Ibimenyetso simusiga bishobora kukwereka ko urwaye diyabete

Indwara ya diyabete ni imwe mu zihitana abantu benshi ku isi. Imibare y’ishami ry’umuryango w’abibumbye ryita ku buzima yakozwe mu mwaka wa 2019 yerekanye ko iyi ndwara yahitanye abantu basaga miliyoni imwe n’ibihumbi magana atanu (1,500,000) muri uwo mwaka gusa ndetse imibare yabicwa nayo igenda yiyongera buri mwaka.

Muri iyi nkuru tugiye kugaruka ku bimenyetso mpuruza bishobora kukwereka ko ushobora kuba ufite ibyago byinshi byo kwibasirwa na diyabete ndetse turarebera hamwe n’uburyo ushobora kwirinda kurwara diyabete.

Niba ufite kimwe mu bimenyetso bikurikira ni byiza kwihutira kujya kwa muganga bagapima ibipimo by’isukari mu maraso bakamenya uko uhagaze n’indyo ugomba kwirinda n’izo ugomba gutangira gukurikiza.

Indwara ya diyabete (igisukari) ni indwara iri mu byiciro bibiri, hari diyabete y’ubwoko bwa mbere (Type 1 Diabetes) na diyabete y’ubwoko bwa kabiri (Type 2 Diabetes) ndetse izi zombi zigira ibimenyetso byihariye.

Ni ryari umuntu arwara Diabete yo mu bwoko bwa mbere ?

Umuntu arwara diyabete yo mu bwoko bwa mbere iyo urwagashya rwe rudakora umusemburo witwa insulin uhagije cyangwa ntirukore n’ingano nke y’uwo musemburo.

Uyu musemburo wa insulin ni ingenzi cyane kuko niwo ushinzwe kuringaniza ikigero cy’isukari mu maraso.

Iyo rero urwagashya rwawe rudakora uyu musemburo cyangwa rugakora muke, icyo gihe uba ufite ibyago byinshi byo kurwara iyi diyabete yo mu bwoko bwa mbere.

Ni ryari umuntu arwara diyabete yo mu bwoko bwa kabiri ?
Umuntu arwara diyabete yo mu bwoko bwa kabiri iyo umubiri we ufite gahunda y’ubwirinzi irwanya ikorwa ry’umusemburo wa insulin ufasha kuringaniza igipimo cy’isukari mu maraso.

Ibimenyetso mpuruza bikwereka ko ushobora kuba urwaye diyabete yo mu bwoko bwa mbere

Amakuru dukesha urubuga rwa CDC avuga ko abantu barwaye diyabete yo mu bwoko bwa mbere bakunda kugira ibimenyetso bikurikira:

- Kugira isesemi
- Kuruka
- Kuribwa mu nda

Ibi bimenyetso birasanzwe kuko ushobora kubigira kandi urwaye indi ndwara itari diyabete, ni byiza ko wihutira kwisuzumisha kwa muganga kugirango bemeze ko ari diyabete urwaye.

Uru rubuga rukomeza ruvuga ko ibi bimenyetso bishobora gutangira kugaragara nyuma y’ibyumweru bike cyangwa amezi ndetse ubu bwoko bw’iyi diyabete bushobora kwibasira ingeri z’abantu bose harimo abana, ingimbi ndetse n’abakuru.

Ibimenyetso mpuruza bikwereka ko ushobora kuba urwaye diyabete yo mu bwoko bwa kabiri

Ibimenyetso byerekana ko ushobora kuba urwaye diyabete yo mu bwoko bwa kabiri bifata imyaka myinshi kugirango bigaragare inyuma.

Ubu bwoko bwa diyabete bukunda kwibasira abantu bari mu bugimbi n’ubwangavu gusa rimwe na rimwe ishobora no kugaragara mu bana bato.

Bitewe n’uko ibimenyetso by’ubu bwoko bwa diyabete ya kabiri bigoye kubivumbura, ugirwa inama yo kujya kwisuzumisha buri gihe kwa muganga ukamenya niba nta byago ufite byo guhura nayo.

Ibimenyetso mpuruza ukwiye kwitondera bishobora kukwereka ko ushobora kuba uri hafi yo kurwara diyabete

Mbere y’uko muganga azakubwira ko urwaye diyabete, hari bimwe mu bimenyetso ushobora kubanza kwibonaho bishobora kukwereka ko uri hafi kurwara diyabete.

Niba nawe waba ufite kimwe mu bimenyetso bikurikira, ni byiza ko wakwihutira kwisuzumisha kwa muganga :

- Kwihagarika (kunyara) inshuro nyinshi cyane cyane hagati mu ijoro
- Kugira inyota nyinshi idashira
- Gutakaza ibiro mu buryo budasobanutse
- Kugira inzara cyane (Gusonza bikabije)
- Kureba ibicyezicyezi
- Kuzana ibinya mu ntoki no mu birenge
- Kugira umunaniro ukabije
- Kugira uruhu rwumagaye
- Kugira udusebe two ku ruhu dutinda gukira

Niba ukunda guhura na bimwe muri ibi bimenyetso bishobora kuba ari diyabete itangiye kugaragara, ni byiza kwihutira kwa muganga ugakorerwa isuzuma ry’amaraso bakakubwira ibipimo by’isukari uko bihagaze ndetse ukagirwa n’inama y’amafunguro ukwiye kwirinda n’ayo ugomba kurya.


Mbere yo guhangayika wibaza byinshi, ni byiza ko intambwe ya mbere ukora ari ukujya kwa muganga niho uzakura inama zigufasha gukomeza kugira ubuzima buzira umuze.

None ni gute wakwirinda kurwara diyabete ?

Kugirango wirinde kurwara diyabete (Ubwoko bwa mbere cyangwa ubwa kabiri) ugirwa inama yo gukora ibi bikurikira :

Irinde amafunguro n’ibiribwa byongerewemo isukari
Kurya ibiryo byongerewemo isukari bikongerera ibyago byo kuba wakwibasirwa na diyabete.

Iyo uriye ibiryo byongerewemo isukari, umubiri wawe uhita uyicagaguramo uduce duto cyane (molecules) dushobora kujya mu maraso.

Ibi bihita bituma igipimo cy’isukari mu maraso cyiyongera, ibi bihatiriza urwagashya gukora umusemburo wa insulin mwinshi, uko bikomeza kwiyongera bituma uhura n’ibibazo byo kugira imisemburo iri ku kigero cyinshi mu mubiri.

Icyo gihe umubiri ukora imisemburo myinshi ya insulin ngo iringanize igipimo cy’isukari, ibi bishobora kukuviramo kurwara diyabete yo mu bwoko bwa kabiri.


Intwambwe ya mbere yo kwirinda diyabete ni ukwirinda amafunguro yongerewemo isukari.

Gukora imyitozo ngororamubiri.

Imyitozo ngororamubiri ifasha imikorere myiza y’umusemburo wa insulin imbere mu mubiri kuburyo iyo ukora imyitozo bituma ingano ya insulin ikorwa n’umubiri iba ari nke kandi igafasha kuringaniza igipimo cy’isukari mu maraso.

Ubushakashatsi bumwe bwigeze gukorwa bwerekanye ko abantu bari bafite ibyago byinshi byo kwibasirwa na diyabete ariko bagakora imyitozo ngororamubiri, byatumye uburyo imibiri yabo yakoranaga n’umusemburo wa insulin biva ku rugero rwa 51% bikagera kuri 85%.

Imyitozo ngororamubiri byerekanye ko irinda umubiri gukora ubwirinzi burwanya umusemburo wa insulin ibyo bikaba byakurinda kwibasirwa na diyabete yo mu bwoko bwa kabiri.


Imyitozo ngororamubiri ni kimwe mu bizakurinda kurwara diyabete.

Kunywa amazi

Niba wifuza kwirinda kurwara diyabete, ugirwa inama yo kunywa amazi nk’ikinyobwa cyawe cy’ibanze.

Iyo ukunda kunywa amazi cyane bituma akurinda kunywa ibindi binyobwa byongerewemo amasukari cyangwa ibindi byose bishobora gushyira ubuzima bwawe mu kaga.

Ibinyobwa byinshi biryohera byongerewemo amasukari dukunda kugura mu maguriro usanga bishobora kukongerera ibyago byo kurwara diyabete zo mu bwoko bwombi.


Kunywa amazi bizagufasha kwirinda ibyago byo kwirinda diyabete.

Kugabanya ibiro
Umubare mwishi w’abantu barwaye diyabete yo mu bwoko bwa kabiri usanga bafite ibiro by’umurengera.

Iyo umuntu afite ibiro by’umurengera akenshi usanga biterwa no kugira ibinure byinshi aho byitsindagira hafi y’ingingo zimzwe na zimwe nk’umwijima, ibi binure babyita visceral fat.

Ibi binure nibyo bituma umubiri urwanya umusemburo wa insulin ndetse bigatwika ingingo z’imbere mu mubiri nk’umwijima kuko ariho bikunda kwitsindagira ndetse ibi bishobora kukuviramo uburwayi bw’umwijima.

Niba ufite ibiro by’umurengera ni byiza ko utangira gukora imyitozo ngororamubiri ukabigabanya ndetse ukirinda ibiryo birimo amavuta menshi n’ibinure byinshi.


Niba wifuza kugabanya ibyago byo kwirinda kurwara diyabete, gabanya ibiro byawe niba ufite ibiro by’umurengera.

Irinde kunywa itabi
Niba wifuza kwirinda kurwara diyabete, ni byiza ko wirinda kunywa itabi cyangwa ugahagarika kurinywa niba usanzwe ubikora.

Kunywa itabi bifitanye isano rya hafi n’uburwayi butandukanye burimo kurwara umutima, kanseri y’ibihaha, uburwayi bw’umuyoboro utwara inkari (prostate) ku bagabo, kanseri y’amabere (ku bagore) na kanseri y’urwungano ngogozi.


Hari ubushakashatsi bwerekanye ko kunywa itabi nanone bifitanye isano rya hafi n’uburwayi bwa diyabete y’ubwoko bwa kabiri. ni byiza ko wirinda itabi niba wifuza kwirinda kurwara diyabete.

Irinde ibikorwa bituma wicara umwanya munini.

Niba akazi kawe ukora buri munsi kagusaba kwicara umwanya munini ahantu hamwe kuburyo utanyeganyega, urugero nk’umukozi ukora mu biro yicaye umunsi wose, icyo gihe ufite ibyago byinshi byo kwibasirwa na diyabete.

Hari ubushakashatsi bwigeze gukorwa ku bantu bamara umwanya munini bicaye ndetse mu bantu 47 bakoreweho ubwo bushakashatsi basanze abamara umwanya munini bicaye bafite ibyago bingana na 91% byo kwibasirwa na diyabete yo mu bwoko bwa kabiri.

Mu rwego rwo kwirinda ibi byago ugirwa inama yo kujya uhaguruka ugakora urugendo ruto nk’igihe uri mu kazi ukirinda kwicara ahantu hamwe umunsi wose.

Indi nama ugirwa ni ugukora imyitozo ngororamubiri.


Irinde kwicara umwanya munini ahantu hamwe mu rwego rwo kwirinda kwibasirwa na diyabete.

Irinde amafunguro yatunganyirijwe mu nganda.

Amafunguro menshi atunganyirizwa mu nganda niyo nyir’abayazana y’indwara zitandukanye nk’umutima, umubyibuho ukabije na diyabete.


Ugirwa inama yo kurya amafunguro yiganjemo imboga nyinshi n’imbuto kuko bishobora kongerera umubiri wawe ubwirinzi bugufasha kurwanya diyabete ahubwo ukirinda ayatunganyirijwe mu nganda.

Kunywa ikawa n’icyayi

Nyuma yo kuba wanywa amazi nk’ikinyobwa cy’ibanze, ugirwa inama yo kunywa ikawa cyangwa icyayi biherekeje amafunguro yawe ya buri munsi mu rwego rwo kwirinda diyabete.

Ubushakashatsi bwakozwe bwerekanyeko abantu banywa ikawa buri munsi byabagabanyirije ibyago byo kurwara diyabete yo mu bwoko bwa kabiri ku kigereranyo cya 8-54%.

Ku bakunzi b’icyayi, urubuga rwa Health Line rubagira inama yo kunywa icyayi cy’icyatsi (thé vert) kuko cyifitemo ikinyabutabire cyitwa epigallocatechin gallate (EGCG) ndetse iki kinyabutabire gifite ubushobozi bwo kugabanya igipimo cy’isukari yitsindagira ku mwijima ahubwo hakabaho kongera ingano y’umusemburo wa insulin.


Kunywa icyayi cya thé vert cyangwa ikawa ni byiza kuko byongerera umubiri wawe ubudahangarwa buwurinda kwibasirwa na diyabete.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO