Episode 66: Inyuma y’ inzu… yamfunguriwe igitabo cy’ ubuzima

Navuye mu rugo njya gutega imodoka, mu modoka nari ndimo hari aho yageze irahagarara ngo itware abandi bagenzi maze hinjiramo umusore ndikanga, uwo musore yasaga neza na Leon twiganye, aho nashyitse bwa mbere mfata umwanzuro wo kudasubira mu rugo nkajya gushaka ubuzima….

Narashyugumbwe ngo muvugishe ngira amahirwe abandi baramuhagurukira akomeza ku ntebe y’ inyuma nari nicayeho yicara neza iruhande rwanjye ako kanya mpita mubaza,

Njyewe-“Ariko ntabwo yaba ari wowe, ubu se yaba ari wowe singuce mu jisho?”

Uwo musore yakomeje kundeba aranyihorera, ndetse afata ecouteur atangira kuzitunganya ngo azishyire mu matwi menya neza ko atari we ahubwo abantu basa badafitanye isano dukomeza kugenda tugeze imbere binyanga mu nda nanga kuripfana ndamukomanga akura ecouteur mu matwi,

Njyewe-“Bro! Nakomeje kukwitegereza cyane niba byakubangamiye wihangane gusa hari umusore nzi musa neza neza fotokopi! Nabanje kugira ngo ni we ariko naje gusanga utari we kuko ubaye uri Leon nzi ntabwo twahuza amaso ngo ntunyibuke”

We-“Genda wibeshya, wabimenye wari wambangamiye, uziko wandebaga ukenda kunsezera mu isura?”

Narasebye ndikoroza dukomeza urugendo, bidatinze tugera aho naviragamo, nzamuka ngana ku kazi, nari mu ba mbere abandi bose baje bansanga, akazi karatangira uko nakoraga ni nako nakomezaga kujya kure mu ntekerezo, kubera Teta ariko nkagarukira hafi ngo hato ntata umutwe, mu masaha ya saa yine nibwo nahagurutse ndasohoka ngo nanure umugongo.

Nazengurutse inyuma y’ inzu ntambuka buhoro buhoro ari nako ndeba nimero ya Kalim ngo muhamagare mubwire niba afite umwanya asimbukire ku bitaro andebere, ngeze imbere gato nasanze wa musore….umwe wakoraga isuku wandengeye igihe urubanza rwari rwashinzwe yicaye yubitse umutwe.

Nagize amatsiko nkomeza kugenda musanga, yumvishe intambuko yanjye arikanga cyane,

We-“Ayiweee!

Njyewe-“Eeeh! Sorry ndagukanze, ariko se umuntu w’ umugabo arikanga peee! Akenda kwiruka?”

We-“Boss! Nanjye si njye, nari ndi kure ntabwo nari ndi hafi hano, naho kuba umugabo se…. uretse kwihagararaho no kwihambira buriya nta mugabo utagira ubwoba”

Njyewe-“Oya nta musore nkawe wagakwiye kwikanga ingendo, ubundi se ko nsanze wubitse umutwe, usa nuri gutekereza ibintu byinshi, byakugendekeye bite?”

We-“Ahaaa! Wa muntu we se ko ntacyo wabikoraho, nta nimpamvu yo kukubwira ibyanjye”

Njyewe-“Ndabyumva kumbwira ikibazo ufite ni uburenganzira bwawe gusa nanone burya ujya gukira indwara arayirata”

We-“Indwara yanjye rero ntikira, niyo nayirata kajana ntiyampa agahenge, ntegereje ko izampitana”

Muri uko kumva amagambo yuwo musore nakomeje kumva neza ko afite ibibazo bimukomereye kandi nari nzi neza uko umutima uryana iyo usumbirijwe, ngerageza ibishoboka ngo menye intandaro y’ amaganya ye,

Njyewe-“Ariko rero nubwo ibigutera kwigunga no kubika umutwe mu biganza ntacyo nabikoraho kubivuga byatuma umutima wawe uruhuka, byibura ukumva ko hari uzi agahinda kawe,

Ndeba erega ndi umusore nkawe kandi muri ubu buzima icya mbere mu by’ ingenzi nugufatana urunana, ugahagurutsa uwo usanze yicaye kuko ubuzima ari inzira ndende, bukaba inyanja ngari tutabasha kureba ngo duheze n’amaso yacu”

Hashize akanya katari gato uwo musore yaratoboye arambwira,

We-“Cyakora mu bantu bose nanyuze imbere ni wowe umbwiye amagambo koko akantera ihumure nkumva ko agahinda kanjye atari umutungo mbitse nanga gusohora hanze ngo hato batawunyaga”

Njyewe-“Ntiwumva se! Iyo ni intambwe ya mbere uteye, ushatse wakataza ugahunga nguteze yombi”

We-“Uko undeba uku rero mporana amaganya kubera agahinda nterwa no kwiheba nkicuza impamvu navutse, kenshi iyo ndi njyenyine nibaza niba Imana ibaho, ariko se niba ibaho niyo yampitiyemo kubaho mu buzima mbayemo ubu?”

Njyewe-“None se….ntabwo ndi kumva icyo ushaka kuvuga, uri kwinubira aka kazi uriho cyangwa?”

We-“Oya! Oya rwose ntabwo navaho ninubira aka kazi ndiho kuko ngakora ngakunze kandi nkagakorana umurava, akazi kabi ndabizi ko ari ukwiba no kuroga”

Njyewe-“Hanyuma se….”

We-“Erega, ubundi namenye ubwenge mbana na mama ubyara, mu buzima bwo mu buto butari bubi twabagamo nageragezaga kubona byose nifuzaga urebye mu bana bose twakuranye ninjye wabaga ufite udukinisho, imyenda n’ inkweto byiza”

Njyewe-“Nguteze yombi”

We-“Ngeze muwa gatandatu w’ amashuri abanza, mu gihe cyo kuzuza impapuro z’ ibizamini bya leta nibwo twageze aho buzuriza amazina ya papa mbura icyo nandikaho, mwarimu ambajije impamvu nahasimbutse mubwira ko ntamuzi, niko kumbwira ko niba ntatanze amazina ye ntazakora ikizamini nk’ abandi agahinda karanyica nsohoka mu ishuri ndataha”

Njyewe-“Oooohlala! Ugeze mu rugo byagenze bite?”

We-“Nageze mu rugo ibintu mbiterera hejuru, mbwira mama ko kuba ntazi papa simenye n’ amazina ye bigiye gutuma ntakora ikizamini nk’ abandi, nanga kurya nanga kuryama muri make ndigaragambya,

Mama nta kundi yari kubigenza, byabaye ngombwa ko ambwiza ukuri, yaranyicaje maze arambwira ati:

“Tuza mwana wanjye, tuza igihe niki noneho reka mbikubwire byose, nakubyaye mu buryo butunguranye, nakubyaye mu buryo ntateguye ariko kandi ubu ntabwo mbyicuza,

Ubwo natangiraga akazi bwa mbere, nabonye akazi ko gucururiza umugabo umwe wari ikimenyabose kubera ko yari afite ubutunzi, kubw’ impanuka byabaye ngombwa ko ndyamana nawe…nuko nza gutwara inda”

Mama yakomeje ambwira ati:

Muri uko gutwara inda, naje kubimubwira ko ntwite inda ye, aranyihanangiriza anshyira urutoki ku munwa antegeka kutazagira uwo mbibwira ubwo nari maze kwanga kuyikuramo,

Yambwiye ko biramutse bimenyekanye byaba ibindi, ko aho kugira ngo bimenyekane no kumpitana yampitana, ndaruca ndarumira, ndarira ndihanagura, ndiyakira,
Ntibyatinze yampaye imperekeza mva mu kazi ntangira kwirwanaho uza kuvuka, nkomeza kugira ibanga rya so, kugeza na nubu sinshaka ko hari umenya amazina ya so ugende ubabwire ko yapfuye”

Njyewe-“Eeeh! Ubwo byaje kugenda gute?”

We-“Bya cyana, mu maganya n’ amarira nakomeje kubwira mama ko aho yaba yibeshye ndetse ko nuwapfuye aba afite amazina abura amahitamo, afata ikaramu n’urupapuro yandikaho amazina arampereza yihuta ajya gutura agahinda mu cyumba”

Njyewe-“Yoooh”

We-“Mu gitondo nafashe inzira njya ku ishuri mpereza mwarimu ka gapapuro abona kumpumuriza ko nzakora ikizamini nk’abandi, ibindi ntabwo nigeze mbyitaho nakomeje ubuzima ndetse ikizamini ndagikora yewe ndanagitsinda,

Ngiye gutangira igihembwe cya kabiri mu mwaka wa mbere nibwo mama yambwiye ko agiye gushaka umugabo, ko isaha ku isaha azantumaho ku ishuri nkazaza gutaha ubukwe, ni nako byagenze naje gutaha ubukwe nisubirira ku ishuri,

Igihembwe cyararangiye mu gutaha nibwo nabuze aho nerekeza, nageze aho twabaga nsanga harimo abandi bantu, ngize ngo mbabaze barambwira ngo njye kubaza ubuyobozi nibwo namenye ko inzu twabagamo yagurishijwe mbere y’ubukwe,

Nashakishije hose aho mama aba ndaheba, kuva uwo munsi ntabwo nongeye kumubona kugeza ubu nkubwira ibi”

Njyewe-“Ooohlala!”

We-“Igihembwe cya gatatu ntabwo nigeze nsubira ku ishuri birumvikana, natangiye kugenda nshumbika….nabaye ahantu henshi nk’ umukozi wo mu rugo, nkava hamwe nkajya ahandi….kugeza aho ndi ubu”

Njyewe-“Ihangane muvandi! Ndumva waraciye inzira y’ agatsibanzira yuzuyemo mahwa ariko si ibya wenyine, ubisangiye na benshi, icyo ugomba gukora rero nukwishakamo imbaraga, dore urakuze nta mpamvu yo kujya uhora wigunze, reba ejo hazaza uharanire kuzaba uwo wifuza kuzaba we naho ibyahise biba byarahise”

We-“Iyaba byanshobokeraga, ariko se byashoboka bite ko iteka iyo nibutse aho ndi buze gutaha ngakandagira mu gisongo umutima ukabika, amarira agashoka ajya munda”

Njyewe-“Uuuh? Ushatse kuvuga iki?”

Nyuma y’ akandi kanya gato yakomeje kumbwira,

We-“Urumva, muri iyo myaka yose nazerereye mu ngo nyinshi hari umunsi aho nakoraga bantumye guhaha, mu gihe nazamukaga mu muhanda nabonye imbwa yaje yasamye mu kwitabara mbatura ibuye ngize ngo nyitere irarikweba rikubita mu kirahuri k’imudoka yamanukaga,

Kambayeho amaguru nyabangira ingata ngo nyir’ imodoka atamenya aho nyuze ariko ntabwo byankundiye, abagenzi bantangiriye hafi baramfata baranyicaza, batangira kumpa inshyi,

Haje umugabo nyir’ imodoka maze bamuha umwanya nawe afata inkoni ariko nkomeza gutakamba, tukiri aho haje umugabo wari umuyobozi, mubonye ndamumenya atangira kumvugira,

Nyir’ imodoka icyo yashakaga cyari uko nishyura ikirahuri k’ imodoka ye ariko muyobozi agakomeza kundengera, biza kurangira batumijeho Boss nawe araza, aho kundengera aranyitakana, ababwira ko niba nangije imodoka y’ abandi bitamureba”

Njyewe-“Ooohlala! Ubwo byaje kugenda gute nyuma yo kukwitakana?”

We-“Nyir’ imodoka yahamije ko ngomba kwishyura byanga byanoga, ko nibiba ngombwa aranjyana iwacu bagateza cyamunara imwe mu mitungo y’ ababyeyi, batangira kumbaza murugo ndetse n’ amazina y’ ababyeyi,

Nababwiye ko nta murugo ngira, mbabwira amazina ya mama, mbabwira ko aya papa ntayibuka, mperuka mama ayanyandikira ku rupapuro ubwo nari ngiye gukora ikizamini cya leta ndetse ko kuva navuka ntigeze mubona,

Uwo mugabo nyir’ imodoka amaze kumva ibyo, yahise avuga ko niba ari uko bimeze agomba kunjyana nkajya kuba umucakara we, nkajya mukorera kikaba ikiguzi cy’ ikirahuri cy’ imodoka ye,

Muvandi! Nkigera iwe nabonye icyo bita amagorwa ageretse kuyandi, kugeza na nubu nkubwira ko iyo ntashye ariyo nzira igana iwabo wagahinda gahora gashibuka rimwe na rimwe kakanyegeka aha………………………………………..

Ntuzacikwe na episode ya 67 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - mtg

    Disi yamennye ikirahure kimodoka ya se

Igitekerezo cyawe kirashyirwaho aruko gisusumwe

TANGA IGITEKEREZO