Episode 85: Nahuye na Teta mu nzozi… ngira icyo nisabira Imana

Belinda-“Mama! Noneho nta banga rigihari! Reka nkubwire ukuri kose! Ndabyibuka neza njya guhunga nkava aha mu rugo ni umutima wanjye wanshiraga urubanza nkumva ko gutwara inda y’ indaro ari ishyano ndetse utazigera unyihanganira,

Nagarutse kubw’ umutima nanone,ndetse unyakira unyereka ko uwo ntwite ari umuziranenge, ko ibyabaye byabaye ntakwiye kwangara ngo mbuze amahirwe ukiri urusoro ntiretse ko n’ umwana w’ ikirara yagarutse akakirwa,

Mama! Ntabwo nari narigeze gucira umuntu urubanza ariko Billy wumvishe mu rindi zina ni Papa w’ umwana wanjye, ubyumve nk’ akahise nubwo aka kanya atari ko nari narateguye cyo kubikubwiraho”

Mama Belinda-“Ugize uti iki Beli?”

Belinda-“Ngize nti Billy wumvishe ni Papa w’ umwana wanjye, niwe twabyaranye Shema”

Mama Belinda-“Ibyo numva ndarota cyangwa? Beli! Ni gute waba warabyaranye n’ umujura? Oya mbwira wikubika umutwe, ndashaka kumenya ukuntu wiyandaritse bigeze aho kubyarana n’ ingegera….”

Mama Belinda yakomeje kuvugana umujinya uvanze n’ agahinda nk’ umubyeyi birumvikana Belinda akomeza gutuza no guhanagura amarira, hashize akanya katari gato,

Belinda-“Mama! Najye si njye! Unteze amatwi ukanyumva ibyose nari nzi ko ari urukundo, ntabwo nari nzi ko Billy umusore wamenyeraga umwanya akampa byose nabaga nkeneye kuri ubu yahinduka akitwa umutekamutwe w’umujura aho nari kunyurwa numva ahamagarwa Papa Shema”

Mama Belinda-“Oya ntabwo mbyumva Beli! Ubu nicaraga nzi ngo mfite umukwe umunsi n’ isaha azaza yicare yirege musabe imbabazi mbashyingire nkire urubwa rw’ abanzi ino none ngo umutekamutwe w’ umujura? Uwo mtindi wanyibiye umwana ubwenge n’ umutima sinshaka kuzamubona mu maso yanjye…”

Belinda-“Mama! Uko wabifata kose Billy ni Papa w’ umwana wanjye kandi nta kintu ushobora kubihinduraho”

Mama Belinda-“Ariko ubwo nta soni ufite Beli? Uratinyuka ugakomeza guhamya ko kuba warabyaranye n’ ingegera napfa kubyakira?”

Belinda yahise ahaguruka asohoka yihuta atwaye amarira mu biganza, dusigara twitsa imitima, nyuma y’ akanya katari gato,

Mama Belinda-“Namwe mujye mundebera ishyano ababyeyi tugusha, Belinda ntacyo yigeze amburana kuva mu buto bwe ariko ndebera yaranze anzanira icyo nzafatisha amaboko abiri”

Twakomeje guceceka hashize akandi kanya gato nawe arahaguruka,

Mama Belinda-“Yewe, reka ngende, musore, wihangane ntabwo twari tuje gutonganira hano ahubwo twari tuje kugufasha ngo tunamenye ibyakubayeho, wihangane kandi humura hano urisanga”

Leon-“Urakoze Mama! Ndabashimiye pe!”

Amaze kugenda twakomeje kuvuga kuvuga buri wese uko abibona,

Gentil-“Ariko njyewe ndabona ibyo Belinda avuga aribyo! Kuba Billy yaramuhindutse ntabwo bivuze ko bikuraho kuba barabyaranye umwana kandi yavuye mu rukundo nubwo rutarambye, rero icyo mama we atari azi nuko Billy yabaye undi kandi nta kindi yabihinduraho”

Leon-“Ahubwo Mama Belinda agize amahirwe abimenya kare, ubwo iyo aza kubimenya yaramushyingiye umukobwa we?”

Gentil-“Kimwe nuko erega Billy ashobora kuzahinduka akihana akaba umusore ukwiye gushyingirwa akava mu bujura”

Njyewe-“Yewe! Sinzi ko bishoboka! Billy ndamuzi, twarabanye! Sinzi niba shobora kuzahinduka!”

Nyuma y’ akanya gato dutuje,

Leon-“Songa! Nagiraga mbasabe ikintu kimwe sinzi niba bishoboka….”

Njyewe-“Tubwire turakumva nta kibazo Leon! Urabizi kuva kera warisangaga si ngombwa gusaba umwanya wo kuvuga”

Leon-“Nyine! Murabona ibi byambayeho navuga ko ari ibyago mu bindi ariko kandi nagize Imana mbagwa mu maboko murandamira, ni muri urwo rwego rero nifuzaga ko niba ntacyo byaba bitwaye twakomeza kubana tugafatanya byose, nanjye niteguye gutanga uruhare rwanjye”

Njyewe-“Eeeeh! Ese n’ibyo? Ndumva ku giti cyanjye nta kibazo! Urabizi umunsi nanjye nagusabye ubufasha ntabwo wigeze umpakanira! Kuri njye nta kibazo mbibonamo rwose!”

Gentil-“Wa mugani se warenga ku nshuti n’abavandimwe ukerekeza hehe?”

Leon yadukoze mu biganza dukomeza kuganira amasaha akomeza gukura tugiye kuryama sinzi uko nibutse ibyo Gentil yari yinjiye avuga,

Njyewe-“Ariko nta muntu numvaga avuga ko agiye kuvuga ijambo ry’ abagabo ra? Byaje guherera hehe?”

Gentil-“HHhhhhh! Nawe urishyuza ugakabya Songa! Ni njyewe ariko amasaha arakuze! Ijambo ryiza nzarivuga ubutaha”

Njyewe-“Ntacyo n’ejo n’ umunsi”

Twagiye kuryama, mu nzozi zitaburagamo Teta nongeye kumubona muhereza ya mpano ya telephone nari nkibitse ahatagera imvura, nakangutse nshigutse. Ntangira kwivugisha mu mutima,

Njyewe-“Ariko se kuki nanga nkakubona Teta? Ko nakurekuye ukagenda kuki ukomeza kungaruka mu nzozi, akaba amahuriro yanjye nawe ntashobora gukwepa ngo mpunge iyo gahunda mba ntagiranye nawe?

Kuki se ukomeza unsura kandi waransize undeba ukanyereka igihandure nkamenya ko hari icyo utari uzi, ko wirengagije urwo nabonye nakubwiraga ko nazinutswe, nakubahira ko wampamagaye mu bandi ukampa amahirwe nabyo ukanyereka ko byarangiye?

Ndagusabye nzozi zajye ntuzagaruke aha hantu, maso yanjye ahumuriza nsinziye siba mu mboni ibi bihe binyereka ko ubeshya ureke uw’ abandi agumane n’ amahitamo ye, nanjye nkomeze ubuzima buzira agahinda katagira gihoza, Mana yanjye niba unyumva ndagusabye umva gutaka k’ umutima umenetse”

Namaze kwitsa umutima ndabyuka njya kwitegura nerekeza ku kazi, mu masaha ya saa sita ndi mu biro hamwe na Bosco nibwo numvishe umuntu ukinguye….yari Jolie

Jolie-“Songa! Bite?”

Njyewe-“Ni sawa Jolie!”

Jolie-“hariya hanze hari ugushaka!”

Njyewe-“Unshaka? Uwo se ninde kandi?”

Jolie-“Ngwino uramubona yewe!”

Narasohotse ngeze hanze yari Gihozo! Nkimubona naratunguwe nibaza uko yaba yageze aho, ndatambuka ndamusuhuza,

Njyewe-Giho! Amakuru yawe?”

Gihozo-“Ni meza Songa! Bite se wowe?”

Njyewe-“Ni sawa, aha na hehe se?”

Gihozo-“Sha nari njye kureba Manager wanyu, yari yambwiye ngo nze kumureba”

Njyewe-“Uuuh? Muraziranye se?”

Gihozo-“Oya ntabwo tuziranye Songa! Ni nabwo bwa mbere tubonanye, Teta wawe niwe waduhuje”

Njyewe-“Uti Teta wanjye?”

Gihozo-“Ko mbona ubisubiramo nkibigutunguye Songa? Ko mbona bisa naho hari icyo ubitse ku mutima?”

Muri ako kanya natuje umutima ndeba kubwira Gihozo agahinda kanjye aho twari duhagaze aho…kurega Teta muyandi magambo gusa mbona ko nta mpamvu yo kumushyira hagati y’ amahitamo atagizemo uruhare mpitamo guceceka ndatuza hashize akanya gato,

Njyewe-“Giho! None se Manager wamubonye?”

Gihozo-“Yego twabonanye n’ ubutumwa yabumpaye nuko nanze kugenda ntagusuhuje nzi ko ukorera hano”

Njyewe-“Urakoze cyane Giho!”

Gihozo-“Uzaza kudusura ryari se aho tugiye kwimukira?”

Njyewe-“Yeee? Mugiye kwimuka se?”

Gihozo-“Uuuh? Ntabwo wari ubizi se? Teta ntabyo yakubwiye?”

Njyewe-“Harya….banza ashobora kuba yarabimbwiye ndi mu kazi kenshi bikinjirira hamwe bigasohokera ahandi...”

Gihozo-“Sha twatangiye kwimuka rero ngira ngo ibibazo by’ inzu twabagamo byo urabizi, Manager rero niwe wakomeje kudufasha”

Njyewe-“Eeeeh! Giho! Ntacyo ubwo….”

Nabuze icyo ndenza kuri ibyo Gihozo aransezera aragenda nsigara nibaza byinshi, koko nabonye ko nasigaye kuree….kure cyane koko nemeye ko nagombaga kurekura by’ ukuri ndetse ngaca indi nzira.

Nimugoroba mu ishuri nikanze telephone yanjye isona ndebye mbona ni nimero ntazi, nakomeje kubyirengagiza bibaye ubugira gatatu ndasohoka nitaba vuba,

Njyewe-“Helloo!”

Nahise numva ijwi rya Gentil ndarimenya,

Gentil-“Songa! Bite se? Wamenye se?”

Njyewe-“Hhhhh! Nakumenye cyane Gentil! Nawe se burya ujya umenya uko bahamagara?”

Gentil-“Ariko ntukansuzugure Songa! Urumva nayoberwa uko bakoresha telephone nubwo nize make?”

Njyewe-“Natebyaga Gentil! Ahubwo se umaze kukishashura uri kumpamagara ngo wumve ko ari kazima?”

Gentil-“Hhhhh! Wabimenye! Ubu mpagaze ku iduka! Ahubwo se uranyumva neza cyangwa bampangitse?”

Njyewe-“Ndakumva neza rwose! Ishyura ahubwo umbwire aho ngusanga tuyimeneho amazi”

Gentil-“Turirirwa tujya kure se? Uze kubanguka ahubwo duhurire kwa Buryohe harya hepfo yo mu rugo!”

Njyewe-“Ntiwumva se! Ahubwo reka nze mpite nze!”

Gentil-“Humura genza gake aho uzira uradusanga!”

Njyewe-“Ok! Sawa noneho naha mukanya”

Sinjye narose ishuri rirangira feri ya mbere hari aho Gentil yari yambwiye, nasanze biteretse icyo kunywa nanjye baranyakira dukomeza kuganira yewe na mucoma aratwitaba.

Nyuma y’ akanya gato tuganira,

Gentil-“Songa! Leon! Naho ubundi nari nabatumiye ngo dusangire, hari ukuntu ugira utya ukaba uhembewe imirimo y’ amaboko yawe ukishimira ko Imana yakugiriye ubwo buntu uri kumwe n’ abavandimwe!”

Njyewe-“Ntiwumva se! Ejo burya nari nabiketse! Nabonaga ukuntu umwenyura nkabibonamo akantu”

Gentil-“Hhhhh! Wowe erega turaziranye…naho ubundi ntabwo nabura gushimira Songa by’ umwiharimo, ntabwo nari nzi ko hari umunsi uzagera nanjye nkicara ahantu nkaha ngasengera ariko ubu maze kubona ko byose bishoboka iyo ufite ukumva akagutega amatwi,

Ubu ikizere ni cyose muri njye, nagize umukoresha w’ igitangaza kuburyo mufata nk’ umubyeyi….Songa we arabizi…., ibyo byose mbishimira Imana kandi binyibagiza ubuzima bushaririye bw’ akahise, dusangire k’ubuzima bwacu!”

Twarasomye turatereka,

Njyewe-“Urakoze Genti! Ntawe bitashimisha! Wowe na Leon! Nongeye kubashimira ko dukomeje gufatanya muri byose dusenyera umugoze umwe! Ariko nari mfite n’ igitekerezo!”

Leon-“Ikihe gitekerezo?”

Njyewe-“Buriya nta kuntu twakwimuka tugashaka inzu nini twisanzuriramo ko hariya hantu tuba ari hato?”

Gentil-“Ariko nanjye narabitekereje! Birakwiye pe!”

Njyewe-“Ubwo ubyemeye na Leon ntakuntu atabyemera, nari mfite impungenge ko urababazwa no gusiga rya funguro rya mugitondo ryo kwa nyokubuja wari umaze kumenyera”

Gentil-“Hhhhh! Songa! Harimo n’ inkyuro!”

Twese-“Hhhhhh!”

Twakomeje kuganira umwanzuro uba uwo, nyuma y’ iminsi ibiri inzu twari twayibonye, nimugoroba mbere yuko turamuka twimuka nibwo twagombaga gusezera Mama Belinda.

Natashye kare ngeze mu rugo nsanga Leon yatashye ariko Gentil dukomeza kumutegereza turamubura, mu kumuhamagara kuri telephone tukumva itariho dukomeza kwibaza kubyamubayeho.

Twakomeje gutegereza ariko turaheba, bigeze nko mu masaha ya saa tatu nibwo twabonye we na Mama Belinda binjiye, mu kumwitegereza nabonaga asa n’ uwakonje aradusuhuza yinjira mu nzu.

Ako kanya nanjye nahise ninjira ndetse na Leon twari twicaranye hanze arinjira, nkomeza kumwitegereza,

Njyewe-“Genti! Bite ko watinze gutaha kandi ukaba uje wasuherewe byakugendekeye gute?”

Hashize akanya yitsa umutima arahindukira,

Gentil-“Songa! Urabizi kuba ndi hano ni wowe, ntabwo nifuzaga kugeza aho dutera indi ntambwe ngo nsigare kuko aho ndi hari andi mahirwe, nifuzaga ko dukomeza gusangira ubuzima ariko muri aka kanya niba muri abasezera nimusezere ntabwo tukijyanye……………………..........

Ntuzacikwe na Episode ya 86 yiyi nkuru “Nanjye si njye” ejo mu gitondo

Genesisbizz

Related Articles

Ibitekerezo

  • - general

    Mwanditsi mwiza rwose urakoze. ariko buri gihe mu nkuru zawe utwereka urukundo rutsinda kdi siko bihora. ubu naha uzazenguruuuuuuuuuuuka uhuze Teta na Songa. kubwanjye siko byagahoze. Buriya uhinduye umuvuno Teta agakurikira cash Songa akishakira undi byaza kurangira Teta aabaye isomo ry'abakurikira amafranga bakahakura ibyo batatekerezaga. Erega nubwo ari inkuru yagana akariho da

  • - moses

    mwaramutse ho mwanditsi wacu dukunda kndi tunubaha kubera inamaze nziza sha akakantu karatwubaka peeeee arko ikigaragara nuko maman belinda ashobora kuba abyara genti peeee

  • - Bemeriki

    Nyine songs kuri teta wae ihangane ufite inkwi irya ibihiye peeee gusa muzasubirana cg uzabona undi

Igitekerezo cyawe kirashyirwaho aruko gisusumwe

TANGA IGITEKEREZO