Episode 7: Belinda amaze kunyereka ko ntaho anzi, akebo kemeye kujya iwa Mugarura

Nahuje amaso na Belinda w’ amateka nsa n’ utaye ubwenge, amaso yanjye agarukamo bya bihe…wa munsi urubwa rumbera ngafata umwanzuro wo kuzinukwa urukundo ngataha nkubita agatoki ku kandi.

Akimbona nawe yarikanze cyane ntabwo natinye kumureba mu maso ntahumbya, nahamije ntashidikanya ko ari we Belinda Bily yambwiye.
Yaratambutse anshaho ahobera Bily,

Bily-“Oooh! Cherie! Yambiiii!”
Belinda-“Yambiiiiii! Nari nzi ko ntahagusanga, nanze kuguhamagara nashakaga kugutungura”
Bily-“Wooow! Kalibu sha, ndishimye kubwawe”
Belinda na Bily bahise bicara, amaso yanjye nkomeza kuyahanga Belinda, muri ako kanya baba batangiye gukina, bakirigitana mu maso yanjye.

Nakomeje kumva umujinya muri njyewe, nabonaga koko ibyo Belinda yakoraga ari ukugira ngo andishe umubu ambabaze, kugera ubwo yanga no kunsuhuza.

Hashize akanya katari gato nagiye kumva numva,
Bily-“Eeeh! Uziko nibagiwe wana? Beli! Ko utasuhuje undi? Iyo umusuhuza hari icyo byari kugutwara?”
Belinda-“Reka reka ni wowe nza ndeba Cheri!, uyu se namusuhuzamo iki?

Ahubwo se watangiye kubana nawe ryari…nako wamutoraguye hehe?”
Muri ako kanya narashigutse amaso yamurebaga nawe andeba atantinya arakanuka, umujinya uba mwinshi ariko ndifunga nkomeza roho,
Bily-“Uyu musore ntabwo namutoraguye ahubwo nyine niwe dusigaye twibanira, yitwa Songa ngaho musuhuze”

Belinda-“Reka reka ntawe nasuhuza, ahubwo se ubwo wamuzanye aha ubona atabangama koko? Njyewe ndumva ndi no kumubona umutwe ukandya nkazengera, nabe agiye Cheri!”

Bily-“Oya Cherie! Uyu musore nta kibazo ke, tugihura twarahuje ni umusore nkanjye nta ribi rye, twatangiye kwibanira nanze ko ajya gukodesha kandi nibana, buriya numvaga nkeneye umuntu tubana”

Belinda-“Hmmm! Ariko Cheri! Umuntu w’ umusore yicara imbere y’ abantu akumva ibyo bavuga bitamureba? Iyaba azi ubwenge aba agiye kwikatisha akaza kugaruka natashye”

Muri ako kanya ntaho nari guhera mvuga, umujinya uvanze n’ agahinda wakomeje kunganza ndahaguruka ndagenda.

Nageze hanze mbura aho nyura gusa nsezeka umujinya mu muryango w’ igipangu jya kwikatisha.

Mu kwikatisha nakandagiraganaga ikirenge umujinya, nashigutse ndi no kugwira abantu kandi ngenda ntazi aho njya.

Nk’ ibisanzwe aho naruhiye niho nagarukiye, bwari bwije hari mu kabwibwi, nkingura umuryango nkomeza ngana aho nabanaga na Bily, ndakomanga nkuko byabaga ari umuco ariko nkomeza gutegereza kugeza bibaye inshuro eshatu za zindi za gasopo umuntu atakwiye kurenza.

Mu gihe nari ngiye kurenga ku mategeko yo gukomanga nahise mbona nguwo Bily arakinguye, banza ibyo ari byo byose yari avuye guherekeza,

Bily-“Yayaya Bro! Pole sana! Natinze kabisa, wikatishije se urarambirwa cyangwa nibwo ukiza?”

Njyewe-“Oya nta kibazo hashize akanya gato nje, ariko n’ ubundi ntacyo nakora biba byarangiye kandi kuri njye ntabwo bigoye kwakira akantu nkaka gato cyane ko aha atari iwajye”

Bily-“Umva kandi icyo ntajya nkunda, nanga umuntu ugira ibintu ibya hatali, nkubwo se ushatse kumbwira iki?”

Njyewe-“Umbabarire nari nshatse kukubwira ko wigenga, igihe cyose ushakiye ugomba gutaha iwawe nta kibazo, nta kibazo rwose kuri njye najya ngutegereza”

Bily-“Ntubigire ibya danger wangu, hano aba ari ukubana nk’ abadjama, niyo nakuraza hanze ntacyo ahubwo reka nkingure nari nibagiwe ko umaze umwanya untegereje, buriya nibagirwa kubi, hari nubwo nibagirwa amezi abapangayi bandimo”

Bily yarakinguye turinjira, umusore wari uyoboye igipangu afite imiryango akodesha, kuri iyo saha ntabwo nari nakamwegera ngo mwinjirire mu buzima mubaze byinshi, numvaga bihagije kuba yarampaye amahirwe yuko twibanira.

Twinjiye mu nzu Bily yidunda mu ntebe, ariruhutsa maze ahita ambwira,
Bily-“Ahwiiiiiii! Ewana pole kabisa, natinze ariko nta ribi nawe uri umuntu w’ umusore ibi bibaho, ahubwo se ko uriya mukobwa yakwanze hari ikosa wakoze ntarebye neza?”

Muri ako kanya nikije umutima, wa mujinya wongera kuzamuka, nakuyemo umupira nari nambaye ndawujugunya mbwirana uburakari bwinshi Bily,
Njyewe-“Bily! Ni wowe kabitera, ni wowe watumye Belinda ambeshya urukundo! Nubu mwari mwabipanze, ntabwo nari nzi ko Belinda nakubwiye ari we nawe wambwiye”

Bily-“Ibi ni ibiki banyarwanda? Ngo ngo?”
Njyewe-“Bily! Uriya Belinda wambwiye, niwe w’ amateka yanjye nakubwiye, niyumvishaga ko atari we, ariko byabaye ibindi ananyirengagije akanyereka ko atanzi!”

Bily-“Uravugisha ukuri Songa? Belinda niwe wabonye uvuye aha ni we wambwiraga cyangwa ni bya bindi byawe?”
Njyewe-“Ntabwo nakubeshya Bro! Belinda waje aha niwe wo kw’ ishuri nakubwiraga, niwe watumye nzinukwa, ese niyo atagira impuhwe yanyirengagiza bene kariya kageni?”

Bily-“Yebaba wee! Bro! Am sorry kabisa! Ntabwo nabimenye, ntabwo nari nzi ko uriya ari Belinda watumye uzinukwa urukundo, ariko reka muhamagare mutuke mutukuze ibyacu birangirire aho, kuko ntabwo nabana n’ umukobwa nkuriya wambwiye, ndabikorera wowe tu kuko nta rundi rukundo mufitiye usibye kwishimisha”

Njyewe-“Oya oya Bily! Nashoboye kubyihanganira kandi igihe nikatishaga nabyakiye, ahubwo nari mbikubwiye nk’ umuntu wanyakiye ngo tubane ubimenye kuko ntari umwana mubi wo kugusha ibintu nkibyo”

Bily-“Ooohlala! Songa! Ntabwo ushobora kumva ukuntu numva mbabaye, umuntu utazibagirwa mu buzima, umuntu wakomeje gutekereza cyane agatuma uhurwa ntabwo mba numva impamvu yakubona akakwirengagiza,
Uriya mukobwa twamenyanye umunsi umwe ubwo nari ndi muri cartier ngiye kugura akanono ngo ntogose nivure hang over, nawe yari ari ku murongo w’ inyama inyuma yanjye ndamwimukira nk’ umusore ubonye umukobwa mwiza afite icyo ashaka nawe urabyumva”

Njyewe-“Ndabyumva Bily”
Njyewe-“Hanyuma maze kumwimukira yabihaye agaciro, ndetse arantegereza kugeza nanjye bampaye ikinono, ugira ngo ntibyarangiye amperekeje akamenya aho ntaha? Bukeye bwaho yaje kuntira frash disk ngo arebe film bitangira buhoro buhoro kugeza ubwo amenyereye mu rugo”
Njyewe-“Uuuh? None se ushaka kumbwira ko Belinda atuye hano hafi?”

Bily-“Eeeh! Ugira ngo ni kure se? Usibye ko twatinze ku muryango w’ iwabo hagakingura umukozi wari ugiye kugura indagara nkagenda ntamusezeye naho ubundi ni hano hafi tu!”

Muri ako kanya natangiye kubaza Imana ishobora byose yahisemo kuntuza muri iyo cartier, kuri njye numvaga mu buzima bwanjye ntifuza kuzongera guhura na Belinda ariko kandi ibyambayeho yari amahirwe naronse ntashoboraga kudafumbatiza.

Njyewe-“Bily! Ni ukuri Belinda nta mutima agira, byibuze iyo ahagarara ku ijambo yambwiye akongera kunsubiramo ko atankunda ntacyo byari kuba bitwaye, ariko kwanga no kunsuhuza byanyeretse ko hari ikindi afite ku mutima,

Niwe wanteye kwihimura, ni we wanteye kuzinukwa ariko we abibona nk’ umukino woroshye ugoye gutsindwa, ese uramukunda cyangwa wa mugani wawe nuwo kurimiza ntiwamusohokana nk’ umwenda uhenze?”

Bily-“Ntakubeshya rero Belinda ntabwo mukunda pe! Tubanye gutyo gusa, sinzi ahubwo niba atekereza, nk’ umusore ufite akantu nkura mubyo ababyeyi bansigiye ntacyo nayamaza, ndayamuha nawe…..nyine….urebye nyine nta rukundo mufitiye, nkubwiye ko ndufite naba nkubeshye”

Njyewe-“None se Bily! Wowe ubona arugufitiye cyangwa?”
Bily-“Ibyo ntabyo nzi Songa! Nta nubwo mba nifuza kubitekereza, ahubwo niba ari we wambwiraga ndaje nkwereke”
Njyewe-“Unyereke iki se?”
Bily-“Ndaje mukine mutere hejuru amanuke no hasi ngo Pooo! Nawe azicuze nkuko nawe wicuza”
Njyewe-“Ahubwo se wabitangiye none aha”
Bily-“Bro! Narabikubwiye njyewe nta rukundo ngira, buriya birambabaje bya hatali nibutse ukuntu yanze no kugusuhuza, nyemerera mwiture inabi azarire ahogore amenye ko umuntu ari nkundi”
Njyewe-“Yebaba weee! Waba ukoreye umuti nazakwitura wazarongora nkakugabira Gaju!”

Muri ako kanya Bily yahise afata telephone ye arahamagara, numvaga amagambo n’ amatwi yanjye yombi,
Bily-“Cherie! Wagezeyo se?....oya ibyo uri kuvuga ntabwo ndi kubyumva….njyewe ntabwo ntera inda….wibeshya ndabizi neza ntabwo ari njye musore utera inda njyenyine……ariko uzi ko ntakuzi….iyi nimero reka nyisibe, ndumva utangiye kumbwira ibintu ntumva neza, ntabwo uyu ari wo mwanya wo kumbwira ko naguteye inda, nta na gahunda mpfite yo kugira umwana, niba utarigeze ubabara, si njyewe ni wowe utarabishatse, iyo uba warabibayemo wari kuba waranyweye amazi bigashira ariko ntacyo tangira uyanywe”

Aho nari nicaye numva byose numvaga iryo cumu nakomeza kurisunika, sinamenye ko Bily yateye inda Belinda bigahurirana n’ ibihe byo kumwitura inabi yangiriye nkomeza kumuga urutoki rw’ igikumwe mubwira ngo yes yes!

Bily-“Ndakwiyamye ntukomeze kumbwira ibyo! Ahubwo reka nsibe nimero yawe ntabwo nkuzi! Nundi munsi ntuzongere kumpamagara, nako reka mbyikorere”

Bily yakupye telephone ndetse amara umwanya utari muto kuri telephone, nibwo yahise ambwira,

Bily-“Ndamu blonce wangu! N’ ubundi nari narabuze impamvu”
Njyewe-“Waratinze ahubwo, nikatisha numvaga nahita nimuka nkava aha, ntabwo numvaga ko nabana nawe ukundana na Belinda, naho ubundi mureke uriya nta mukobwa urimo, niwe watumye mba uyu ndi we”

Bily-“Ariko buriya ntabwo ntandukiriye Bro! Ntabwo nzicuza? None koko umwana yaba ri uwanjye?

Njyewe-“None se ntabwo uzi neza ko wateye inda? Nta mugabo uyoberwa aho yanyuze, ahubwo…nako mwihorere azikorere niyo yaba ari wowe azamenya ko ari njye wamukundaga by’ ukuri nabona bibaye ibindi, ndifuza ko azicuza bikaba isomo ku nshuti ze zamushutse,

Umunsi umwe azamenya ko niriye nkimara ngo mushimishe, akabona wowe umushimisha kundusha nyamara ubu nkaba nzi ko umubeshya we atabizi, kugeza nubwo anyirengagiza?

Hmmm! Bily! Akebo kajya i wa mugarura, uwo mugabo mugarura ntabwo muzi ariko nguhaye akebo ngaho gereramo Belinda nkuko yabinkoze umuntu ni nkundi....Ni ukuri “Nanjye si njye”……………………..

Ntuzacikwe na Episode ya 8 yiyi nkuru “Nanjye si njye” ku munsi w’ ejo

Genesisbizz

Related Articles

Ibitekerezo

  • - mtg

    sha ari bily ari songa ibintu bakora nibyabana kbs ubu se ninde wagira undi inama.songa niyegere teta amugire inama amwereke uko akazi gakorwa ave mumatiku

Igitekerezo cyawe kirashyirwaho aruko gisusumwe

TANGA IGITEKEREZO