Episode 83: Teta ati…”Nanjye si njye”...Nongera guhura na Leon

Nasezeye Gihozo mpina akagongo nzamuka jya ku muhanda, ntabwo niriwe ntega nafashe umuhanda nsubira ku kazi ngenda n’ amaguru…gusa nubwo ibirenge n’ umubiri byari mu muhanda ariko ubwenge ntibwari buri aho hafi.

Nongeye gushiguka numva amahoni yavugiye mu matwi yanjye abantu bariyamira, mu kureba mbona ndi mu muhanda rwagati, abashoferi bacisha imitwe mu madirishya batangira kuntuka,

Umwe-“Wowe urashaka kudukoresha impanuka nta soni?”

Undi-“Isi yagusize wibagirwa ko uri mu gicucu cy’ urupfu? Cyangwa ushaka kwiyahura nguhe lifuti ikugeza kuri nyabarongo?”

Abari aho hafi bakomeje kundeba nanjye ndanyonyomba nyura indi nzira ya bugufi mpingukira ku kazi, nitsa umutima ndinjira ndicara.

Si njye warose amasaha y’ akazi arangira nasohotse mu ba mbere, feri ya mbere yari mu rugo, aho nageze mpitira mu buriri, umubiri wanjye wari wacitse intege, numvaga nshaka kuba aha njyenyine ndetse n’ amaso yanjye ahumirije.

Nokomeje gutekereza Teta kuva umunsi wa mbere tubonana kugeza uwo munsi w’ akadomo ko kwemera ko burya ibihe biha ibindi, wari umwanya wo gutuza no kwemera ko natsinzwe n’ igitero cyuwihariye amahitamo ye, ntangira gushaka imbaraga muri njye zo kwakira ibyo ntabashaga guhindura.

Mu gihe nari nkiri muri uwo mwijima, Gentil atari yataha, numvishe telephone yanjye isonnye….yari Teta nkuko nari mbiketse.

Nakomeje kwitegereza telephone ariko nanirwa gukanda yes, ndetse nyirambika ku ruhande, bibaye ubugira gatatu numva message, mu kuyifungura yagiraga iti,

“Songa! Ndabona wanze kunyitaba gusa nashakaga kugusaba imbabazi, nagiye mu buryo butunguranye… Nanjye si njye byabaye ngombwa ko ngenda tutabonanye, ntabwo ariko nabyifuzaga, nicuje impamvu tutabonanye mbere tugapanga kubonana ku munota wa nyuma gusa nagezeyo kandi nabonye aho kuba n’ ibindi byangombwa byose, ukomeze ugire ibihe byiza nizere ko utanze kunyitaba kubera kundakarira ahubwo ari uko udafite telephone muri aka kanya!”

Maze kwitsa umutima narebye icyo nandika nsubiza Teta ndakibura, natangiraga kwandika ng: “Erega wivunika narangije kwiyakira…..nyuma y’ umwanya utari muto mbitekerezaho nkabisiba ngakomeza kwandika nsiba,….mu magambo yose nasigaje ijambo rimwe nti…. Urakoze Ndohereza.

Hashize iminsi ibiri nakomeje kwihiringamo imbaraga no guhindura page y’ agatabo kahoze ari ak’ ibyishimo kakaza guhinduka ak’ amaganya, mu kazi nkagerageza kuganira n’ abandi bitandukanye na mbere, byose ari ugushaka morari inyibagiza Teta.

Uwo munsi akazi karangiye nasohotse mu bambere manuka ngana aho najyaga gutegera imodoka, nari narihaye gahunda yo kujya nkora siporo buri uko ntashye ngo nkomeze kubaka ubuzima bushya buzira kwigunga.

Nkihagera nahahuriye na Juma twakoranaga, bwari ubwa mbere tuhahuriye ubusazwe ntabwo yajyaga ahategera,

Naramwegereye ngo nk’ umuntu dukorana nongera kumusuhuza nubwo twasaga n’ abirirwanye,

Juma-“Aaah! Bite bite Songa!”

Njyewe-“Ni sawa Juma! Aha na hehe se ko ntari nsanzwe nkubona uca izi nzira?”

Juma-“Hhhhh! Wabimenye nyine ubwo uyu munsi ndacumbika iwawe!”

Njyewe-“Hhhh! Ni kalibu rwose!”

Juma-“Naho ubundi nari nyuze iyi nzira, hari ibyangombwa njyanye ku ishuri ngo niyandikishe mu wundi mwaka ugiye gutangira”

Njyewe-“Eeeeh! Ngo ku ishuri?”

Juma-“Yego! Ko utunguwe se?”

Njyewe-“Nuko wari umvugiye ibintu, nanjye ubu nicyo kindi mu mutwe, ndashaka gutangira nanjye uyu mwaka ahubwo se mbwira wiga iki? Wiga he?”

Juma-“Hari ibindi naba niga atari biriya dukora se? N’ icungamutungo… nyine n’ amafaranga muri rusange”

Njyewe-“Eeeeh! Ahubwo dore ngo ibintu bisa n’ ibyikoze! Ndashaka kukwaka ubufasha”

Juma-“Ubuhe bufasha se?”

Njyewe-“Nta kigoye kirimo Juma! Ni ibisobanuro ry’ ibisabwa kugira ngo umuntu atangire kwiga”

Juma-“Ibyo nabyo? Aho kugira ngo unkureho amakuru se waje tugafatanya urugendo tukajyana ku ishuri bakakwihera amakuru nyayo atariho ivumbi?”

Njyewe-“Ariko uzi ko ari byo! Reka tujyane wa mugani wawe”

Imodoka ntiyatinze yaraje turayurira, tugenda tuganira ntibyatinze twageze aho twagombaga kuviramo tuvamo, dutambika n’ amaguru,

Juma-“Naho ubundi Songa! Ikintu cya mbere n’ ubumenyi! Bikaba byiza nanone iyo ufite uburambe, niyo mpamvu nkubwira ko wahisemo neza kugira icyo gitekerezo, nanjye nabimenye kare, nsha uwo muvuno none umwaka wa mbere ndawuhigitse”

Njyewe-“Ubu se nanjye nzawuhigika ra? Nubwo nafashe umwanzuro ariko nanone ntabwo byoroshye”

Juma-“Ni nkindi mishanga yose Songa! Bisaba kwiyemeza gusa nanone wibuke ko gushora mu bumenyi nta gihombo kibamo!”

Twakomeje kwigira imbere tugera kucyapa k’ ishuri menya ko ariho tuje, byari n’ amahire twari duturanye, twarinjiye anyereka aho njya kubariza,

Juma-“Dore urinjira muri uriya muryangooo… ubwo ibisabwa byose urabaza, utagira icyo wibagirwa, nanjye reka njye mu bindi ubwo turaza kubonana hanyuma”

Twatandukanye na Juma ninjira aho yari anyeretse, umukobwa nasanzemo yanyakiriye neza ntangira gusobanuza ibisabwa byose, mbyandika ahantu ntacyo nsimbutse, nyurwa n’ ibisobanuro ndamusezera.

Nasohotse nsanga Juma ahagararanye n’ abasore babiri n’ inkumi ndabasuhuza,
Juma-“Songa! Biciyemo se?”

Njyewe-“Eeeh! Cyane rwose! Ntacyo ntabwiwe!”

Juma-“Ntiwumva se!....

Yahise abwira abo bari kumwe….

Juma-“Dore uyu musore nawe yaje kutwiyungaho, agiye gutangira kwiga hano!”

Bose-“Eeeeh!”

Juma-“Ubusanzwe turakorana, mumuhe ikaze abiyumvemo”

Umwe muri ba basore yahise avuga,

We-“Ni kalibu wangu!”

Undi-“Ikaze Bro! Ndabona uzanye courage nyinshi, ku munsi wa mbere urupapuro rutashye rwuzuye”

Juma-“Hhhhh! Maxime ntabwo ajya yiyumanganya, akaba ararikocoye!”

Bose-“Hhhhh!”

Bakomeje gutebya nanjye ngenda mbisangamo ndetse dusohoka ku ishuri nabiyumvishemo numva twaguma muri ibyo bihe, byakomeje kumpa imbaraga n’ amatsiko yo kwinjira muri ubwo buzima nabonaga ko buzaba bwiza kurushaho bikaziba icyuho cyo kwigunga no kumva ko ahari wenda ngiye kwinjira mu buzima buzira kwigunga no kumva nshaka kuguma njyenyine nyuma yo gusitara nirukira uwo numvaga ko atazansiga nk’ isezerano nari narahawe.

Byabaye ngombwa ko mbasezera, nkerekeza mu rugo dore ko hari na hafi,
nkihagera nasanze Gentil yicaye hanze ari kumwe na Belinda,

Njyewe-“Eeeh! Genti! Beli! Bite byanyu? Ndabona mwataramye! Nanjye reka nshyitse akagongo hafi yanyu….”

Habanje kubura unsubiza biranshanga, mu kubitegereza mbona amasura yabo asa naho aganjwe n’ ibitekerezo bitari aho hafi,

Njyewe-“Gentil! Bite ko munyihorera habaye iki?”

Gentil-“Eeeh! Nta kibazo! Nta kibazo Songa!”

Natuje akanya gato, ngiye kubona mbona Belinda arahagurutse ahereza ikiganza Gentil,

Belinda-“Sha reka njye kuryama amasaha arakuze!”

Gentil-“Nanjye reka mbe ngiye nah’ ejo!”

Belinda-“Songa! Bye! Ntabwo tuganiye, nawe uratinda ugakabya!”

Njyewe-“Nta kundi ubwo nihombeye Beli! Gusa….nako nta kibazo ugire ijoro ryiza! Ubwo nanjye reka nigane ingendo yanyu”

Belinda yaragiye natwe twinjira mu nzu turicara, hashize akanya gato dutuje nanze kuguma mu gihirahiro,

Njyewe-“Gentil! Bite ko nje nsanga muvuga mugaceceka, ni njyewe mwishishe cyangwa hari icyabaye ntaramenya?”

Gentil-“Oya ntabwo ari wowe twishishe Songa! Ubwo se koko nanjye nakwishisha?”

Njyewe-“Nanjye nibyo binteye kwibaza byinshi, mbonye wowe na Belinda muruciye murarumira, ndavuga nti se mwo kabyara mwe mbaye impamvu yo guhisha akari kumitima?”

Gentil-“Songa! Nta kindi erega nuko usanze turi kuganira, twahereye kare tuganira…Belinda yanganirije menya byinshi ntari nzi, nanjye ndabohoka musangiza urugendo rwanjye rw’ ubuzima, niyo mpamvu waje usanga imitima isa niyahoberanye amagambo yashize ivuga”

Njyewe-“Eeeh! Ni ukwihangana Gentil! Gusa ariko kandi ni ngombwa kuganira ngira ngo wabonye ko bivura ndetse bigatuma ujya gukanda amenya ahakeneye komorwa mbere y’ ahandi”

Gentil-“Nibyo Songa! Hanyuma se….nyine, nako nashakaga kukubaza amakuru ye”
Njyewe-“Inde se Gentil”

Gentil-“Hari undi se….ndavuga Mwiza!”

Njyewe-“Hhhhh! Ese! Ndumvaaa….ndumva wamukumbuye?”

Gentil-“Gira uti ahubwo ndambiwe kwihangana kuko natangiye kumukumbura abura isaha imwe ngo agende”

Njyewe-“Hhhhh! Harya nakubwiye ko ubu iwacu ku ivuko asigaye ayoboye ku kitwa ubuhinzi?”

Gentil-“Reka da? Koko se?”

Njyewe-“Ahaaa! Wa mushinga watangiye gushora imizi da! Ubu ngo niwe abantu bose baza kwigiraho bamubaza uko yabigenje ngo agire imbuto itoshye y’ ibirayi n’ ibindi! Ngo ubu ni umuhinzi w’ ikitegererezo iwacu”

Gentil-“Urabeshya?”

Njyewe-“Ubu nyine ngo yiteze umusaruro ufatika mu mezi ari imbere tumwitege!”

Gentil-“Ndishimye cyane rwose! Iyo ni inkuru nziza mu matwi yanjye, ahubwo se uwabwira Mabuja akaba abitegura uwo musaruro wa Mwiza tukazawurangura?”

Njyewe-“Nanjye nabitekerejeho mbere Gentil! Ahubwo nawe icyo gukora uracyumva, uzaba umuteye ingabo mu bitugu umushakiye isoko ryiza, naho ibyo gukumbura gusa se ibyo n’ ibiki?”

Gentil-“Hhhhh! Rahira ko iryo atari ifuhe Songa! Ntacyo ariko!”

Twakomeje kuganira amasaha akomeza kwicuma tujya kuryama, nari maze kumenyera guhamagara Teta mu by’ ukuri nubwo umutima rimwe wambuzaga ariko nibukaga uw’ akahise, uwampaye inzira mu magana nkumva ntazinukwa ngo mbure no kumubaza amakuru gusa kenshi muhamagaye nkamubura mu gitondo ngasanga yampamagaye, nareba isaha yampamagariyeho, ngasanga ni saa saba, saa munani cyangwa saa cyenda z’ ijoro, nkitsa umutima nkabyuka nkitegura nkajya ku kazi.

Nyuma y’ ibyumeru bibiri ntangiye kaminuza, gahunda yari yarabaye mu rugo-ku kazi-ku ishuri –mu rugo, umugoroba umwe ari kuwa gatanu ubwo nari mvuye ku ishuri narebye imbere mu ntambwe ndende mbona abamotari ndetse n’ imodoka ziparitse mu muhanda zicanye amatara ngira igishyika, byasaga naho habaye impanuka, ntangira guhina akarenge nibaza icyaba kibaye.

Nkuko bigenda natangiye kubaza uwo mbonye wese icyabaye ariko bakanshaho buri wese avuga aye, nkomeza kwegera imbere aho niho nabonye umusore wacumbagiraga arandaswe n’ umumotari, mu kwitegereza neza nabonye uwo musore asa nuwo naba nzi ntangira guca mu bantu ngo mugereho.

Nkimugeraho narikanze cyane, nasanze uwo musore ari Leon twiganye mu mashuri yisumbuye, uwo nashyitseho bwa mbere nguruka ngo menye aho bweze, akanshumbikira ngo ndebe ko nabona ka kayira gafunganye k’ ubuzima benshi dushakashakira kunyuramo ngo tweze…………………………..

Murahishiwe! #Episode84 yiyi nkuru “Nanjye si njye” ni ejo mu gitondo

Genesisbizz

Related Articles

Ibitekerezo

  • - Elie Le Petit

    mwana Teta Umwitondere.Vyibuze Ukore Nk'umuntu W'umugabo Wihangane Uzabona Iherezo Rya Vyose

Igitekerezo cyawe kirashyirwaho aruko gisusumwe

TANGA IGITEKEREZO