Episode 92: Navuye ku ivuko nsanga umwijima ubuditse kw’ icumbi hampamagara

Mu gihe nari ngiye kwinjira muri salon, numvishe ibintu bimeneka, mu gutega amatwi numvishe ijwi ry’ umukobwa utabaza ndarimenya…ryari irya Amanda… mu gukora ku rugi nsanga rudadiye ntangira kuruhonda, biranga biba iby’ ubusa nzenguruka mu gikari, nkubitana na Leon ku rugi wari wambaye ubusa hejuru tugundagurana asunika akinga nanjye nsunika nkingura,

Njyewe-“Kingura! Kingura hano Leon! Ndashaka kumenya ninde numvishe utabaza muri salon?”

Leon-“Aaah! Genda gake wana”

Njyewe-“Ngo ngo…ngende gake? Leon! Va ku rugi ninjire ku neza wishaka ko njye nawe duhangana”

Leon-“Noneho niba wumva ushaka kuntegeka uko wiboneye ntaho winjira noneho! Uraza uhondagura hano nkaho ari ikizu k’ igihuku kibamo ibisambo n’ ibihunyira? Ntukiyemere wana umenye ko dufatanya kwishyura iyi nzu, urabizi wakomeje kumbwira ko ushaka kujya wishyura wenyine ariko nanjye nabibonye kare, nanga ko uzajya ubyitwaza unsuzugura, bimenye neza ntabwo unshumbikiye ngo ngure inzira!”

Njyewe-“Rekura urugi Leon! Uwo mukobwa urira mu nzu namwumvishe ni Amanda! Kingura numvishe intabaza ye!”

Leon-“Wumvishe atabaza se abaye iki? Ubwo uraje umbeshyere kandi waransuzuguye ukambwira ko intama yankandagiye, nizere ko utatinyuka gutekereza ibyo kumufata ku ngufu?”

Leon yakomeje gusunika urugi nanjye nkomeza guhatiriza birangira ninjiye, nkomeza muri salon, koko nasanze Amanda yicaye yubitse isura mu biganza.

Ibintu byose byari bitereye hejuru, nihuta vuba musanga aho yari yicaye nsha bugifi imbere ye,

Njyewe-“Amanda! Ama! Ni njyewe Songa! Mbwira byagenze bite wowe na Leon?”
Nakomeje kubura isura ye yari imuri mu biganza bigoranye aremera duhuza amaso, kakana nabonaga mu maso ye muri uwo mwanya nabuze aho kagiye, ibiganza bye ndabisingira,

Njyewe-“Mbwira Ama! Ni bite? Bigenze bite ko mbona hano habaye isibaniro nkaba nsanze utabaza, Leon akugize ate?”

Aho kunsubiza Amanda yakomeje kundebana agahinda n’ amarira amuzenga mu maso,

Njyewe-“Ama! Bite ko utambwira, Leon akugize ate?”

Amanda-“Ntacyo”

Njyewe-“Oya…oya mbwiza ukuri wigira icyo unkinga, nta kuntu wataka ntacyo ubaye, ikindi kandi ntabwo Leon yapfa kunkingirana gutyo gusa ambuza ko ninjira, mbwira ikibaye ndashaka kukimenya ku bubi na bwiza…gusa hari icyo ntabasha kwihanganira”

Amanda yakomeje kwitsa umutima nanjye nkomeza kumwitegereza mu maso, hashize akanya katari gato ahita ahaguruka yimeza neza,

Njyewe-“Uuuh? None se ko uhagurutse….”

Amanda-“Reka ngende Songa!”

Njyewe-“None se uhisemo kugenda nta kintu umbwiye? Cyangwa ubundi ntabwi ari njye wari waje kureba?”

Amanda-“Mbabarira ngende Songa! Ndagusabye ndeka ngende”

Njyewe-“Ariko rero ntabwo mbyumva? Ama! Ntabwo bishoboka ko ushobora kwanga kunsobanurira ibyo nsanze aha, ugahitamo kwigendera?”

Amanda-“Songa! Mbabarira ndumva ntameze neza, mperekeza ntahe cyangwa niba nkugoye nabwo nta kibazo ndijyana”

Njyewe-“Ariko se ibi nibiki koko?”

Nyuma y’ akanya gato nahagurutse aho nari nshiye bugufi, Amanda ajya imbere dusohoka mu rugo, amagambo yari make uko namuvugishaga yansubizaga ubundi akanyihorera.

Tugeze hafi y’ iwabo turahagarara, kari akanya ko gutandukana, akinjira iwabo nanjye ngasubira mu rugo,

Njyewe-“Ama! Nubwo muri aka kanya umutima wanjye utanyuzwe ariko kandi ngushimiye ko wari wantunguye ukaza kunsura, sinzi niba ibyo ntekereza koko ari byo….nako ntagushidikanya hari icyo wampishe gusa nuza gutekereza kabiri cyangwa gatatu uraza gusanga nta mpamvu yo guhisha uwo wakagombye guhishaho,

Ama! Ntabwo nabura kukubwira ko kumpisha icyabaye ubwo nabasangaga wowe na Leon byongeye kunyereka ko nshobora kuba nibeshya ntari ubuhungiro bw’ umutima wawe nkuko wabimbwiye,

Ese ubu naba ndi iki imbere yawe aho ushobora kumpisha ko ubabaye kandi mbona amarira ku maso yawe? Ama! Iyaba wumvaga uko umutima wanjye utera muri aka kanya nibaza igihe nzabera umwizerwa, uko bucya n’ ibihe bihora bisimburana binyibutsa akahise, ndibaza….ndibaza niba ntashobora kuba ngiye kubabara bwa gatatu nkibuka amagambo Leon yambwiye ansha integer ko nta mahirwe nzagira mu rukundo, ko nkwiye kuva muri iyo nzira nkazinuka nyamara umutima wanjye uhora ushakira ibyishimo aho nabiburiye, ese koko nawe nkuburiyeho amahirwe naburiye kubandi”

Amanda-“Oya wivuga ibyo Songa, mbabarira reka ngende ubwo turaza kuvugana kuri telephone sibyo?”

Njyewe-“Hmm! Ngaho nawe mbwira, waba unkunda ute mu gihe ntari umwizerwa kuri wowe, uru rukundo ndwite ik? Habe no kumbaza iby’ urugendo rwejo, nta ntashyo ku muryango wanjye, nta n’ ishya n’ ihirwe unyifurije koko?”

Amanda-“Ni ukuri mbarira Songa! Ndumva…ndumva ntameze neza erega kandi nakomeje kubikubwira gusa ntabwo washatse kubyumva gusa niba ari ibyo by’ urugendo…ruzakubere rwiza kandi uzasuhuze abo usanze”

Nikije umutima, Amanda arampobera ansoma ku itama, agenda yihuta cyane, amaze kwinjira iwabo nanjye ndahindukira nsubira mu rugo.

Mu kuhagera nasanze uko nahasize ariko hakiri, nari ndurimo njyenyine, nakomeje kwibaza byinshi gusa ntacyo nari kubikoraho, narabyirengagije ntangira gutera ipasi no gufunga neza ibyo nzajyana.

Amasaha yakomeje kwicuma saa mbiri zihereza saa tatu, ntabwo namenye aho Leon yari ari muri iryo joro, njya kuryama, nongeye gukanguka mu gitondo ari Gentil umpamagaye nitaba vuba,

Njyewe-“Hello! Gentil bite se?”

Gentil-“Ni sawa Songa! Warangije kwitegura se?”

Njyewe-“Eeeh! Naraye niteguye rwose, ahubwo se nimero naguhaye zaciyemo Moses mwavuganye yakubwiye uko imodoka ikugeraho?”

Gentil-“Twavuganye! Yambwiye ko saa tatu imodoka iba ingezeho”

Njyewe-“Ariko se nkwizere koko urangezayo cyangwa uransiga mu manga ubimbwire tujye gutega imodoka nk’ abandi bagenzi bose?”

Gentil-“Hhhhh! Barakubeshye wana Afande ntabwo yansinyira permis atabona ko icyuma nkizi, ahubwo mugire mwitegure ndaje tugende hakibona, urugendo ni urwa kare”

Njyewe-“Niko bimeze rwose”

Narangije kuvugana na Gentil, ndabyuka ndasohoka ngeze hanze nakubitanye na Leon, duhuje amaso arayubika, yihuta agira ngo ajye mu nzu,

Njyewe-“Leon!”

Leon-“Ariko se urambaza iki? Kuva ejo umbaza iby’ uriya mukobwa njyewe nshinzwe kugucungira abakobwa?”

Njyewe-“Ibi niki ra? Ibyo se kandi ubizanye ute ko ntabyo nkubajije?”

Leon-“Oya…wenda niba urambiwe kubana nanjye wabimbwira neza ariko utansuzuguye ngo ungerekeho ibyaha Songa!”

Leon wari wabuze amahoro naramwitegereje….burya aho inshuti cyangwa umuvandimwe atangiye kukubera mushya niho wibuka ko nyuma y’ uyu munsi haciye indi myinshi kandi ko ubupfura n’ ubutwari bw’ inshuti nyayo bigaragarira mu guha agaciro icyo zipfana kuruta icyo zipfa maze ndamubwira

Njyewe-“Wigira urwikekwe erega ibyo byarangiye, uwo nagize umwizerwa niwe ubitse ukuri kwibyo mwashatse kumpisha, urabizi kuva twamenyana imyaka ibaye myinshi ntabwo nigeze nkwiyereka mu sura y’ ubuhemu, windusha uburakari ngo uhe intebe icyaha ushobora guterwa nabwo, ahubwo se gahunda imeze ite ko utitegura ngo tugende?”

Leon-“Ntabwo tukijyanye nabihinduye, mubansuhurize”

Njyewe-“Koko se urakomeje?”

Leon-“Nuko bimeze…”

Leon yahise yinjira mu nzu, ntacyo nari kurenzaho namurekeye amahitamo ye, nditegura mu ma saa yine nibwo Gentil yavugije ihoni ndetse ahita ampamagara, mfata utwangushye ndasohoka nsanga aparitse mu muhanda.

Nakinguye imodoka Moses yari yadutije ngo dushyiremo amavuta idufashe mu rugendo, nsuhuza Gentil ndicara ndegama,

Gentil-“Eeeeeh! Songa! Wambaye neza kabisa!”

Njyewe-“Hhhhh! Urakoze Gentil!”

Gentil-“Uziko nari mbanje kukuyoberwa! Wagira ngo ni minisitiri ndakurahiye!”

Njyewe-“Hhhh! Nawe wikabya, rekera aho birahagije”

Gentil-“None se bite bya Leon ari hehe ngo tugende?”

Njyewe-“Wahora niki ibya Leon ko byanyobeye, ngo ntakije ahubwo twigendere”
Gentil-“Uuuh? Yarwaye se cyangwa….”

Njyewe-“Ibye byihorere, buriya erega iyo umuntu yafashe umwanzuro nuko aba yabitekerejeho, twigendere”

Gentil yakije imodoka dufata urugendo rugana ku ivuko, tumaze kurenga umugi dutangira kuganira,

Gentil-“Songa! Kuki utambwiye kare kose ko Moses wa Joannah ariwe uradutiza imodoka? Wabigize ibanga wari uziko amaherezo ntazabimenya?”

Njyewe-“Gentil! Nari mbizi ko aricyo ugiye kumbwira, nabikoze mbishaka ngo nawe uzongere wirebe umenye uwo uriwe, ahari wenda mwaherukanaga uri muri ka kazu ko kwa Joannah none ubu mwongeye guhura aguhereza kontaki”

Gentil yatuje umutima arandeba aramwenyura dukomeza kugenda,

Njyewe-“None se yabashije kukubona arakumenya?”

Gentil-“Oya ntabwo yigeze amenya, gusa namuciye mu jisho ntabwo yari gupfa guhuza Gentil wuno munsi na Zamu wabumvaga bongorerana batashye mu masaha y’ ijoro, ngakingura buhoro buhoro bikaba ibanga ryacu”

Njyewe-“Birumvikana, none se ko utamwibwiye….”

Gentil-“Oya…igihe kizagera, umunsi byibura nzafata umwanya nkamushimira ko yigeze kuntekereza akampa icyo kwambara nubwo Databuja yanze akayitwika ngo ntabwo ashaka ko nsa neza”

Ayo magambo yankoze ku mutima nongera kwitegereza Gentil, nitsa umutima dukomeza urugendo, mu nzira ndende twarashyize turashyika, Mwiza na bashiki banjye bari baje kunsanganira ku muhanda.

Ibyishimo byari byose mbahobera, ndetse n’ abaturanyi barahurura, baradutwaza turazamuka, nongera kwishima mpobera uwambyaye, ibyishimo biramurenga ambaza niba koko ari njyewe abona wabaye undi!

Mama-“Mana wee! Gentil!Ni wowe koko umwana wanjye wabaye gutya? Yeee? Imana igira amaboko! Ndebebe rwose…mundebere Gentil umwana wanjye yabaye umuzungu!”

Njyewe-“Hhhhh! Mama! Ni njyewe da, ni njyewe rwose umuhungu wawe”

Mama-“Ayiweee! Mbega…mugire….aba bakobwa ra, ntabwo byari byashya ngo mugaburire abashyitsi….”

Njyewe-“Oya mwitonde erega ntabwo turi abashyitsi…hari umwana uba umushyitsi mu rugo se?”

Nitegerezaga ukuntu bashyashyana numva ibyishimo muri njye, abaturanyi baraza dusangira ibyishimo, amasaha akomeza kwicuma, aho nari nicaye Mwiza yaraje atwongorera njyewe na Gentil turamukurikira duhinguka mu mbere,

Mama-“Songa! Mwicare mbahe kuruhisho muze kubona imbaraga zibageza iyo mu mugi”

Njyewe-“Uuh? Tugiye kurya se nanone kandi?”

Mama-“Oya mugomba kurya….hano hari n’ agapfundikiye, tunaganire erega umbwire amakuru dore nta mwanya twabonye wo kuganira”

Njyewe-“Oya nibyo Mama! Amakuru se….amakuru yon i menshi, ubu nyine akazi nakoraga babaye bampagaritse….”

Mama-“Ayiwe! Utambwira ibyo Songa! Ngo baraguhagaritse? Bakobwa bakowe ibi ndabigira nte? Wakozi iki mwana wanjye? Urabe utarahemutse kandi kuva mu buto bwawe ntabyo nkuziho"

Muri ako kanya Mwiza na Gentil twabonye bahaguruka baragenda, bajya kuganira ibyabo,

Njyewe-“Mama! Naho ubundi, nanze kubahamagara ngo ntabakura umutima nkabatera guhangayika, akazi nari ndiho uwampaye amahirwe yo kukabona ni nawe watumye nkavaho”

Mama-“Yooooh, none se byagenze bite? Mbwira erega ndi nyoko?”

Njyewe-“Mama! Nazize amaherere, nazize umukobwa twigize gukundana cyera ari nawe nkesha amahirwe nagize bwa mbere mu buzima, ibyacu ni birebire gusa nyuma yuko yigabijwe nuwari umukoresha wanjye ntibyarangiriye aho, yakomeje kubona mbatera icyugazi aranyirukana”

Mama-“Ayiga Mana! ubu se ubayeho gute ko mbona wagira ngo nta kibazo ufite?”
Njyewe-“Mbayeho neza Mama, Imana yakomeje kumfasha, ngira ngo Mwiza ajya akubwira ko agiye kunshakira ibimasa, ubu nsigaye ndi umucuruzi w’ inyama n’ umunyeshuri icyarimwe”

Mama-“None se…ubwo urabikora bikagutunga koko?”

Njyewe-“Cyane rwose! Ubu nta kibazo nawe urabibona”

Mama-“Nukuri Imana ishimwe, ariko disi hari icyo nari niteze ntabonye?”

Njyewe-“Iki se Mama?”

Mama-“Nari nzi ko uranzanira umukazana erega…niyo mpamvu nari natumiye”

Njyewe-“Ese?”

Nyuma y’ akanya gato,

Mama-“Igihe niki erega, none se niba waragize amahirwe ukaba warateye imbere nkuko mbibona, ubu uribwira iki koko? Nkeneye ibirori ntarasaza nanjye ngatega urugori nk’abandi babyeyi”

Nakomeje guceceka, hashize akanya gato,

Njyewe-“Byagakwiye Mama, ariko icyo nabuze ni amahirwe pe! Nawe se…”

Nagize ngo nsobanure ariko mbura aho mpera, ndiyumanganya mpinira hafi maze ndamubwira,

Njyewe-“Humura Mama! Naritaye mu gutwi kandi ikifuzo cyawe ngihaye agaciro, ubutaha nzaza mvuga ijambo rizima”

Mama-“Nuko nuko Songa! Ntiwumva! Ngufatiye iry’iburyo rwose kandi nizeye ko uzabona umugore ugukwiye, utazatuma ubabara mbese uwo nzishimira nanjye”

Njyewe-“Najye uwo ndamushimye Mama!”

Twakomeje kuganira amasaha akomeza kwicuma, ibyishimo byabaye byose buri wese yigera imyenda aza kunyereka, umunsi uciye ikibu baduha impamba baraduherekeza batugeza ku modoka turasezera dufata umuhanda.

Nyuma y’ urugendo rurerure twageze I Kigali, twicara ahantu hamwe ngo tumanure akavumbi tuvuga iby’ urugendo, nongeye gushimira Gentil, bwari bwije ntitwahatinze twaratashye ngo tujye kuruhuka.

Nkigera mu rugo natunguwe no gusanga amatara ataka hari hari umwijima uteye ubwoba maze ncana itoroshi nkomeza imbere ngera ku rugi nsanga rukinze ndakomanga bibaye ubugira gatatu ndazenguruka nsha mu gikari,naho ndakomanga ariko Leon akomeza kunyihorera, iminota ibaye mirongo itatu ngikomanga nibutse ko Kadogo yajyaga asiga urufunguzo mu nzu yo hanze atashye iyo twabaga tudahari.

Kubw’ amahirwe narusanzeyo ndakingura nshana itara, nihuta ngana ku cyumba cya Leon, mu gukingura nasanze icyumba kimpamagara, yagiye cyera………………………….

Ntuzacikwe! Iyi nkuru “Nanjye si njye” iracyakomeza….!

Genesisbizz

Related Articles

Ibitekerezo

  • - Bemeriki

    Rwose Songa inshuti zawe zose ninko kubaka Ku musenyi rwose nawese ndebera bijya gutangira nguwo belinda, Billy baragiye teta none na leon mbega isi ya none weeeee Eddy urakoze cyne kubwinama zuje ubwenge udahwema kuduha.

  • - dou2

    Inshuti mbi koko irutwa n'umwijima w'icuraburindi pe! Ubu Leon atewe ikimwaro n'ibyo yagerageje gukorera Amanda,aho gusaba imbabazi ahisemo gutumuka? Ikibabaje ni uko azaza nyuma asaba imbabazi zitampaye agaciro. Inshuti z'ubu we! Nzaba ndora

  • - GILBERT

    Songs iga kubaho wenyine utuze ukore

  • - Mpiranyi j p

    Cyaze inshuti zirahinduka koko . Ishyari. Ni ribi iyi si ntisakaye urukundo rusigaye rufite abanzi benhi twarakimeretse ariko Uwiteka aracyaturinze nanjye nahuye nibibazo nkibi nanubu narazinutswe uyu mwanditsi muhanuzi nzamushaka tuganire Imana iguhe umugisha

  • - Cornelle

    Gentil aranyuze kbsa ntaho imana itakura umuntu ndumva nsubiranye ikizere cyejo hange murakoze kutwubaba iyi nkuru iteye amatsiko yuko izarangira songa asaze

  • - Habinshuti

    Cya Leon nikigome cyakoze ibara ahubwo amanda yanze kwiteza abantu araruca ararumira nta kundi songa uwarose nabi burinda bucya ihangane, thx eddy

Igitekerezo cyawe kirashyirwaho aruko gisusumwe

TANGA IGITEKEREZO