Episode 54: Nirengagije umuryango, nsezeranya Teta gutanga ibyanjye byose

Indoro y’ imbabazi yandebaga yanteye ikiniga, amaso ye yari yamenyereye amarira akomeza kuyampanga, yasaga nuwaganjwe n’ intimba yanegekaye, nkomeza kurwana n’ ikiniga ngize ngo mvuge byibura izina Teta biranga.
Mu gihe narwanaga nuko atemba ajya mu nda Teta yahise atobora maze ambaza atuje ati….

Teta-“Songa! Wamenye ute ko turi hano?”

Njyewe-“Nanjye si njye n’ Imana yabishatse”

Teta-“None se ibyo ni ibiki ufite?”

Njyewe-“Nari mbagemuriye, mukuru wawe ntabwo yakubwiye ko twabonanye se?”
Teta-“Oya Songa! Naherutse agenda ngasigarana n’ abarwayi”

Njyewe-“Twabonanye rero ndetse yambwiye uko ibintu bimeze, nongeye gukomezwa nuko ukomeye, uri intwari Teta! Nibazaga ukuntu umeze nkumva byabaye ibindi ariko ndakubonamo gukomera no kwihangana, washoboye ibishobora bake”

Teta yikije umutima hashize akanya gato maze arambwira,

Teta-“None se twakora iki kindi? Ni ukwakira ibyo tudashobora guhindura nyine….”

Njyewe-“Nta kundi byo….akira ibyo nari mbazaniye ngo murebe ko mwaramira ubuzima, ndabizi ko kuva mu gitondo nta kintu mwigeze mushyira mu nda wowe na mukuru wawe, abarwayi bo bambwiye ko ikibatunze ni serumu”

Teta yongeye kuzenga amarira mu maso, mbona neza ko bimukoze ku mutima, yakira ibyo nari mfite muri ako kanya mukuru we yahise ahahinguka,

We-“Teta! Wasize abarwayi koko wiyizira aha? Nibyo koko Denise yari yarabivuze ko uri indangare”

Teta-“Wimbwira nabi Giho! Nasohotse ari abaganga bansohoye ngo barabona hari ikitari kugenda kuri maama wacu”

We-“Eeeh! Nari ngize ngo….”

Njyewe-“Eeeh! Giho! Usanze nari mvuye kubashakira icyo gushyira mu nda, mwareba aho mwicara mukareba uko mwigenza….ndabizi inzara iryana ahabi”

Gihozo mukuru wa Teta yongeye kwitsa umutima avugana ikiniga ambwira asa n’ uganya,

Gihozo-“Urakoze Imana iguhe umugisha, nubwo wigoye kubwacu ntitubikunda gusa ntabwo twakwanga icyo uduhaye, ndabona intego yo kwishoboza byose mu mbaraga nke zacu yanze ikaba kwibeshya, koko nta wigira muri iyi si buri umuntu akenera undi mu gihe nyacyo atazi”

Ayo magambo yankoze ku mutima, kumva ko nje mu gihe nyacyo byongeye kuntera imbaraga ko byibura mbona ko Gihozo ashyize mu gaciro akabona ko mbikwiye imbere ya Teta.

Nongeye kwitsa umutima maze tuva aho tujya hepfo gato ahantu hasaga naho hihereye, Teta ategura ibyo nari nzanye we na mukuru we batangira kurya, byaragaragaraga ko bari bashonje cyane.

Aho nari nicaye imbere yabo barya, ntabwo nigeze mbakuraho ijisho, agahinda kakomezaga kuganza umutima wanje, nkibaza iherezo ry’ ubuzima bugoye bwasanze abavutse nkanjye, bakirera bakikuza ntahandi begamiye, ibyago bigasimburana bibasanga.

Bamaze kurya barenzaho amata, nyuma yo kwiruhutsa mukuru wa Teta yarambwiye ati….,

Gihozo-“Urakoze Songa! Imana iguhe umugisha, si ukubeshya numvaga ngiye gupfa kubera inzara, bya bindi byo kwihagararaho…oya? Oya pe!”

Teta-“Ahubwo nibwo nibutse ko tutasangiye, ese ibi ndabyita iki?”

Njyewe-“Nta kibazo….nta kibazo rwose urebye buriya ubwo muhaze nanjye ndahaze, ntawe ugabura adahaze, ahubwo se murumva mumeze mute?”

Gihozo-“Sha ni ukuri turahaze, kandi rwose utagushimira yaba ari ingayi”

Njyewe-“Si kubwanjye ni kubwayo, Imana buriya niyo itanga byose, yabinyujijemo ngo manu yanyu ibamanukireho”

Gihozo-“Ni ukuri ibishimirwe”

Nyuma y’ akanya katari gato,

Gihozo-“Rero reka mbe mbasize njye impande y’ umuryango w’ indembe, wasanga ubu badushatse batubuze, nitutongera kubonana ugire urugendo rwiza kandi rwose Imana iguhe umugisha”

Njyewe-“Tuwusangire Giho!”

Gihozo-“Reka ngende”

Yadusize aho aragenda, hashize akanya nitangiye itama nitegereza keza nateye intambwe ndamwegera, muri icyo gicuku nzamura ingofero y’ umupira yari yambaye nyimwambika mu mutwe ngo mufubike maze mubwira ntuje,

Njyewe-“Teta! Humura ndacyahari, ndi Songa umwe waguhaye isezerano ko nzaba ndi kumwe nawe kubera urukundo rwashibutse rushishe rugusatira ngo rugutwikire iri zuba ry’ ibibazo uruhuri,

Nkimenya iby’ impanuka ubwenge n’ umutima byanjye byatangiye gukurura abawe gusa kuko numvaga ntashaka kubyumva nkabyirengagiza, none amaherezo bibaye impamo,

Naje aha ntabiteguye ariko n’ Imana yashatse ko nkugeraho nyuma yo kumara umwanya utari muto ku muryango w’ iwanyu, nayo irabizi ko ngukunda kandi nifuza kukwitura umugisha nakugiriyeho”

Nyuma y’ akanya nitegereza Teta wari wubitse amaso twahuzaga nkagira impuhwe yarayubuye maze arambwira,

Teta-“Songa! Sinzi icyo nakubwira muri aka kanya gusa wumve ko umutima wanjye ubitse amateka atazigera yibagirana mu buzima bwanjye, byatangiye numva bidashoboka ko nagufata uko ngufata ubu ariko nkomeje kubona neza ko ari wowe nari ntegereje,

Songa! Wakoze cyane ntabwo nabona uburyo nakubwiramo ko njye na mukuru wanjye twari dushonje yewe nta n’ ubushobozi ubu na buke dufite kuko ibyo dutunze byose nkuko nabikubwiye twabitanze kubwa maama wacu”

Njyewe-“Yooooh”

Teta-“Songa! ntabwo tuzi uko ejo buzacya, guhangayika no kwiheba byarenze kuba ibyo biba ibindi, uzi kugera aho wemera ko wavukiye kuganya no kubabara ubuzima bwawe bwose? Nta kundi nyine ubwo Imana yabonye ko ari byo bidukwiye”

Njyewe-“Teta! Ihangane kandi humura, kuba muri mu byago ntabwo bivuze ko muri mwenyine, isi niko imeze, ibibazo n’ ingorane ntibibura ariko ubutwari ni ukumenya uko ubyitwaramo kandi bikarangira utsinze,

Ubwo umubyeyi wanyu impanuka itamuhitanye, muku wawe ntabure ubuzima mu mpanuka, reka twizere ko bazakira, ibuka ko nakubwiye ko nzaba mpari kandi urukundo ngukunda ruzatuma nkora icyo ari cyo cyose ngo mpabe hafi, yewe nibiba ngombwa nzatanga byose”

Teta-“Oya Songa! Ntabwo nifuza ko utanga ibyawe mu bibazo byacu, oya…oya nzi byose byawe, nzi icyo waje ukeneye, nzi umuryango wawe wasize, ntabwo waje gukorera twebwe tureke tuzirwanaho, nibitunanira kandi ntawe tuzarenganya kuko kwirengera byose nkuko twabihize nk’umuhigo nibitunanira tuzamenya ko koko babivuze ukuri tuyoboke izindi nzira twanze cyera”

Njyewe-“Oya….oya Teta! Izo nzira…..izo nzira ziranshisha, aho kugira ngo muzaziyoboke kubwo gushaka ubushobozi bwabakura muri aya makuba ahubwo….humura ndahari, nyizera Teta ndagukunda kandi kubikubwira gusa ntibihagije, mpa rugari”

Nyuma y’ akanya gato Teta atuje, yanguyemo arampobera, amarira arayantura ndamucigatira yumva neza ko mpari koko.

Amaze gutuza byabaye ngombwa ko ntaha, amasaha yari akuze twazamutse buhoro angeza ku muhanda, ndamusezera mfata inzira ijya mu rugo.

Nkigerayo nibwo nibutse icyankuye mu rugo, nkigera kwa muganga nibagiwe ko nari mperekeje Belinda, nongera kubona ko umutima n’ ubwenge Teta yabitwaye, ngikingura,

Kamanzi umusore w’ umukozi akaba n’ umuzamu wo kwa Belinda yahise atangara cyane,

Kamanzi-“Eeeh! Boss! Ni wowe? Nabibabwiye! Nabibabwiye ko utari umwana ushobona kubura”

Njyewe-“Uuuuh! Utambwira se ko igikuba cyacitse?”
Kamanzi-“Gucika gusa se ko cyatanyutse ahubwo? Mama Belinda yabuze amahoro, ngo bajyanye n’ umuntu none bamubuze, uziko yahamagaye no kuri polisi?”
Njyewe-“ Ngo…ngo yahamagaye no kuri polisi?”
Kamanzi-“Ahaaa! Ahubwo se….”
Mu gihe yari akivuga ako kanya urugi rwo kuri salon rwarakingutse, yari Mama Belinda,
Mama Belinda-“Songa! Ni wowe? Ahwiiiii! Imana ishimwe”

Njyewe-“Mama Beli! Mwambuze, musanze Kamanzi ari kumbwira ko mwari mwahangayitse cyane gusa nanjye si njye, burya aho twari turi hari harwariye abanjye, twaburanye mbahugiyeho gusa mumbabarire kuba nabatabye mu nama”

Mama Belinda-“Abo bawe uvuga se kandi ni bande?”

Njyewe-“Wahora niki ko ya mpanuka….”

Mama Belinda-“Oya se utambwira ko yahitanye abawe?”

Byabaye ngombwa ko mbwiza ukuri Mama Belinda, mubwira uko byagenze ngo tuburane nk’ umubyeyi arabyumva ariruhutsa ko ndi amahoro, nongeye guha agaciro uko yahangayitse kubera njyewe, ndamushimira njya kuryama, gahunda yo kuzinduka nerekeza iwacu yongera gupfa, nari nafashe umwanzuro wo kugumana na Teta kubw’ urukundo mukunda, ntabwo nari kumusiga mu makuba kandi ari njyewe wenyine uzi ibiri mu ndiba y’ umutima we yankinguriye akanyiyereka wese, uwankuye mu bandi akampa amahirwe nicyo cyari igihe ngo ibikorwa birute amagambo……………………………….

Ntuzacikwe na Episode ya 55 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - K.Joseph Vinny

    Ndababaye kubera ibyabaye kuri teta kd nshimishijwe nuko songa amwitayeho ariko nanone mbabajwe nuko yirengagije abamwibarutse bakiganjwe nintimba bazi ko atakiriho kd abizi ko ari ukuri koko

  • - mtg

    GENERAl rero ibyo uvuga ndabyenera ko urukundo ruvugwa hano rushobora kuba rutabaho. Gusa niyo moamvu ubona umwanditsi ariho yitanga munkuru ze zose kugirango nibura tugire icyo tumenya kuri rwo wenda abazadukomokaho haricyo bizabagezaho. Gusa mumfashe dukomeze gushyigikira umwanditsi.

  • - General

    Inkuru ni nziza ariko Songa uvugwamo koko ni uwo mu nkuru. Ubu tutabeshye, nkubu abujijwe niki kujya mu cyaro? Niba yahembwe yari gusigira Teta udufaranga duke two kwifashisha hanyuma akajya kumara agahinda ababyeyi. Cyakora babivuze ukuri koko amaso akunda ntabona yewe numutima ukunda ntiwumva. Nuko nyine urukundo nkuru rwibera mu nkuru naho ubundi mwisi turimo mbona warusanga hake. N'urufite akenshi yisanga yuzuye ibikomere yatewe no kuruha abatarukwiriye cg ibirura byishakira inyungu zabyo.

Igitekerezo cyawe kirashyirwaho aruko gisusumwe

TANGA IGITEKEREZO