Episode 67: Ifuhe ryapfubijwe n’ ibyishimo Teta yantuye yongera guseka

Muvandi! Nkigera iwe nabonye icyo bita amagorwa ageretse kuyandi, kugeza na nubu nkubwira ko iyo ntashye ariyo nzira igana iwabo w’agahinda gahora gashibuka rimwe na rimwe kakanyegeka aha.

Njyewe-“Oooolala! Mbwira ndakumva, aho hantu byaje kukugendekera gute uhageze?”

Umusore yatuje umutima arwitsa mu gihe yari agiye kumbwira hari uwampamagaye mpindukiye……yari Bosco,

Bosco-“Songa! Hano niho ukorera akazi? Nagushatse nakubuze naho wiyiziye mu kinwanwa?”

Njyewe-“Eeeeh! Wambuze se?”

Bosco-“Umva ra, none se ngusanze aha ari uko nakubonye? Nakomeje gutekereza ko wenda waba wagiye kwiherera ibyoroheje, bivaho nkeka ko byaba ari ibikomeye ndategereza ndarambirwa….niko kuza gukomanga ku bwiherero, numvishe nta muntu urimo ntangira gushakisha”

Njyewe-“Nawe rero ntugakabye! Ubwo koko ntiwari kumpamagara kuri telephone?”
Bosco-“Reka reka, ayo mafaranga yari kuba apfuye iki?”

Njyewe-“Bosco kw’ ifaranga byo aho ntiwihishira! Ariko se buriya nubwo ntawe uyanga ukwiye kugabanya ukamenya ko amafaranga abereyeho kudutunga! Uko mbibona iwawe mushobora kuba murya rimwe ku munsi ngo amafaranga yawe adapfa ubusa”

Bosco-“Eeeh! Oya aho ho urarengereye! Cyakora iwanjye nta gusesagura, buri faranga ryose risohotse ngomba kugira aho mbyandika naho ibiryo byo bose ndabagenera ntagupfa kwarura ibirunga ngo barye nk’abatazakenera kurya ejo”

Njyewe-“Hhhhh! Yewe! Hagowe umugore wawe! Ndumva ashobora kuba ari wowe mugabo bavuze ubarira inyama ku mugozi”

Bosco-“Eeeh! Eeeh! Ushatse kuvuga ko ndi igisambo sha Songa?”

Njyewe-“Reka reka ni wowe ubyivugiye, ubwo se natinyuka kukubahuka? Niyo byaba ari byo naruca nkarumira”

Bosco-“Va muri ibyo uze ujye kuri guichet ya nyabugogo, banguka bahamagaye bavuga ko bakeneye amafaranga”

Bosco yahise agenda mboneraho kubwira wa musore,

Njyewe-“Bro! Reka njye mu kazi nshobora gusanga watashye ariko n’ejo ni umunsi kandi rwose ntabwo nakumviye ubusa, ejo niteguye kongera kugutega amatwi, komera wihangane, wiganzwa,winanirwa , niteguye kugufata akaboko mu bishoboka”

Namusize aho njya gufata sheki nerekeza kuri banki ngo mfate amafaranga nyajyane nyabugogo, mu nzira ngenda umutima wongeye gutera ntekereje Teta, nkomeza kwibaza aho we na wa musore wamuhaye akazi baraye bajyanye ngategereza nkarambirwa….ntangira guhindura isura.

Nongeye gushiguka narenze aho nagombaga kuviramo ndaruca ndarumira ngo hatagira unyumva akanseka, tugeze imbere imodoka ihagaze mvaho mfata moto nsubira inyuma nta kundi narahombye ndabyimenyera.

Natonze umurongo kuri banki nk’ abandi bitinze ngerwaho, bampa amafaranga mfata moto nerekeza nyabugogo, umusore wahakoreraga muhereza amafaranga amaze kuyabara,

Njyewe-“Ndumva nta kindi kibazo gihari akazi keza reka mbe ngiye”

We-“Eeeh! Kugusinyira se noneho uyu munsi ntabwo ari ngombwa? Cyangwa umaze kunyizera ntabwo nakwigarika ngo mvuge ko ntayo wampaye?”

Muri ako kanya nibwo namenye ko nacanganyikiwe, byose byari ukubera Teta, amaze kunsinyira ndasohoka nkigera hanze natekereje kujyakumureba ku bitaro cyangwa gusubira mu kazi, nyuma y’ akanya gato niyumvira nikije umutima nsubira ku kazi.

Amasaha yakomeje kwicuma buri uko imwe ishira natekerezaga Teta, numvaga mpangayitse meze nkuri ku mwanya wa nyuma mu irushanwa, numvaga meze nk’ umwami babwiye ko habonetse undi ugiye kumusimbura ku ntebe, sinjye wabonye amasaha agera feri ya mbere yari ku bitaro.

Nkihagera wa musore nari naraye ntumye kunshakira Teta akamubura yahise ambona, aza yihuta ahita ambwira,

We-“Eeeh! Uragarutse se? Hano umaze kuba ikimenya bose! Twahoze tukuvuga, tuvuga ukuntu uhora aha kubera uriya mukobwa, Hhhhh! Hari abari bazi ko ukora hano!”

Njyewe-“Ibyo nta kibazo kuri njye, ahubwo se arahari noneho?”

We-“Arahari rwose, yari ari mu bitaro bisanzwe, uwo yari arwaje bamukuye mu bitaro by’ indembe bamuzana mu bitaro bisanzwe”

Njyewe-“Eeeh! Noneho ubu nshatse nanjye nagenda ngasura umurwayi?”

We-“Nta kibazo rwose wamusura biremewe ko atakiri hagati y’ Imana na muganga gusa se? Wamusura nubwo mbona atari cyo kiba kikuzanye!”

Njyewe-“Wamfashije se ukanjyana aho bari, ariko umbabarire gukomeza kukugora, erega nanjye si njye”

We-“HHhhhh! Nta kibazo! Ndabizi nannjye ndi umusore, gutereta biravuna!”

Uwo musore yagiye imbere ndamukurikira, dukomeza kugenda bidatinze duhinguka ku cyumba kimwe, arambwira,

We-“Dore ni hano bari, wakomanga ukinjira nta kibazo, njyewe mbaye ngiye!”

Njyewe-“Urakoze muvandi!”

Amaze kugenda nariyumviye….hashize akanya ndakomanga ako kanya Teta ahita akingura, abonye ko ari njyewe aramwenyura,

Teta-“Eeeeh! Songa!”

Amaso yanjye nayarengeje Teta ahubwo nyahanga umusore nari mbonye bwa mbere wari wicaye imbere y’ igitanda mukuru wa mama we yari aryamyeho.
Hashize akanya gato mwitegereza,

Teta-“Songa! Ni kalibu! Umenye ute ko turi hano?”

Njyewe-“Nashakishije aho muri kugeza mpamenye, umurwayi se amerewe ate?”

Teta-“Usanze amaze gusinzira ariko ari koroherwa pe! Mfite ikizere ko tuzataha vuba, ko utasuhuje undi se….”

Nahereje akaboko wa musore wari wicaye aho, ku mutima ntabwo natekerezaga ko ari inshuti y’ umuryango, umugiraneza cyangwa undi, numvaga ko ari aho kubera Teta, icyasha cyo gufuha cyari cyarangije gufubika umutima.

Nanjye nicaye aho twese turaceceka habura uvuga, hashize nk’ iminota itanu ducecetse wa musore ahita ahaguruka,

We-“Teta! Reka ngende! Ukomeze ugerageze kandi wihangane, uzajye ukora ari uko wabonye umwanya nta kibazo”

Teta-“Urakoze cyane! Reka nkurenze ibitaro noneho…”

We-“Oya nta kibazo! Nta kibazo gumana n’ umushyitsi! Njyewe se hano ko ntari umushyitsi mpahora, uwabona umperekeje yagira ngo iki?”

Uwo musore yampereje ikiganza Teta amukingurira umuryango arasohoka abona gukinga, aza ansanga aho nari nicaye.

Nubuye amaso nyahuza naye, abona neza ko isura yanjye yahindutse, nyuma y’ akanya gato ahita ambaza,

Teta-“Songa! Byagenze bite? Wabaye iki? Niki cyakubabaje ko mbibona mu maso yawe?”

Nakomeje guceceka sinagira icyo musubiza, yongera kumbaza,

Teta-“Ko utansubiza Songa? Ni uriya musore usanze aha se? Uriya ni wa musore nakubwiraga twiganye akaba chef wacu wampaye akazi”

Njyewe-“Teta! Rekera aho namwibwiye, uwo ejo mwajyanye amajoro yose”

Teta-“Mana yanjye wee!”

Ako kanya hari umuganga winjiye ahita atubwira,

Muganga-“Eeeh! Teta bite? Mukecuru ameze ate?”

Teta-“Nta kibazo ari kugenda yoroherwa ariko yasinziriye”

Muganga-“Ndamukangura yihangane, ahubwo mube mwiheje gato nk’ iminota makumyabiri mugaruke”

Twarasohotse dukata hahandi inyuma y’ amazu twari twaragize uruganiriro, ako kanya ntangira gutonganya Teta,

Njyewe-“Teta! Koko? Wifate ujyane nuriya musore amasaha y’ ijoro mugende muhere ngutegereze nkubure? Wenda ni chef wawe ibyo kudakora ari we wagutwaye nta kibazo , wenda nanjye kukubura ngataha kuri wowe nta kibazo kuko nakumenyereje ko buri munsi nza buriya wumvaga ko nuyu munsi ndagaruka, ariko se ntiwagiriye impuhwe na mukecuru urwaye waremeye uramusiga koko?”

Teta-“Songa! Tuza, tuza wigira umujinya ndabibona nicyo cyakubabaje ariko humura nyizera ntabwo ndi inzererezi, ibyo nari nagiyemo nimbikubwira ndabizi urishima”

Njyewe-“Nishima nishima iki Teta? Ubwo urumva ikintu cyanshimisha ari ikihe kuva ejo uri kumwe nuriya musore nasanze yicaye hariya….”

Teta-“Ariko se kuba yasura umurwayi ikibazo kiri he?”

Njyewe-“Oya Teta! Ntabwo wagahaye umwanya umuntu nkuriya wifuza kwitwaza ko yaguhaye akazi ngo ushiguke umukurikire, ntabwo nzi niba uri kumva uko umutima wanjye utera, ndakubona mu marembera unsiga nyamara wakabaye umpa andi mahirwe”

Muri ako kanya Teta yarambuye ibiganza abishyira mu gituza cyanjye, amagambo yari yambanye menshi sinzi aho yagiye naracecetse, umutima uratuza nyuma y’ akanya gato arambwira,

Teta-“Songa! Humura nyizera, ndabibona wafushye ariko unteze amatwi ukanyumva naturisha umutima wawe”

Narawikije maze mu gihe ntaravuga Teta akomeza kumbwira,

Teta-“Songa! Ejo nari ndi hano, mu masaha ya nimugoroba ndi kwitegura gutangira akazi uriya musore twiganye yaje hano, akimbona atangira kumbaza amanota nagize ntungurwa nuko amanota y’ ikizamini cya leta yasohotse”

Njyewe-“Uravugisha ukuri?”

Teta-“Hhhhh! Wasanga nawe utabizi kandi utameze nkanjye uboheye mu bitaro”
Njyewe-“Reka reka ntabyo nari nzi”

Teta-“Iseke rero wigaye….ubwo nyine namubwiye ko ntari mbizi mubajije uko nabireba ambwira ko bigoye keretse tujyanye aho bacuruza interineti akandebera, n’ amatsiko menshi tugenda ubwo”

Njyewe-“None se wasanze bimeze bite? Ahubwo se njyewe ubu…..”

Teta yaramwenyuye ndetse ahita ampobera maze arambwira,

Teta-“Songa! Nshimishijwe no kukubwira ko natsinze neza cyane, nabaye uwa gatatu mu kigo cyose, ndabigutuye wowe nifuza kuzishima nsanga iteka”

Njyewe-“Yeeee? Teta! Hhhhhh!”

Ibyishimo byarandenze ngize ngo muterure arwana abyanga ari nako akubita agatwenge, ako kanya wa muzamu aba arahahingutse,

We-“Eeeh! Munyihanganire nari ngize ngo ni umuntu uri gutabaza naho ni mwebwe? Hhhh! Aha hantu ariko mfite impungenge ko ibyatsi byaho bizuma kuko imikino muhakinira imazekuba myinshi, mujye mwimuka mujye n’ ahandi”

Ntacyo twamusubije nawe yahise yibwiriza aragenda, hashize akanya,

Njyewe-“Teta! Felicitation! Nongere nti felicitation! Ndishimye kubwawe ntabwo ushobora kubyumva! Byibura nongeye kubona useka shenge!”

Teta-“Urakoze cyane mukunzi, kuri njye n’ ituro ngutuye kuko urabizi kenshi mbura icyo ngutura, ahubwo wowe bite?”

Njyewe-“Harya ngo mwabirebeye hehe?”

TEta-“Sha, ni ukugenda nyine nawe ukareba kuri interineti biba biriho”

Njyewe-“Ndumva ntakwicara ngo ntuze ntaramenya amanota yanjye, ahubwo reka nze gato….”

Nagiye ku ruhande nkora mu ikofi nkuramo inoti ya bitanu muri ya mafaranga Juma yampaye ndayifumbatiza ndagaruka,

Njyewe-“Teta! Reka njye kureba ko nanjye namenya amanota yanjye”

Teta-“Yego sha, genda kandi….ubu se nzagushimira ngeze ryari ko wakomeje kumba hafi….”

Njyewe-“Ibyo tubireke ahubwo ngeza ruguru gato”

Twarazamutse tugisohoka umuryango w’ ibitaro,

Njyewe-“Reka nere kukugora garukira aha ujye kureba umurwayi muganga ashobora kuba yasohotse,

Nahobeye Teta mufumbatiza ya note, mpindukira vuba ngenda nihuta nongeye kumva ampamagara ndacyebuka ndamwitegereza, numvishe ikiniga muri njye ndakitsa ndongera ndahindukira musiga ubwo mfata inzira n’ umuhanda…………………………………….

Ntuzacikwe na episode ya 68 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - Bemeriki

    Urukundo nirwogere Teta na songa ndabishimiye cyane rwose peeee naho uwo musore ukora isuku kwa songa ndumva yarahuritse peeee

  • - Munana

    Urakoze Eddy. Byibura Teta yongeye kwishima kwiga byonyine nibyo bizakura umuryango we mu mage . Iyi story mi nziza irashishikariza urubyiruko kwishakamo ibisubizo ngo batabare imiryango yabo. Courageous mwanditsi wacu

Igitekerezo cyawe kirashyirwaho aruko gisusumwe

TANGA IGITEKEREZO