Ethiopia: Umwaka w’imikino wagizwe imfabusa kubera icyorezo cya COVID-19

Ishyirahamwe ry’umupira w’amaguru muri Ethiopia ryaraye ritangaje ko imikino yose ya shampiyona iburijwemo kubera icyorezo cya coronavirus.

Uwo mwanzuro wafashwe nyuma y’ikiganiro cyabaye abo bireba bahari naho abandi bakitabiriye mu buryo bw’iyakure bwa videwo, harimo n’abahagarariye shampiyona y’icyiciro cya mbere.

Itangazo ry’inama nkuru y’ubuyobozi bw’ishyirahamwe ry’umupira w’amaguru muri Ethiopia rigira riti:

"Hashingiwe ku kuba igihugu kiri mu bihe bidasanzwe no kuba hatazwi igihe ikiza cya coronavirus kizamara, twafashe icyemezo cyo kuburizamo imikino ya shampiyona y’uyu mwaka".

BBC ivuga ko Muri Ethiopia, abantu 162 ni bo bamaze kwemezwa ko banduye Covid-19, indwara y’ubuhumekero iterwa n’ubu bwoko bushya bwa coronavirus.

Muri bo imaze kwicamo abantu bane naho 93 bamaze kuyikira, nkuko imibare ya Kaminuza ya Johns Hopkins yo muri Amerika ibigaragaza.

Kubera iryo burizwamo ry’imikino ya shampiyona, uyu mwaka w’imikino wagizwe impfabusa - bivuze ko nta kipe izazamuka mu cyiciro cyangwa ngo imanuke.

Ethiopia kandi ntabwo izahagararirwa mu irushanwa rya Champions League nyafurika (CAF Champions League) n’iry’igikombe cya CAF Confederations Cup.

Kugeza ubwo iyi shampiyona y’uyu mwaka yaburizwagamo, Fasil Kenema ni yo yari iyoboye urutonde rw’agateganyo n’amanota 30 mu mikino 17 yari imaze gukina.

Mekele 70 Enderta ni yo yari ku mwanya wa kabiri, irushwa na Fasil Kenema inota rimwe.

Iyi Mekelle 70 Enderta ni yo yegukanye igikombe cya shampiyona y’umwaka ushize wa 2019.

Ishyirahamwe ry’umupira w’amaguru muri Ethiopia ryanafashe icyemezo cyuko amakipe akwiye kugumana abakinnyi bari bafite kontaro zizarangira ku itariki 30 y’ukwezi gutaha kwa gatandatu.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO