Episode 93: Bwa mbere n’ubwa nyuma inshuti zavunnye intebe nahaye urukundo

Kubw’ amahirwe urufunguzo narusanze aho Kadogo yajyaga arusiga koko, ndakingura nshana itara, nkomeza nihuta ku cyumba cya Leon, mu gukingura nasanze icyumba kimpamagara, yagiye cyera, nkubitwa n’ inkuba.

Nabanje kugira ngo wenda ndibeshya yaba ari nko muri salon cyangwa wenda yatinze gutaha, nzenguruka inzu yose birangira ngarutse mu cyumba cye, mu kureba neza mbona yazinze utwangushye, noneho nemera ko koko yagiye.

Nikije umutima nsubira gukinga umuryango wo mu gikari, nsubira muri salon ndicara ndatuza, … nongeye guha agaciro icyo Amanda yanze akampisha ntakabuza nemeza ko aricyo cyaba cyateye Leon guhunga.

Nahise ndeba nimero za Leon vuba vuba, mu guhamagara numva ngo nimero mpamagaye ntabwo ibashije kuboneka…yari yayikuyeho kare!

Nyuma y’ akanya katari gato narongeye ndeba nimero ya Amanda, byari nka saa tanu z’ ijoro ya masaha atabonekagaho yari yarangiye, nkanda yes nshyira ku gutwi, nyuma y’ ubugira kabiri isona ikavaho atanyitabye.

Nanze kuryama nihereranye ibyo nari nsanze mu rugo, mpamagara Gentil ndetse na Kalim mbabwira uko bigenze gusa nirinda kubabwirira kuri telephone ibyabanjirije uwo munsi gusa bukeye bwaho umwe ku wundi bambwira ko nimugoroba bazangeraho.

Navuye muri salon njya mu cyumba cyanjye, nkirambika ku buriri karanyiba dore ko nari nanijwe n’ urugendo.

Nakanguwe na telephone yasonaga, hari mu rukerera, mu kureba uwari umpamagaye…yari Amanda, nyuma yo kwitsa umutima nakanze ku cyatsi nshyira ku gutwi,

Njyewe-“Oui! Hello!”

Amanda-“Bite Cheri! Yambiii!”

Njyewe-“Yambii yambii! Waramutse neza?”

Amanda-“Yego naramutse neza, bite wowe se umerewe ute?”

Njyewe-“Nanjye meze neza nta kibazo”

Amanda-“Oooh! Umbabarire ndagukanguye, waraye umpamagaye urambura, nabibonye mu gicuku,niyo mpamvu nkuzindukiye”

Njyewe-“Oya nta kibazo! N’ ubundi nakangutse kare…nako ubusanzwe aya masaha nawe urabizi mba nakangutse”

Amanda-“Yego ndabizi ariko wibuke ko mpora ngusaba kujya uruhuka, urabizi uba wiriwe ukora utaruhuka, niyo mpamvu ubu ndumva nkoze ikosa?”

Njyewe-“Oya humura nta kosa ukoze kuba wazirikanye ko naraye nguhamagaye mu ijoro nkigera aha ngo nkubwire ko nagarutse amahoro, nibwiraga ko nk’ umukunzi wanjye, uwo ntekereza mbere mu bandi, uwo nagakwiye gutaha mbaririza yasigaye amfatiye iry’ iburyo ataza kugoheka atamenye niba nashyitse amahoro,

Ama! Nakomeje gutegereza ngo ndebe ko utanga agatego ariko ndaheba niko kuguhamagara ariko nabwo ndakubura, byahuriranye n’ ibimbungamo nasanze aha nongera kwibaza byinshi gusa ariko…..”

Amanda-“Mana wee! Mbabarira Songa! Wampamagaye naryamye, numvaga ntameze neza, yewe nta nubwo nigeze njya ku kazi”

Njyewe-“None se basi ibyo byonyine ntabwo byari ngombwa ko ubimbwira? Erega kumpisha icyo ari cyo cyose aho biva bikagera bituma nkomeza kwibaza uwo ndi we kuri wowe, Ama! Ese niki ko ukomeza kuntungura kuva ubwo nasangaga wowe na Leon mukampisha icyabaye kugera ubwo azinze akagenda atambwiye twarabanye imyaka?”

Amanda yaratuje ntiyagira icyo ansubiza, hashize akanya numva yikije umutima avugana ikiniga,

Amanda-“Songa! Basi mbabarira ndagusabye wumve ko nkiri wa wundi wagusezeraniye mbikuye ku mutima kuzakubera umuhoza nkurinda guhugana ariko kandi ese ntabwo unyizera koko?

Njyewe-“Ama! Uretse kwijijisha no guca ku ruhande urumva nakomeza kuguha ikizere gute?”

Amanda-“Songa!….basi se….nako ugire umunsi mwiza”

Njyewe-“None se uhise ugenda kandi…?”

Amanda-“Ubwo urumva narenzaho iki koko?”

Njyewe-“Oooh! Oya wigenda ubabaye Ama! Ahubwo se nkubwiye nabi?”

Amanda-“Mbabarira mbe ngiye ndagusabye”

Njyewe-“Ahwiiii! Basi niba nkubwiye nabi umbabarire, ukomeze wihangane urware ubukira, ndaza kugerageza ntahe kare nyure mu rugo iwanyu ndebe uko umeze”

Amanda-“Oya ndaba nagiye ku kazi…”

Njyewe-“Uuuh? None se urajya ku kazi kandi urwaye?”

Amanda-“Hmm! Ndihangana, ntabwo nasiba akazi iminsi ibiri ikurikirana gusa urakoze…”

Njyewe-“Sawa ubwo nta kundi…turasubira…ndaza kuguhamagara”

Amanda-“Sawa bye! Akazi keza!”

Amanda yarakupye nyuma y’ akanya katari gato niyumvira ndabyuka njya muri douche, uko nimenagaho amazi niko ya magambo Mama yambwiye akomeza kungaruka mu matwi agira ati:

“Igihe niki erega, none se niba waragize amahirwe ukaba warateye imbere nkuko mbibona unabimbwira, ubu uribwira iki koko? Nkeneye ibirori ntarasaza nanjye ngatega urugori nk’abandi babyeyi”

Nibukaga ko namusezeranyije nkemera icyifuzo cye gusa ariko niko narushagaho gucika intege kuko na Amanda nari naritomboreye nkamwishimira nkumva ariwe uzaba umucunguzi w’ umutima wanjye wahabijwe n’ akahise, yari atangiye guhinduka buri kanya ambera mushya, nyirabayazana nkumva ko ibyo ari byo byose ari Leon kabitera yicyo nahishwe.

Ibindi byose narabyirengagije mfata inzira nerekeza kw’ ibagiro, saa tanu tumaze kugemura inyama ahantu hose naruhukiye Chez Songa, kuri busheri aho nabarizwaga nyuma yo kuzenguruka ngemurira Boss.

Mu gihe nari ndi kwiruhutsa Boss yaparitse imbere yaho nacururizaga, mubonye ndahaguruka ndasohoka ngenda musanga, ndamusuhuza ambwira kwinjira mu modoka, maze kwicara mo,

Boss-“Bite se Songa! Akazi karacamo nta kibazo?”

Njyewe-“Eeeh! Karacamo cyane rwose ngira ngo ibyo musanzwe mubizi ko nduhuka ari uko kagenze neza”

Boss-“Hhhhh! Ndabizi cyane ko urimo umukozi, niyo mpamvu nari nkunyuzeho ngo tujyane ahantu gato, nabonye wagira ibitekerezo nk’ umusore usoretse kandi witeguye gufasha uwariwe wese wamushyira mu mwanya abona ko ubikwiye!”

Njyewe-“Aho ho ntabwo wibeshye rwose! Uti hari aho ushaka ko tujyana?”

Boss-“Yego! Hari ikibazo se tujyanye gato nkakubwira neza iyo gahunda sha ko uko bucya nuko bwira nkomeza kugenda kwizera?”

Njyewe-“Nta kibazo Boss! Nta kibazo rwose twagenda”

Boss-“Ok! Reka tureba aho tunyarukira gato hafi aha ttuganire”

Twagiye dutyo bidatinze twinjiye ahantu araparika, mu kuva mu modoka nabonye ari ahantu hashashe neza hari jardin nziza ndetse hari intebe zigiye zitaruye, hasaga n’ ahantu hagenewe gutemberera abashaka kuganira batuje.

Twakomeje gutambika gato tugera hirya aho nta muntu wacaracaraga, maze arambwira,

Boss-“Naho ubundi Songa! Igihe tumaze dukorana nabonye uri umukozi mwiza kandi uzi gushabika nkuko nanjye nakuze, burya erega ntimukarebe tumeze gutya ntako tutagize mu busore bwacu!”

Njyewe-“Ibyo byo si nsiba kubibona umunsi ku wundi! Ndabyumva kandi nubu ndabibona ukuntu uba ugikora nta kuryama, uziko akuya hari ubwo kajya kagira gutya kakakubahuka kakagushokaho!”

Boss-“Hhhhh! Wasetsa sha Songa! Niko biba bigomba kugenda, naho ubundi icyo nari nguhamagariye rero…”

Twigiye imbere gato,

Boss-“Songa! Ngira ngo ntabwo tuziranyeho byinshi cyane, twamenyanye duhuriye muri business ariko buriya iyo abantu bakoranye ahantu hamwe bakomeza no gukorana n’ahandi nta gikomeye kirimo”

Njyewe-“Oya ntacyo! Kuri njyewe ahubwo n’ ibyishimo kuko wandebye ukampitamo! Ayo mahirwe ansekeye ndayakeje, mbwira rwose nditeguye”

Boss-“Ok! Hanyuma rero dore uko ibintu bimeze, nubwo utanzi hari ibyo ugomba kumenya mbere yo kumenya icyo nshaka ko unyemerera hanyuma bikazatuma uzirikana ibanga…”

Boss wari usheshe akanguhe yavuze iby’ ibanga umutima uransimbuka, nongeye kwibuka ibanga icyo bivuze nibuka ko ari icyaha gikomeye iyo waribikijwe rikameneka, nashatse guhakana mbere yuko arimbwira ariko ndikomeza mpebera urwaje,

Njyewe-“Ndakumva mbwira Boss!”

Boss-“Uko undeba uku mfite urugo rumwe nemera n’umugore umwe w’ isezerano ariko nkagira izindi ngo ku ruhande n’ abandi bagore ntahaho bitewe naho ngeze bukanyiriraho ndi mu kazi”

Njyewe-“Ndakumva komeza umbwire Databuja!”

Boss-“Muri make, mfite imitungo myinshi ariko aho bigeze nabonye imbogamizi nyinshi ziri mu gihe kizaza niga amayeri yo kuyiyambura nkayishyira impande n’ impande, kugira ngo ejo n’ ejobundi itazigabizwa n’ ubonetse wese mu gihe nzaba nshaje byo kutabona imbaraga zo kwigobotora uwo ari we wese”

Njyewe-“Ndakumva!”

Boss-“Akaba ariyo mpamvu rero mbere ya byose nshaka kukumenya wese,
nkamenya ababyeyi bawe, aho uvuka kuburyo ndamutse nkubuze nagushakisha”

Njyewe-“None se ko numva utangiye utanyizera aho n’ ubundi ibyo wifuza ko dukorana byazaduteranya kandi nta ruhare buri wese abigizemo ari ukutagira ikizere gusa?”

Boss-“Oya urumva icyo nshaka nukukwandikishaho umwe mu mutungu wanjye tukajijisha ushaka wese kumenya ibyo ntunze, tukagirana amasezerano y’ ibanga ya gihamya nzitabaza uramunse umpindutse, ntabwo ari umutungo uremereye ni inzu ikodeshwa yinjiza atari make ku kwezi”

Njyewe-“Eeeh! Ubwo se….ndumva byagashobotse ariko ikibazo mfite ni kimwe”
Boss-“Ikihe kibazo se kandi?”

Naratuje gato, hashize akanya ndamubwira,

Njyewe-“Boss! Ko dukorana bya hafi benshi babizi, urumva ibanga ryanjye nawe habura urigenza?”

Boss-“Uuh? Hanyuma se ukaba wumva nakwibeshyeho sha Songa?”

Njyewe-“Njyewe numva uramutse ushatse undi muntu utaziranye cyane ndetse udakorana nawe bya hafi aribwo ibanga ryaba ibanga, naho njyewe se ubu…byanga byanoga ntabwo nabura ingenza”

Boss-“Ariko uzi ko ari byo! None se hari undi muntu wambonera wakwizera nkuko nari nakwizeye?”

Muri ako kanya umutima wongeye kunkomanga numva ubwoba muri njye gusa nkomeza kwikomeza ndamubwira,

Njyewe-“Boss! Hari umusore nzi utagira adress nimwe, nta se azi, nta nyina, bamutaye akiri muto kuburyo hashize imyaka myinshi gusa ubu ni umusore kandi ndamwizeye cyane”

Boss-“Ntiwumva se! Ahubwo uwo niwe nari ntegereje! Ahubwo se mubonye gute ngo aze twicarane turi batatu ibintu bive mu nzira? Urumva nawe azaba abifitemo inyungu”

Njyewe-“Boss! Ntabwo nahita nkubwira ngo ni ryari ariko nimugoroba turabonana, ndaza kukubwira mu gitondo”

Boss-“Nuko sha Songa! Erega kugwiza imitungo si ikintu, hari ubwo umuntu abura aho abihisha ngo agabanye guhora arota nabi, ubwo gahunda niy’ ejo?”

Njyewe-“Ni iy’ejo rwose nzaguha igisubizo”

Boss-“Ntiwumva se! Nawe kandi ndumva uzabigiramo inyungu, ugatandukana ko gukodesha nkaguha aho uba ukajya undebera hafi uko ibintu bigenda umunsi ku munsi, ugatandukana n’ ubukode bwo muri uyu mugi”

Njyewe-“Koko se? Hahaha! Ayo mahirwe se ubwo arashoboka?”

Boss-“Wowe kora iyo gahunda ibindi uzaba umbaza”

Twavuye aho hantu gusa ntabwo nari ntuje, nagendaga mbitekerezaho umutima ukansimbuka nkumva namubwira ngo mbivuyemo gusa nkibuka ko namize ibanga, dukomeza kugenda tugera aho yari yankuye hamwe nakoreraga…dutandukana gutyo.

Amasaha yo gutaha yarageze saa kumi nebyiri nari ngeze mu rugo maze kwitunganya nafashe telephone ngo mpamagare Kalim na Gentil mbabaze impamvu bambeshye….Kalim aba arakinguye,

Kalim-“Urabizi ntabwo njya nkomanga njyewe n’ ibisanzwe!”

Njyewe-“Hhhhh! Ndakuzi ndakumenyereye!”

Narahagurutse ndamusuhuza ataricara atangira kumbaza,

Kalim-“Niko ngo Leon bimeze bite? Ngo watashye usanga yazinze yaciyeho atakubwiye?”

Njyewe-“Banza wicare erega ntabwo ari inkuru yo kubara uhagaze!”

Kalim-“Ahaaa!”

Tukiri aho hari uwakomanze, yari Gentil!

Njyewe-“Aaaah! Gentil! Kalibu sana! Icyo ngukundira wizanira impamba, iyo Fanta se uyiguze hehe?”

Gentil-“Hariya ruguru ahantu hacuruza umubyeyi ugira blague zikurura abakiriya! Uziko nari ngiye kugura n’ amakara habuze gato?”

Twese-“Hhhhh!”

Gentil-“Mwebwe muraseka! Ahubwo banza nzajya nza kugurira ibyo kurya hariya kandi mpaha”

Kalim-“Uuuuh? Ngo ntabwo ujya uhaha? Muri make urya muri restaurant buri gihe?”

Njyewe-“Kalim! Jya uganya ibyawe uwo afite nyirabuja sha! Azindukira ku mureti bamukubitira kubimara nk’ umwana wiga kurya, niyo mpamvu!”

Kalim-“Eeeh! Niyo mpamvu byo nanjye ndabibona!”

Gentil-“Muve muri ibyo ahubwo mumbwire ibya Leon! Ngo bimeze bite?”

Njyewe-“Ahaa! Dore nabahamagaye ngo muzamvuganire umunsi bamumbajije, ibyabaye aha muri iyi minsi ingahe ishize bisa n’ amayobera ntabasha gusobanura kuko ihishe byinshi”

Kalim-“Byagenze bite se? Mwakomanye amahembe se bya bindi by’ izibana?”

Njyewe-“Reka reka! Ntuzi ejo bundi dutandukana, nageze hano nsanganirwa n’ urusaku rw’ utabaza…

Natangiye kubwira Kalim na Gentil byose ntaho mbakinze, nyuma yo kumva byose Kalim niwe wiyamiriye mbere ambwira ahamya atazuyaza,

Kalim-“Mbega Songa! Urambabaje! Ariko se nawe nubwo utatekereza umutima nama wo ntabwo wawumvira? Wowe ubwo ntacyo wumvamo? Umusore muzima asigaye ku ruhu inka yarariwe cyera!”

Njyewe-“None se ubwo ushatse kumbwira iki Kalim?”

Gentil-“Icyo mbona cyo nubwo ntamenya icyabaye ariko kirahari kandi waragihishwe, mu gihe uhishwa nuwo wibwira ko agakunda rero uribeshya, niyo haba harabaye impanuka hari uwo yahitanye”

Njyewe-“Ariko se mureke kumviraho inda imwe, ufite ukuri akumbwire”

Gentil-“Ukuri mfite nuko witanga wese ntiwizigame n’ imbaraga zo kwemera no kwihangana, abantu bose ubagira beza ukabiyereka wese igihe cyagera ukisanga usumbirijwe, nkubwo kuko Amanda wabonye mu nzira ukamugira ngo umwamikazi w’ umutima…”

Kalim-“Nyamara nakomezaga kubikubwira Songa! Urukundo uhubukira utazi ruzagusiga uri umusazi!”

Njyewe-“Kalim! Ntabwo nabahamagaye ngo munyaturireho imivumo muntega iminsi, ibyambayeho bikansiga mu rujijo aho umutwe wanjye utifashije gusobanukirwa niho mwakabaye muba muri ariko unyumvire”

Gentil-“Ariko se Songa! Ubwo twese urabona tukwanze, aho bigeze mba mbona ukina nawe ubwawe, niba utagishoboye gufata umwanzuro ngo uve muri iyo mikino wahaye intebe kakubayeho, wagira ngo ubayeho utuje ugategereza igihe kigena byose ukareka kujarajara wapfa….”

Kalim na Gentil bakomeje kumpererekanya ndanga ndatsindwa kuva uwo munsi, isaha n’ isegonda nibwo narekuye ibyo nari nshigatiye numva mu mubiri wanjye hasa n’ ahavuyemo urugingo, ndatsindwa ndetse ndanamwara nongeye kwibuka akahise nabonaga nko kujarajara kwanjye.

Mu nzira mperekeje Kalim na Gentil,

Kalim-“Naho ubundi Songa! Nizere ko wahindutse, bibe ubwa mbere b’ ubwanyuma utuvugishije menshi, buriya erega natwe turi abasore kandi ntituri intama nkuko wasebyaga Leon nkuko wabitubwiye! Ahubwo arabe yarakweretse aho abera Leon ahari wasubiza amerwe mu isaho!”

Gentil-“Kalim! Nawe rekera aho kabisa niba atumvishe yasibye….”

Tukiri mu muhanda hari moto yaje Kalim arayitega,adusiga atyo dukomeza kugenda niwo mwanya nabonye ngo mbwire Gentil ibya Boss…

Maze kumubwira uko ibintu bimeze yabyakiranye amashyushyu ntiyazuyaza yirengagiza ibindi byose, za mpungenge nari niteze ko aragira zasimbuwe n’ amatsiko avanze n’ ibishimo ambaza niba koko ntamubeshya,

Gentil-“Songa! Noko niba koko utambeshya....iki ni ikiganza cy’ Imana gikomeza kunsunika, niba ari…njye ndabona nyamara aya atari amahirwe gusa…nako nzabishima ari uko byakunze, ahubwo se uwo Databuja w’ umubyeyi ushaka kurutisha uwo atazi umugore n’ abana aturutse mu ijuru rya he ko Mabuja mfite ubu we namenye ko ahari yavuye ahera h’ abamarayika numva bavuga?”

Njyewe-“Wowe kuva wemeye, ejo tuzajya kumureba, gusa icyo ngusabye ntuzampinduke! Namubwiye ko nkwizeye kandi koko nzi ko udateze kumpinduka! Nizere ko ukomeje kubona ko amahirwe n’ umugisha wo guhundwagazwaho ikizere wayavukanye…tutitaye ku ngaruka bizagira wowe ambara uwo mwambaro sakindi izaba ibyara ikindi, sibyo Kijyambere”

Gentil yazamuye urushyi ndarukwepa, yajyaga yanga ko mwita Kijyambere cyangwa Kibonke kuko yari yarabyibushye agahinduka cyane kuburyo umuzi mu gihe gito cy’ akahise byari bigoye cyane ku mumenya.

Twaratandukanye arataha nanjye nsubira mu rugo, bwakeye njya mu kazi bisanzwe mu masaha ya nimugoroba nka saa moya nibwo nahamagaye Boss ambwira aho tumusanga, Gentil aba angezeho dufata umuhanda.

Bidatinze twageze aho yari yandangiye Gentil wari wabyambariye yigira neza, njya imbere, twinjira mu gipangu umusore wasaga nkaho ari umuzamu atubaza uwo tuje kureba ndamubwira atuyobora aho twinjira, mu guhinguka aho Boss yari yicaye naramusuhuje mpindukiye Gentil ndamubura……………………………………..

Ntuzacikwe! Inkuru “Nanjye si njye” iracyakomeza….!

Genesisbizz

Related Articles

Ibitekerezo

  • - Garlle

    Harya inkunga kumwanditsi itangwa kuyihe nimero twaramwibsgiye disi kandi yadufashije quarantine

  • - Gitego

    Amatsiko aratwishe ni ukuri

  • - Gsga

    Ese ko mutaduha Episode Songa bimeze bite?

  • - rwaka

    Uwo mugabo niwe wahoze ari boss wa Gentil,knd ndakeka ari papa we,boss kazi niwe maman we ariko yabuze aho ahera amwibwira niko mbikeka

  • - Egide

    Samson wiriwe neza! Baduhe indi Episode pe! Uzi ukuntu byaba biryoshye!

  • - Muvunyi Paul

    SONGA URUKUNDO NTAWE URUSHAKA RWO UBWARWO RURAKWISHAKIRA

  • - Mama Bella

    Mpise ngira amatsiko nongeye gusoma umusogongero l, ubu se noho songa agiye kuba undi nkuko babivuga data? kalim na gentil baramubwiyr pe, ntazongera gukunda ahubwo mfite ubwoba bwuwo agiye kuba we thx eddy

  • - Mbabazi Mellony

    Cyore none uwo yaba ari umugabo wa mama wa Gentil? Wasanga agiye kongera kubona nyina disi, naho ubundi Songa nagenze gake ibintu Amanda amureke abanze atuze azamubwira icyabaye hagati ye na Leo

  • - Samson

    Suko ibintu byikora ubwo wasanga uyu ari papa gentil😟😟😟😟amatsiko mduhe indi episode

Igitekerezo cyawe kirashyirwaho aruko gisusumwe

TANGA IGITEKEREZO