Episode 59: Mpobera nsezera uwambyaye, niyumvishemo ikizere n’ imbaraga

Mwiza-“Oya Songa! Fanta irahenda! Basi tugende ungurire ubushera”

Njyewe-“Ubushera se….oya baguhe Fanta wumve uko ibikonje bimera, nanjye ndaba nshyizeho telephone ijyemo umuriro mpamagare Boss musabe uruhushya wenda ampe iminsi ibiri ya konji, mbonereho no kubwira Teta ibyambayeho”

Mwiza-“Teta! Uwo Teta se ninde? Songa! Wazanye umugore?”

Njyewe-“Oya ntabwo nazanye umugore ahubwo uwo Teta nkubwira ni….urebye ni…..”

Mwiza-“Ko utinya kumuvuga se? Mbwira mwana wa Maama niba warazanye umugore ukaba ushaka kubigira ibanga ndarikubikira kuko n’ ubundi igihe kizagera bijye hanze!”

Njyewe-“Reka babanze baguhe Fanta, nshomeke na telephone ubundi mbone kukubwira uwo Teta nifuza gutura abanjye”

Nyuma yo gushyira telephone ku muriro, nitegereje Mwiza agotomera Fanta, amaze kwiruhutsa,

Njyewe-“Naho ubundi Mwi! Teta nkubwira…..ubu se ndamuhera hehe?”

Mwiza-“Humura urabizi kuva cyera mu bwana bwacu ntacyo wigeze umpisha, tobora umbwire iby’ uwo mukobwa Songa!”

Njyewe-“Mwi! Uwo Teta nkubwira, kuvuga uwo ari we kuri njye birankomerera cyane, mbura aho mpera nkanabura aho ngarukira”

Mwiza-“Uuuh? Gute se?”

Njyewe-“Mwi! Uwo mukobwa nkubwira niwe naboneyeho amahirwe ya mbere mu buzima, nkubwiye uko twamenyanye nuwo yangize we kuri ubu akaba ariwe unsubizamo ikizere cyejo hazaza, akaba ari we untera imbaraga zo gukora cyane mubyago no mumakuba ngo mpagarare ku ruhande rwe n’ urw’ umuryango wanjye”

Mwiza-“Yoooh! Uwo mukobwa se ubwo asa ate we? N’ inzobe? Murareshya? N’ umunyamugi ndabyumva, ndumva ngize amatsiko yo kumubona”

Njyewe-“Igihe ni kigera uzamubona Mwi! Kandi uzamwishimira”

Twakomeje kuganira njye na Mwiza ari nako abantu batandukanye binjiraga aho bakambona bagakubitwa n’ inkuba, twahavuye telephone yuzuye twikorera ibyo twari twahashye tuzamuka twerekeza mu rugo.

Tugeze ku gashyamba kabaga ruguru y’ umugezi twaratuye ngo turuhuke, njye na Mwiza turicara,

Mwiza-“Ahwiiiii! Njyewe numvaga ninaniriwe, ibondo naryegeketse, Ahwiiii!”

Njyewe-“Ntacyo reka turuhuke, tube twumva n’ akuka kava muri iri shyamba”

Nyuma y’ akanya gato dutuje nikije umutima ndahindukira mbwirana ikiniga kinshi Mwiza,

Njyewe-“Mwi! Sinzi niba nzakira igikomere mfite ku mutima”

Mwiza-“Ikihe gikomere se Songa? Cyuko twabuze Data? Ntacyo twabikoraho usibye kubyakira, ikindi kandi ntabwo ari twe twenyine tubaye imfubyi, nk’ abasigaye rero tugomba kumenya ko ahasigaye ari ahacu, tukusa ikivi yasize”

Nongeye kwitsa umutima ubugira kabiri,

Njyewe-“Mwi! Igikomere mfite nuko Data yigendeye atabonye Songa yifuzaga, uwo yabonaga ko azamukura mu makuba, akamukiza nkuko yakundaga kubivuga, ubu nkaba ntagishoboye kuzamwitura imvune zose nibyo yatanze byose ngo nzabe umugabo”

Mwiza-“Humura Songa! Buriya niko Imana yabishatse gusa aho ari azishima abona wita kuri Mama na barumuna banjye”

Njyewe-“Wa mugani wowe ntacyo nabikoraho uretse kwakira ibidashobora guhinduka…..

Mwiza-“Ngaho se mbwira Songa! Ubundi byakugendekeye gute ngo ugende uhere iyo mu mugi, tugutegereze duhebe……”

Njyewe-“Mwi! Ibyanjye n’ igitabo, ibirimo ni ni byinshi gusa icyanditse ku gifubiko kicyo gitabo ni “Nanjye si njye”

Mwiza-“Nawe si wowe?”

Njyewe-“Nanjye si njye Mwi! Nkiva ku ishuri nanze kugaruka aha mu rugo mfata icyemezo cyo kujyana n’ umusore twiganaga witwaga Leon………

Nabariye inkuru yanjye Mwiza, nawe akomeza kuntega amatwi, imvura yakubye niyo yatumye ngarukira aho nari ngeze, dutanguranwa nayo mu rugo kubw’ amahirwe tuyitangayo.

Mama yashimishijwe n’ amahaho, bashiki banjye nari nazirikanye mbaha amandazi na bombo barishima, nihina mu cyumba ngo mpamagare Boss, ngerageze no gushaka uko navugana na Teta.

Narebye nimero ya Manager nkanda yes, hashize akanya katari gato ivaho ahubwo ako kanya hari nimero ntazi yampamagaye, nshyugumbwa kwitaba numva ko nta wundi ari Teta,

Njyewe-“Allooo!”

Numvishe ari ijwi ry’ umugabo nsubiza amerwe mu isaho,

We-“Hello! Ni Bosco muvugana”

Njyewe-“Eeeeh! Komera komera muntu mukuru?”

Bosco-“Eee eh! Ibyo kuba mukuru ndumva ari byo witwaje ngo unyibagize ideni nguhembe yose kandi nari kugukata? Wumvaga ko nshaje ntazabyibuka? Cyangwa wibagiwe ko twagiranye amasezerano yanditse?”

Njyewe-“Oya….ntabwo nigeze nkwibagiza nyakubahwa ahubwo nanjye byanshiyeho”

Bosco-“Urabeshya, niba hari ikintu umuntu atajya yibagirwa ko afite n’ ideni ribamo, reka nakubwize ukuri nakwihoreye mbishaka ngo ndebe ko uri inyangamugayo none nasanze……”

Bosco yakomeje kumbwira byinshi, ambwira uko yanyihoreye abishaka ngo arebe ko ndi inyangamugayo nzibwiriza, nanjye nibuka ko namwihoreye mbishaka nkanga kurekuza igeno nari nkeneye ngo nsimbukane impamba mu rugo, ngire nicyo mfasha Teta usumbirijwe n’ ibibazo.

Hashize umwanya utari muto Bosco ambwira uburyo nakoze amakosa, nanjye nari nacishije make,

Bosco-“Ibyo tubiveho, ahubwo uri hehe ngo unyishyure amafaranga y’ abandi?”

Njyewe-“Kwishyura se….erega buriya nubwo ntabikubwiye mbere nagize n’ ibyago, ubu ndi iwacu ku ivuko, naratashye nsanga Data amaze umunsi umwe yitabye Imana”

Bosco-“Ayayaya! Ihangane niba ibyo uvuga ari byo”

Njyewe-“Urumva nabeshya icyo kinyoma? Mbaye mbeshya naba ndi umushinyaguzi, nagusabaga niba bishoboka ko wanyihanganira ukazankata iryo deni mu kwezi gutaha”

Bosco-“Ibyo ntabwo byashoboka, erega umenye ko amafaranga nshunga atari ayanjye, iby’ ibyago byawe ntabwo nazabibwira abazaza kureba ko nshunga amafaranga neza, ugomba kwishyura”

Njyewe-“Ariko se nawe ko uri umuntu, ibyago ko nawe byakugwirira, ko mu rugo ari njyewe barebaga, urumva narasigaranye angahe ko ahubwo ntazi icyo nzabwira Mama Belinda nyir’ inzu mbamo?”

Bosco-“Ibyo byo ndabyumva urasumbirijwe ariko kandi ugomba kwishyura uko byagenda kose iby’ ideni bikarangira, niba ntako umeze witabaze inshuti”

Nyuma y’ akanya gato,

Njyewe-“Ubu se nditabaza nde ra?...”

Bosco-“Komeza ubitekerezeho ubwo uraza kumbwira”

Yakupye telephone nitsa umutima ndeba nimero za Manager nkanda yes nshyira ku gutwi ako kanya ahita anyitaba vuba,

Manager-“Bite Songa! Amakuru yawe wasanze iwanyu ari amahoro?”

Njyewe-“Ahaaa! Amahoro yo ntayo, nasanganijwe n’ ibyago”

Manager-“Ibyago?”

Nabwiye Manager ibyambayeho, birumvikana nta kindi yari kumbwira uretse kunyihanganisha, nanjye mboneraho kumusaba indi minsi abyumva vuba, anyongera iminsi ibiri.

Nkiri mu cyumba urugi rwarakingutse, Mama arinjira ambonye arikanga maze arambaza,

Mama-“Songa! Bite ko waje kwigunga hano?”

Njyewe-“Oya ntabwo naje kwigunga ahubwo nari ndi guhamagara abantu, dore nibwo nari mbonye uburyo”

Mama-“None se warangije ngo uze ube uganiriza abaje kudufata mu mugongo? Erega ni wowe mugabo urusigayemo”

Njyewe-“Reka nze gato ndaje”

Amaze kugenda narebye nimero ya Kalim ngo muhamagare mubwire ibyanjye ndetse musabe ampe Teta tuvugane ariko inshuro ziba eshatu atitaba ndahaguruka njya kureba abari bicaye hanze.

Iryo joro naraye ntasinziye nibaza icyabaye kugira ngo Kalim yange kwitaba telephone, umunsi wakurikiyeho wo telephone ye ntabwo yacagamo, mu gihe nari nicaye hanze nitangiriye itama byanjemo, mfata gahunda yo guhita nsubira I Kigali.

Nahise nitegura vuba, mu gihe nari ndi gushyira imyenda mu gikapu Mwiza yinjiye mu cyumba nari ndimo,

Mwiza-“Uuuh? Songa! Bite se noneho ko mbona…..?”

Njyewe-“Ndagiye Mwi! Ahubwo se Mama ari hehe ngo aze musezere?”

Mwiza-“Oya se ubwo wowe uhise ugenda igitaraganya kandi wari wavuze ko uzagenda ejo?”

Njyewe-“Bibaye ngombwa ko mpita ngenda Mwi! Nzagaruka vuba ntabwo nzatinda, akira nimero zanjye nazanditse kuri kano gapapuro, ikibazo muzajya mugira muzajye mumpamagara”

Mwiza-“Ahaaa! Nta kundi, reka nze mbwire Mama aze, ubu se ugiye utariye ko nari ntetse byari bigiye gushya?”

Njyewe-“Ahubwo byarure bibe bihora ngire ngende”

Hashize akanya Mama yinjira mu cyumba,

Mama-“Songa! Ngo uragiye?”

Njyewe-“Yego ndagiye Mama, mpise mfata umwanzuro wo kugenda”

Mama-“Ndabyumva ntiwakwicara hano kabiri waramenyereye shuguri, hanyuma se nyuma y’ ibi hakurikiyeho iki?”

Njyewe-“Mama! Nyuma y’ ibi muhumure nzakomeza kubaba hafi nzibe icyuho cya Papa nubwo mu mugi naho ntorohewe n’ ubuzima nasanzeyo ariko nzagerageza nsitaze amano nkomeze ngende,

Akira naya mafaranga, nahoze nifuza kenshi kubaramburira ibiganza ariko bikanga, ntabwo byoroshye Mama, ubuzima buri hanze aha budusaba byinshi gusa nta kundi tugomba kurwana no kububamo”

Mama-“Ndabyumva mwana wanjye iyo ngo n’ i mahanga ubuzima ntabwo buba bworoshye gusa urakoze”

Njyewe-“Urabivuga se urabizi Mama nako ndabizi umubyeyi abonesha amaso ibyo umwana atarabona gusa uzakomeze kumfatira iry’ iburyo, wenda ibyambayeho ntibizongera kumbaho n’ inyatsi Kalim yambwiye yakira”

Mama-“Humura Songa! Icyo ngusabye gusa nukutazaba umuhemu, uzajye urya duke uryame kare, uzagendere kure ikibi cyose kandi ntuzishunge inshuti mbi ngo wishore mu iraha ryagukururira ibyago n’ ibyorezo, iteka uzajye wibuka uwo So yifuzaga ko uba wibuke ku isooko, bashiki na nyoko wakubyaye”

Nikije umutima maze mpobera Mama, numva umutima uraruhutse, niyumvishemo ikizere n’ imbaraga, icyo nari narabuze cyera.

Maze kurya nahamagaye bashiki banjye bato ndabasezera, Mama angeza mu marembo, Mwiza aheka igikapu tumanuka tujya ku muhanda, twahamaze umwanya utari muto dutegereje imodoka, kubw’ amahirwe hari imodoka y’ ivatiri yaje mfa gutega irahagarara ndayegera, yari irimo umusore n’ umukobwa bonyine basa n’ abatongana,

Umukobwa-“Ariko se wagiye unyumvira? Buri gihe uba ushaka kundakaza? Njyewe ntabwo mbishaka, nta wundi muntu nshaka ko tujyana muri iyi modoka”

Umusore-“Kuba utabishaka ariko ntabwo bivuze ko njye ntabishaka, umenye neza ko ikifuzo cyawe atari itegeko, imodoka ni iyanjye kandi nakubwiye ko ntashobora gusiga umugenzi ku nzira, byongeye umusore nkanjye hari impamvu ntashobora kumusiga ku nzira ”

Uwo musore yakomeje gutongana nuwo mukobwa, hashize umwanya utari muto uwo musore wari utwaye arambwira,

We-“Bite se?”

Njyewe-“Ni byiza nuko numva mutongana……”

We-“Ibyo byihorere ahubwo umbwire aho ugiye numve ko twakwigiza imbere”

Njyewe-“Niba mugera I Kigali aho mwansiga hose nta kibazo”

We-“Injira mu modoka tugende”

Nasubiye inyuma Mwiza ampereza igikapu ndamuhobera, ninjira mu modoka arampepera, irahaguruka dufata umuhanda…………………………

Ntuzacikwe na Episode ya 60 yiyi nkuru “Nanjye si njye” kuwa mbere mu gitondo

Genesisbizz

Related Articles

Ibitekerezo

  • - Daniel byiringiro

    muraho neza, rwose Eddy uraturyohereza cyane, iyinkuru turayikunda cyane, nonese uyumunsi ntagace gashya muduha😊😋? (60)

  • - Daniel byiringiro

    muraho neza, rwose Eddy uraturyohereza cyane, iyinkuru turayikunda cyane, nonese uyumunsi ntagace gashya muduha😊😋? (60)

  • - Daniel byiringiro

    muraho neza, rwose Eddy uraturyohereza cyane, iyinkuru turayikunda cyane, nonese uyumunsi ntagace gashya muduha😊😋? (60)

  • - General

    Mbe mwanditsi wacu dukunda wahuye n'ikihe kibazo gituma utaduha inkuru ngo natwe tubone ikiduhuza? Ko turi mu nzu ntacyo dukora ntiwadukorera umuti ukaduha utuzode aka uyu munsi n'ejo? Kdi niba wagize ikibazo nabwo watubwira tukabimenya. Stay safe

  • - Egide

    Mwiriweho! Turaye tutabonye inkuru y'uyu munsi rwose! Muramuke neza

  • - Kwizera

    Mwaramutse neza basomyi duhurira aha nawe mwanditsi,ese aho umwanditsi ntiyabuze aho aca ngo ashyireho inkuru?

Igitekerezo cyawe kirashyirwaho aruko gisusumwe

TANGA IGITEKEREZO