Ibisubizo bya muganga byemeje ko ntanduye Corona-Divin Uwayo

Umunyamakuru ku gitangazamakuru cy’igihugu (RBA) Divin Uwayo, nyuma yo gukora inkuru ijyanye naho abarwaye Coronavirus bari kuvurirwa mu bitaro bya Kanyinya, yahawe akato ndetse benshi bakamwishisha bakeka ko yanduye COVID-19, gusa ubu yabinyomoje.

Tariki 29 Werurwe uyu mwaka, umunyamakuru ukora ku gitangazamakuru cya leta (RBA) ‘Uwayo Divin’ yakoze inkuru igaragaza ubuzima abarwaye Coronavirusi mu Rwanda babayeho mu bitaro bya Kanyinya, nyuma yayo akaza guhabwa akato n’abakekaga ko nawe yanduye iyi ndwara.

Icyo gihe Uwayo akora iyi nkuru, hari hashize ibyumweru bibiri mu Rwanda hagaragaye umurwayi wa mbere wa COVID-19 icyorezo giterwa n’agakoko ka Coronavirusi.
Uwayo yahabwaga akato bitewe naho yagiye gukorera akazi ke k’itangazamakuru

Muri iyo nkuru yakozwe na Uwayo, hari mu masaha yo ku gicamunsi, yabanzaga kwambara imyenda yabugenewe imurinda kuza kwandura kugira ngo aze kubasha kwinjira mu byumba birwariyemo abo barwayi.

Umuyobozi w’ibitaro bya Kanyinya Dr Ernest Nahayo yabanje gusobanurira uyu munyamakuru uko iyo ndwara yandura mbere yo kujya muri ibyo byumba, maze baherako bajya gusura aba barwayi bambaye imyambaro yabugenewe.

Uwayo Divin wagiye uhura n’akato gatandukanye mu bihe binyuranye nyuma yo gukora iyi nkuru, yavuze ko nta bwoba yarafite ajya kwipimisha Coronavirusi, ariko ko impungenge zo zitabura, wakongeraho akato rero byo bikaba ibindi.
Yahisemo kujya kwisuzumisha COVID-19 yarafite impungenge zaterwaga na kato bamuhaga

Nyuma yo gutangaza ko ibisubizo bya muganga byemeje ko uyu munyamakuru nta COVID-19 afite mu mubiri we, akanagaragaza icyemezo kibihamya, benshi bibajije impamvu iki cyemezo kitariho umukono (signature) ndetse ntikinaggaragareho amazina y’uyu munyamakuru, bityo bakabiheraho bemeza ko wenda impamvu batabishyizeho ari uko akiri mu kato.

Mu gusubiza ibi, uyu munyamakuru yahakanye ko atashyizwe mu cyiciro cy’abapimwe cyangwa ngo ashyirwe mu kato, ko ahubwo yafashijwe kumenya uko ahagaze kubera imiterere y’akazi asanzwe akora.

Yagize ati: “Ntabwo ndi mu cyiciro cy’abapimwe nyuma yo gushyirwa mu kato kuko nta ngendo mperuka gukorera mu mahanga, nta bimenyetso cg ngo mbe narahuye n’umwe mu barwayi! Nafashijwe kumenya uko mpagaze kubera imiterere y’akazi kanjye katanyemerera kuguma mu rugo nkaba ngihura n’abantu.”

Kugeza magingo aya zimwe mu mpamvu zigaragaza ko uyu munyamakuru yifuzaga kwerekana icyemezo cya muganga gishimangira ko atanduye COVID-19 aruko atashakaga gukomeza guhabwa akato na bamwe bumvaga ko ashobora kuba yaranduye iyi virusi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO