Episode 96: Natabawe na Mama Leon ankiza amenyo y’ abasetsi

Natangiye kureba hirya no hino, abantu benshi bari bankikije bavuga ko nasaze, ibimwaro biranyica, ndabiyaka mbaca mo hagati ariko mperekezwa n’ inkwenene kuko nari nambaye ubusa mu gatuza, sinjye nabonye ndenga aho hantu…

Nakomeje kugenda…nako guhunga, aho nikingaga hose nabonaga hari undeba nkongera nkahava ngakomeza kugenda nihishahisha, nubwo babivuze nkikanga nari meze neza nkuwasaze.

Nageze aho umwana aganya atarira ngo nyina yumve kuko tutari kumwe, nihumura mu maso, ninjira mu isoko bagurishagamo imyenda, nabonaga abantu baseka gusa ntawundi nari gutuma icyo kwambara naremeye ndinjira, nkiryinjiramo ako kanya hari umubyeyi wagize impuhwe ampereza umupira nkinga mu gituza, mu kumwitegereza ngo mushimire nabonye hari aho muzi…mu gusubiza intekerezo zanjye mu kahise ubwenge bwarampereje…yari Mama Leon! Naramubonye ndamumenya…mu gihe ntaravuga,

Mama Leon-“Ubu se ni wowe ra cyangwa ndibeshya? Ni wowe umuhungu wigeze gucumbika mu rugo avuye ku ishuri? Uwazanye n’ umuhungu wanjye akagenda abonye akazi iyo za Kigali?”

Koko yari we, ntabwo nigeze muca mu jisho, namenye ko ari we koko maze ndiruhutsa, yari amasaha yo kwanura ibicuruzwa, ifirimbi iravuga batangira gukingisha abacuruzi, nanjye ntangira kumufasha, ibyo yambwiraga byose narikirazaga kubera kubura icyo nsubiza, hakaba ubwo ambajije aho gusubiza nkikiriza.

Twasohotse mu isoko tugera ku muhanda, duhagarara ku murongo w’ abatega, bidatinze imodoka iraza dufata umuhanda, bitinze tugera I Musanze tuva mu modoka dutambika tugana aho moto zaparikaga maze Mama Leon arambwira,

Mama Leon-“Harya mu rugo uracyahibuka?”

Njyewe-“Oya…hashize igihe kirekire rwose ntabwo mpibuka”

Mama Leon-“Reka nze ndangire uyu mumotari arahamenya nta mayobera ahari”
Mama Leon yarangiye motari aho tugiye nicara kuri moto, ntihari kure twagezeyo bidatinze, tukinjira mu rugo natunguwe no kwakirwa na Marina, mushiki wa Leon,
Malina-“Eeeh! Songa! Ugeze hano ute?”

Mama Leon-“Ageze hano ate se bisaba iki? Ni kalibu Songa…nta nubwo nibukaga izina ryawe, abana baribuka koko!”

Nakiriwe mu rugo gusa nari mfite ipfunwe ryuko nyuma y’ igihe ngarutse aho nagiye nkibagirwa, nta kindi nari ntegereje atari ugusobanura icyabinteye nubwo ntacyo nari kubona.

Tumaze kurya, Marina amaze kwandurura no guhanagura ameza nibwo Mama Leon yatuje maze arambaza,

Mama Leon-“Songa! Imana ikora ibyayo, ntabwo nari nzi ko twahurira mu isoko, ese amakuru yawe ko wagiye ukatwibagirwa nkutarigeze atumenya? Mu gihe wabaye hano niki watunenze cyatumye ugenda ubutagaruka?”

Nyuma y’ akanya gato narikoroje byabindi byo kwishakamo icyo gusubiza maze ndavuga,

Njyewe-“Rwose ntacyo nabashinja, mumbabarire naragiye nihugiraho ikosa ndaryemera gusa ariko nanjye si njye…nako ntacyo mfite cyo kwireguza mumbabarire pe!”

Marina-“Ahaaa! Waragiye koko wihugiraho turabibona wabaye undi, warabyibushye wabonye amafaranga biragaragara, ariko buriya ntabwo yakagomye kukwibagiza abantu”

Mama Leon-“Nibyo rwose, ni nko kwambuka wagera hakurya ugaca ikiraro, wakenera kugaruka ugahera I musozi!”

Nyuma y’ akandi kanya gato….

Mama Leon-“Ibyo tubireke, hanyuma se amakuri ya Leon ko nawe yagiye akaba nkawe akibagirwa iwabo? Mbere yajyaga agira atya akaduhamagara none dore hashize igihe kirekire nta kanunu ke tuzi”

Njyewe-“Amakuru ya Leon? Ahubwo nari ngiye kuyababaza?”

Mama Leon-“Ibi niki bakobwa bakowe?”

Njyewe-“Hashize igihe tutabana rwose, imyaka imaze kuba hafi itatu ansize akagenda atambwiye naho agiye”

Marina-“Ngo?”

Mama Leon-“Ntibishoboka! Leon twari tuzi ko mubana none ngo nawe ntabwo uzi aho aba? Ubwo se ibyo wabitubwira ute?”

Marina-“Songa! Ntabwo uri umwana mwiza nkuko twabikekaga, niba utazi aho Leon ari mwarabanaga ubwo watinyutse kwemera kuza hano ute? Nta n’ isoni? Niba se mutakinabana wabuze no kuduhamagara ngo ubitubwire? Mama! Niba ari uko bimeze nta nubwo yakabaye ari muri iyi nzu”

Mama Leon-“Mwana wanjye cisha make, erega ni njyewe wamuzanye, uriya mupira ntuzi ko bawugerekaga menshi, nawumuhaye mubonye yambaye ubusa erega!”
Marina-“Reka reka! Ubwo se yakwambara ubusa gute?”

Njyewe-“Mama! Ntugire ikibazo erega ndawishyura, buriya nari nje n’ ubundi kugura nubwo wandamiye ukantabara ukandinda amenyo y’ abasetsi aho bampaga inkwenene babona nanitse inda”

Mama Leon-“Ntabwo nkwishyuje erega ndi umubyeyi, ahubwo tubwira uko byakugendekeye wasanga turamenya n’ impamvu utazi aho Leon yagiye n’ impamvu utatubwiye ukimubura”

Byabaye ngombwa ko ntera aho kwikiriza baratuza, ntangita kubabwira uko byose byagenze, aho nari nzi ko Leon yampunze ajya siho yagiye, nababwiye byose ntacyo mbakinga bambaza ibibazo ntari gushobora gusubiza,

Mama Leon-“Ubwo se disi niba mwarabanaga, muhishanya, agatangira kukwikanga ku buryo yageze aho kuguhunga? Nta kosa waba warakoze ngo bimunanire kuryihanganira?

Erega nubwo zibana zikanakomanya amahembe ntay’ itana ngo irare hanze…iby’ uko yafashe umwanzuro wo kugenda tubishyire hasi ahubwo dufatanye gushaka aho yaba yaragiye”

Nakomeje kubabwira ko ntaho naba nkeka ndetse ko Leon atari umwana wabura ngo tugere aho dufatanya kumushakira hasi no hejuru, mu gicuku mbasezeranya ko nindamuka menye aho ari nzababwira gusa sinabahisha impamvu numvaga ko yabiteye.

Aho naharaye rimwe mu gitondo nzinduka mfata imodoka ya mbere ngo ngaruke ndebe iby’ akazi kanjye, ibanga nararigumanye na Gentil ntabwo yigeze amenya ibyambayeho ubwo nari nicaye ku nkombe, negamye ku giti k’ inganzamarumbo.

Ntashye mvuye mu kazi nageze mu rugo ndyama mu ntebe muri salon ngo nanure umugongo, mu gihe nari maze kwitsa umutima numvishe umuntu ukomanze ku muryango njya kureba uwo ari we, mu gukingura…yari Amanda.

Amanda wari warashatse umugabo ubukwe bwe nkabutaha, utarigeze andeka ngo nkomeze kuba njyenyine ntiyigeze anjya kure, kenshi yangiraga inama cyane cyane izo kumbuza gutagaguza umutima njarajara mu bakobwa, akanyibutsa ko nawe yankundaga gusa kandi akanyibutsa Teta wamvuye umutima, akambwira ko yasize avuze ko ibyabaye nawe atariwe.

Yaransuhuje aratambuka aricara nanjye nkomeza kuryama mu ntebe, atangira kunganiriza ndetse atumiza n’ agafanta turasangira nkuko yakomeje kubikora mu gihe cyose ntiyigenze ansiga njyenyine, gusa ibiganiro bigeze kure nibwo nongeye kumubaza,

Njyewe-“Ama! Igihe kimaze kuba kirekire! Noneho wenda ubu tumaze kubyakira ariko kandi nubwo tutaragashira ndifuza kuzamenya impamvu yateye Teta kwiyahura, ese ubundi mwaje kumenyana gute hariya hantu?”

Amanda-“Songa! Ubundi Teta namumenye nk’ iciro ry’ imigani, ubwo nageraga ku Gisenyi, ubwo nari nkigerayo nasanganiwe nabambwiraga ko hari umukobwa umaze igihe aba mu cyumba cya wenyine utajya usohoka,

Ubwo nagize amatsiko nibaza umukobwa uza gukodesha icyumba akishyura buri joro adasohoka…nkomeza kugira amatsiko menshi nkajya mpisirisimba nizembagiza amaherezo nyuma y’ iminsi numvikanye n’ umukobwa wajyaga amushyira ibyo kurya ampa ibyo kurya bye aba ari njye mbijyana iryo joro”

Njyewe-“Ndakumva Ama! Hanyuma byaje kugenda gute?”

Amanda-“Songa! Nindi minsi nakomeje kujyayo gusa amaganya n’ agahinda bikamubuza kugira icyo ambwira, gusa mu ijoro rimwe turi kumwe nagize ntya ndamuganiriza atangira kumbwira ibye kuva mu kuvuka kwe, akomeza ambwira iby’ ubuzima bw’ urukundo..aho niho nakumunyeye, ibindi byose abigira ibanga yanga kunyizera ngo hato uwo yikangaga yumvishe intambuko yuwo atazi hanze atazamenya aho ari”

Njyewe-“Yikanga? Ubwo uwo ninde yikangaga?”

Amanda-“Numvaga avuga…niba ari Boss we…niba ari inde…Eeeh! Banza ngo ari Manager”

Njyewe-“Manager?"

Amanda-“Yego! Niko numvaga avuga, ubundi akaganzwa n’ amarira, akongera kumbwira ngo abavandimwe bamuguranye amagana, akicuza avuga ko nawe atari we ndetse ko atigeze agambirira kugusimbuza undi, akibuka uko wamubaga hafi gusa yagera kumbarutso yo kuba ari aho namusanze akananirwa kubinsobanurira”

Nyuma y’ akanya katari gato ntuje….

Njyewe-“Ariko wari uzi n’ ikindi Ama! Ibi bintu ngiye kubijyamo! Ntabwo ibi bintu bigomba kurangirira gutyo gusa”

Amanda-“Ugiye kubijyamo?”

Njyewe-“Ngiye guhaguruka, nubwo umuryango wa Teta watereye agati mu ryinyo aho kunyumva bakampinda, igihe niki ngo ukuri kugaragare, Manager niwe kabitera agomba kubazwa ibyo kwiyahura kwa Teta”

Amanda-“Songa! Nyamara ariko ushatse wabyihorera ukareka kwibabariza ubusa n’ ubundi ntibyamugarura”

Njyewe-“Ndabizi ntabwo byamugarura ariko kandi Manager ngiye kumucanaho umuriro muteshe umutwe nawe azasare nkuko nanjye nasaze,wenda yakumva neza ko nta keza ko kwiba no gutema imizi y’ urukundo….nta keza kabyo”

Amanda-“None se ubu ugiye gukora iki Songa?”

Njyewe-“Bimparire Ama! Ni njyewe nzi icyo nzakora, gusa ninkwitabaza uzankundire unyitabe”

Amanda-“Nta kibazo Songa! Gusa uzabyitwaremo neza, uzashishoze hato utazabigwamo nawe”

Njyewe-“Humura nzabyitwaramo neza kandi nongeye kugushimira ko wakomeje kandi ugikomeza kumba hafi,uracyari wa wundi koko nabonye ngakurikira, uwo wa mubyeyi yanshimiye bakakunyiba ntariyakira”

Amanda-“Songa! Garukira aho utongera kugarura bya biganiro bituma buri gihe ntahana agahinda, ahubwo reka ntahe”

Amanda yarahagurutse nyuma yo kwiyumvira nanjye ndahaguruka ndamuherekeza, mu nzira ngaruka hari imodoka ebyiri zanshiyeho, imwe muri zo ndayimenya, yari iya Boss, zinjira mu gipango ntera intamwe ndende, mu kwinjiramo natunguwe no kubona abantu nka batanu, mu kureba neza mbonamo na Joannah nibaza ikibagenza………………………………………….

Genesisbizz

Related Articles

Ibitekerezo

  • - Theo

    Songa ihangane utegereze inkuru izasoza teta yabonetse hari abamurohoye higa cash muzabeho neza

  • - Egide

    MBESE NA AMANDA YARASHINGIWE? MBEGA SONGA NGO ARAGIRA AKAGA WE! MURATWIHERE IBINDI BICE BISIGAYE.

  • - Eli Elohe

    Njyewe rwose biranyobeye. Songa natuze ubundi Amanda azamubwire byose hanyuma abone aho ahera amukurikirana. Ark umwanditsi nakomerezaho.

Igitekerezo cyawe kirashyirwaho aruko gisusumwe

TANGA IGITEKEREZO