Hotel y’I Musanze, intandaro yo gutandukana kwa Danny Vumbi na KIKAC

Ni ubwo nta werura ngo atangaze ko atagikorana n’undi amakuru ahari yizewe ni uko Danny Vumbi atakiri umuhanzi ubarizwa muri Label ya KIKAC Music. Mu gutandukana kwabo haravugwa ibintu byinshi byabiteye n’ubwo hari hategerejwe imbarutso ituma byose bijya hanze.

Iyo mbarutso yabaye indirimbo yitwa ‘Babahe’ Danny Vumbi yakoranye n’umuhanzi witwa Shellif usanzwe aba muri Leta Zunze Ubumwe z’Amerika.

Ni ubwo iyo ndirimbo yabaye imbarutso ntabwo aribwo ikibazo cyabo cyari kije kuko hari hashize igihe kigera mu mezi abiri impande zombi zidacana uwaka.

Ibi ku babyibuka byagaragaye ubwo Label ya KIKAC yamurikaga umuhanzi mushya (Bwiza) ariko Danny Vumbi ntiyahagaragara n’abo ntibasobanura impamvu ataje muri ibyo birori.

Uhujimmfura Jean Claude ukurikirana abahanzi babarizwa muri Kikac aganira na Genesis TV yavuze ko umubano wabo na Danny udahagaze neza.

Ati "Kugeza ubu turi kumusaba ibisobanuro ku bibazo byaba bihari, kugirango dukomeze imikoranire twemeranyijwe ariko kugeza ubu ntacyo aradutangariza ahubwo we yahisemo kuba asohoye indirimbo ku giti cye kandi mu masezerano dufitanye bitemewe."

Danny Vumbi we ibi arabihakana akavuga ko yagiye gukora iyo ndirimbo Label ibizi kuko uwo bayikoranye ariwe wagiye kuvugana nabo.

Mu kiganiro yagiranye na Yago TV Show yagize ati “Ntabeshye iby’uko twatandukanye nanjye nabibonye mu binyamakuru, ibintu ntazi ntacyo nabivugaho nabonye ngo bansabye ibisobanuro ariko ntabyo nagombaga gutanga sinshaka kugira icyo mbivugaho rwose.”

Akomeza agira ati “Ushobora gusanga ari ibibazo byari bisanzwe bihari, iki kikaba nyirabayazana. Impamvu ni uko nabeshyewe kandi burya ntabwo nigeze nsabwa ibyo bisobanuro. Ikindi kuza aha nkabivuga mu itangazamakuru sinabikora kuko si mu bucamanza. Ubu aka kanya navuga ko nkiri muri KIKAC kuko sindabona ibaruwa insezerera inshinja amakosa nakoze nanjye yewe ntayo ndabaha isezera.”

Musanze Caves Hotel intandaro Nyamukuru

Ubwo Danny Vumbi yasinyaga nk’umuhanzi ufashwa na KIKAC Music muri Mutarama 2020 ntabwo higeze hatangazwa ibikubiye mu masezerano nk’ibisanzwe muri Label zose zo mu Rwanda zikunze kubigira ibanga. ’Icyo batangaje ni imyaka bazakorana gusa’.

Amakuru ava mu nshuti za hafi n’aba bombi avuga ko intandaro yo gutandukana kwabo ari Hotel yitwa Musanze Caves Hotel yanditse kuri Danny Vumbi.

Ngo bajya gukodesha ahaba iyo Hotel cyari igikorwa Danny Vumbi yafashijwemo na Label ye aho ngo hari amafaranga yagombaga kuzajya yinjiza muri Kompani. Ibi ngo babikoraga mu buryo bwa kivandimwe kuko bari barizeranye bakorana nk’umuryango, gusa ngo nta na rimwe bigeze bakira amafaranga ava aho hantu kandi harinjizaga umunsi ku w’undi.

Uhujimfura wo muri KIKAC Ati “Birababaza gufasha umuhanzi ushora amafaranga yawe ariko byagera aho ugomba kumukoresha ngo nawe ube wamwungukamo agahita agutera uwinyuma … Muri make uba waramuvunikiye.”

Nawe ntabwo yerura ngo avuge ko icyo bapfa ari iyo Hotel n’abo bajyaga bamamaza ndetse bakahakorera n’ibindi bikorwa by’akazi kabo.

Kuba bagifitanye amasezerano nabyo ni imbogamizi kuri bose kuba bakiri gutinya icyo batangaza cyatuma umwe agwa mu mutego akagongwa n’itegeko ryazamutsindisha mu rubanza.


Iyi Hotel isanzwe isohokeramo ibyamamare bitandukanye

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO