Episode 91: Natashye nuzuye ibyishimo nsanganizwa urusaku rw’utabaza

Ngeze mu ntambwe nka makumyabiri ngo ngere mu rugo numvishe abatongana ndikanga, ndahagarara… muri ako kanya numvishe ijwi rya Leon atongana cyane ibikoba birankuka ako kanya ntera intanbwe ndende, nkubita umuryango wo ku gipangu ndinjira,

Leon-“Amboo! None ho ibintu bigiye gusobanuka ubwo Songa aje, tugiye kubaryamisha tubadihe mpaka!”

Leon wari kumwe umwana w’ umuhungu wari umukozi wacu, buri gihe yazaga guteka yarangiza agataha ndetse hari n’ umukobwa nawe wakoraga mu baturanyi bari bafitanye agakungu, rimwe na rimwe hari ubwo twatahaga tugasanga bigabije inzu yose, bariho baburana byacitse….,

Umukobwa-“Arampa telephone y’ abandi! Arampa telephone y’abandi cyangwa mumuhembe ayo yari kuzakorera uyu mwaka wose ampe amafaranga nishyure telephone y’ abandi”

Ako kanya nahise mbaza vuba,

Njyewe-“Hano se byagenze bite noneho ko mbona…?”

Leon-“Shaka inkoni ahubwo tubashyushye amabuno atote dore nyuma y’ agakungu kabo batangiye no kuyogoza cartier biba”

Njyewe-“Ngo? Ibyo uvuga se koko nibyo?”

Leon-“Ahaa! Dore ngo noneho uyu mukobwa yibye tepehone y’ abandi ayizanira Kadogo nyuma yo kuvumbura ko uyu mukobwa ari we wayibye bari kwitana ba mwana umwe ati nayiguhaye undi ati reka da!”

Njyewe-“Hanyuma se Leon! Ni wowe wabahaye umwanya hano ngo baburane…nako basubiranemo?”

Leon-“None se ko uyu mukobwa aje asakuza aca igikuba ashaka no kwinjira mu nzu ahubwo!”

Njyewe-“Ngo? Eeeeh! Mbare kabiri ntakibabona hano”

Leon-“Urakomeje se?”

Ako kanya wa musore wadutekeraga yahindukiye vuba asohoka yiruka umukobwa nawe amwoma mu nyuma jugujugu bagenda batyo.
Bamaze kugenda,

Njyewe-“Leon! Nawe nizeraga koko nkaho wakuye agakungu mu rugo ngo ugiye kumva ibirego by’ amafuti yabo?”

Leon-“Ahubwo ibyo ukoze wowe urabona ari byo? Buriya yufashije iki Kadogo nk’umukozi wawe?”

Njyewe-“Reka reka ntukivange mu bintu byose, uziko buriya udacunze neza washiduka ari wowe ubaye umujura”

Leon-“Wa muugani buriya Kadogo inkoni zimurembeje ntiyavuga ko ari njyewe yayihaye kuko ari njye ufite uko yakwishyura?”

Njyewe-“Wakabimenye se? Ahubwo se basatse bagasanga iri munsi ya matora yawe wabigenza ute? Erega abantu basigaye bazira amaherere ku tuntu duto duto!...nako uwakubwira ibyambayeho!”

Leon-“Ibyakubayeho?”

Njyewe-“Leon! Uziko bampagaritse ku kazi…nako banyirukanye mu kinyabupfura?”

Leon-“Cyo re! Ngo bakwirukanye?”

Njyewe-“Hmmm! Byose atari Teta se?”

Leon-“Teta nanone se kandi? Nyamara Ahaaa!”

Njyewe-“Ibyo tubireke n’ ubundi ntacyo uteze kubihinduraho, ahubwo ngeze hano inyuma ntaha nkuka umutima! Numvishe ijwi ry’ umukobwa ngira ngo kabaye, uziko nabanje kumviriza nkikanga ari Teta wageze aha”

Leon-"Reka da?”

Njyewe-“Hmm! Uzi umujinya ninjiranye?”

Leon-“Hhhh! Ariko rero nawe abakobwa bazagusaza! Uziko aricyo kintu kibera mu mutwe wawe gusa? Ikibazo cyawe rero ntujya unava ku izima, ubundi ko mbona bose bagusiga mu marira wazazinutswe? Songa! Urakabije pe!”

Njyewe-“Reka reka! Ubwo se uba ubona bikabije? Nta kidasanzwe, ahubwo wowe buriya ni wowe mba numva ushobora kuba ufite ikibazo gikomeye kuko no mu nzira ntabwo twari twahura n’ umukobwa ngo mbone ukebutse byonyine”

Leon-“Ubwo se ushatse kuvuga iki?”

Njyewe-“Nshatse kuvuga nyine ko ushobora kuba ufite ikibazo cy’ uburwayi bw’ intinyi!”

Leon-“Hhhhh! Songa! Ntabwo nari nzi ko untekereza utyo! Burya bwose ni ako gatebo wanshyizemo igihe cyose tumaranye?”

Njyewe-“Hhhh! Nibintu byigaragaza ariko? Ahubwo mbwira, ubundi ubwo burwayi bwawe bwagufashe gute? Uba wumva ubabara hehe?”

Leon-“Songa! Nubwo ntarwaye nkuko ubitekereza nkawe ariko niyo narwara intinyi uko nababara kose simbabare ndwana n’ umutima nkawe, ngo ndare amajoro nkanuye nkawe, ngo mbone ibitotsi ndare nshiguka nkawe”

Njyewe-“Eee! Leon! Umbwiriyemo! Ariko ntacyo, ko nabonye umuhoza se! Hhhh! Mbaza ngo mvuye hehe?”

Leon-“Hari ahandi se ubwo nyine?...ni mu bakobwa nta kindi kiba mu mutwe wawe, ubwo ni wa wundi uharaye wagusajije uzinduka iya rubika urwanira envelope ngo ugiye mu migati….”

Njyewe-“Ntacyo bintwaye Leon! Ninshaka nzabe iciro ry’ imigani, wowe nuko utigeze utera intabwe igana urukundo ngo winjiremo neza wumve icyo abandi bakurushije, nta muntu wigeze akunda by’ ukuri uzinukwa, umutima washenguwe, washegeshwe uhora ushaka ushishoza ngo wishumbushe”

Leon-“Ariko rero turetse ibyo wenda simbujije ariko ukwiye no kwimenya Songa! Ko ibyo gukundana nta mahirwe wigeze ubigiramo, ko wiriye ukimara ukarengwa, hari icyo wungutse basi ngo nshingireho ngushima?

Songa! Ntabwo wakabaye uta umwanya wawe wirukanga inyuma y’ abakobwa nkaho aricyo cyagukuye iwanyu, ufite umuryango ugomba kwitaho nk’ inshingano, imbere yawe naho harasaba gufata intego n’ ingamba…mbona amaherezo uzasara nudatuza ngo ushyire umutima hamwe ibyo uzabigemo ufite gahunda yo gushaka umugore ukubaka umuryango uhesha ishema ababyeyi”

Njyewe-“Nanjye nagaketse indi nama wangira, none se nzarushingana nuwo ntakunze ngo nawe ankunde, cyangwa wibwira ko hari aho babagurisha ngo nzamugura?”

Leon-“Songa! Ubwo koko utambeshye urukundo ufite ubu nurwo gutegura kubana cyangwa ni rwa rundi rwa secondaire wicuza wabuze ugataha ukubita agatoki ku kandi?”

Njyewe-“Ndumva uri kunsindisha ntanyoye reka njye kureba uko nigenza ahubwo se kiriya cyana ubundi cyazanye akavuyo hano cyatetse?”

Leon-“Yatetse ahubwo njye utantegereza nariye, nshaka kuryama kare nkazinduka niga nkomereze mu myitozo muri week end dufite match”

Njyewe-“Nta kibazo, nanjye reka nirwaneho ariko ugende wikoreshe inama Leon! Iyo ndwara urebe uko wazayivuza naho ubundi….”

Leon-“Ahubwo wowe ugende witekerezeho mbona ari wowe urwaye, nkaho wahangayikishijwe nuko bakwirukanye ku kazi uri mu bakobwa?”

Nakomeje mu nzu nsiga Leon wari waraheranwe n’ ubwigunge, ku mutima nti iyaba wamenyaga igisabo njishe uzanyibagiza amateka y’ agahinda natewe n’ abamubanjirije, Amanda iryo joro nari nararangije kumwimika.

Mu gitondo nakanguwe n’umushoferi wari waraye nzira azanye ibimasa wampamagaye ambwira ko agiye kugera ku ibagiro, nagombaga kujya kuhibera kuko noneho nari mfite umwanya.

Nageze ku ibagiro abakozi batangira gukora akazi ari nako ibiparu byari byose, barangije barapakira twinjira mu modoka dutangira kuzenguruka tugemura kuma busheri yose ya Boss! Uwo munsi nabonye ibipimo bitandukanye nibyo nari nsazwe mbona birantungura, ibiro byari byiyongereye n’ amafaranga birumvikana.

Ku mutima natekereje ko abasore nizereraga bashobora kuba barambeshyaga gusa nanga kubacira urubanza ndatuza kuko nejo nari nzagaruka nkamenya neza ukuri kwabyo.

Umunsi wakurikiyeho nibwo nemeye ko nari narahombye cyera, kuva uwo munsi inyungu yarazamutse mbona neza ko abo nizeraga banshiye ruhinga nyuma bitwaje ikizere nabahaye bagahemuka bigenera ibirenze kw’ igeno twumvikanye kuzajya mbagenera.

Nyuma y’ iminsi ine gusa abakozi bose barijyanye nshaka abandi bakozi bashya, ntangira kujya njya no kwigurira inka inyungu noneho iza ije, ikizere cyanjye cyose ngishyira ku nyama ndetse na Boss aranshimira, ankodesha ahantu hamwe nzajya nshururiza inyama by’ umwihariko…mbega aho nzajya mbarizwa nkuko nari narabimusabye, anyizeza ko ninkomeza gukora neza tuzarambana kandi azanteza imbere.

Iminsi yakomeje kwicuma, ntabwo nongeye kumenya amakuru ya Teta yewe namwibukaga ari nka Gentil umumbajije, Leon twabanaga twabonanaga gake…byabaga ari nka tombora kuko nazindukaga ngenda hakuri kare ndetse ngataha bwije mvuye kwiga.

Amanda nakomeje kumwitaho uko bikwiye nawe akomeza kuntungura umunsi ku munsi, mu gitondo iyo nabyukaga nirukira ku ibagiro ntamuhamagaye byasabaga ko musaba imbabazi, nimugoroba nkaza kumutegereza avuye mu kazi tukavugana tukabona kuryama rimwe na rimwe ngapimanya saa yine nkajya kumucaho ku kazi tugatahana.

Twakomeje kwiyumvanamo ndetse bigera hahandi gufata umwanya wihariye ngo mubwire ko mukunda mbihigika, twese twari twararangije kurohama muri iyo nyanja, natera ndagukunda ntambwire ko nkoze ahubwo akanyikiriza ngo nanjye ndagukunda, muri make ntawakundaga undi ahubwo twarakundanaga!

Oooh! Byafashe indi ntera kenshi akajya aba ari mu rugo, iyo yazaga Leon yahitaga agenda akaza gutaha yarakaye ndetse akamara iminsi atamvugisha uko byahoze namubaza akanyihorera.

Habura umunsi umwe ngo nerekeze ku ivuko, navuye ku kazi nerekeza mu mugi, nta kindi cyari kinjyanye usibye kugura ikote n’ inkweto byo kuzagenda nambaye.
Nagezeyo mpahurira na Kalim twari twavuganye, ajya kumfasha gucagura, maze kubona irinkwiye ntabwo nibagiwe igitenge n’ umukenyero bya Mama ndetse n’ imyenda ya bashiki banjye nubwo ntari nzi neza uko basigaye bangana, napfuye kugura iminini bazakuriramo n’ inkweto.

Tuvuye aho njye na Kalim twanyuranye ahantu hamwe, hari kuri restaurant yakundaga kungurira inyama nyinshi, bari barabaye abakiriya b’ imena nanjye nari narabasezeranyije kuzajya mbarangira abakiriya, tukihagera,

Kalim-“Eeeeh! Aha hantu se wahamenye ute noneho ko nawe usigaye undusha umugi?”

Njyewe-“Hhhhhh! Aha se? Aha hafitanye isano nawe, iyo utaza kumpa inzira yibi nkora ntabwo mba narahamenye!”

Kalim-“Ntiwumva se! Reka noroshye umukandara noneho ubu nibwo ngiye kurya ukishyura, uyu munsi banza ufite ijambo ushaka kumbwira nabibonye!”

Njyewe-“Hhhhh! Nakubwira iki! Wabimenye uyu ni wa munsi wigeze kumbwira facture izaba iyanjye, icara rwose urye aho uhagira nibashaka bagucishe mu misoto”

Kalim yankubise mu kiganza baza kutwakira, turarya turanywa aho duhagiye mfata umwanya maze ndamubwira,

Njyewe-“Kalim! Ngira ngo wenda ntabwo muri uyu mwanya turi hano ngira ngo mvuge byinshi ahubwo nawe amaso araguha kandi uyu munsi wari uwiteze, ni wa munsi wanteze nzakubwiriraho ijambo ryiza ko inzira wanyoboye nayiyobotse nayo ikankundira ikampira, ubu nkaba nkomanga ku gituza akandi kaboko kari ku mufuka w’ inyuma w’ ipantaro nssmbaye numva aho ugeze ubyimba”

Kalim-“Hhhhh! Nawe rero ukuntu ubivuga nta gushidikanya ndabyumva ko hari ikimaze kugeramo!”

Njyewe-“Utyo! Nibyo navugaga uretse ko nanze kubivuga nishongora!”

Kalim-“Ndabyumva erega nanjye ntabwo ndi umwana”

Njyewe-“Niyo mpamvu ureba ikote inyuma yanjye, ubu ntangiye kumva ko ngeze muri cya kiciro cyo kwambara imyenda yadozwe n’abahanga, yayindi yambarwa rimwe mu kwezi kuri bamwe, rimwe mu cyumweru ku bandi ubu ntangiye kumva ko njye nanayambara no ku mibyizi”

Kalim-“Uuuh? Ko numva utangiye no gukabya Songa! Aho nturi nka wawundi wikanze imbeho agatwika imyenda yambaye ngo yote? Ahubwo se nturi nka wawundi wahaze ijoro rimwe akamena isahani nk’ yibwira ko atazongera gusonza?”

Ayo magambo ya Kalim nongeye kuyatekerezaho koko mbona ko natandukiye nkisumbukuruza nkibwira ko ahari nageze hahandi nicujije ko ntari, ko iyo aba ariho ndi ntari kwimyiza imoso…namenye ko Teta akimbungamo…, nyuma y’ akanya gato ntuje,

Njyewe-“Umbabarire Kalim! Ikinteye kuvuga ibi ni cya kindi, mba numva naba undi wenda ngasatira abansize nkabura byose, ntakubehye mba numva ndi mu masiganwa ngo ndebe ko nafata Teta akabona ko ibintu ari ibishakwa,bonye Amanda umukobwa mwiza ku mutima no kumubiri, ariko iyo turi kumwe nta kindi mbona impande yacu atari amaso ya Teta atwitegereza, najye mwereka ko atari mukobwa wenyine…byahe se?”

Kalim-“Songa! Ibyo uvuga ndakumva cyane, iyo ugize igikomere mu rukundo uwo wakundaga akaguta uhora wumva wakora icyo ari cyo cyose ngo wiyambure igisuzuguriro ariko tekereza neza ko ntacyo wakora kiruta kubaka ubuzima bushya bwawe uzishimira, ukareka kwirya ngo wimare wirukira kuringanira nibyagusize”

Nyuma y’ akanya gato,

Njyewe-“Naho ubundi nyuma yibyo, ejo ndasimbukira ku ivuko, reka ntahe nitegure nzaguhamagara nageeyo nkubwire uko bameze”

Kalim-“Ni byiza cyane Songa! Burya icyo wakora cyose naho watumbagira ukagera kumanuka ukibuka aho wahagurukiye bitera andi mahirwe, komereza aho rwose”

Njyewe-“Noneho reka nake ya facture tugende”

Kalim-“Yake rwose kandi uyishyure ubikunze”

Twasekeye rimwe ndahaguruka njya keishyura turasohoka, tugeze ku muhanda dusezeranaho umwe afata inzira ye”

Mu nzira manuka njya mu rugo ubwenge n’ umutima byari byibereye ku ivuko, mbona ukuntu tuzaseruka aho nakuriye twiboneje, nkanyuzamo nkamwenyura, bidatinze ngera mu rugo.

Mu gihe nari ngiye kwinjira muri salon, numvishe ibintu bimeneka umutima urankuka, mu gutega amatwi numvishe ijwi ry’ umukobwa utabaza ndarimenya…ryari irya Amanda… mu gukora kurugi nsanga rudadiye ntangira kuruhonda, biranga biba iby’ ubusa nzenguruka mu gikari, nkubitana na Leon ku rugi wari wambaye ubusa hejuru tugundagurana asunika akinga nanjye nsunika nkingura……………………………..

Ntuzacikwe! Iyi nkuru “Nanjye si njye” iracyakomeza….!

Genesisbizz

Related Articles

Ibitekerezo

  • - Egide

    Leon se afashe Amanda bahu? Birabe ibyuya!

  • - GILBERT

    Ndumiwe Léon se agiye kumvuriraho bah😅😅😅😅😅

  • - JP

    Amatsiko nimenshi KBS mwanditsi burikanya Inkuru irangira twumva ariyo igitangira urumuhanga KBS courage

  • - J pierre

    Bravo songa! Ufite amahirwe yo kugira umuntu nka Kalim naho Teta komeza umwibagirwe wishaka kurushanwa na mamager ubaka urwawe rukundo, naho twizere ko atari amanda usanze atabaza ahubwo ari wa muyaya wo mubaturanyi Leon ari kwivurizaho uburemba

  • - Kabera

    UMUJINYA WA LEON(KUBWIRWA KO ADAKUNDA) N'ISHYARI BIMUTEYE GUFATA KU NGUFU AMANDA? AMATSIKO NI MENSHI THANK YOU MWANDITSI

Igitekerezo cyawe kirashyirwaho aruko gisusumwe

TANGA IGITEKEREZO