Ibikubiye kuri Album nshya ya Buravan ‘Twaje’ n’umushinga we yise ‘Twande’

Umuhanzi Yvan Buravan yavuze ku mushinga agiye gukora wo guhesha agaciro imbyino n’umuziki Nyarwanda yise ‘Twande’ hamwe n’ibikubiye kuri Album ye ya kabiri yamaze kurangira.

Ibi yabitangarije mu kiganiro yagiranye n’itangazamakuru aho yagarutse cyane kuri ibyo bikorwa arikumwe na Masamba Intore wamufashijeho byinshi bitewe n’uko nawe yamwiyambaje.

Buravan ni umwe mu bahanzi baheruka kwegukana igihembo mu Imbuto Foundation bitewe n’umushinga mwiza wahize abandi.

Uwo mushinga yawise ‘Twande’ avuga ko iryo jambo ryakoreshwaga kuva na kera aho ryifashishwaga cyane mu rugamba hagamijwe kwagura igihugu.

Ati “Ni twande kuko natwe dushaka kwagura umuziki Nyarwanda ukamenywa hose higanjemo imbyino zacu na gakondo yacu ariko tukanavangamo iby’ahandi kugirango bibe umwimerere w’Abanyarwanda.”

Ibindi kuri uyu mushinga ni uko azagenda yigisha abantu batandukanye cyane mu rubyiruko kugirango barusheho gukunda ibyacu kuruta iby’ahandi.

Intore Masamba umwe mu bari baje kwifatanya na Buravan avuga ko yamufashije bitewe n’uko ari umwe mu bakiri bato bafite inyota yo kwamamaza iby’umuco Nyarwanda.

Ati "Ibyo kubyina no kuririmba usanga mu bana bato bitarimo cyane gusa barabikunda kandi baranabishaka. Dushaka ko byakwira muri generation zose. Buravan yabaye imbarutso arabikora. Ni umushinga uzaha umwanya urubyiruko ngo babyige banabimenye, uko ugenda ubyina cyangwa uririmba ibyacu Ururimi rurazamuka ukamenya kuzimiza. “

Kuri Album ye avuga ko izajya hanze kuya 19 Ukuboza 2021 ariko igitaramo cyo kuyimurika kibe taliki ya 30 Nyakanga 2022.

Izaba igizwe n’indirimbo icumi (10), z’umwimerere mu Kinyarwanda ariko zicuranze mu buryo bugezweho. Izo ndirimbo zakozweho n’aba Producer barimo Bob Pro, Made Beat na Holly Beat.

Mu bahanzi bakoranyeho harimo Ish Kevin, Andy Bumuntu, Ruti Joel na Dj Marnaud. Nk’umuhanzi ukijijwe yavuze ko hariho n’indirimbo yakoze yo kuramya no guhimbaza Imana.


Bruce Intore na Intore Masamba ni bamwe mu bazakorana na Buravan ku mushinga we


Buravan yabitangarije mu kiganiro yagiranye n’itangazamakuru

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO