! Wintera agahinda…..”

Njyewe-“Ubu ndi kwibaza nuramuka ushavuye uzaguhoza? Ese ubu uzabona uwo uhamagara akwitabe? Ndi kumva usa n’untaye nkibaza niba nzongera kukubona ugarutse nkabona biri kure nk’ukwezi, sinzi niba biraba nkabyakira, ubu nibwo ndi kubona neza uwo uri we mu buzima bwanjye”

Nakomeje guhuza amaso na Teta, mbona ya ndoro y’ imbabazi mutegera ibiganza arambika ibye mu byanjye maze yongera kumbwira,

Teta-“Songa! Ndabibona urababaye, amagambo yawe atumye nongera guha agaciro urugendo ngiyemo n’ikinjyanye, nongeye kumva koko ngiye aho ntazi umuntu numwe nongera kwibaza niba koko nzagaruka amahoro”

Uko Teta yakomezaga kuvuga ikiniga kuri we cyakomeje kwiyongera ndetse n’ amarira azenga mu maso akomeza kumbwira,

Teta-“Ubu nibwo ndi kubona ko mfite umpangayikira koko, ndabona agahinda ufite n’ umuhangayiko umfitiye nkabona neza uwo ndiwe kuri wowe, muri aka kanya ndagusabye unyumve wizere ko aho ngiye nzaba amahoro kandi ntabwo nzakwibagirwa, gusa nawe uzakomeze kunziraka kandi usabire umubyeyi wacu azakire tugaruke amahoro”

Njyewe-“Erega koko byabindi nibyo uragiye?”

Teta-“Nanubu se ntabwo wari wabyemera?”

Hashize akanya gato turebana ubudahumbya, Teta yongera kumbwira atuje mu ijwi ryje ikiniga,

Teta-“Byemere Songa! Ahubwo reka ntahe njye kwitegura nkuko nabikubwiye umwanya mfite ni muke, birashoboka ko tutakongera kubonana”

Njyewe-“Ndabyumva ubu nibwo bwa nyuma, kuguherekeza ngo nzakugeze ku kibuga k’indege ntibizakunda, Teta! Ubu koko uragiye?”

Teta-“Byakire Songa! Nta kundi, ibyo kumperekeza ntabwo byakunda kuko nzaba ndi iruhande rw’ umurwayi, ahubwo ningerayo nzakora ibishoboka byose tuzavugane kuri telephone”

Nikije umutima maze mbwira Teta,

Njyewe-“Urakoze cyane kunsezera Teta, nongeye kubona ko unzirikana kandi mpaye agaciro umwanya wangeneye, mu magambo make nsigaranye mbere y’ uko ugenda uyu niwo mwanya wo kongera kukubwira ko ngukunda kandi nzahora ngukunda kuko ari ibyo ntashobora guhagarika, kubivuga n’ umunwa wanjye ntibihagije umutima nagufunguriye ntacyo waguhishe, wabonye neza ko intebe yawe ihamye mu mutima wakwimitse nk’ umwamikazi”

Teta-“Urakoze Songa! Ntacyo nabona navuga muri aka kanya gusa…..”

Teta yaraturutse ararira, ndamwegera ngo muhoze ariko biranga, biba ngombwa ko tuva aho hantu kuko abantu bari batangiye kutwitaho bibaza icyo abaye.

Twageze ku muhanda Teta ahagarika moto, arayurira nanjye mpagarika indi ndamukurikira, twageze muri quartier y’ iwabo duparika ku muryango w’ igipangu cy’iwabo, moto zimaze kugenda,

Teta-“Ubu se ntiwigoye unkurikira koko Songa?”

Njyewe-“Oya ntabwo nari kukureka ngo ugende uhogoye nanjye ntahe njye kuryama nsinzire, nagombaga kuguherekeza ngasigasira amahirwe ngifite yo kuba nkubona iruhande rwanjye”

Teta-“Basi urakoze ngaho reka njye kwitegura, ninza kubohoka ndaguhamagara tuvugane”

Njyewe-“Urakoze Teta! Reka nikubure ntahe, nta kundi ubwo…..”

Nabuze ikindi ndenzaho, ndahindukira ntera intambwe nk’ eshatu ngeze imbere nibuka ko ntigeze musezera ndagaruka muhereza ikiganza gusa ntiyacyakira hashize akanya nkirambuye akaboko, Teta yanguyemo arampobera ndamucigatira, nyuma y’ akanya katari gato mu ijwi rituje arambwira,

Teta-“Songa! Ndagukunda”

Akimbwira atyo naguye mu kantu, ngira ngo ndumviranye ntangira kumusubirishamo mubaza neza ibyo avuze,

Njyewe-“Teta! Nshobora kuba numviranye ahari? Cyangwa ni za nzozi z’ umukene ndose umbwira ijambo nifuzaga kumva ?”

Teta-“Oya ntabwo urose ibyo mvuze nanabisubiramo, ndagukunda kandi igihe niki ngo mbikubwire, burya bwose byari bindi ku mutima kandi nahaye agaciro amagambo yawe n’ uburyo wakomeje kunyereka ko unyishimira, ntabwo nari kwitesha ayo mahirwe n’ umugisha nagize wo gukundwa, iki nicyo gihe ngo mbikubwire”

Muri ako kanya namenye neza ko ntari mu nzozi koko, ibyishimo biba byinshi muri njye, mbura icyo nkora ngo mwereke ko nishimye bitavugwa, mucigatira mu gituza ikiniga k’ ibyishimo kiranganza.

Nyuma y’ akanya katari gato ngihobeye Teta, hari moto yamanutse iza idusanga, iducana mu maso tukingaho ikiganza, itugezeho irahagarara, mu kureba neza uwari uyijeho yari Denise mukuru wa Teta.

Nahise ndekura Teta nigira neza, numvishe ubwoba muri njye ariko nihagararaho ndiyumanganya ntiyigeze abanza no kwishyura moto ahubwo yahise atangira kuvuga cyane,
Denise-“Nanone kandi nanga umwaku ngahura nawo! Ariko Teta nta soni?”
Teta wari wagize ubwoba bwinshi yatangiye gushaka uko yisobanura ariko aho kuvuga aradidimanga,

Teta-“Ariko se hari icyo bigutwaye? Hari icyo bitwaye kuba nari ndi …. nari ndi gusezera Songa?”

Denise-“Kuva kare wava kwa muganga uvuga ko uje kwitegura nibi wari ujemo Teta? Erega nta n’ isoni mufite mwahoberaniye ku muryango ku muhanda aho abahisi n’ abagenzi bababona mwerekana ko uru rugo ari iwabo w’ indaya”

Teta-“Nyumvira ni ukuri? Deni! Waretse gufata ibintu uko bitari?Nkubwo ibyo by’ indaya ubikuye hehe?”

Denise-“Niko wowe wa musore we, nongere nkwiyame, nkwiyame kuri murumuna wanjye, bibe ubwa mbere n’ ubwa nyuma nkubona uhunahuna kuri Teta nta n’ igikoroto wamutanzeho wamubonye akuze, urumva neza?”

Njyewe-“Ariko nta kibi usanze dukora, kandi kuba ntacyo natanza ngo abe angana atya ntabwo byambuza kuba natera intambwe nza musanga, ndacyeka atari business ngo nari kuba naramushoyemo”

Denise-“Wumvishe agasuzuguro? Ok! Noneho reka ngukurire inzira ku murima, kurugutura amatwi wumve neza, uyu ni murumuna wanjye, umwana nasigiwe na Mama,

Mfite uburenganzira ijana ku ijana bwo kumuyobora aho nshaka no kumubuza ibyo nshaka, umenye ko ntakwihanganira kumubona umushuka umutesha umutwe n’umwanya ngo mbyirengagize, bibe ubwa mbere n’ ubwa nyuma nkubona aha”

Njyewe-“Ahaaa! Teta! Wakoze cyane kubw’ umwanya wawe kandi nkwifurije urugendo rwiza, Imana izabane nawe kandi izabe kumwe n’ umurwayi, tuzongera kwishima tubona mugarutse amahoro, reka ngende nkuko mukuru wawe abintegetse”

Teta-“Songa!....”

Denise-“Nkubone mu rugo, erega nta n’ isoni”

Denise yahindukije Teta nk’ umwana muto amwinjiza mu gipangu, numvaga ko bidashoboka ko umuntu mukuru bamugira cishwa aha nkuko bamwe bajya babivuga gusa umutima ucisha bugufi nari nzi kuri Teta ntabwo wari gutuma ahangana na mukuru we.

Hashize akanya gato nibaza kubyo nari maze kubonera aho hantu nzamuka buhoro buhoro ngana ku muhanda, mfata aka moto nerekeza ku icumbi. nari nshumbitsemo, aho nahinduriye ubuzima bw’ ikerekezo cyari imbere giteye amatsiko, Kuko Teta wari warangize uwo ndiwe yari agiye kunsiga ntibagiwe ko niyamwe na mukuru we kubera we...................................................

Ntuzacikwe na Episode ya 49 yiyi nkuru "Nanjye si njye" Ejo mu gitondo

Genesisbizz

Related Articles

Ibitekerezo

  • - Egide

    Songa we ihangane undi mwana ajye kurwaza nyina wabo. Nzi ko azaza mukomeze gukundana!

  • - Bemeriki

    Nibyiza cyne rwose urukundo ni rwogere peeee Songa nawe Teta courage

  • - mtg

    Nukuri IMANA ibane na teta kdi umurwayi tugiye kumusengera azakira.

Igitekerezo cyawe kirashyirwaho aruko gisusumwe

TANGA IGITEKEREZO