Ibihembo bya Grammy Awards byasubitswe kubera ubwiyongere bwa Covid-19

Ibihembo bya Grammy Awards byari biteganyijwe gutangwa ku itariki 31 Mutarama 2022 byasubitswe bitewe n’ubwiyongere bw’icyorezo cya covid-19 yihinduranyije yiswe Omicron.

Ibihembo bya Grammy Awards byari biteganyijwe kuba ku nshuro ya 64 bigatangwa tariki 31 Mutarama gusa abategura ibi bihembo batangaje ko bitakibereye mu nzu y’imyidagaduro ya Arena iherereye i Los Angeles kugeza ku itariki itaramenyekana.

Abategura ibi bihembo ari bo Recording Academy na televiziyo ya CBS batangaje ko ikipe ikora ubutaruhuka kugirango ibi bihembo bigende neza hamwe n’abazabyitabira ko ari bo bantu bashyira imbere ko bityo batakwemera gushyira ubuzima bwabo mu kaga mu gihe virusi ya Omicron igifite ubukana bwinshi.

Bakomeje bavuga ko gutanga ibi bihembo ku itariki 31 Mutarama birimo ibyago byinshi ndetse ko itariki bizasubukurirwaho izatangazwa mu minsi iri imbere.

Amakuru dukesha inzego z’ubuzima za Los Angeles avuga ko nibura ubwandu bwa Omicron bwiyongereye ku ijanisha rya 121% kuva ku munsi mukuru wa Noheli.

Los Angeles nanone yabonye umubare munini w’abarwayi bahawe ibitaro aho nibura habarurwa abarwayi 1,792 bari mu bitaro.

Twakwibutsa ko ubu ari inshuro ya kabiri ibi bihembo bisubitswe kuko no mu mwaka ushize itariki yo kubitanga yarimuwe ikurwa kuri 31 Mutarama bishyirwa tariki 14 Werurwe ndetse ntibyigeze byitabirwa n’abantu ahubwo babikurikiye bari mu ngo zabo mu rwego rwo kwirinda guhererekanya ubwandu bwa Covid-19.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO