Evangile:Imana ntabwo yaremye abantu kugirango babe imbata z’ibyaha itsinda Redeemed ryatanze ubutumwa bwibutsa abantu kubaho ubuzima Imana ishaka

Itsinda Reedemed rigizwe n’abaririmbyi batandukanye ndetse aba bose babarizwa muri Eglise Adventiste Francophonie de Kigali i Kanombe kuri iki cyumweru bataramiye abakunzi ba Genesis TV biratinda binyuze mu kiganiro Evangile aho bakumbuje benshi inzira igana ku mana biciye mu butumwa batangiye mu bihangano byabo.

Mu kiganiro yagiranye na Genesisbizz Bahizi Fabrice uhagarariye Redeemed Group yatangaje ko bishimiye cyane urugwiro bakiranwe mu kiganiro Evangile ndetse aboneraho no gushimira bikomeye abakunzi ba Genesis TV by’umwihariko ubuyobozi bwayo.

Ubusanzwe iri tsinda rihuriyemo abaririmbyi batandukanye aho bose bahuje umugambi n’intego kuko bose bakora indirimbo ziramya ndetse zikanahimbaza imana nk’uko Bahizi yakomeje abitangaza.

Itsinda Redeemed ryashinze imizi mu mwaka wa 2015 aho ryashinzwe n’uwitwa Ishimwe Olivier, uyu musore ngo yegeranyije abandi basore bagera kuri barindwi aho ngo bose bari bahuje umuhamagaro wo kuvuga ubutumwa bwiza bw’Imana binyuze mu gukora indirimbo ndetse icyo gihe ngo batangiye ari itsinda rigizwe n’abantu 8.

Gusa kugeza uyu munsi Redeemed igizwe n’abasore batandatu aho abandi ngo babaye bahagaze kubera impamvu zitandukanye z’ubuzima kuko ngo bakorera kure y’aho iri tsinda ribarizwa.

Bahizi Fabrice avuga ko kuri ubu bafite Alubumu y’amajwi imwe ndetse n’indirimbo 2 z’amashusho ndetse ibi byose wabisanga ku muyoboro wabo wa You Tube witwa Redeemed Group Rwanda.

Kuri ubu iri tsinda ririmo gutegura Alubumu ya kabiri y’amajwi ndetse n’indirimbo z’amashusho.

Impamvu nyamukuru baririmba ngo indirimbo ziramya zikanahimbaza Imana ni uko bibahuza n’ijuru kandi ngo bikaba n’uburyo bwiza bafasha itorero ryabo kugeza ubutumwa bwiza kure hashoboka.

Ubwo Bahizi uhagarariye iri tsinda yabazwaga ku kibazo cy’imbogamizi bahura nazo yatangaje ko bahura n’ikibazo cy’amikoro icyakora ngo kubera bafashwa n’Imana ngo babasha kugera kubyo bashoboye kugirango batange ubutumwa bwiza.

Iri tsinda ryaboneyeho kwibutsa abantu ko bakwiye kubaho ubuzima Imana ishaka kuko ngo ntabwo Imana yaremye abantu kugirango biyangize cyangwa ngo babe imbata z’ibyaha ahubwo ngo abantu baremewe imirimo myiza muri Kristo Yesu.

Umuntu wese wakwifuza gutera inkunga mu buryo butandukanye iri tsinda ashobora kubasanga ku mbuga nkoranyambaga zabo harimo Instagram dore ko bitwa Redeemedgroup-Rwanda ushobora kandi kubahamagara kuri nimero ya 0780610136 mu gihe waba ufite igitekerezo cyangwa inyunganizi wifuza kubaha.










Itsinda Redeemed ryatanze ubutumwa bw’ihumure biciye mu bihangano byabo ndetse riboneraho no gushimira ubuyobozi bwa Genesis TV bwabashyiriyeho ikiganiro Evangile.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO