Episode 70: Joannah yaransuye igikuba kiracika ngwa mu kantu

Tukiri aho Manager yarahahingutse, akibona uwo musore wakoraga isuku twari duhagararanye amwamagana akimubona, amubwira ko yataye akazi agasimbuzwa undi, agerageza kwinginga biranga biba iby’ ubusa ahina akagongo arikubura arataha.

Bukeye bwaho navuye mu rugo niteguye ko uwo munsi turatangira kurubamo turi babiri, nerekeza ku kazi, uwo munsi ntabwo nigeze nicara n’amasaha abiri kuko niriwe nzenguruka ku mashami nari nshinzwe nkora rapport Bosco yari yansabye.

Saa kumi nimwe nibwo nari ngeze ku biro, nkinjira mu marembo nahahuriye na wa musore ahetse igikapu akikiye n’ ishashi nini irimo ibyo ntahise menya muri ako kanya,

Njyewe-“Eeeh! Bite se? Wubahiriza amasaha rwose, saa kumi nimwe mu kadomo uhise uhagera?”

We-“Nariraye ku kababa, ugira ngo byari byoroshye?”

Njyewe-“Ubu se uje usezeye?”

We-“Umva nawe ra? Ubwo se urumva nari gusezera mpereye he? Usibye umukobwa w’ umukozi wenyine niwe wari uzi ibyanjye”

Njyewe-“Eeeh! Noneho reka nze mbike izi mpapuro nze dutahe”

We-“Ariko se koko ubundi ko wambwiye ngo nzaze nkurebe niteguye kuri njye bikaba korosora uwabyukaga, ubundi unjyanye hehe?”

Njyewe-“Uraza kuhabona, wigira ikibazo”

Nagiye nihuta nkinjira nkubitana na Manager,

Manager-“Aaaah! Songa! Bite bite? Nari nakubuze ngo umpe amakuru?”

Njyewe-“Uyu munsi nabuze niriwe nzenguruka umugi wose”

Manager-“Bosco yambwiye, naho ubundi nashakaga kukubaza…”

Manager yikije ijwi avuga buhoro,

Manager-“Songa! Kuki utambwiye ko Teta byamushobeye asigaye akora isuku kwa muganga?”

Njyewe-“Ubwo se nari kubikubwira utabimbajije?”

Manager-“Hhhhh! Koko se nibyo cyangwa bambeshye?”

Njyewe-“Kuba byo nibyo….”

Manager-“Hhhhhh! Ndumva bisekeje, bwiza bupfa ubusa ntakireba asigaye yirwa yunamye kandi hano yaririrwaga yegamye? Uwamunyereka rwose!”

Nakomeje kwitegereza Manager aseka, nibuka ambwira ko ameherezo Teta azicuza kuri we yishimiye iminsi yamuteze,

Manager-“Narabikubwiye erega, narabivuze ko azicuza! Petit Frere yabimbwiye ngira ngo nundi Teta basa banahuje amazina yose naho niwe wa nyawe?”

Njyewe-“Petit Frere?”

Manager-“Eeeh! Hari Petit Frere tubana, nimugoroba twaganiriye atangira kumbwira iby’ umukobwa witwa Teta biganye, nza gukomeza kumubaza byinshi nza gusanga ashobora kuba ari uwo nzi, none koko nawe urabihamije!”

Muri ako kanya nahise menya ko wa musore nabonye ngafuhira, ari murumuna wa Manager gusa narabyirengagije nsa nkaho uwo ambwira ntamuzi, akomeza kumbwira,

Manager-“None se ubu muracyakurukana nka cyera Songa? Uracyagenda umugaragiye nkaho uri umugaragu we? Hhhhh! Ariko nawe warakabyaga, umuntu w’ umugabo? Cyakora nta cyanshimishije nko kumva iyo nkuru wenda azicuza amahirwe yateye inyoni, reka ngende nahejo Songa! Hhhhh! Teta rwose!”

Manager yanyuzeho aragenda ndahindukira mukurikiza amaso, arenze nkomeza njya mu biro ndambika impapuro ku meza ndakinga.

Nageze ku muhanda nsanga wa musore antegereje, tujya gutega imodoka, bidatinze twageze mu rugo, muha kalibu arinjira,

Njyewe-“Ni Kalibu aha niho nibera”

We-“Eeeeh! Aha niho uba?”

Njyewe-“Yego, aha niho mba ahubwo zana nkwakire….

Nakiriye iby’ uwo musore nkanjye numvishe amagorwa ye nkanga kumwumvira ubusa, nkiyemeza kumuhunza ahamuteraga gushengurwa akaza ngo tubane, numvaga duhuje imbaraga nk’ abasore twakwibeshaho ariko akarekeraho kubaho ubuzima bw’icuraburindi...nanze kumwumvira ubusa,

Njyewe-“Ariko buriya uzi ko ntazi izina ryawe?”

We-“Ntabwo nakurenganya, ku kazi se ko ntawajyaga ampamagara mu izina, naho nabaga bikaba uko, ubundi nitwa Gentil”

Njyewe-“Eeeeh! Gentil! Naho ubundi nyuma yo kumbwira ibyawe byose ndetse ukambwira ko ubonye uko uva mu rugo rw’ amagorwa, nk’ umusore nkawe nagize igitekerezo cyo kuba waba uhungiye hano tukaba tubana….”

Gentil-“Eeeeh! Nari nziko buriya unzanye ahantu wamboneye akazi none unzanye iwawe?”

Njyewe-“Ndabyumva icyo wamenyereye n’ ugushaka imibereho…ndavuga gukora utaruhuka niyo mpamvu waketse ko nkujyanye aho nakuboneye akazi gusa kuri ubu icyo nkwifuriza kuruta ibindi nuko watuza ukabanza ukaruhuka inkeke, ugatuza ukitekerezaho ka gahinda kakwegeka ukabanza ukakitsa ubundi tugafatanya gushaka aho watoborera ugatangira ubuzima bushya nkuko nanjye nagiye ntazi aho nzashyikira”

Yikije umutima hashize akanya arambwira,

Gentil-“Sinzi icyo nakubwira muri ako kanya, ntabwo nari nzi ko nzabona umuntu untekerezaho, kimwe mubyatumaga niheba nkibaza amaherezo yanjye ariko ubu ndumva….eeeh!”

Gentil yaramwenyuye ndabibona, yicara neza aregama,

Njyewe-“Buriya erega ntawe umenya uko ejo buzacya niyo mpamvu iyo bukeye bwitwa ejo, ntabwo wari kumenya ko umunsi umwe tuzahura, icyo nifuza ni kimwe nuko twahuza imbaraga tukibeshaho nk’ abasore, uko undeba uku nanjye mfite umuryango nasize ku ivuko, nahavuye nje gushakisha, ubu ni njye batezeho amaboko, ngomba nanjye kuzusa ikivi cya data”

Gentil-“Niba nawe ufite umuryango…”

Njyewe-“Gentil! Nubwo bwose kuri wowe amaganya atabura ariko wasanga umunsi umwe uzabona ababyeyi bawe, ndacyeka aho bari nabo bibaza uko usigaye ungana…umunsi uzagera mwongere mubonane jya ugira ikizere”

Gentil-“Ahaaa! Byihorere wa munyarwanda we agahinda k’ inkoko kamenywa n’ inkike yatoyemo”

Twatangiye gufatanya gushaka icyo kurya tumaze kurya turaryama, dutangira gufatanya ubuzima bwa buri munsi.

Iminsi yakomeje kwicuma Gentil akomeza kuntungura, bwaracyaga ngafata inzira ijya ku kazi nataha ngasanga yahashye nkibaza aho yakuye amafaranga, nanjye nahembwa tugashyira hamwe birumvikana sinibagirwe umuryango.

Nakomeje kuba hafi ya Teta nubwo bwose byahindutse kubera gushugurika twitegura gutangira kaminuza tukajya tubonana gake gusa namubereye igishura kimufubika irungu nawe ambera uburuhukiro bwa buri joro iyo nabaga ntashye naniwe nawe ananiwe yanyibutsaga uwo nari we nuwo yifuza ko nzaba we, akanyibutsa ko habaho urukundo ko ntaho ateze kujya ko igihe kimwe nyuma yo guhirimbanira gushaka imibereho tuzishimana nka bimwe by’ abakundana tubona muri film.

Umunsi umwe Joannah wakundaga kumpamagara kenshi tukaganira hakaba ubwo bwenda kudukeraho yarampamagaye, hari mu masaha ya saa kumi nimwe mwitaba ntatinze,

Njyewe-“Hello! Joannah! Bite se?”

Joannah-“Ni sawa Songa! Ariko ubwo ko uba wacecetse n’ akazi gusa cyangwa harimo n’ akantu kameze nk’ urwango?”

Njyewe-“Oya nta rwango ahubwo umpamagaye nari ngiye kuguhamagara nanjye”

Joannah-“Umva imitwe! Ariko Songa! Nako reka nicecekere, hanyuma se uri hehe?”

Njyewe-“Ubu nari nsoje akazi, nari ngiye gutaha?”

Joannah-“Harya neza neza wanze ko ngusura?”

Njyewe-“Hhhhh! Sinakubwiye se ko uzabanza kwaka uruhushya Moses, nabyemera ni kalibu rwose!”

Joannah-“Ariko se koko wabivugaga ukomeje Songa?”

Njyewe-“None? Nawe ariko ibaze yamenye ko waje iwanjye utamubwiye, urumva yabifata ate?”

Joannah-“Jya ureka ibyo ariko, none se kugusura hari ikindi bivuze? Jya woroshya ibintu, ahubwo mbwira aho uri mpagusange dutahane nze ube unanyisekereza dore ntuherutse kunkanda imbavu”

Njyewe-“Uravugisha ukuri se cyangwa uri kwikinira?”

Joannah-“Mbwira yewe!”

Narangiye Joannah aho nari ndi ambwira ko agiye kuza tugatahana akatubera umushyitsi muri uwo mugoroba.

Nyuma y’ iminota nka makumyabiri hari imodoka yahagaze imbere yanjye, mbona ikiganza kiri kundembuza ndayegera, nasanze ari Joannah n’ umusore wari umutwaye,

Joannah-“Songa! Injira mu modoka tugende ndaba ngusuhuza”

Twagiye mbarangira bidatinze twageze ruguru yo mu rugo tuvamo ahita abwira wa musore wari umutwaye,

Joannah-“Sawa! Turaza kuvugana kuri telephone!”

Amaze kugenda Joannah yarampobeye tumanuka mufashe ikiganza dore ko kugenda n’ amaguru kwe byari bisekeje, muri make yasaga nutabimenyereye, sinjye nabonye tugerayo twinjira mu gipangu ariruhutsa.

Nanyuze kuri Mama Belinda na Belinda bari bicaye hanze ndabasuhuza baratwitegereza cyane, nkingura umuryango nabagamo turinjira,

Njyewe-“Ni kalibu Joannah! Hano niho wahoraga wifuza kunsura, niho nibera urisanga!”

Joannah-“Eeeh! Ndashyize ndahageze, ahwiiiii! Ndumva naniwe uwaba yiryamiye ahubwo!”

Njyewe-“Hhhhhh! Biragaragara ko utajya ugenda n’ amaguru, metero maganatanu ngo urananiwe urumva ushaka kuryama?”

Joannah-“Songa! Cyakora ntakubeshye byo kugenda n’ amaguru byarananiye, ubundi se mba navuye mu rugo ryari?”

Njyewe-“Nukuvuga ngo wirirwa wicaye nyine bukarinda bwira?”

Joannah-“None se nakora iki?”

Njyewe-“Ugashaka uturimo wakora nk’ umukobwa?”

Joannah-“Rimwe na rimwe njya ndukora”

Njyewe-“Eeeh! Mbabarira nakomeje kukwirebera nibagirwa kukwakira”

Joannah-“Hhhhhh! Mbega! Mbwira ahubwo nkwakire ari njyewe”

Njyewe-“Oya ntaho byabaye”

Joannah-“Nta kibazo Songa! Si njye wagusabye kuza kugusura se? Ahubwo….”

Joannah yatangiye gukora mu isakoshi akuramo amafaranga arampereza,
Joannah-“Akira tumiza icyo kunywa”

Njyewe-“Ubu se iyo ureka ntabwo nari kugutumira utarinze kumpa amafaranga?”

Joannah-“Ariko Songa! Ntabwo uzi ko umushyitsi mwiza yizanira impamba, nawe nuzaza kunsura uzayizane!”

Nakiriye amafaranga maze ndamubaza,

Njyewe-“Ngutumirize iki se?”

Joannah-“Ndanywa iki ra? Iyo ntari mu rugo buriya ndirekura, maze yaba Papa na Mama ntawe uzi ko nywa inzoga! Hano hafi se hari aho bagira ka Vin Rouge ngo abe ariko uzana twinywere?”

Njyewe-“Ntabwo mbizi ariko niyo yaba kure nakwemera nkajyayo ariko ukabona icyo ushaka!”

Joannah-“Nizere ko turasangira ariko?”

Njyewe-“Hhhhh! Nta kibazo Joannah! Ngo nibwo biryoha!”

Joannah-“Nicyo ngukundira njyewe!”

Navuye mu rugo jugujugu nzenguruka muri cartier nshaka Vin rouge kugeza igihe nyiburiye mfata moto ntangira kuzenguruka mbaririza kubw’ amahirwe ndayibona ndakata nsubira mu rugo.

Nkinjira nasanze nta muntu uri muri salon ndikanga, mu gihe nkibyibaza Joannah yasohotse mu cyumba yakuyemo agakote yari yambaye,

Joannah-“Habuze gato wari usanze nsinziriye Songa! Ko watinze byagenze bite?”

Njyewe-“Wahora niki ko cartier ntuyemo nayijagajaze bikarangira nteze nkajya gushakira ahandi”

Joannah-“Uzimuke rero….kandi nashatse kubikubwira nkinjira hano!”

Njyewe-“Ugira ngo se buriya hano hari icyo hantwaye, inzu zaho zirahendutse njye mbona nta kibazo”

Joannah-“Ikibazo se ni amafaranga? Ntacyo noneho uzashake ahandi heza nzajya nkongereraho”

Njyewe-“Ngo?”

Joannah-“Hhhhhh! Ko wikanze se Songa? Mpereza utwo baguhaye two kunywesha ndabona wowe ntazi”

Joannah yarafunguye dutangira kunywa ari nako mutera ibiparu, ya nseko ye atajyaga atangira iba yose ari nako ankubita inshyi za buri kanya, nkababara ariko nkiyumanganya.

Mu gihe twari tukiri muri ibyo mvura Joannah imbavu Gentil yarinjiye duhuje amaso ahita asohoka vuba, gusa Joannah ntabwo yigeze amubona kuko yari yubitse umutwe mu biganza kubera guseka cyane,

Nibajije niba gusohoka kwa Gentil ari ugutinya kuturogoya cyangwa ikindi, hashize akanya Joannah amaze gutuza,

Njyewe-“Ahwiiiiiii! Wari upfuye! Reka mbe nguhaye akaruhuko ndaje gato ntabwo ntinda”

Narahagurutse ndasohoka, nzenguruka ruguru y’ inzu nsanga niho Gentil yihishe, ahita ambwira vuba,

Gentil-“Mbwira! Mbwira! Mbabarira umbwire, ntabwo ambonye?”

Njyewe-“Gentil! Ko mbona wahabye bigenze bite? Ko winjiye ugahita usohoka utinye umushyitsi?”

Gentil-“Wowe mbwira niba yambonye ibindi ubyihorere”

Njyewe-“Hhhhhhh! Oya ntabwo yakubonye, burya utinya abakobwa bigeze aha?”

Gentil-“Songa! Uriya….uriya ni Joannah ndamuzi, ni umukobwa wa Databuja, aho navuye mpunze, aho nabaye igihe mbakorera nk’ ubwishyu bw’ ikirahuri k’ imodoka yabo!”

Njyewe-“Ngo? Uravugisha ukuri Gentil??”

Gentil-“Niwe namubonye yewe, ndamuzi wese imbere n’ inyuma , ahubwo se ageze hano gute?………………………………….

Ntuzacikwe na Episode ya 71 yiyi nkuru “Nanjye si njye”

Genesisbizz

Related Articles

Ibitekerezo

  • - moses

    mwaramutse mwanditsi ? ko twahebye x tutakibona inkuru waba uramahoro? cg corona yara kudutwaye ntitwabimenya?

  • - Mbabazi Mellony

    Ahubwo se kotwategereje amaso akaba yaraheze mukirere?

  • - Ngoga

    Inkuru noneho ni uburyohe gusa, uyu Joana agiye gukurura ishyano kwa songa namayoga ye, gentil uramenye ntumwiyereke

  • - Bemeriki

    Ehhhhh uko numvise joanah bwa mbere ahura na songa numvise atoroshye wasanga ariwe wafataga oya mbere my guhohotera Gentil peeee gusa mwanditsi thank you Imana ikomeze ikwagurire impano

  • - Bandekebaproprotais

    Uyu mukobwa ndumva atazorohera songa ndetse ashobora guzateranya inshuti .

Igitekerezo cyawe kirashyirwaho aruko gisusumwe

TANGA IGITEKEREZO