Episode 99: Narumviye mpinduka umugaragu ariko nongera kubona Teta

We-“Tuza wa musore we, imvura ihoshe maze unkundire unkurikire twinjire mu bwato nkujyane ku kirwa k’ ihirwe abe ariho utura ayo maganya yawe, wenda niho hatuma utazongera kugaruka gutura agahinda kawe aha hantu ukundi,

Njyewe-“Ikirwa k’ ihirwe?”

We-“Yego, muri aka kanya nyizera utanzi, ibyo umbwiye mu mwanya muto tumaranye binyemeje ntashidikanya ko ari wowe nabereye intumwa ngatinda nkaba nkugezeho, noneho ahari ubu nagororerwa”

Njyewe-“Ariko se ibyo uvuga ko ntari kubisobanukirwa wakweruye ukambwira?”

We-“Ntaweruye wasohoje ubutumwa wa musore we, ahubwo ndabona imvura ihise, nkurikira tugende”

Njyewe-“Ubu se nkwizere nte wa mugabo we ngo mveho ngukurikira ntakuzi?”
We-“Ariko se tugende….”

Uwo mugabo yagiye imbere amanuka agana aho yari yasize ubwato, hashize akanya niyumvira nanjye manuka musanga ninjira mu bwato aragashya twerekeza ku kirwa k’ ihirwe.

Mu rugendo rutari ruto ugereranyije amasaha abiri n’ igice nibwo natangiye kubona hakurya ikirwa, ngize ngo mubaze niba ariho tugiye aranyihorera, dukomeza kugenda kugeza tuhageze tuva mu bwato,

We-“Nkurikira tugende, bidatinze turaba dushyitse, akira iri kote witwikire hose, hatagira uwo utuma akureba cyangwa uwo uvugisha”

Njyewe-“Kubera iki se ngomba kugenda nihishe nububa nk’ umujura?”

We-“Kora ibyo nkubwiye wa musore we”

Nafashe iryo kote nditwikira ajya imbere ndamukurikira, tugenda urugendo rutari ruto mu mugoroba wa joro nibwo twageze ahantu hari amazu menshi, ndetse hacaracara abantu benshi nkomeza kumukurikira.

Twinjiye mu rugo rumwe uwo mugabo arasuhuza yikirizwa n’ ijwi ry’ umugore, wa mugabo ampa kalibu mu nzu ndicara, rya kote ndaryifubika, haza umugore wari ufite urumuri arankesha,

We-“Uraho yewe?”

Njyewe-“Muraho neza?”

We-“Yego! Ko mutugendereye bwije se murava he mukajya he? Ndabona utanshiye mu jisho ari ubwa mbere nguteye imboni”

Wa mugabo yahise ashyira ku ruhande umugore we, sinzi ibyo bavuganye nyuma aragaruka,

We-“Naho ubundi wahageze, aha ni ku kirwa k’ ihirwe, uwageze aha nta kabuza arahirwa, ntawe ugera aha ngo yongere kuganya”

Njyewe-“None se ko nashimye nza, nkagukurikira kuko wanyijeje gukira amaganya, aha nzahava nibagiwe uwo nabuze nkunda ko n’ ubundi ntazongera kumubona ukundi?”

We-“Tuza bazane ibyo kurya ukore ku munwa uryame usinzire, kare kare mu museso inkoko niyo ngoma”

Niko byagenze tumaze kurya banyeretse aho ndyama gusa ntabwo nigeze mbona ibitotsi iryo joro, naraye nkanuye nibaza aho ndi nicyo naje nkurikiye nkarushaho kugira ubwoba.

Mu museso wa kare numvishe unkangura, ndabyuka ntitwatinze twafashe urugendo nkomeza kugenda mubaza aho tugiye ariko akomeza kumpisha, bidatinze twageze ahantu hari amatungo menshi, abantu bacaracara mu mirimo itandukanye wa mugabo arambwira,

We-“Nihagira ukubaza umubwire ko uri umugaragu mushya, kandi icyo ubona nkora nawe ugikore”

Narikirije dukomeza kugenda, umbajije wese nkamubwira uko wa mugabo yari yambwiye, imirimo ntangira gukora ibyo nawe yakoraga saa sita zigeze ubwo twari twicaye turuhuka,

Njyewe-“Ariko rero njyewe ndabirambiwe, ubundi ubu ndi mu biki? Igihe nahereye nkubaza wanyihoreye, wanzanye gukora sinzi nuwo ndi gukorera, ubundi ubu wampaye iki cyanshuritse ubwenge?”

Wa mugabo yarebye hirya no hino asanze nta muntu uri hafi arambwira,
Tuza musore, tuza hano ni kwa Databuja, yitwa Bintu! Niwe mutunzi wenyine kuri iki kirwa, aba ureba bose bacaracara hano ni abakozi be”

Njyewe-“None se nanjye wanzanye guhakwa?”

We-“Tuza uhakwe wa musore we niba ushaka gukira agahinda, kandi ntuzigere urambwirwa kuko kugeza aho uzabasha guhuza imboni n’ ihirwe waje ushaka hari ubwo byazanatinda”

Njyewe-“Ariko se ibyo umbwira bihuriye he na Teta nabuze wasanze ndirira ku nkombe y’ umugezi utemba koko?”

We-“Tegereza wa musore we, nurambirwa uzagenda amaramasa kandi uzabaho iminsi yawe yose wicuza, ariko niwihangana ugategereza uzakira agahinda kadashira, untere kugororerwa”

Nikije umutima akazi karakomeza, bigeze nka saa cyenda narebye hirya mbona umuntu watemberaga agaragiwe, wa mugabo twari kumwe ahita ambwira,
We-“Do! Uriya niwe Databuja nakubwiraga, buriya aba asohotse atembera mu bakozi be areba uko ibintu bimeze, iyo aje twese tuba tugomba gukora tutikoresheje, hari ubwo akwitegereza akaba yaguhitamo ukajya gukorera iwe mu rugo”

Naritaye mu gutwi nkora ntikoresheje, iminsi ikomeza kwicuma ndetse ibyumweru bibiri birashira, uwo munsi wari uwa nyuma kuri njye ubwo nari naraye ntasinziriye nigaya numva ko nashutswe nkajyanwa bunyago nkajya gukora uburetwa gusa byisubiyemo twazindutse tugenda, inzira yose nagendaga nitotomba mbaza wa mugabo impamvu, turinda tugerayo.

Muri ya masaha Databuja yasohokaga yaraje abakozi bose si ugukora karahava, yaboneje aho nacukuraga igishyitsi k’ igiti nigira nkutamubonye, hashize akanya aravuga,

We-“Uwo musore…uwo musore ucukura igishyitsi mumujyane asange abandi, ndabona agashoboye”

Ako kanya hari umusore wambwiye kumukurikira duhinguka mu rugo rwarimo abantu n’ abandi buri wese ari mubye, banyereka aho abandi basore bariho bubaka urugo nanjye ndabafasha, guhera uwo munsi bambwira ko nzajya nkorera kwa Databuja mu rugo.

Kuva uwo munsi wa mugabo wanzanye ntabwo nigeze nongera kumuca iryera, nirirwaga aho mu rugo bwakwira nkajya aho abandi bakozi bararaga, mu gitondo imirimo igakomeza.

Umunsi umwe numvishe bavuga ko nimugoroba haraba ibirori, ko umuhungu wa Databuja arerekana umukobwa yahisemo bendaga kubana, ibyo kunywa byari byateguwe amashyushyu ari yose ntegereje kureba iyo ibirori byabaye uko biba bimeze.

Ntibyatinze amasaha yarageze intore zirahamiriza abakobwa barashayaya, Databuja arasohoka ndetse n’ umugore we n’ abandi ntamenye, umuhungu we nawe arasohoka babaha ibyicaro.

Nyuma yo kuvuga ijambo Databuja yaduhaye uburengenzira bwo kunywa no kurya kakahava, si ukunywa natwe duca umuzizi ari nako abakozi tuganirira aho turi, igihe kiragera numva ngo umuhungu wa Databuja agiye kuzana umukobwa yahisemo twese turahaguruka.

Hashize akanya numva amashyi menshi nanjye ndayakoma, nyamara sinari nanabonye uwo mukobwa wahiswemo mu bandi, mu kwitegereza neza umusatsi wamvuye ku mutwe.

Nabonye umukobwa usa neza na Teta, umutima urankuka, nsa n’ utaye ubwenge nsubira inyuma njya inyuma y’ abandi, mpumeka insigane birarenga ndanyonyomba nerekeza aho abakozi twararaga.

Gutuza byaranze nsubirayo nongera gutera akajisho kuri wa mukobwa wasaga na Teta neza, nkibaza ukuntu abantu basa badafite icyo bapfana bene ako kageni iby’ uko ari Teta byo ntabwo nashoboraga kubyiyumvisha.

Akaryoshye karayonze gashira mu itama, abakozi bari bizihiwe bose barikura nsigara njyenyine aho ibirori byari byabereye, mu gihe nari nkicaye hari umusore waje aransuhuza,

We-“Bite muvandi! Ko wowe utajya kuryama byagenze bite?”

Njyewe-“Nari nkicaye aha, ibirori byandyoheye nari ndi kwibaza umunsi nanjye nzakoreraho ibirori”

Amaze kwicara,

We-“Uti umunsi uzakoreraho ibirori?” Wowe se ufite uzabigukorera ko uri kwishunga umwana wa Databuja witoreye umukobwa mu kiyaga”

Njyewe-“Ngo?”

We-“Uriya mukobwa bagiye kubana se ntabwo umuzi? Umaze igihe kingana gute hano?”

Njyewe-“Yewe ntabwo ari kirekire niyo mpamvu ubwo ntazi iby’ iyo nkuru”

We-“Uriya mukobwa wabonye yarohowe mu kiyaga n’ umuhungu wa Databuja, amuzana kuba hano, none bagiye no kwibanira da”

Uwo musore yambwiye atyo menya ntashidikanya ko Teta atigeze apfa akiriho ndetse ko ari we niboneye n’ amaso yanjye, ako kanya menya neza icyo wa musare yanzaniye ku kirwa cy’ ihirwe nyuma yo kumubwira iby’ agahinda kanjye.

Iryo joro nagiye kuryama gusa ntabwo nigeze ngoheka, byonyine kuba nari menye ko Teta akiriho kandi ari bugufi yanjye byongeye kunsubizamo imbaraga, nakomeje kwibaza uko nzamugera imbere byibura ngo duhuze imboni,

Umunsi ku munsi nakomezaga gushaka amahirwe yazatuma mugeraho ariko nkomeza kuyabura, nkarazwa ishinga no kubaririza igihe umuhungu wa Databuja azakorera ubukwe ariko uwo mbajije wese yambaza icyo mbishakira nkaruca nkarumira.

Kera kabaye namenye itariki y’ ubukwe, bikaba ibyo ntari kubasha guhindura, buracya ngo ubukwe bube ubwo nari munsi y’ urugo nabonye umukobwa witwaga Mutesi, wakundaga kuba ari kumwe n’ abakobwa ba Databuja na Teta wabaga abarimo dore ko bitabaga byoroshye kubageraho cyangwa kubabona basohotse.
Mutesi naramuhamagaye arankundira aranyitaba,

Njyewe-“Mute! Nari nguhamagaye ngo umfashe niba byashoboka”

Mutesi-“Mbwira vuba ndihuta urabizi ko ntajya ntinda hanze”

Njyewe-“Ndashaka kumfasha nkagutuma kuri Teta, ukagenda ukamumbwirira ko uwagenze bukira, uwo wategeye ibiganza, uwo wazukiyemo amuri hafi, kandi uti “Nanjye si njye”

Mutesi-“Ntibishoboka? Teta se aziranye n’ abakozi? Umukazana wa Databuja muziranye he?”

Njyewe-“Ndagusabye njyanira ubwo butuma, umuhereze na kano gapapuro nta gushidikanya arahira amenya uwo ari we”

Nahereje Mutesi agapapuro kari kanditseho ngo Nanjye si njye agenda ubwo, gusa yagiye akebuka anyitegereza nkabibona ko atemeraga ibyo mubwiye, nyuma y’ akanya katari gato numvishe umuntu utambuka ndashiguka mpindukiye mpuza amaso na Teta mpaguruka bwangu.

Nabanje guhagarara mbura icyo nkora, nawe akomeza kundeba adahumbya, ntera intambwe nawe atera indi mugeze imbere ikiniga kiranganza, Teta nabonaga ko atanyibuka akomeza kundeba nkutanzi………………………

Genesisbizz

Related Articles

Ibitekerezo

  • - Eli Elohe

    Nanjye sinjye. Ntibazabana kbsa

  • - Mbabazi Mellony

    Ayiiiiiiweeeee Teta arabe ataribagiwe rwose ahubwo se Songa biramugwa amahoro da?

  • - Alsina cynthia

    Yooo byambabaza Teta atibuka songa nukuri 🙆🙆🙆gs Basi imana ishimwe ubwo akiri muzima.

  • - Elie Le Petit

    Birabaye murongeye murabonanye,biragenda gt se?muratoroka se?ibibazo biraje bibabere ihurizo

  • - K.Joseph Vinny

    Songa itonde utabigwamo gusa umwanditsi urakoze kuba teta atarapfuye kd uzakore nibishoboka manager agaruke amenye ko amafrng atagura urukundo

Igitekerezo cyawe kirashyirwaho aruko gisusumwe

TANGA IGITEKEREZO