Episode 79: Nemeye nibyo ntazashobora ngo mpumurize Teta wamburiye umwanya

Mwiza disi yazenze amarira mu maso, akomeza kundeba ntaragenda arampobera ngeze ku muryango w’ igipangu ndahindukira ndeba imisatsi ye yari ijagaraye mu ntekerezo nibuka iya Jolie twakoranaga uburyo isa n’ uburyo mbwirwa ko ari myiza burya ntawe udakeneye gusa neza ahubwo, ubushake buza mbere ubushobozi bukaza nyuma ninjye yabererekeye natashye mfite umujinya mwiza.

Uwo munsi nakoranye imbaraga nyinshi numvaga mfite imbaraga nyinshi ndetse n’ akazi kenshi ko gukora, saa sita ntabwo nigeze njye mu kiruhuko, saa kumi nimwe zigeze nzinga byose ndataha.

Feri yambere yari mu rugo, narahageze nsanga Mwiza yiteguye yireba mu ndorerwamo reka sinakubwira,

Mwiza-“Songa! Nategereje nahebye, watinze nashyushye natokombeye uziko saa cyenda nari narangije kwambara?”

Njyewe-“ Urabeshya? Hhhhhhh!”

Mwiza-“Gusa nanone nakomeje kwibaza, nkubu koko uramutse umbwiye ngo tugende njye kugutegera usubire mu cyaro?”

Njyewe-“Oya…aya masaha se ubwo natuma ugenda? Ahubwo fora tugiye hehe?”

Mwiza-“Ubu se twaba tugiye nka hehe ra? Ariko ndahaketse! Tugiye mu rusengero”

Njyewe-“Hhhh! Wakishe fora ahandi”

Mwiza-“Ubu se ni hehe? Nko kuri stade kureba umupira”

Njyewe-“Hhhhh! Reka nze mpindure nitegure nawe komeza ugire amatsiko nibyo nanjye nshaka”

Mwiza-“Ariko nawe?”

Nariteguye vuba turakinga dufata umuhanda, ntabwo twiriwe dutega nashakaga kugenda ntembereza Mwiza, nawe si ugutangara ntabwo yigeze yiha akabanga yarisanzuye.

Twaratembeye turongera turatembera, Mwiza yamenye byinshi bitandukanye yifuzaga kumenya, dushyikira ahantu hamwe ngo twicare turuhukire ku gafanta mbonereho kumubwira icyo nashakaga kumubwira.

Aho twari twicaye baje kutwakira, batubaza icyo kunywa baratuzanira ndetse nicyo kurya dutanga komande,

Mwiza-“Songa! Ndishimye! Nddishimye cyane ni ukuri, wakoze cyane guhitamo kuntembereza ukanyereka ibi byose”

Njyewe-“Byari bikwiye Mwi! Erega buriya iyo udatembeye uba umeze nk’ umuntu usoma ibyanditse ku gifubiko k’ igitabo, burya imbere haba harimo byinshi”

Mwiza-“Yego Songa!”

Twakomeje kuganira, tumaze kurya nibwo natuje umutima maze mfata akanya mbwira mushiki wanjye Mwiza,

Njyewe-“Mwi! Naho ubundi uretse kuba twatembeye, nakuzanye hano ngo twicare tuganire ndetse dusangire, maze dufate umwanzuro ku kifuzo cyawe ari nacyo cyatumye ufa inzira ukaza kundeba”

Mwiza-“Yeweee! Ntiwumva se! Wakoze cyane Songa! Kandi nabitekereje ko ugiye ko uyu munsi ushobora kuba urambwira inkuru nziza! Mbwira winyicisha amatsiko Songa! Ugiye kunshingira iki cyo gukora?”

Njyewe-“Mwi! Wagize igitekerezo kiza nk’ umukobwa urahaguruka ureba imbere kure wifuza, kuba ushaka icyo wakora n’ inzira nziza n’ amahitamo y’ ubuzima bwiza wifuza kuzabamo mu gihe kizaza kuko byose biva mu gukura amaboko mu mufuka,
Urabizi mwana wa Mama ko umuvandimwe avukira gukura umuryango mu makuba, kuba waraje unsanga byari bikwiye kandi wari usanze amaraso yawe, kugufasha ni inshingano zanjye ariyo mpamvu mu mahirwe nagize nemeye kugufasha urabizi ko ubufasha butagomba ibyinshi”

Mwiza-“Yeweee! Mbega byiza! Ni ukuri ndishimye pe!”

Nyuma y’ akanya gato nitegereza Mwiza wari ufite akanyamuneza nongeye kumubwira,

Njyewe-“Mwi! Naje gutekereza ndetse nganiriza inshuti yanjye, mfata umwanzuro wo kuguhitiramo bijyanye n’ ubushobozi mfite ndetse n’ amahirwe kuri wowe”

Mwiza-“Mbwira Songa! Wampitiyemo iki?”

Njyewe-“Mwi! Urabizi twakuze dutunzwe n’ isuka, ubuhinzi cyari cyo kintu cyatumaga turamuka ndetse nanjye niyo yatumye niga, ndifuza ko arbyo ukomeza nk’ umushinga ngomba kugufasha”

Mwiza-“Uuuh? None se I Kigali barahinga?”

Njyewe-“Oya! Ugomba gusubira ku ivuko akaba ariho ubikorera”

Mwiza-“Ngo mucyaro?”

Mwiza yarasuherewe ndabibona ndetse arahindukira ntiyakomeza kwicara andeba mbona ko ababajwe nuko nari mubwiye gusubira ku ivuko,

Njyewe-“Mwi! Ndabibona neza ko ubabaye, wenda utekereje ko ari uburyo bwo kuguhinda ngo nkwigize kure yanjye ariko muby’ ukuri ntabwo ariko bimeze, niyo nzira ihari yonyine”

Mwiza yambwiye ababaye cyane,

Mwiza-“Songa! Bivuge neza erega ko udashaka ko tubana wibica ku ruhande, njye kuki se wampitiyemo kuzasazana isuka cyangwa wowe kuki utaje ngo uhinge nkuko ubimbwira?”

Njyewe-“Nyumva neza Mwi! Erega bitekerezeho, tekereza ubaye ukodesha imirima mininini ugahingisha abakozi ukabahemba, ukagura imbuto n’ ifumbire, ukita kumyaka uko bikwiye ugasarura ibifatika ukagaburira mu rugo bakarya bagahaga ubundi ukabigemura ino ukamanukana amafaranga ukabika kuri bank,

Tekereza noneho ugumye inaha, ubu ngiye kuva ku kazi nkomeze ishuri, ubu se tuzakenera gukomeza kubaho, icyo wakora cyose ino gisaba amafaranga, wacuruza inyungu izajya igenda uko wakayakiriye, ikindi kandi igishoro umushinga watangira ntabwo ayo mafaranga yaboneka ntagujije”

Mwiza-“None se nyine wagujije?”

Njyewe-“Ubu se naguza nkazishyura iki koko kandi ngiye kuva ku kazi?”

Mwiza-“Ahaaa!”

Njyewe-“Wibabara Mwi! Ntacyo nguhishe kandi reba kure uri mukuru uraza kubona ko nta kundi yagenda”

Mwiza yikije umutima hashize akanya arambwira,

Mwiza-“Nibyo Songa! Nta kundi ngomba kugenda, kandi nzabigenza uko wabimbwiye buriya ubwo wagenze mu ishuri buriya mwarabyize, ubwo ejo nzataha”

Njyewe-“Urakoze kunyumva! Ndagukunda kandi nkunda umuryango wanjye, mbifuriza ibyiza”

Mwiza yongeye kugaruka nkuko yari ameze mbere, dukomeza kuganira ndetse bamwongera icyo kunywa, atangira kumbwira uko bizagenda nagera mu rugo, ko azababwira byinshi yabonye, amasaha yari akuze, ndishyura turataha.

Twageze mu rugo dusanga Gentil yicaye adutegereje, yari yanze kuryama tutaraza, Belinda aza gutwara Mwiza bajya kuryama,

Gentil-“Wiriwe ute se Songa?”

Njyewe-“Niriwe neza, nari natembereje mushiki wanjye ngo azagende abwira abo murugo uko tubaho”

Gentil-“Uuuh? Hanyuma se Mwiza agiye gusubira iwanyu kandi yari yarambwiye ko yaje aje azasubirayo cyera yarahindutse asa n’ izuba nkuko abandi bavuye mu mugi baba basa”

Njyewe-“Yego, ejo azagenda”

Gentil-“Kubera iki se wamuretse akigumira inaho ko….”

Njyewe-“Uuuh? Ko ubivuga nkaho utabishaka Gentil?”

Gentil-“Songa! Ntakubeshye numvaga atagenda, Mwiza twari dutangiye kumenyerana, twiganirira, numvaga natangiye kumwishimira”

Nacecetse akanya gato, ntekereza kubyo Gentil yari ambwiye, kuba byibura Mwiza yari yatangiye gutuma ahinduka akishima ari kumwe na Mwiza narabyishimiye kuko nifuzaga ko ahinduka akaba mu buzima nk’ ubw’ abandi akareka guheranwa n’ agahinda gusa kandi nanone nta kundi byari kugenda Mwiza yagombaga gutaha.

Njyewe-“Agomba kugenda Gentil! Urihangana nta kundi”

Gentil yarababaye ariko arabimpisha gusa narabibonye, twagiye kuryama mu gitondo nk’ ibisanzwe nazindutse nsanga yagiye, nditegura njya gusaba uruhushya ku kazi ngo njye gutegera Mwiza.

Byahuriranye nuko ku ishami rya nyabugogo bari bahamagaye ko bashaka amafaranga ngendera rimwe, nyura mu rugo Mwiza muha amafaranga yo gutangira umushinga mubwira ko nabona ari make azambwira ngashaka andi kuko nari nizeye Kalim.

Namuha impamba ye niya Mama ndetse na bashiki banjye bato ubundi asezera ashimira Belinda na Mama we njya kumutegera imodoka.

Iminsi yakomeje kwicuma ndetse Belinda yibaruka umuhungu, Teta yakomeje guhuga buri uko namuhamagaraga yambwiraga ko ari mu myiteguro kandi nzi uko iwabo murugo bimeze, nkabyumva nkamukomeza kenshi nkajya kumusura gusa nkavayo mbabaye kuko umwanya yampaga muke n’ umuke mbonye ukaba uwo kuntura ibibazo nanjye nkemera kumufasha nibidashoboka.

Iminsi yo gutangira kaminuza yari yegereje, ndi ku kazi nagiye ku biro bya Manager ndakomanga ndinjira,

Manager-“Aaaah! Songa! Bite se?”

Njyewe-“Ni byiza nyakubahwa Manager!”

Manager-“Hhhhhh! Noneho icyo cyubahiro cyose nikiki ra? Uje kuntereta iki?”

Njyewe-“Oya ntacyo ahubwo nari nje kukubwira ko iminsi yo gutangira igeze, ngiye gukomeza kaminuza”

Manager-“Uuuh? Ukaba se ushaka kuva ku kazi?”

Njyewe-“Yego! Ndashaka gusezera”

Manager-“Ariko Songa! Nari nzi ko ukuze naho burya imitekerereze yawe naho igarukira?”

Njyewe-“None se urumva….”

Manager-“Ubu ugiye kuva mu kazi neza neza!”

Njyewe-“None se ubwo urumva kandi nareka kwiga?”

Manager-“Hhhhhh! Songa rwose! Ubikoze byose se? ko utari impyisi ngo imirimo ibiri ibe yakunanira, ese ubundi ugiye kwiga ibiki?”

Njyewe-“Ngiye gukomeza ibyo nize mu yisumbuye bijyanye no gukanika”

Manager-“Burya nibyo wize?”

Njyewe-“Yego! Ahubwo imodoka yawe nijya igira ikibazo uzajye umbwira nkudepane ndebaho”

Manager-“Hhhhhh! Ubwo se uheruka mu modoka ryari? Ubu ntiwabyibagiwe”

Njyewe-“Cyakora byo ni cyera”

Manager-“Songa! Ndacyeka…nako ndahamya neza ko nkurusha imyaka nubwo atari myinshi, aho unyura nahanyujije ibirenge niyo mpamvu nicaye imbere yawe, ntabwo ari ukwirarira ibyo nkubwira nawe urabyibonera mbayeho neza uko biri nubwo aho nshaka kugera ntarahagera ariko byibura hari aho ngeze! Byose hari aho byavuye mu gutekereza,

Tekereza neza Songa! Ugiye kuva ku kazi ujye kwiga ndabyumva ni byiza ariko se kandi ibyo ugiye kwiga nyuma y’ imuaka uzi neza ko bizaguha akazi?”

Njyewe-“Ibyo byo ntabwo mbizi urabizi ko byose ari amahirwe, ntabwo nzi ibizambaho mu buzima burimbere ariko kandi ngomba kugira ikizere, erega nubwo bumenyi n’ ubukungu bukomeye busaza nyirabwo yapfuye”

Manager-“Ok! Ibyo ndabyumva! Ariko se wagiye kwiga ibyo ukora ukabona ubwo bumenyi budasaza ko byose ari kimwe?”

Nacecetse akanya gato, ntekereza kuri ayo magambo mu gihe ntari nagira icyo musubiza,

Manager-“Ugiye guhindura ubuzima, wari witunze utunze n’ abawe, wabikomeje ahubwo ukajya kwishyura mu ishuri ryigenga, ukongera ubumenyi bw’ ibyo ukora unahemberwa ko wenda wazarangiza ukazazamurwa mu ntera ko aho isi igeze kubaho ari ugusigasigasira amahirwe ngo ataguca mu ntoki? Ibihe byarahindutse si nka cyera, ugomba kugendana nabyo nta kwicara hamwe”

Nongeye gutekereza kuri ayo magambo nyuma y’ akanya mbwira Manager,

Njyewe-“Ubwo se amafaranga nazayabona ko uzi ayo mpambwa kandi akaba ariyo antunga atuma nita no kubanjye”

Manager-“Wakabimenye se! None ko ugiye kukavaho uzatungwa niki? Ahubwo se ayisumbuye yo wayize ute ko nzi ko abenshi twagiye duterateranya yewe na nubu akaba ari ko bamwe bikimeze? Wagerageza ukajya ukomeza ubika duke twazagwira ukishyura….bitekerezeho Songa!..............................................

Ntuzacikwe na Episode ya 80 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - Winny

    Teta ibye byoroshye mu mutwe ahubwo kurikiza inama za manager uzajye wiga nijoro ukore ku manywa.ntuzareke akazi ufite inshingano nyinshi zikureba .

  • - Callixte

    Konumva bitoroshye Ubwose songs Wanamugani wa manager arata akazi ngo nishuri kukazi c nibamwirukana bizagendute?

Igitekerezo cyawe kirashyirwaho aruko gisusumwe

TANGA IGITEKEREZO