Harabura amasaha make ngo hanyobwe inzoga z’ubukwe bwa Miss Bahati Grace

Ubukwe bwa Miss Rwanda 2009 Bahati Grace na Murekezi Pacifique bubura amasaha make ngo bube bwatangiye gushyuha aho bamwe bategereje ibyo birori by’agatangaza byanahagurukije bamwe mu Rwanda.

Ubu bukwe buteganyijwe kuri uyu wa Gatandatu tariki ya 4 Nzeri 2021, muri Leta Zunze Ubumwe za Amerika mu mujyi wa Cedar Rapids muri Leta ya Iowa.

Biravugwa ko abahanzi b’ibyamamare mu Rwanda imyiteguro bayigeze kure bitegura kuzasusurutsa bantu bazitabira ubu bukwe.

Uretse abo bahanzi kandi n’abakobwa babiri barimo Iradukunda Elsa wabaye Miss Rwanda 2017 na Nimwiza Meghan wabaye Miss Rwanda 2019 bamaze kwerekeza muri Leta Zunze Ubumwe za Amerika aho bajyanwe n’ubu bukwe.

Uyu musore ugiye kubana na Bahati Grace bamaze imyaka itatu bakundana nk’uko yabitangaje.

Mu minsi ishize abakobwa batandukanye bakoreye Bahati ibirori byo kwitegura gukora ubukwe bizwi nka ‘bridal shower’.

Miss Bahati ni umwe mu ba miss bavuzwe cyane mu itangazamakuru ubwo yatwaraga inda agifite ikamba rya Miss Rwanda akaza kubyarana n’umuhanzi K8 Kavuyo waje no kumureka.
Miss Bahati ntiyacitse intege akomeza kwirwanaho muri Amerika kugeza akundanye na Murekezi bagiye kwibanira.


Bahati Grace na Murekezi Pacifique ubukwe bwabo buri ku munsi w’ejo


Bamaze imyaka itatu bakundana


Umunsi ku w’undi buri umwe aba agaragariza undi urukundo amufitiye


Miss Elsa na Meghan berekeje USA mu bukwe bwa Bahati


Umunyamakuru Ally Soudy ati "Izi nzoga ko ziri ku ntindira"

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO