Episode 98: Mu mvura nyinshi uwo ntazi yantegetse kumukurikira ku kirwa k’ ihirwe

Muri ako kanya umutima wateye insigane, ntangira gucurikiranya amagambo, kubera kongera kumva umuntu unyibutsa ko nakundaga Teta, narangiye aho ndi Gihozo ambwira ko aje bwangu.

Nageze mu rugo nkomeza kuzenguruka mu nzu nivugisha,

Njyewe-“Ubu se nyuma y’ igihe Gihozo azanywe niki hano koko? Ko nagiye iwabo kenshi mbasaba kuntega amatwi ngo mbabwire icyo namenye baveho banaryoza Manager kabitera ariko bakampinda bakanyima umwanya banga ko ndikocora ngo mvuge ko wa mugani baguranye ubuzima bwa Teta amagana,

Ubu wasanga aje kunyibutsa ko nakunze gusa nta kindi kimuzanye ariko ntacyo naze murebe mu maso byibura nakwibuka byinshi”

Nyuma y’ iminota nka mirongo itatu nongeye kumva telephone isonnye nitaba vuba, yari we wambwiraga ko ahageze, ndasohoka ngeze ku muryango w’ igipangu mubona hirya gato yanjye ndamurembuza.

Yaraje angezeho mbanza kugira ngo ntabwo ari we ndibeshye, yari yambaye ikanzu ndende imuruta n’ igitambaro mu mutwe, nabonaga asa n’ uwiriwe agenda imihana, amaze kumpobera turinjira dukomeza mu nzu, muha kalibu aricara, nyuma y’ umwanya utari muto mwitegereza nibaza icyo yabaye cyamuteye guhinduka ndamubaza,

Njyewe-“Amakuru yawe se Giho?”

Gihozo-“Ni meza”

Njyewe-“Nkwakirize iki se? Hari Fanta, jus n’ icyayi….”

Gihozo-“Oya nta kibazo meze neza nta kintu nshaka”

Njyewe-“Ok! Nabicyekaga ko ushobora kwanga ibyo nguhaye gusa ntabwo byagakwiye ariko ntacyo”

Gihozo-“Oya ntabwo ari ukwanga icyo mumpaye ahubwo nuko…nuko nanze kubagora”

Njyewe-“Ungora? Kwakira umushyitsi nta kigoye kirimo, kandi wigira ikibazo Imana yaduhaye amafunguro ngo tujye twakiriza abadusuye”

Gihozo-“Nta kibazo mpa Fanta”

Maze kumufungurira Fanta nicaye imbere ye maze aragotomera, ndamwitegereza, akomeza kwanga guhuza amaso nanjye,

Njyewe-“Hanyuma se niki kiguteye kuza kundeba igitaraganya?”

Nyuma y’ akanya gato Gihozo acecetse yatangiye kuvugana ikiniga ndetse amarira amuzenga mu maso,

Gihozo-“Songa! Rwose ikingenza hano nta kindi kitari ukugusaba imbabazi ni ukuri nshiye bugufi imbere yawe, umva ukuri kwanjye, nzanywe no kugusaba imbabazi kuko njye na mukuru wanjye ari twe twateye Teta guhindura ingendo, akaguheza mu mutima akimika uwatumye yanga kwiyakira bikarangira yiyahuye”

Njyewe-“Ntabwo ndi kumva neza icyo ushatse kuvuga ariko?”

Gihozo-“Songa! Ndabyibuka neza ubwo twari dusumbirijwe, ibyago n’ amakuba bisimburana mu rugo ntabwo wigeze uhabura gusa nubwo watubaga hafi mu buryo bumwe twari dukeneye uwadufasha mu bushobozi byibura bugacya kabiri,

Nibwo twagiye inama njye na Mukuru wanjye twicaza Teta maze tumubwira buryo ki agomba kukureka akegurira umutima Manager dore ko byabaye amahire murumuna we wazaga hano kenshi tukamwakira nk’ amata y’ abashyitsi,

Yaradukundiye aratwumva, Manager atanga byose nawe warabimenye ko n’ inzu yacu bank imaze kuyitwara yatwimuriye mu yindi, afasha Teta iby’ ishuri byose kugeza ubwo yamujyanye akajya kumugira umugore we…byose twari tubizi gusa tubigira ibanga rikomeye”

Njyewe-“Ngo…ngo….uravuze ngo kugeza ubwo Manager yajyanye Teta ajya kumugira umugore?”

Gihozo yikirije azunguza umutwe, ndiruhutsa menya ukuri ntari nzi, nyuma y’ akandi kanya katari gato,

Gihozo-“Songa! Teta yajyanye agahinda, yagukundaga bitagira urugero byo ndabizi gusa kandi yanze gusuzugura bavandimwe yemera ibyo tumubwira nubwo atari azi ko ari hano bizagera,

Tubabarire kubyabaye byose, ndicuza imbere yawe kuko njye na mukuru wanjye twagize Teta undi ndetse na nyuma yuko yiyahuye ntabwo byari bikwiye ko tugufata nkuwo tutazi, twirengagije ko Teta yiyahuye usiganwa umusanga ngo umukize,

Ni ukuri nyuma y’ ibyabaye, nari ngarutse kugusabaza niba ugifite umutima ukomeye, mbese niba ukizirikana ko wakunze, niba ugifite wa mutima waguteraga gukora ibishoboka byose ngo umube hafi, girira we maze utubabarire”

Nyuma y’ akanya gato nanone,

Njyewe-“Ok! Nubwo bwose ntakwemera ko Teta yahinduwe namwe ariko byibuze menye ko mwabigizemo uruhare, kubabarira byo ni itegeko kuri njye kuko nzi ko ari umuti ukomeye w’ umutima”

Gihozo-“Urakoze Songa”

Njyewe-“Hanyuma se amakuru yanyu, mubayeho mute”

Gihozo-“Songa! Turiho tutariho, nyuma yuko Manager ahaye Denise akazi yagize ibyago ahomba amafaranga menshi baramwirukana, nyuma yuko nanone Manager atorotse ngo atazabazwa ibya Teta inzu yari yaratwishyuriye amezi icumi bayidukuyemo, ubu rwose turasumbirijwe nawe urabibona uko nabaye”

Nyuma y’ akanya gato…,

Njyewe-“Mwihangane rwose ndumva mutorohewe, none se ubu muri kuba hehe?”

Gihozo-“Twagiye kuba ku hirya y’ umugi, ubu nyine buri wese yirwanaho akagira icyo acyura”

Njyewe-“Bite bya mukecuru se?”

Gihozo-“Mukecuru twagize Imana arakira gusa ubu ni za ntege nke z’ izabukuru”

Twakomeje kuganira amasaha akomeza kwicuma njya gutegera Gihozo ndetse muha n’ impamba, ngaruka mu rugo mpahurira na Gentil wari wabuze amahoro aterera ibintu byose hejuru,

Njyewe-“Cyo re! Gentil! Bite byawe uri mu biki?” Wasaze cyangwa?”

Gentil-“Oya ntabwo mbyumva! Ntabwo nshobora kubyumva habe na mba!”

Njyewe-“Ariko se noneho ndamenya mpera hehe mfata?”

Gentil-“Songa! Songa! Bya byangombwa byiyi nzu z’ abandi biri hehe?”

Njyewe-“Reka reka sinzi naho wabibitse”

Gentil-“Oya Songa! Wimbwira gutyo, iyi nzu ibamo njyewe nawe gusa nta wundi muntu uba hano”

Njyewe-“Ibi niki kandi? None ho se utangiye no kunkeka amababa? Ubwo se ibyangombwa nabyiba nkabigira nte koko?”

Gentil-“Ibyangombwa niwo mutungo Songa! Mbwira niba wanabimpishe menye icyo ugambiriye…”

Erega byabaye ibindi njye na Gentil turatongana karahava, yakomezaga kunshinja ko ari njyewe wahishe ibyangombwa nanjye ngakomeza kubihakana kugeza ubwo yivumbuye agenda ntazi aho agiye.

Nasigaye nibaza byinshi amasaha mbura igisubizo, nibazaga uwaba yatwinjiriye agatwara ibyangombwa nkamubura ndambiwe njya kuryama nakangutse mu gitondo nsanga Gentil akicaye mu ntebe, noneho yari yatuje,

Njyewe-“Gentil! Nanubu wakomeje kubibura se?”

Gentil-“Wahora niki Songa, nakomeje kubibura rwose ahubwo tuza umbwire twibukiranye…ubundi ibuka neza cya gihe maze kubyereka babanyamategeko nabishyize hehe?”

Njyewe-“Wabishyize he ra?...ugira ngo ndabyibuka se? Ndumva ntibuka aho waba warabirambitse ku meza”

Gentil-“Ubu se mbigenje nte Songa?”

Njyewe-“Reka dutuze dukomeze dushake, ibyo ari byo byose ntaho byagiye nzi neza ko turabibona”

Gentil yemeye atemeye musiga mu rugo nerekeza ku kazi, iminsi yarihuje iba icyumweru ibyangombwa dukomeza kubibura, Gentil ntabwo yari akiryama ngo abone ibitotsi ariko kandi nanjye ubwoba bwakomeje kuba bwinshi nibaza impamvu nemeye ko yikorera uwo mutwaro.

Ari muri weekend nagiye kureba inzu nubakishaga iwacu ku muhanda, aho nari naraguriye Mama ngo nzabimure mbavane mu kabande.

Mu kuhagera nasanze ibintu byose bimeze neza ndetse igisigaye ari ukuyitaha tukayicinyiramo akadiho dore ko bashiki banjye nabo ayisumbuye nabo bari bayagereje, ibyanteraga gukubita agatwenge nkishimira ko imihigo nahize ndi kuyigeraho ndetse n’ ikivi cya Data ndi kucyusa…ibyanteraga gushimira Imana yo igena byose.

Navuye mu rugo nkomereza ku Gisenyi, nkuko nabimenyereye nari ngiye kwibuka Teta, mu nzira ngenda nakomeje kumva ijwi rimbwira ngo: “Nanjye sinjye” nahumiriza nkabona isura ye nkihumura mu maso.

Nagezeyo nshigutse ubwa kenshi, nkomeza ku nkombe ngera kuri cya giti k’ inganzamarumbo ndicara nkegekaho umutwe.

Nakomeje kwibuka uw’ akahise, uwankunze akampa amahirwe ubwenge n’ umutima biramusanga,mu gihe nari nkiri aho imvura y’ umushokano yisutse aho idakubye, ndwana no gushaka aho nugama.

Natangiye kwiruka muri icyo gihuru ariko mbura aho nyura ngaruka munsi ya cya giti k’ inganzamarumbo, imvura yarimo umuyaga si ukugwa ibintu biba ibindi ndetse n’ inkuba ziriyasira ntangira kugira ubwoba.

Mu gihe nari nkiri aho hari ubwato nabonye buza hakuno ku nkombe, umugabo wari uburimo amaze kubuzirika azamuka aza aho nari ndi, imvura yari yamunyagiye gusa yari akikiye agahago.

Yansanze kuri cya giti aho negekaga agahinda maze aransuhuza,

We-“Uraho yewe musore?”

Njyewe-“Muraho namwe?”

We-“Ko uri hano se muri iyi mvura ntutinya inkuba n’ umuhengeri?”

Njyewe-“Yewe, erega yamfatiye hano mbura uko mbigenza”

We-“Aha se wahageze ujya hehe?”

Njyewe-“Nta handi najyaga, nari naje aha kwibuka umwiza nabuze, uwanshiye mu myanya y’ intoki agasiga ambwiye ngo: “Nanjye si njye”

We-“Ngo? Uwo mwiza wabuze se wamuburiye aha?”

Njyewe-“Yego, namuburiye aha umuvumba umutwara mbibona, iki kiyaga gihora gishonje yakiyahuyemo nacyo cyanga kumwanga”

We-“Ihangane ariko kandi…harya ngo yasize akubwiye ngo:“Nanjye si njye?”
Njyewe-“Yego niko yasize ambwiye, nanubu mbyumva kenshi bingaruka mu matwi, ishusho ye nkayihoza mu ntekerezo asa n’ uwanzukiyemo”

We-“Yewe, urugendo nari ngiyemo ndarusubitse, reka imvura ihite tujyane ngire icyo nkwereka”

Njyewe-“Ngo? Tujyane hehe wa mugabo we ko ntakuzi?”

We-“Uti ntabwo wajyana nuwo utazi? Nyamara wasanga utakuzi ariwe wanyagiriwe hano utegereje, uwo utazatuma ugaruka aha hantu ukundi”

Njyewe-“Ariko se wa mugabo we aho ntushaka ko nkubahuka nkakubwira nabi? Ushaka kunyirukana hano hantu nagabanye kubera agahinda?”

We-“Tuza wa musore we, imvura ihoshe maze unkundire unkurikire twinjire mu bwato nkujyane ku kirwa k’ ihirwe abe ariho utura ayo maganya yawe, wenda niho hatuma utazongera kugaruka gutura agahinda kawe aha hantu ukundi…………………………………….

Genesisbizz

Related Articles

Ibitekerezo

  • - Alsina cynthia

    Mana weeee ibintu nketse bibaye aribyo nakwishima nukuri ntakabuza uyu ni Teta bagiye kumwereka kumirwa🥰 imana igira amaboko disiii... Eddy basi ejo uzaduhe episode nkebyiri pe inkuru wagirango nibwo nkiyitangira. Urakoze 👏👏👏

  • - Elie Le Petit

    It's Smelling To Me That Teta Still Alive.She Didn't Die

  • - JP

    Igitekerezo mwanditsi wumuhanga ejo wazadushyiriyeho ibice byose byinkuru kowaba udufashije murakoze kutwumva

  • - Mbabazi Mellony

    Yampayinka rero sinabivuzengo Teta ntiyapfuye ariho uwo mugabo abaye atariwe wamutabaye mwangaya Mwanditsi wacu komerezaho Songa agomba kubana na Teta rwose

  • - Theogene

    Ndabona songa agiye guhura na Tera Imana ibibemo amubone atuze

  • - Eli Elohe

    Songa rwose.

Igitekerezo cyawe kirashyirwaho aruko gisusumwe

TANGA IGITEKEREZO