Episode 81: Ibyo niboneye n’ amaso byatumye nemera

Nageze ku muhanda nurira moto, feri ya mbere nageze aho nagombaga kuviramo ndishyura ndinjira mu gihe nari nkiri gukura telephone mu mufuka sinzi uko nakebutse ku ruhande natunguwe nuwo nabonye impande yanjye ngakubitwa n’ inkuba nkamera nkuri mu kinya.

Nabonye Teta ari kumwe na murumuna wa Manager bicaye mu mutaka, biteretse icyo kunywa, batarambona ako kanya ndanyonyomba nikinga ku modoka yari iri iparitse aho hafi.

Nabanje kugira ngo ndarota nihumura mu maso ngo ndebe neza, koko yari we nongeye kwibuka ko yambwiye ko ataboneka nkanga kumubaza impamvu, impamvu nari nyibonye.

Mu gihe nari nkikinze ku modoka ndeba uko baganira ari nako intimba ikomeza gutaha umutima wanjye telephone yarasonnye….ndebye nsanga ni Moses, nseta ibirenge nigira hirya ngo nitabe,

Njyewe-“Hello!”

Moses-“Ese byakugendekeye gute wangu? Wayobye cyangwa wakubiswe uri kuza n’ amaguru?”

Njyewe-“Oya ahubwo wabimenye nari mpageze….”

Moses-“Injira uzamuke turi hejuru turi ahitegeye amarembo….ahubwo se ko tutakubona?”

Njyewe-“Eeeh!....Nari ninjiye….ndikuza aho muri…. Mbagezeho!”

Moses-“Ok! Sawa!”

Nongeye kumamayo akajisho akanya gato…nzunguza umutwe ngira ikiniga, ntangira kubaza Imana impamvu yemeye kunyereka ibyo nabonaga mu maso yanjye ndetse ntangira kwicuza impamvu nje aho hantu.

Nikije umutima ndaceremba ndinjira nzamuka aho Moses yari andangiye ko yicaye, nkihagera nasanze yicaye wenyine mu gihe nakekaga ko ari kumwe na Joannah fiancé we,

Yahise ahaguruka,

Moses-“Aaaah! Inshuti yo ku nzira ikaba irahageze! Hhhhh! Kalibu muvandimwe!”

Nubwo nashengurwaga nshira naramwenyuye tukubitana mu biganza duhuza intugu ibi by’ abasore, nicara aho nakebukaga gato nareba hasi nkabona neza aho Teta yari yicaranye na Maric, ku mutima nibajije uwateye iyo ntebe niba hari icyo dupfa,

Njyewe-“Moses! Amakuru amakuru?”

Moses-“Ni meza kabisa biracamo! Icara ubanze uruhuke ubundi bakwakire tube tumenaho abiri…..buriya gahunda yose mpaye umuntu nshyirwa ari uko muvuyemo ideni”

Njyewe-“Byo ndemeye! Nari nagize ngo warivugiraga!”

Uko navugaga nakomezaga gukebuka nkareba hasi nkabona ukuntu Teta na Marc baganira ndetse bafata n’ udufoto nkagarura amaso nkijijisha nyamara nshengurwa nshira,

Njyewe-“Bite se wageze ino ryari?”

Moses-“Eeeh! Kare nka saa kumi gutyo, nari nje kureba iby’ iwanjye uko bimeze!”

Njyewe-“Iby’ iwawe?”

Mu gihe nari nkimubaza hari umukobwa mwiza waje kunyakira amwenyura ambaza icyo kunywa ndamubwira amaze kugenda,

Njyewe-“Nari nkikubaza… wari umbwiye ngo wari waje kureba iby’ iwawe?”

Moses-“Eeeeh! Nari naje kureba uko aha bimeze, muzehe wanjye niwe wahoze akoreramo hano….ngira ngo uribuka ko nakubwiye ko yagiye gusazira kure ahantu hatuje na mukecuru”

Njyewe-“Ndabyibuka warabimbwiye! Muri make ni wowe Boss wa hano?”

Moses-“Hhhhhh! Bisa nabyo usibye ko kubera mba ntahari Joannah aba ahambereye…buriya usibye no kuba ari fiancé n’ umukozi wanjye! Nka kabiri mu cyumweru aza kureba uko bimeze”

Nahise nibuka ko umunsi nari ndi kumwe na Joannah yambwiye ko yarari no mu kazi, akambwira ko kuba twasangiye ari inyungu kuri we kuko ari kwiteza imbere maze mbwira Moses,

Njyewe-“Oya nibyo ijya kurisha ihera ku rugo, urumva ko akora yikorera!”

Moses-“Niko bimeze da!”

Banzaniye icyo kunywa dukomeza kuganira, ari nako nkebuka nkareba hasi nkagarura amaso,

Moses-“Biracamo se wowe ku kazi biragenda nta kibazo?”

Njyewe-“Biragenda urebye ni bya bindi byo kubyuka umuntu agenda agataha bwije!”

Moses-“Biriya se ko ari ibya twese, umuntu agomba kurya ari uko avunitse! Kandi ntiwakwicara hamwe ugomba guhaguruka ukagenda kugira ngo ubone icyo ucyura”

Njyewe-“Ibyo ni ihame! Ari rero kwicara wenyine Joannah ari mukazi….

Moses-“Hhhhh! Joannah se? Sinzi ngo gahunda yagiyemo ntabwo ari hano, yari yambwiye ko nayivamo araza kundeba ariko namuhamagaye ambwira ko atakibonetse hari gahunda agize imutunguye”

Njyewe-“Ariko se buriya bibaho ko fiancé wawe yahindura gahunda yawe akayisimbuza indi?”’

Moses-“Eeeeh! Ibyo bibaho cyane rwose, erega ntabwo ndi umutegetsi ngo ikifuzo cyanjye iteka kijye kiba itegeko!”

Njyewe-“Ibyo ndabyumva! Ariko se nkubwo umenye ko wenda gahunda yagiyemo mo ayifitanye nundi musore utari wowe wabyitwaramo ute?”

Moses-“Eeeeh! Buriya mu rukundo amagambo arasenya, mbyumvishe namubaza niba koko ari byo, yambwiza ukuri ko ari byo nkumva bifatika…ibyo nta kibazo”

Njyewe-“Mfite amatsiko usanze yari yakubeshye uko wabyitwaramo?”

Moses-“Eeh Eeeh! Byihorere wa musore we kubeshywa biraryana, uzi kuba nka cya kirondwe cyumiye ku ruhu inka yarariwe cyera?”

Nashatse gutobora ngo ngishe inama Moses ariko umutima utegeka ururimi rwanjye, mu gihe nongeye gukebuka aho ba Teta bari bicaye nasanze ntabahari, ntangira kwisimbukuruza ngo ndebe ko baba bari hafi aho ariko ndababura,

Moses-“Ko mbona urangaguzwa se bimeze bite? Hari umuntu ubonye uzi?”

Njyewe-“Oya….oya n’ imodoka yasohokaga nari ndi kureba ko ari iy’ umuntu nzi ariko irinze isohoka ntayibonye neza”

Twakomeje kuganira njye na Moses amasaha akomeza kwicuma bigeze nka saa mbiri n’ igice nibwo twapanze gutaha akerekeza i Kabuga , ntabwo yansize ku nzira yabanje kungeza aho naviragamo hafi yo mu rugo abona kugenda.

Namanutse ntekereza kubyo nari niboneye n’ amaso byatumye nemera ko Teta atakiti uwanjye, nageze mu rugo nsanga Gentil ari kurya, menya ko yantegereje akambura, ndamusuhuza ndicara,

Njyewe-“Ahwiii!”

Gentil-“Songa! Uyu munsi ko wakarayemo washakaga kugakora kose kandi nuwagahanze atarigeze agakora ngo akarangize?”

Njyewe-“Wapi ntabwo nari nkiri mu kazi ahubwo hari umuvandimwe wari wantumiye twari turi gusangira”

Gentil-“Eeeeh! Nari ngize ngo? None se ko wegama nkaho wakwegeye ameza?”

Njyewe-“Ryoherwa wangu! Ndumva meze neza njyewe ndahaze, ndengejeho ibindi naba ndengereye”

Twakomeje kuganira Gentil arangije kurya nawe aregama nyuma y’ akanya gato ducecetse,

Gentil-“Songa! Nakomeje kugutegereza ngo nkubwire ungire inama, njyewe byanyobeye kabisa”

Njyewe-“Ibiki se kandi?”

Gentil-“Uribuka nkubwira ko kuba mbonye akazi ko gucuruza ibirayi ari amahirwe kuri twe ntabwo nzajya mbura ikiro k’ ibirayi ntahana?”

Njyewe-“Eeh! Gentil! Utambwira ko wibye Mama Belinda!”

Gentil-“Reka reka! Ntuzi se ko ibyo wabimbujije tukabyanzura ko ntazigera mbikora, ahubwo byabaye itegeko!”

Njyewe-“Ngo? Ibyo se birashoboka?”

Gentil-“Nanjye nibyo byanteye amakenga ngatekereza ko ngiye kuzajya nkorera ibiryo nkuko nari mbayeho mu myaka ingahe ishize”

Njyewe-“Uuuh? Mbwira neza uko bimeze Gentil! Ndumva ntabyumva neza”

Gentil-“Nari ndi kuri stock kuko urabizi ko wa mugabo wamukoreraga mbere yagiye, nk’ ibisanzwe saa tanu nibwo ahagera akareba mu ikayi ubundi akagenda akongera kugaruka nimugoroba,

Ubwo nyine turi kuganira nibwo yambwiye atuje ndetse asa numfitiye impuhwe ngo ariko ujya wibuka gutahana ibirayi byo kurya? Ndamubwira nti reka reka ntabwo iryo kosa ryo kumwiba narikora, arambwira ngo oya ntabwo ari ikosa, ngo ahubwo guhera uyu munsi njye ntahana ibiro bibiri buri munsi azajya ampa n’ uburisho”

Njyewe-“Yampaye inka!”

Gentil-“Nibyo gusa se ko yambajije impamvu kuva nagera hano ntari ninjira mu nzu iwe? Yambwiye ngo guhera ejo nzajye nzinduka mbere yo kuza hano mu kazi jye njya kunywa icyayi….ngo dusangire ra? Songa! Urumva ibyo bishoboka? Ari wowe wajyayo?”

Njyewe-“Reka reka….harya uyu munsi n’ itariki zingahe ra? Ni ya taliki yo kubeshya jya numva?”

Gentil-“Ntabwo nkubeshya nyamara ndakubwiza ukuri, sibyo gusa kandi yambwiye saa sita wa musore Kamanzi azajya anzanira ibiryo ku kazi kandi ngo ninjya nkenera amafaranga hari nkicyo nshaka kugura nk’ imyenda cyangwa inkweto njye mubwira ayampe, ngo ibindi tuzajya tubivugana nyuma ukwezi kurangiye”

Njyewe-“Ibyo byo wenda nta kidasanzwe kirimo, mu kazi bibaho nanjye bajya banguriza”

Gentil-“Oya Songa! Kuri njyewe birakomeye cyane ntabwo ushobora kubyumva!”
Hashize akanya gato,

Njyewe-“Gentil! Mama Belinda ashobora kuba…nako yarakwikundiye nicyo mbona, umukoresha nkuwo kumubona ni amahirwe akomeye, nawe rero uzakomeze umubere umwana mwiza…buriya hari ababyeyi bafata abana bose nk’ ababo,bagatanga batitangiriye itama, bamenya abateze ibiganza bakeneye uwabahagurutsa, kurubu abo ni mbarwa”

Gentil-“Songa! Icecekere wa musore we! Njye nabonye n’ ababuza abandi gufasha no kugira neza bakabuzwa amahoro nuko hari uwafashije undi yibwira ko atari abikwiye….ndabazi narababonye,

Ndibuka Joannah anzanira imyenda umusore bakundana yari yamuhaye ngo anzanire, nayambara Databuja akambaza aho nayikuye, navuga ko ari Joannah agatukwa kakahava, ngo kubera ko yagize neza akamfasha…imyenda baje kuyitwika ngayo nguko”

Njyewe-“Ooohlala!”

Nta kabuza namenye ko iyo myenda yari ivuye kwa Moses, mu gihe nkibona mu ntekerezo uko byari bimeze, telephone yarasonnye ndebye mbona ni Teta umpamagaye nitsa umutima nibuka byose…. Muri ako kanya nibaza icyo ampamagariye nicyo agiye kumbwira …………………………………….

Ntuzacikwe na Episode ya 82 yiyi nkuru “Nanjye si njye” kuwa mbere mu gitondo

Genesisbizz

Related Articles

Ibitekerezo

  • - Elie Le Petit

    To Forget The Past Can't Allow You To Know How To Explore The Future.Imbere Yuko Urakarira Teta Wibuke Kahise Kawe,ndetse Mwempi Muri 2,ibihe Mwagiranye.Umwizere Umwumve

Igitekerezo cyawe kirashyirwaho aruko gisusumwe

TANGA IGITEKEREZO