Gahunzire Aristide yasohoye indirimbo ya mbere ati “Sinje guhangana”

Gahunzire Aristide aherutse gutangaza ko yashinze Sosiyete izajya ifasha abahanzi yise G&A. Ubu yatangiye gushyira hanze ibikorwa bya mbere avuga ko ataje guhangana ahubwo aje gushyira itafari ku ruganda rw’umuziki Nyarwanda.

Indirimbo ya mbere yahereyeho ni iyitwa ‘Amahano’ yakoranye n’abahanzi barimo B. Nidal wo muri Cameroun, Bull Dog na B Threy.

Aba bahanzi bose ni abaraperi yakoresheje. Avuga ko impamvu yabyo ari uko injyana ya Drill iri mu zikunzwe cyane muri iyi minsi kandi ziri no gucuruza.

Ati “Mfite ibikorwa byinshi ariko nahereye ku baraperi kuko injyana ya Drill ku isoko imeze neza iri kugurisha rero nta kindi kibyihishe inyuma.”

Sosiyete ya G&A avuga ko ije gukora mu buryo butandukanye n’ama Label asanzwe akorera mu Rwanda.

Ati “Izajya ikora ibikorwa byinshi ariko byo mu myidagaduro, uru ruganda ndumazemo igihe hari byinshi nanyuzemo. Nzi ibiba ku bahanzi cyane abigenga badafite ababafasha bihoraho. Njye ntabwo nzasinyisha umuhanzi ariko nzajya mfasha benshi kugirango nzamure umuziki Nyarwanda, nzakoresha ubunararibonye mfite mfashe benshi bagiye banyegera.”

Akomeza avuga ko akiri muri Kompany yanyuzemo nka Kina Music na The Mane yagiye ahura n’abahanzi bamusabaga ubufasha ariko akabura uko abafasha bitewe n’amasezerano yabaga afite aho.

Ati “Hari abanyandikira ku mbuga bansaba ubufasha icyo gihe sinabonaga uko mbafasha kuko nabaga mfite aho mbarizwa. Aho ntandukaniye n’abandi rero ubu uzajya ankeneraho ubufasha wese azajya yisanga.”

Mubyo azajya afasha abahanzi harimo kubafasha mu gushaka abaterankunga, kumenyekanisha ibihangano byabo ndetse no kubashakira ibitaramo.

Nyuma yo gusohora indirimbo ya mbere yagize ati “Sinje guhangana ahubwo nje gushyira itafari ku muziki Nyarwanda.”

Iyi ndirimbo ye yakozwe na Producer Kina Beat mu buryo bw’amajwi, amashusho atunganywa na Taheer Visual.


Queen Cha ni umwe mu bahanzi bakorana bya hafi na Aristide

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO