Episode 53: Ibyo kw’ ivuko narabyibagiwe, nguma impande ya Teta

We-“Oya oya ikomereze gahunda zawe, ntabwo wakwikorera umusaraba wacu kuko uraremereye cyane, reka dukomeze umuruho buriya ahari nicyo twavukiye”

Natuje gato nitsa umutima maze ndamubwira,

Njyewe-“Ngomba kubikora, umusaraba tugomba kuwikorerana kandi ngafata aharemereye, Nanjye si njye ni urukundo nkunda Teta”

Nyuma y’ akandi kanya gato mukuru wa Teta yikije umutima mbona abuze icyo kuvuga, turatambuka twicara hirya gato aha twenyine maze ndamubaza,

Njyewe-“Ngaho mbwira witonze uko ibintu bimeze, Ubundi byagenze gute? Ese Denise n’ umurwayi se baracyariho?”

Yongeye kwitsa umutima maze arambwira,

We-“Denise na mama wacu….baracyariho ariko nta kizere gihari cyo gukira”

Njyewe-“Oooh! Imana ishimwe ubwo bagihumeka umwuka w’ abazima, ni igitangaza gikomeye kuba n’ umurwayi umuntu yatekereza ko ari we wari ufite ibyago byo kugwa muri iriya mpanuka akiriho! Burya Imana niyo ifite ijambo rya nyuma ku muntu koko!”

We-“Ahaaa! Abantu bose baratangaye, ahubwo Denise niwe urembye kumurusha”
Njyewe-“Yarakomeretse cyane se?”

We-“Oya ahubwo yaviriyemo imbere, ubu ntarakanguka”

Njyewe-“Oooohlala! Komeza wihangane kandi wizere Imana, none se ubu Teta ari hehe? Yaba yamenye ko muri hano?”

We-“Erega twabimenye mu ijoro ryacyeye, nibwo baduhamagaye tuza igitaraganya, urabyumva nawe guhahamuka no kwiheba ntibyabura gusa uko biri turi kugenda twiyakira”

Njyewe-“None se Teta ari hehe?”

We-“Ari mu cyumba k’ indembe, niwe wasigaranye n’ abarwayi”

Hashize akanya njye na mukuru wa Teta dutuje ducecetse muhereza impapuro yari yataye mu nzira ubwo yagendaga yihuta,

Njyewe-“Akira impapuru wari utaye, none se ubundi ubu wari ugiye hehe?”

We-“Nari ngiye hehe? Harya nari ngiye hehe ra?”

Muri ako kanya namenye neza ko yari yataye umutwe, byari akababaro kumwitegereza mu maso, muri ako kanya nongeye kugira agahinda ariko kandi niyumvamo imbaraga zo gukora uko nshoboye kose ngo mpagarare nemye nkore uko nshoboye mbafate mu mugongo.

Nongeye kubaza mukuru wa Teta,

Njyewe-“None se, ko mwaraye muje aha ijoro mukaba mwanahiriwe, wenda abarwayi bo batunzwe na serumu, mwebwe hari ikintu mwigeze mushyira mu nda?”

We-“Ntacyo twigeze dufata usibye ko njyewe bitanamanuka”

Nakomeje kubabazwa nibyo bihe bigoye, nyuma yo gutekereza akanya katari gato, nafashe umwanzuro wo kujya gushaka icyo kurya, ngakomeza gushaka uko nabona Teta, ubundi nkabona gutaha.

Njyewe-“Reka nze nikoze hariya hirya gato ndaje”

Nasize mukuru wa Teta aho nihuta njya ku muhanda, ari nako ngenda mpamagara nimero ya Kalim, numvaga ko nawe hari icyo yakora ako kanya cyangwa bukeye bwaho, kuko igihe cyo kwitabaza inshuti n’ abavandimwe cyari icyo gusa ntabwo yigeze ayifata.

Nageze ku muhanda ntangira kuzenguruka nshakisha aho nagura umugati na jus, kubw’ amahirwe mbona ahantu hamwe hakinguye ninjiramo, nasanze koko ari iduka ricuruza imyenda mu gihe nari ngiye gusubira inyuma, umukobwa wari urimo yahise ambwira,

We-“Ko ugiye utaguze se kiriya? Ni kalibu ngwino tuguhe myiza”

Njyewe-“Oya nari nyobye, ntabwo nari nzi ko hano mucuruzamo imyenda, ahubwo se mwandangira aho nakura icyo nagemurira umuntu uri hariya hepfo ku bitaro?”
We-“Oooh! Mbese urarwaje?”

Njyewe-“Hari abantu nsanze barwaje hano hepfo ku bitaro, nari nje nkerewe nsanga kuva bwacya nta kintu bakojeje ku munwa”

We-“Yoooh! Reka nze nkwereke aho ugurira aho hirya, hari ahantu nkunda kugurira nanjye”

Njyewe-“Waba ugize neza niba naba ntakugoye”

We-“Oya nta kibazo, guturana n’ ibitaro niko bigenda, abantu benshi bakunze kutwaka ubufasha butandukanye, urebye byabaye nk’ inshingano zacu”

Njyewe-“Eeeh! Ni byiza cyane rwose, buriya ni umugisha muba mukorera, Imana iba ibireba”

Twarasohotse arakinga, dutambika hirya gato tuganira,

We-“Eeeh! Nibagiwe kukwibwira, nitwa Gogo!”

Njyewe-“Nanjye nitwa Songa! Nibera I Gikondo”

Gogo-“Njye mba mu gikari cya hariya usanze nshururiza, ni naho mu rugo”

Njyewe-“Ese? Ni byiza”

Twamenyanye dutyo dukomeza imbere gato twinjira mu muryango w’ ahantu hahumuraga ibyo kurya, ahita ambwira,

Gogo-“Ni hano nakubwiraga, bagira ibiryo byiza bifite isuku bihora bishyushye, bakanagira amata n’ ibindi byo kunywa byiza….”

Muri ako kanya nibwo nibutse ko ntazi umubare w’ amafaranga nari mfite mu mufuka, nongeye kwibaza impamvu nagiye kwemera kujya gushaka icyo ndamiza abarwayi n’ abarwaza ntarebye ko mfite ubushobozi buhagije gusa nabikoze nkutabaye icyo numvaga nuko ngoma kugenda kandi nkagira icyo nzana.

Naribuyeje nkuri kureba ibyo agura nkura ikofi mu mufuka nsanga mfitemo ibihumbi bitatu gusa, ni nayo nari mfite imbere n’ inyuma, cyakora ubwo nari nahembwe ikizere cyari cyagarutse ko buracya njya kuri bank.

Nahise Mbwira Gogo,

Njyewe-“Ibiryo se…..oya reka ngure umugati na jus abe ari byo njyana”
Gogo-“Eeeh! Ubwo se umugati na jus nibyo ushyiriye abantu kuva bwa cya batakoze ku munwa?”

Njyewe-“Buriya se….”

Gogo-“Umuntu wabwiriwe ntabwo wamuha umugati ngo awumire, bashyire ibiryo humura ndakuzanira nicyo kubitwaramo”

Nakomeje kwibaza niba ayo mfite biravamo, mu gihe nari nkibitekereza Gogo yahise ajya no kuvuga ibyo bategura, asohoka yihuta nsigara nibaza niba ayo mfite bivamo, nyuma y’ akanya katari gato yagarutse azanye nicyo gutwaramo ibiryo, atangira kwaruza nabonaga ameze nk’ umuntu koko wamenyereye gufasha abarwaza nkuko yari yabimbwiye, ibyari bikwiye umugisha mwinshi kuri we.

Hashize akanya yahise ambwira,

Gogo-“Dutware amata cyangwa….?”

Nongeye kwikanga kubera facture, mu gihe ngishaka uko namubwira ko amafaranga mfite ari make yahise afata akajerekani k’ amata atambika hirya gato batangira kudupfunyikira.

Mu gihe bari bakiri muri ibyo nakoze kuri Gogo twigira ku ruhande, burya iyo umuntu agiye ku guza abura amagambo meza agusha umuntu neza yabimubwiramo, ngo amutere impuhwe.....ariko byo iyo ukeneye ubufasha uca bugufi, ari byo bidutera benshi kudidimanga.

Namubwiye ntuje,

Njyewe-“Gogo! Wakoze cyane kumfashe nkaba mbonye ingemu….buriya…uko undeba ntabwo nigeze menya kurwaza…nako tuzaganira umunsi umwe ahubwo, biriya byose twafashe buriya ni nk’ angahe?”

Gogo-“Reka nze mbaze”

Yagiye kugenda mufata akaboko,

Njyewe-“Buretse kujya kubaza, nyine….ibyo wampitiyemo rwose nabishimye kandi koko nibyo bikwiye kuramira amagara yabo mbishyiriye ariko ntakubeshye amafaranga mfite ntabwo yabyishyura byose niyo mpamvu nagusabaga ngo untize muyo wacuruje niba uyafite ejo nzayagusubiza kuko naje ntabyiteguye”

Gogo yacecetse gato, hashize akanya arambwira,

Gogo-“Ni njye wakoze ikosa wa mugani sinabanza kukubaza ayo ufite, none se ufite angahe hano?”

Njyewe-“Mfite ibihumbi bitatu gusa pe! Imbere n’ inyuma nushaka umbwire nkuremo ipantaro imifuka nyicurike”

Gogo-“Niba arengaho uzayanyishyura ejo nta kibazo zana ayo ngayo andi ubwo ndayagushyiriraho”

Njyewe-“Ntiwumva se! Urakoze cyane rwose, uri umukobwa mwiza Imana ijye ikomeza igutake igutengeneze iguhe igikundiro n’ ikimero……”

Yarasetse ajya ahasi arahindukira ndamukurikira, abajije batubwira ko byose ari ibihumbi bitandatu, amaze kwishyura ndaterura turasohoka,

Gogo-“Nizere ko utazambeshya ejo uzayanzanira, buriya nanjye ndareba uko mbwira muzehe naza kumbarira ayo nacuruje”

Njyewe-“Humura rwose nyizera, ukuntu upfashije ntabwo narenzaho ngo nguhemukire, iyaba abantu bose bameraga nkawe, bagafasha abandi, abo bazi nabo batazi nta kintu bagendeyeho, bakagirira ikizere abo babonye bwa mbere, iyi si yaba paradizo”

Ibyo nabivugaga duhagaze ku muhanda umanuka ujya ku bitaro, maze uwo mukobwa w’ umutima ahita ambwira,

Gogo-“Reka nkureke ugende, ni ahejo kandi mukomeze gukomera”

Njyewe-“Urakoze cyane Gogo! Ijoro ryiza”

Namanutse nihuta bidatinze mba ngeze ku bitaro, mu gihe nari ndiho nibaza uko mbona mukuru wa Teta, nkamuha ibyo nzanye bakajya kureba uko bakwirwanaho ahubwo nabonye intambuko ya Teta ndayimenya, yazaga agana aho ndi, ageze nko mu ntambwe icumi akata hepfo ako kanya mpita muhamagara,

Njyewe-“Teta! Teta!”

Yahindukiye vuba duhuza amaso mu ntera nto yari ituri hagati nshigatiye ingemu, akomeza guhagarara hashize akanya katari gato atera intambwe aza ansanga.

Indoro y’ imbabazi yandebaga yanteye ikiniga, amaso ye yari yamenyereye amarira akomeza kuyampanga, nkomeza kumwitegereza yasaga nuwaganjwe n’ intimba yanegekaye, nkomeza kurwana n’ ikiniga ngize ngo mvuge byibura izina Teta biranga………………………………………………..

Ntuzacikwe na Episode ya 54 yiyi nkuru “Nanjye si njye” kuwa mbere mu gitondo

Genesisbizz

Related Articles

Ibitekerezo

  • - Mbabazi Mellony

    Yooooo mbega abana bababaye !!! Songa courage uwo niwo mwanya wawe ntuwupfushe ubusa

  • - alice

    mbega ukuntu Gogo abaye umwana mwiza,mbega abana bakurikiranwa ni agahinda,uyu musore rero ni cyo gihe abonye cyo kwerekana urukundo akunda Teta

  • - Egide

    Ariko nta buryo izi nkuru zazakinwamo films bahu?

  • - Egide

    Mwaramutseho! Aho Songa aracyagiye iwabo? Ndabona arimo kugira impamvu zikaze!

  • - mtg

    yooooo ni amarira nagahinda disi.songa ukomeje guhura nibibazo bituma utajya murugo gusa ihangane ube hafi ya Teta niko kwisi bigenda humura murugo uzabasanga kdi bazakubabarira.

Igitekerezo cyawe kirashyirwaho aruko gisusumwe

TANGA IGITEKEREZO