Episode 68: Bugorobye…Teta yanguye mu gituza arira asa nabi cyane

Nahobeye Teta mufumbatiza ya note, mpindukira vuba ngenda nihuta nongeye kumva ampamagara ndacyebuka ndamwitegereza, numvishe ikiniga muri njye ndakitsa ndongera ndahindukira musiga ubwo mfata inzira n’ umuhanda.

Feri ya mbere nageze aho bacururiza interineti n’ icapiro nibindi bitandukanye nsanga hicayemo umusore,

Njyewe-“Muvandi! Ndebera, ndebera !”

We-“Uuuh? Bite byawe ko mbona wahagira? Banza utuze umbwire icyo ushaka ngufashe”

Njyewe-“Ndashaka kumenya amanota yanjye, numvishe ko yasohotse ntabwo nari nabimenye”

We-“Ko mbona ufite ubwoba se ntabwo wiyizeye?”

Njyewe-“Uri kurushaho kuntera ubwoba, wowe uko ubizi ibisubizo by’ ibizamini byose ntuzi ko bitera ubwoba? Ndebera ndebera!”

Uwo musore namubwiye byose yansabye, nyuma y’ akanya gato,

We-“Hhhhh! Simbona se wagize ubwoba bw’ubusa?”

Njyewe-“Yeee? Urayabonye? Ubonye amanota yanjye?”

We-“Egera hino gato nkwereke….”

Negereye uwo musore nsoma amazina yanjye ndebye amanota ngurukira mu bicu, nageze hanze yanyomye mu nyuma ambwira ngo mwishyure ndamwishyura uwo mugoroba nicaye muri cartier ku kabaraza ko kuri butiki kwa Claude nigurira kamwe.

Aho nari nicaye nabonye Belinda yinjira muri butiki, kuko atari yambonye mpita muhamagara maze kumuhobera,

Belinda-“Songa! Amakuru? Uracyabaho?”

Njyewe-“Ndaho ndakomeye rwose, wowe se umeze neza? Warakize neza?”

Belinda-“Yego narakize! Ndabona waje kwifata neza”

Njyewe-“Hhhhh! Byari bikwiye!”

Belinda-“Ahaaa! Urabuzwa niki se sha ko wowe wagize amahirwe ukaba ufite akazi, ahubwo nanjye ushatse wangurira agafanta”

Njyewe-“Hariki ikibazo se? Bakakaguhe rwose”

Belinda-“Hhhhhh! Nivugiraga rata reka ngure isukari ntahe, gusa wari ukoze”

Njyewe-“Oya ntabwo waba wankinishaga Beli! Icara uyinywe unambwire amanota wagize”

Muri ako kanya Belinda yahinduye isura yitsa umutima, yicara ku gatebe kari imbere yanjye dutangira kuganira,

Njyewe-“Beli! Naho ubundi nari naje kwihemba”

Belinda-“Reka? Wihemba kubera iki se? Ahubwo se aha niho hantu heza umuntu ufite akazi nkawe azakwihembera?”

Njyewe-“Byihorere Beli! Ahantu heza ni mu mutwe erega!”

Belinda-“Ahaaa! None se uri kwihemba kuko byagenze bite?”

Njyewe-“Hhhhhhh! Beli! Nagombaga kwihemba kuko icyo naharaniye nakigezeho! Ndumva nishimye cyane ko natsinze neza ikizamini nkagira amanota ampesha amahirwe yo kuba ngiye gukomeza kaminuza”

Belinda ntacyo yarengeje kubyo nari maze kumubwira habe no kwishimira ko nishimye, yikije umutima gusa.

Nongeye kumubwira,

Njyewe-“Ko mbona ntacyo bikubwiye se? Ubabajwe nuko natsinze neza?”
Belinda-“Oya Songa! Ahubwo….”

Njyewe-“Ahubwo iki?”

Belinda-“Songa! Ubu ni njye wabaye iciro ry’ imigani mubo twiganye bose”

Njyewe-“Yeee? Wabaye iciro ry’ umugani kubera iki?”

Nyuma y’ akanya gato Belinda yabuze aho ahera yarambwiye….

Belinda-“Songa! Uziko naje muri batatu banyuma mu kigo cyose?”

Njyewe-“Reka reka ntibishoboka, ubwo warebye neza? Oya warebye nabi mu gitondo usubire kureba neza”

Belinda-“Sha winkina ku mubyimba ubwo se urumva nayoberwa amazina yanjye?”

Njyewe-“Umbabarire ntabwo ari ukugushinyagurira gusa ntabwo nabura kukubwira ko mbabajwe n’ umusaruro wawe”

Belinda-“Byihorere sha wowe ntabwo ubizi, noneho mama uri hariya we ntuzi aho angeze, ndatambuka akantuka mbese ubu nanjye niyanze”

Njyewe-“Nta kundi, none se ko icyo umuntu abibye aricyo asarura kandi nyuma y’ igihe akaba atari igihe ubwo nyine ihangane uzasubire gusibira”

Belinda-“Mvugiraho sha! Hmm!”

Njyewe-“Ahubwo Beli! Tuve muri ibyo, uzi ko ejo bundi nahuye na Billy?”

Belinda-“Billy???”

Njyewe-“Twarahuye rwose gusa yabaye undi, icyo nabonye cyo n; ifaranga! Hhhh! Icyo washakaga nicyo gusa!”

Belinda-“Wimbwira Billy! Songa! Urambwira ukambwira na Billy? Sinshaka kumwumva mu matwi yanjye!”

Belinda yarahagurutse arikubita yinjira muri butiki, hashize akanya asohoka yihuta ndamuhamagara ariko yanga kunyitaba agenda atyo.

Nasigaye ntekereza byinshi kucyo navutse nsanga kitwa urukundo rwa babiri, iki gihuza imiryango inshuti n’ abavandimwe bagahurura ndetse Imana ikaruha umugisha ariko kandi kigatuma aho umwe anyuze undi ahanyuza umuriro.

Namazemo icyo kunywa nari nsigajemo ndishyura ndataha, ku buriri nibwo natangiye gutekereza uko bizagenda nindamuka ngiye gutangira kaminuza.

Nongeye gutekereza ku muryango wanjye ndetse na Teta numvaga ko ngomba gukora ngo mbafashe mu mahirwe nagize, natangiye kwibaza navuye ku kazi nkerekeza iy’ ishuri, nanone kandi nibuka ko Manager yambwiye ko ngomba gukomeza amashuri kuko mu gihe kuri imbere ibintu bishobora kuzahinduka.

Agatotsi karantwaye nongeye gukanguka mu gitondo numva telephone isona, mu kureba yari nimero ntazi nitaba vuba,

Njyewe-“Hello!”

We-“Songa! Bite waramutse neza?”

Nahise numva ijwi ndarimenya, yari Teta,

Njyewe-“Ni byiza maa! Wowe waramutse ute se?”

We-“Nanjye meze neza, none se wabashije kumenya amanota yawe?”

Nabanje guseka nkomeza kwicisha amatsiko Teta gusa n’ ubundi amaherezo yicyo namukingaga cyari gutaha kuri we, namubwiye ko natsinze ku manota meza arishima cyane mu gihe nari ngifite byinshi byo kumumbwira, ambwira ko agiye gusubiza telephone uwayimutije, nta kundi aho niho nongeye kubonera ko agatirano koko katamara imbeho.

Iminsi yakomeje kwicuma ndetse Imbaraga z’ Imana zirigaragaza mukuru wa mama Teta bamusezerera mu bitaro biba igitangaza gusa ntabwo yatashye akize neza yagombaga gukomeza kwivuza kuri twe twari tuzi byose ikizere cyo kuzakira neza cyari gihari.

Umunsi umwe ari kuwa gatanu nicaye ndi mu biro, amasaha yo gutaha yarageze njye nguma mu biro mu mu gihe nari nicaye numvishe urugi rukingutse mpindukiye nsanga ni Manager,

Manager-“Songa! Bite ko ukarayemo?”

Njyewe-“Ndi gukora ntikoresheje kuko mu minsi iraza erega nzasezera”

Manager-“Uravugisha ukuri?”

Njyewe-“Yego rwose ndavugisha ukuri”

Manager-“Ugiye gusezera akazi kubushake bwawe se cyangwa wahuye n’ imbogamizi ukomeza kuzihererana bya bindi byawe?”

Njyewe-“Hhhhh! Oya, ahubwo nuko natinze kuba nabikubwira ko natsinze neza ikizamini gisoza ayisumbuye ku manota meza bityo amahirwe yo kuba nakomeza kaminuza ari yose, urumva rero akazi ngomba kuba nkavuyeho nkajya gushaka ubumenyi”

Manager-“Eeeh! Ni byiza kuba waratsinze neza, ariko se kuva mu kazi wabitekerejeho neza?”

Njyewe-“None sehari andi mahitamo mfite? Ndumva icya mbere ari ukongera ubumenyi nkuko wabinsabye”

Manager-“Ibyo ndabyumva ariko rero ubonye uko ubikora byose byarushaho kuba byiza ugakomeza gufasha umuryango wawe dore ko wambwiye ko ari wowe bahanze amaso”

Njyewe-“Nabikora byose nte se ubu ko ntazi aho nzemererwa kwiga?”

Manager-“Aho baguha hose ariko….ukomeze ubitekerezeho Songa! Kuri ubu erega ntabwo ibintu byoroshye”

Manager yansize mu rungabangabo nsigara mbitekerezaho, ya shusho ya mama ansezera ingaruka mu ntekerezo, nibuka ya magambo ambwira ati,

“Iteka uzajye wibuka uwo So yifuzaga ko uba wibuke ku isooko, bashiki na nyoko wakubyaye ari wowe duhanze amaso mu mibereho y’ejo, ntuzarekure amahirwe wabonye uzayanambeho udufumbatize nawe utere imbere nzishime rubanda rugushungera warabaye undi wundi bavuga ngo dore mwene kanaka!”

Nagarukiye aho gutekereza, ndahaguruka ndasohoka ndakinga ndataha gusa nakomeje kuzirikana ibyo manager yari yambwiye.

Bya bihe nari ntegereje byarageze, aho nari niteze kubona Teta aseka, uwo munsi hari ku cyumweru, izuba ryararashe mfata telephone ndeba nimero ya Gihozo mukuru wa Teta ndamuhamagara ngiye kumva numva ijwi rya Teta,

Teta-“Hello”

Njyewe-“Oooh! Teta! Yambiiiii!”

Teta-“Yambiiii!”

Njyewe-“Gihozo buriya nicyo mukundira, abagikubita amaso inka akamenya icyo ihatse”

Teta-“Hhhhhh! Umva sha, nawe arabizi, azi ko intambwe yawe ireba aha iba izanywe nanjye, umeze ute se?”

Njyewe-“Urebye meze neza ndabura wowe”

Teta-“Ngaho se bivuge neza, ushaka kuntumira se?”

Njyewe-“Oooh! Teta! Urabizi neza ko ubutumire bwanjye buhora munsi y’ urugi rw’ icyumba cyawe, nakwishima cyane uyu munsi uteye intambwe ukangenderera”

Teta-“Ok! Nta kibazo Songa! Niba ubishaka ndaza”

Njyewe-“Woow! Ndagutegereje, ngutegurire iki cyo kunywa cyangwa kurya?”

Teta-“Hhhhh! Oya ntabwo aricyo kiraba kinzanye Songa! Ntukigore Teta wawe ntabwo agoranye inyota inyishe nayariba nayavoma”

Yoooh! Amagambo ya Teta yankoze ku mutima, ansezeranya kungeraho mu masaha y’ ikigoroba, maze gukupa gushyashyana binzamo ntangira gushyira ibintu byose ku murongo.

Maze kwigira neza naricaye ndategereza, saa saba ziragera, saa munani, saa cyenda mfata telephone mpamagara Gihozo, anyitaba vuba,

Gihozo-“Hello! Songa! Umwana wacu umurekure kare umenye ko….”

Njyewe-“Ahubwo se….nari nguhamagaye nkubaza niba yahinduye gahunda kuko na nubu ntiyari yangeraho”

Gihozo, reka wibeshya, uravugisha ukuri?”

Njyewe-“Ntabwo mbeshya, nategereje nahebye”

Gihozo-“None se ko nzi ko yari afite ticket atigeze aza n’ amaguru yatinze hehe?”

Njyewe-“Nanjye ubu byanshanze! Niyo mpamvu nari nguhamagaye”

Gihozo-“Komeza utegereze wasanga hari aho yabanje kunyura, ahubwo itegure surprise! Hhhhh!”

Koko nishyizemo ako gatima nkomeza gutegereza, saa kumi ziragera, saa kumi nimwe ntangira kwiheba, saa moya numvishe umuntu ukomanze, ndahaguruka njya ku muryango, mu gukingura Teta yanguye mu gituza arira ndetse anasa nabi cyane………………………………………….

Ntuzacikwe na episode ya 69 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - Bernard

    Urajya kwiga se shahu usize he nyoko na bashiki bawe ugibagiwe teta? Kora uzaba wiga

  • - Fafa

    Songa uzaba wiga mwana banza ufashe umuryango wibuke ko na mwiza yarivuyemo

  • - Gogo

    Teta se yabaye iki disi? Amatsiko ni yose

Igitekerezo cyawe kirashyirwaho aruko gisusumwe

TANGA IGITEKEREZO