Hatangijwe ‘Iriba week’ igamije kubakira ubwiherero abatishoboye

Mu rwego rwo gushima Imana kubw’urugendo rw’imyaka 25 korali Iriba imaze ikora umurimo w’ivugabutumwa, hatangijwe ’Iriba week’, icyumweru kizarangwa no kubakira ubwiherero imiryango 5 itishoboye.

Iki gikorwa kizarangira ku itakiki 9 Gashyantare 2020, cyatangiye kuri uyu wa mbere tariki ya 3 Gashyantare 2020.

Yubile y’imyaka 25 iyi korali imaze itangiye urugendo rudasubira inyuma rwo kwamamaze ubutumwa bwiza bwa Yesu Kristo, izizihizwa taliki ya 15 Gashyantare, hanyuma igitaramo cyo gushima kibe kuya 16 Gashyantare 2020.

Korali Iriba ibarizwa muri ADEPR Paruwase ya Taba mu Karere ka Huye mu Ntara y’Amajyepfo, iri mu zifite ibigwi mu Rwanda kubw’ibihangano byayo bikora ku mitima ya benshi.

Ibi birori by’ubudasa bije mu gihe gito bari bamaze bashyize ahagaragara alubumu nshya bise “Jehovah shammah.”

Neema Marie Jeanne, umuyobozi wungirije ushinzwe itangazamakuru muri iyi korali, yabwiye GENESISBIZZ ko imyiteguro y’iki gikorwa irimbanije, kandi bakaba bararikira abantu bose kuzaza kwifatanya nabo.

Yagize ati “Mu rwego rwo gushima Imana kubw’urugendo rw’imyaka 25 tumaze, uyu munsi twatangiye #IribaWeek, icyumweru kizarangwa no kubakira ubwiherero imiryango 5 itishoboye. Iki gikorwa kizarangira ku itakiki 9 Gashyantare 2020”.

Yakomeje agira ati “Twishimiye kubamenyesha ibi birori no kubatumira. Muzaze dufatanye gushimira iyaturemye nk’itsinda. Tuyishimire n’urugendo rwose tugendanye. Twizeye ko ubwo tuyoborwa nawe dufite amahoro. Ntitwakwirengagiza uruhare rwanyu muri uru rugendo. Tuzahora tubibubahira, tunabishimire Imana.”

Yakomeje atangaza ko tariki ya 15 Gashyantare azaba ari ibirori bidasanzwe byo kwizihiza isabukuru y’imyaka 25 korali Iriba imaze ibayeho, naho kuwa 16 Gashyantare bakazakomereza igitaramo ku rusengero kuri ADEPR Taba.

Iyi korali yamenyekanye mu ndirimbo zirimo ‘Nta kibasha’, ‘Witinya’, ‘Turiho ku bw’ubuntu’, ‘Urakomeye’ na ‘Icyampa’n’izindi.

Iyi korali yatangiye igizwe n’abaririmbyi 18 ubu bakaba basaga 100, yashinzwe ku wa 15 Gashyantare 1995.

Indi nkuru wasoma: https://genesisbizz.com/Korali-Iriba-igiye-kwizihiza-yubile-y-imyaka-25-ishinzwe

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO