Episode 94: Teta yiyahuye mbibona…asiga avuze ati “Nanjye si njye”

Bidatinze twageze aho yari yandangiye Gentil wari wabyambariye yigira neza, nanjye njya imbere, twinjira mu gipangu umusore wasaga nkaho ari umuzamu atubaza uwo tuje kureba ndamubwira, atuyobora aho twinjira, mu guhinguka aho Boss yari yicaye naramusuhuje mpindukiye Gentil ndamubura.

Nkigera aho bari bandangiye Boss ari…

Boss-“Bite sha Songa!”

Njyewe-“Ni…ni byiza Boss! Ni sawa ni sawa…rwose”

Natangiye kwibaza icyo ngiye gusobanura muri ako kanya ubwo nari mpindukiye nkabura Gentil, naguye mu rungabangabo ntangira gucurikiranya amagambo imbere ya Boss,

Njyewe-“Ntabwo natinze ariko natinze! Nabanje kujya kwitunganya ndamutegereza ariko mpindukiye ndamubura…nako mbona araje! Nizere ko ntabatindiye cyane Boss! Mwubahiriza isaha yanyu aba ari isaha ntimutegereza ko isake isona…nako ibika!”

Boss-“Gabanya igihunga wicare utuze, ndabona usa nufite impagarara, wikwisobanura nkuri mu ikosa iminota itanu urengejejo ntabwo ari myinshi”

Muri ako kanya nicaye aho numvaga hahanda, ntabwo niyumvishaga ukuntu Gentil yanshuka ngo nsimbuke tutari bujyane, natangiye kwibaza kandi icyo ndabwira Boss mbere yo kuza nari nahamagaye kuri telephone nkamubwira ko njye na wa musore duhagurutse tuje kumureba.

Ako kanya hari umukobwa waje kunyakira, aza yisanga kuri Boss bisa naho bari baziranye cyane, mu gihe bari bacyongorerana Boss amukabakaba nibwo nafashe telephone nandika messawge vuba,

“Gentil! Unkoze ibiki koko? Ubwo urabona ndisobanura mvuga iki imbere y’ uno mugabo? Ntabwo nari nzi ko wampinduka nakwizeraga, burya koko nibyo byawe?”
Nkimara kwandika message nubuye amaso nsanga wa mukobwa wari uje kunyakira ampagaze hejuru asa n’ ushaka gusoma ibyo nandikaga ndamuhisha,

We-“Bite se ko wagumye muri telephoneeee! Ko utambwira icyo nkwakiriza? Uranywa iki?”

Njyewe-“Eeeh! Icyo kunywa se?”

Boss-“Tumiza icyo kunywa sha Songa! Bwira uwo mukobwa mwiza ajye kukuzanira icyo kunywa ushaka hariya ruguru gato ku kabari, ubundi yiheze tuvugane,”

Natumye uwo mukobwa icyo kunywa ntomboje, amaze kukizana ariheza nkuko Boss yari abimusabye, mu gihe yari ari kwitaba telephone nibwo nabonye uko noherereza message Gentil.

Nyuma y’ akanya

Boss-“ Songa! Noneho twavugana! Nahisemo ko tuza kwiyicarira hano mu gikari… nari ndi kwibaza nti ko uje wenyine kandi wari umbwiye ko uzanye na wa musore none nkaba mbona ungezeho uri wenyine bigenze bite?”

Njyewe-“Boss! Twaburanye! Nari nanze gukomeza guhugira kuri telephone muhamagara ngo utagira ngo ni agasuzuguro nkuzaniye mu mahoro yawe, twari tuzanye rwose…”

Boss-“Uuuh? Ubwo se yaba yayobye?”

Njyewe-“Birashoboka…nako nibyo kuko twuriye moto mubwira kunkurikira, tugeze aha mba ndamubuze, ahubwo se wampa umwanya ngasohoka ngakomeza kumuhamagara nkamubaza uko byamugendekeye?”

Boss-“Nta kibazo sha Songa! Genda umubaze kandi uze umuzanye!”

Ako kanya narahagurutse ndasohoka ngeze hanze mbona wa musore w’ umuzamu ngenda musanga ndamubaza,

Njyewe-“Bite se wangu?”

We-“Ni sawa kabisa!”

Njyewe-“Wa musore twinjiranye hano ntiwamenyera aho anyuze ra?”

We-“Reka reka yambwiye ngo mvuge ko ntawe nabonye!...nako ntawe nabonye”

Njyewe-“Uuuh? Ubwo se ni wowe uri kwijijisha bene ako kageni? Ntabwo ari wowe waduhaye kalibu ukatwereka aho Boss yicaye?”

We-“Ariko se ubwo ntabwo wumva icyo nshaka kuvuga?”

Muri ako kanya nahise menya ko uwo muzamu babiziranyeho, ndasohoka mfata telephone mpamagara Gentil ako kanya ahita yitaba vuba,

Gentil-“Hello! Songa!”

Njyewe-“Gentil! Wankoze ibiki koko? Ngere imbere ya Boss nkubure koko?”

Gentil-“Hmmm! Iyaba wari uzi uwo wari unjyanye imbere Songa!”

Njyewe-“Ngo?”

Gentil-““Songa! Wari undoshye mu nyenga y’ umuriro, wari unshukuriye icyobo, wari untaye mu mazi abira, uwo mugabo wari unshyiriye nabaye nkimutanga kumbona nsubira inyuma nk’ umurabyo, umuzamu abonye uko nagendaga kibuno mpa amaguru ansingira vuba mbanza kumufumbatiza ngo andeke mpunge!”

Njyewe-“Ibi niki?”

Gentil-“Songa! Ahubwo niba ukiri kumwe nawe, shaka impamvu ishoboka yose umusige aho uze tubanze tubonane”

Muri ako kanya nahise menya ko ishyamba atari ryeru, nsubira mu nzu vuba mpumeka insigane,

Njyewe-“Boss! Boss! Uzi ukuntu bigenze se!”

Boss-“Eeh! Bigenze bite ko mbona uje usa nuwahahamutse?”

Njyewe-“Boss! Akoze impanuka! Wa musore akoze impanuka, maze kuvugana n’ umuntu witabye telephone ye ambwira ko bageze kwa muganga! Ahubwo reka mbe ntabare….”

Nabivuze nahagurutse kera, niruka kibuno mpa amaguru nsohoka hanze, jugujugu ngera hirya gato mu ikoni ndiruhutsa, ikinyoma kintera guseka nibaza ukuntu gusara ntacyo bisaba.

Nyuma yo kwicara no gutuza, nahamagaye Gentil anyitaba vuba,

Gentil-“Songa! Songa!...”

Njyewe-“Mbwira! Uri hehe Gentil! Nkura ku muhanda dore nabaye umutekamutwe kubera wowe, ni ubwa mbere namenya ko hari ubwo biba ngombwa ko umuntu abeshya, nkanamenya ko gusara no kwiruka mu muhanda cyangwa ku musozi ntawagakwiye kubirenganyiriza nyirabyo atazi icyabimuteye”

Gentil-“Banguka ndi hahandi ucururiza inyama”

Ako kanya nicaye kuri moto, feri ya mbere motari yayifatiye aho twavuye turi babiri nkisanga ndi umwe, Gentil wari wicaye mo imbere akimbona yahise aza yihuta, anyobora inyuma mu gikari,

Gentil-“Songa! Songa! Ikizere nakugiriye kiri gusatira kndoha njye umwana utaragiriwe impuhwe nuwambyaye akansiga mu maboko y’ abantu akanyereka ko we atari umuntu”

Njyewe-“Gentil! Reka kuvuga ibyo witinda mbwira icyaguteye kunkwepa ukibona Boss?”

Gentil yatuje umutima, nabonaga amaraso ye yihuta ndetse mu gituza umutima wateraga insigane ushitura igituz nkabibona,

Gentil-“Songa! Koko ni wowe wari unjyanye mu maboko ya Databuja wangize umucakara imyaka n’ imyaka, akanyita Kibihira aho nabihiwe n’ ubuzima?”

Njyewe-“Ngo?”

Gentil-“Uriya ni Papa Joannah, uriya nabonye ngahunga nk’ inyamanswa y’ inkazi niwe wanyibukije uko nabayeho, mugokera mwubaha ariko akanyima agaciro nk’ umuntu…Songa! Mbwiz ukuri, wamunshyiriye utamuzi koko? Mfite impamvu yumvikana! Ntabwo wsayoberwa Papa Joannah, kandi narabitekereje kenshi nkajya nshiguka wamunyoboyeho”

Muri ako kanya umutima niwo wagombaga gutegeka umunwa wanjye kuvuga ukuri nkabwira Gentil ko ntari mbizi, nyuma y’ umwanya utari muto mubwira uko namenyanye nawe, nongeye kumwibutsa aho twahuriye, mwibutsa umunsi musanga nkamutega amatwi, mubwira uko nsize mubeshye, aho niho yahereye angarurira ikizere,

Gentil-“Songa! Ndabizi ntabwo wambeshya uzi neza ko ari wowe koko wankuye mu maganya ukampa inzira y’ ubuzima bwangize uwo ndiwe ntacyo ushoye uteganya kunguka,

Niba koko utari uzi neza Boss wawe mumenye. Niwe nsiganirwa mpunga, nubwo nzi neza ko nta kosa nakoze ryatumpa mpunga ariko ndabikorera amahoro y’ umutima nifuza gukomeza gusigasira kuko nayabonye nyakeneye kandi niyo yangize uwo ndi we ubu,

Songa! Byose ibuka ko ari wowe, ibyo kumunshyira reka birangirire aha ushake undi umuha utari njye bakorane ayo manyanga gusa icyo nzi cyo ntabwo uwo nawe azabigiramo amahoro uriya mugabo ndamuzi, naraye nkanuye murindiye imitungo, ntabwo ari cyo gihe cyo kuntahura ngo akubone nk’ igitero kimuteye nyamara ari we wakuragaho igeno”

Nyuma y’ akanya gato ntuje,

Njyewe-“Gentil! Ndashima Imana ko utansize nka Leon ngo ugende nkutaramenye, ukabanza kumbwiza ukuri ndetse ugasasa inzobe, ukambwira nyawe uwo wahunze…ndakumva ariko kandi imyenye!

Warahindutse Gentil! Igihe gishize ari kirekire, ntabwo yapfa kukumenya, ikindi kandi namubwiye ko mugenzi wanjye, wowe nari mushyiriye wagize impanuka, noneho ubwo menye neza uwo ari we, reka tuve aha tugende twambarire urugamba, icyo nzi cyo iyabivuze niyamunyoboyeho…ndavuga Imana yagutunze inkoni!”

Gentil-“Inkoni?”

Njyewe-“Wikwikanga, ahubwo humuka, reka aguhe umutungo ubundi umwiyereke!”

Gentil-“Ushatse kuvuga iki Songa! Ndakwinginze winsubiza mu buzima bw’ ibibazo aho nabereye undi ngahangayika nkagorwa, aho ndi haranyuze winsubiza mu bibazo”

Njyewe-“Gentil! Buriya mu buzima kudafatanya biha isi urwaho ikakubona, ariko iyo mwifatanyije musagurira isi, ababiri bishe umwe uwo ni umugani, nti tugambiriye ikibi ahubwo reka dushake ukuri…dushyire Boss ku munzani w’ ubuzima”

Gentil-“Ibyose se byashoboka? Mu buhe buryo?”

Njyewe-“Gentil! Nasize mbwiye Boss ko wagize impanuka, igihe gishize ni kirekire kandi warahindutse cyane, kumenya ko ari wowe Kibihira wamugoreweho ntiyapfa kubitahura, reka twige kubeshya twirwanaho tuzasaba Imana imbabazi nyuma”

Gentil-“Songa! Reka tuve hano dutahe, ningera mu rugo nibwo ndasubiza ubwenge ku gihe, gusa ndakwizeye kandi wandekura nagwa, isi y’ abantu nasigiwe na Mama Data ntazi…nzamenya ko nta mugiraneza uyibaho urenze we wantaye akaba abona ibi byose bimbaho ngo byibura agire impuhwe nkizo ungirira, kuko nzi ko ari mu ijuru ”

Njyewe-“Gentil! Nyizera!”

Twahanye ibiganza, ibyo kugumana turabireka arataha nanjye njya kubarisha amafaranga kuri busheri ndataha.

Mu gitondo Boss yampamagaye kare ambaza uko bimeze nanjye mubwira ko umurwayi wa nyirarubeshwa ari koroherwa, ansaba kujya kubonana nawe mu rwikekwe nemera kugenda.

Mbere yuko ngenda, nayuze kwa Gentil ngo tujyane, namusanze mu rugo n’ ibipfuko nari naguze muri farumasi, mupfuka isura yose dufata inzira, abamubonaga bagiraga impuhwe nibwo bwa mbere motari yemeye gutwarira umugenzi ubuntu.

Twageze hahantu Boss yabaga ari, namenye neza ko ari iwe, yari inzu z’ amacumbi kenshi yakundaga kwirarira maze akitubona,

Boss-“Yebaba wee! Ndabona mugenzi wawe habuze gato akava mu buzima! Uzi ko amagara ari kumucika mbibona! Ubu se ubundi gahunda dufite ntagiye kuyisiga ku isi…”

Njyewe-“Boss! Uyu musore ntabwo arebye, ibi ntibigukange! Ni isura yangiritse gusa ibanga araribitse neza wigira ikibazo”

Gentil yakomeje kwikiriza azunguza umutwe, nyuma y’ iminsi ibiri impapuro zimwanditse ku mitungo zimugera mu maboko, ku mutima nti noneho uw’ abandi yaganira n’ uwamuhatse imyaka n’ imyaka, nubwo ntari nzi ko ari ho bizerekeza.

Nyuma y’ igihe gito gusa…Gentil umwana wavutse nkanjye yari afite amasoko agemuramo imyaka, njye nari narasimbuye Boss utarabashaga kumenya byose kubera ubusaza, aho yakoreraga ni njye wamusimbuye, business irakura karahava burya mu buzima amahirwe muntu agira ni ukumenya ikimuhatse, akazi ukuraho igeno niwo mutage uraza ishinga n’inzozi ukazibura.

Muri ibyo bihe Gentil aho yatahaga yahitaga iwe yagabanye atarushye, aho Boss yamwanditseho yari inzu ikodeshwa hasi no hejuru…inzu igezweho! Mu nkengero zayo niho njye nawe twari tumaze igihe twibera mu mujinya we agashaka gukomeza kwihorera ngo abakiriya baje abahishe akame itonse ariko akanyumvira gusa agakubita agatoki ku kandi….muri icyo gihe cyose Boss ntiyigeze amenya ko Kibihira wamukoreraga ariwe Gentil wamugarutsemo.

Urukundo nashigukiraga kera nararuheje, aho twabaga kwa Boss twirarira ko buri wese avuga ko ari iwe abaje batugana imishyikirano n’ abakobwa beza ntamenyaga aho baturutse…ariko byose bikarangira gutyo.

Uwo munsi umwe ubwo hari kuwa gatanu, nari maze guherekeza Mama na Mwiza, nibo bari baje mu birori byo kurangiza kaminuza , nari nambaye ikanzu nziza y’ umukara igera ku birenge, ingofero yo…ni Mwiza wari uyambaye agenda atubaza aho bacuruza imyaka…ibiryo yahingaga ngo tumurangire amasoko, Gentil akamufasha dore ko nabonaga imishyikirano yabo igenda igana mu gufatanya ubuzima bwose.

Mwiza yoongeye kumbwira igitekerezo cyo kuzazana Mama na bashiki banjye kuwubamo…ndavuga…umugi, maze nkomeza kumusaba gutegereza kuzabazana tukabana bakiyambura uburimiro, nubwo byari isibaniro ry’ amahitamo yanjye ntari naratekereje ko byaba.

Ubwo nari ntashye ngeze mu rugo, mu gihe nakinguraga ku gipangu nikanze umuntu ndahindukira, numvishe ijwi ry’ Amanda ndikanga, nibyo nari ntahanye birameneka,ntarabitora…

Amanda-“Songa! Buretse kugenda nkubwire gato”

Njyewe-“Umbwire iki? Ntabwo nkuzi”

Amanda-“Ngo?…Ntabwo unzi Songa?”

Njyewe-“Ndabona usa n’ Amanda nzi cyera?”

Amanda-“Basi nubwo wanyibagiwe ariko basi ha agaciro igitumye nakomeje kugushaka kugeza aho nyuma y’ igihe nkuboneye”

Njyewe-“Ubu se uje kumbwira iki utambwiye nyuma y’ igihe ko atari igihe? Utambwira iby’ urukundo kuko sinshaka kubyumva, umutima ubitse byinshi kandi warazinutswe”

Amanda-“Songa! Nyumva! Niba ari ukuri kubaho ninjye ngufite, niba hari isomo buri wese yakwiga nantege amatwi, Nanjye Si njye”

Njyewe-“Hhhh! Niba atari wowe se ninde?”

Amanda-“Songa! Naritanze ndamira ubuzima bwawe, mbika ibanga gusa niho havuye kunyangana ibyanjye byose… yego ndakumva kubw’ urukundo rwawe n’ umutima wawe utanga utisigarije ntiwigeze utuza ngo umenye ko byose nabikoreraga wowe,

Songa! Ubu nibwo ukwiye guhishurirwa ko Leon yashatse kuguhitana kubera ishyari agaterwa ingabo n’ igishuko cy’uwakunyaze Teta wakundaga wabuze amahoro kubera guhora ahoza amarira adakama,

Songa! Namenye ko mbere yuko unkunda wakunze, nibuka ko waje ukeneye ko nguhoza gusa uwo wakunze aracyagukunda nanuyu munsi yanze byose uwo ategereje ni wowe, aho namusanze nta wundi akeneye ni wowe, ndagusabye umva ukuri kwanjye”

Njyewe-“Ama! Uzanywe no kunshinyagurira? Urankomerekeje uzuye akaboze, noneho niba udafunze umunwa ngo umve imbere ngiye kukwereka…”

Amanda-“Kora icyo ushaka Songa! Ariko intumwa ntiyicwa, uwawe ubu ari hafi kwiyahura, uwo nasanze amaze igihe adasohoka mu cyumba ubu ari gusatira inkombe y’ umugezi utemba,

Ntabwo ndi hano kubera we, tabara nyabuna uwahawe byose, agakura umuryango we mu mage ntiyigeze akwibagirwa, yabuze amahoro y’ umutima, yararinze arihanagura, ijambo avuga ubu ryonyine nuko nawe atari we”

Njyewe-“Noneho ndambiwe amagambo yawe, nako ni njye wakomeje kuguha umwanya nkumva…

Nagize ngo nkingure umuryango biranga,

Amanda-“Songa! Wihunga intabaza cyebuka undebe ntabwo ndi hano nka Amanda! Ndabizi ibyanjye nawe byararangiye kandi namenye ko wakunze mbere, ndi hano kubwa Teta, nyabura ari gusatira umugezi utemba, agahinda, kwicuza no kwiheba byamuhejeje mu cyumba yahisemo kubamo ubuzima bwe bwose nubwo byanze ubu atangiye gushoka ikiyaga ngo yiyahure…wumve ko bibaye ubugira kabiri mutangira yarakumbwiye ni wowe Songa!”

Umutima wanjye warakangutse, numva amagambo ya Amanda atamuva ku rurimi gusa, ubwenge bugaruka ku kahise nisanga ntangiye kumubaza,

Njyewe-“Ama! Ibyo uvuga uri kubikura hehe? Teta uvuga uramuzi?”

Amanda-“Songa! Ndi intumwa, none aha twajyana nkamukwereka, burya aho nakoraga narahimutse, njya gukora ku Gisenyi, aho niho nasanze Teta, naje nje kugushaka kuko namubwiye ko wanyuze mu mutima, dusangira agahinda kuko ubu ari umuteragahinda”

Njyewe-“Hanyuma se Manager?”

Amanda-“Songa! Ndagusabye…tugende! Uraza kumenya byose kuko nawe siwe, kandi umbabarire kuby’ akahise kanye nawe Nanjye si njye”

Nyuma yo kwiyumvira nibutse Teta koko, angarukamo nkuwo namenye mu kahise kanjye, nibuka umunsi wa mbere mumenya nibuka amajoro yanjye nawe, nibuka ibanga n’ amarira ye, ako kanya njye na Amanda dufata urugendo mu modoka y’ akazi yari yamuzanye twerekeza ku Gisenyi.

Mu rukerera twahingutse ahantu nari ngeze bwa mbere, Amanda ava mu modoka ndamukurikira, twinjira mu mazu nabonaga nk’ amacumbi, akomanga ku cyumba kimwe, nyuma y’ akanya katari gato, ndebye hasi mbona agapapuro ndagatora…mu kugafata narebye umukono wa Teta nadawumenya, hari handitseho ngo “Nanjye si njye” mu gihe nari nkebutse ngo mbaze Amanda…

Amanda-“Oya…ntahandi ari! Yagiye ku nkombe!”

Njyewe-“Ku nkombe?”

Yagiye imbere nkomeza kumukurikira, tumanuka dusatira ikiyaga, ageze imbere arakebuka mbona yirutse ahamagara cyane izina Teta, mu kureba neza mbona umuntu wiruka agana mu kivu, niruka inyuma y’Amanda… umuvumba utwara uwo yahamagaraga Teta mbibona n’ amaso yanjye………………………………….

Genesisbizz

Related Articles

Ibitekerezo

  • - Egide

    Ayiwe RIP disi kuri Teta. Ubu se ibi ni ibiki koko? Agiye atabonye Songa mushya? Amanda se we barakomezanya?

  • - bELLA

    yooh Eddy ucisha make, uriyoroshya, uwakwima afite yaba ari ingayi, 2000 ni make mu mezi arenga atatu disi, humura uri uwacu inkunga yacu irahari niko gushima bambe warakoze kandi dushima IMANA yakuduhaye

  • - Fafa

    YEWEE MBEGA UBUHANGA, AMATSIKO WE MWATWONGEYE KOKO 95

  • - Kabera

    Uretse inkuru nziza n' amagambo yo kumenyesha aryoheye amatwi, warakoze kudufasha quarantine ukwiye ishimwe kuko nta munsi twakubuze watumaze irungu imana ikongerere impano eddy ndi mu bambere

Igitekerezo cyawe kirashyirwaho aruko gisusumwe

TANGA IGITEKEREZO