Facebook yahombye akayabo ka miliyari 7$ bitewe no kuva ku murongo

Ku wa mbere dusoje urubuga rwa Facebook rwahombye 5% y’imigabane yarwo bitewe no kumara amasaha make rwavuye ku murongo ndetse ibi byateje ikibazo ku zindi mbuga zigenzurwa na Facebook.

Ku wa mbere dusoje ahagana mu masaha ya saa kumi n’imwe n’igice (17:30) z’umugoroba nibwo humvikanye guhagarara mu mikorere kw’imbuga nkoranyambaga enye arizo : Facebook, Whatsapp, Facebook Messenger na Instagram.

Izi mbuga zose zahagaritse gukora mu buryo butunguranye ndetse iki kibazo cyabaye ku isi yose.

Uku guhagarara gukora kw’izi mbuga mu buryo butunguranye byatumye umuherwe washinze iki kigo Mark Zuckerberg ahomba cyane ku buryo yahise amanuka umwanya umwe ku rutonde rw’abantu bakize ku isi.

Amakuru dukesha urubuga rwa Forbes avuga ko Zuckerberg yavuye ku mwanya wa gatanu (5) agahita ajya ku mwanya wa gatandatu (6) nk’umuntu ufite ubutunzi bwinshi kurusha abandi ku isi aho ubu afite akayabo ka miliyari 116.8 z’amadolari ya Amerika.


Zuckerberg yamanutse umwanya umwe ku rutonde rw’abaherwe batuye isi

Kuva ubwo izi mbuga zose zahagarikaga gukora ku mugoroba w’ejo hashize, nta kintu ubuyobozi bw’iki kigo buratangaza ku mpamvu yaba yarateye guhagarika gukora kw’izi mbuga.

Abantu benshi batekereza ko iki kigo gishobora kuba cyaragabweho igitero cy’ikoranabuhanga kigamije kwiba amakuru.


Bitekerezwa ko Facebook yagabweho igitero cyo kwiba amakuru(Hacking mu ndimi z’amahanga)

Izi mbuga zari zavuye ku murongo ni Facebook, Whatsapp, Facebook Messenger na Instagram. Kuva ku mugoroba w’ejo hashize ubu zaje kongera gusubira ku murongo, gusa ubuyobozi bwa Facebook buyobora izi mbuga zose bwatangaje ko kongera gusubiza ku murongo ibyangiritse biri bufate umwanya munini kugirango ibintu bisubire ku murongo nk’ibisanzwe.

Urubuga rwa Facebook si ibi bibazo byonyine rwahuye nabyo gusa kuko nyuma y’igihombo kinini rwatejwe no guhagarara igitaraganya, mu minsi ishize uru rubuga rwokejwe igitutu n’umuntu utazwi ashinja uru rubuga koreka no kwangiza abana bato barukoresha.

Nyuma y’iminsi mike umuntu utazwi akomeje gushinja urubuga rwa Facebook ko rwangiza ubuzima bwo mu mutwe bw’abana bato, ndetse ko abakuriye uru rubuga bahisemo inyungu kurusha umutekano w’abarukoresha.

Ku itariki 2 Ukwakira 2021, nibwo umugore w’imyaka 37, Frances Haugen, umuhanga mu byo kubika amakuru (data scientist) wakoreye ibigo bitandukanye nka ’Google’ na ’Pinterest’ yigaragaje mu kiganiro yagiranye na ’CBS News’ nyuma yo kumara igihe kinini ahisha isura ye ndetse icyo gihe yagaragaye ashinja urubuga rwa Facebook kutita ku mutekano w’abarukoresha.

Mu magambo ye yagize ati ’’Facebook yahindutse ikintu kibi ntigeze mpura nacyo mu buzima bwanjye’’

’’ Facebook yagiye yerekana inshuro nyinshi ko yahisemo inyungu z’amafaranga kurusha umutekano w’abayikoresha ’’

Yakomeje agira ati ’’Facebook iri kubona inyungu zayo mu kugurisha umutekano wacu, Facebook iriho uyu munsi iri gutandukanya imiryango no kongera ibikorwa by’urugomo. ’’

Uyu mugore niwe muntu wa mbere wahaye abanyamatego b’Amerika n’ibinyamakuru nka ’The Wall Street Journal’ inyandiko zicukumbuye zerekana uburyo Facebook yari ibizi neza ko ibicuruzwa byayo harimo n’urubuga rwa Instagram biri mu bintu bya mbere byateje ibibazo byo mu mutwe no kwiyanga mu rubyiruko cyane cyane abakobwa.

Mu kiganiro ’’60 minutes ’’ cya CBS News, Haugen yagize ati ’’Facebook yubatse kuburyo igaragaza cyane inkuru n’amashusho bikora ku mitima y’abantu.’’

Nanone yakomeje avuga ko mu bushakashatsi bwakozwe n’iki kigo bwagaragaje ko byoroshye cyane kuba watuma abantu biyanga kurusha uko watuma bagira ibindi byiyumviro bitandukanye.

Mu kiganiro Haugen yagiranye na CBS News yakomeje agira ati ’’Uru rubuga rwabonye ko nirushyiraho gahunda zo kurinda umutekano w’abarukoresha, abantu bazamara umwanya muto kuri uru rubuga, ibyo bizatuma bakanda ku mashusho yamamaza make, bitume bakorera amafaranga make.’’

Mu bihe by’amatora y’umukuru w’igihugu cya Leta zunze ubumwe za Amerika, Haugen yavuze ko uru rubuga rwashyizeho gahunda yo gucunga umutekano w’abarukoresha kuburyo hari amashusho runaka cyangwa ubutumwa batari gutambutsa ngo bikunde kuko bushobora guhungabanya umutekano w’igihugu.

Yakomeje agira ati ’’Nyuma y’amatora, uburyo bwo gucunga umutekano w’abakoresha Facebook babukuyeho, birashoboka ko hari ibintu bimwe na bimwe bahinduye mu mikoreshereze ya Facebook kugirango babone inyungu nyinshi kurusha kwita ku mutekano w’abakoresha uru rubuga.’’

Mu byo uyu mugore yashingiyeho ashinja urubuga rwa Facebook ko rudaha agaciro mu kurinda umutekano w’abarukoresha, ni ibitero byibasiye inzu y’inteko ishingamategeko ya Leta zunze ubumwe za Amerika (Capitol).

Abacurabwenge b’umugambi wo gutera Capitol wabaye tariki 6 Mutarama 2021, ngo bifashishije urubuga rwa Facebook bategura ibikorwa byabo bibisha kandi uru rubuga ntirwabitahura.


Ibitero byagabwe ku nzu y’inteko ishingamategeko ya Leta zunze ubumwe za Amerika, Haugen avuga ko Facebook yabigizemo uruhare, iyo itagira uburangare no gukunda inyungu z’amafaranga avuga ko bitari kubaho.

Nyuma y’uko uyu mugore yokeje igitutu urubuga rwa Facebook aho yagiye avuga amabi yarwo mu bitangazamakuru akanaha inyandiko zitandukanye abanyamategeko, Uru rubuga rwahise rufunga burundu umushinga wo gukora gahunda ya mudasobwa (application) y’urubuga rwa Instagram rwari kuzakoreshwa n’abana bari munsi y’imyaka 13.


Frances Haugen umugore w’umuhanga mu byo kubika amakuru wakoreye ibigo bitandukanye birimo Google niwe uri kotsa igitutu urubuga rwa Facebook.


Nyuma yo kotswa igitutu, Facebook yahagaritse umushinga wo gushyira hanze urubuga rwa Instagram rukoreshwa n’abana bari munsi y’imyaka 13 gusa.


Guhagarika gukora mu buryo butunguranye bya Facebook n’izindi mbuga nka Whatsapp, Facebook Messenger na Instagram byose biyoborwa na Facebook bishobora kwerekana uburangare no kutita ku mutekano w’abakoresha izi mbuga nkuko Haiden yakomeje kubishinja uru rubuga ko rwita ku nyungu z’amafaranga gusa.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO