Mbosso yahishuye uko Diamond yasuzuguye Tanasha

Amabanga Diamond Platnumz yahishe y’uburyo banze kwitabira imurikwa rya EP ya ‘DonnaTella’ yashyizwe ahagaragara na Mbosso nawe wagombaga kuririmba muri icyo gitaramo.

Mu ntangiriro z’uyu mwaka, Tanasha Donna yamuritse EP ye ya mbere ayita ‘DonnaTella’, Diamond na Mbosso bagombaga kuyitabira baburirwa irengero ku munota wa nyuma nta n’umwe uhakandagije ikirenge, nyamara bari hafi yagombaga kubera.

Diamond na Mbosso bageze muri Kenya aho bagombaga kwitabira iki gitaramo cya Tanasha Donna, ndetse banitabira ikiganiro n’abanyamakuru kibandaga ku gusobanurira itangazamakuru uko imitegurire y’iki gitaramo imeze, nyuma yayo aba bombi ntawongeye kubaca iryera.

Mbosso aganira n’umunyamakuru wo muri Tanzania witwa ‘Sam Misago’ mu cyumweru gishize, yavuze ko ubuyobozi bwa Wasafi icyo gihe bwasabye guhita bagaruka muri Tanzania kubw’impamvu zihutirwaga.

Yagize ati: “ndabyibuka tujya Nairobi, hari igitaramo twagombaga kujyamo, ariko ntitwakijyamo, twahise tugaruka…”

Mbosso yongeyeho ko yabwiwe ko agomba gusubira Dar Es Salaam mu buryo bwihuse, akabwirwa ko hari ibintu bisa naho bidasobanutse, yemeza ko ntacyo yari gukora ngo avuguruze Manager Babu Tale, Sallam ndetse na Mkubwa Fella.

Icyo gihe Mbosso avuga ko yasubiye mu gihugu cyabo arikumwe na Diamond Platnumz, aho avuga ko ariho yahise atangirira kwandikira indirimbo ye yitwa ‘TAMBA’.

Mbosso agaruka ku mpamvu we na Tanasha buri wese yahise ahagarika gukurikira undi ku mbuga nkoranyambaga, yavuze ko nyuma y’uko Tanasha na Diamond bashwanye nawe yahisemo kutongera gukurikira uwari umugore wa boss we.

Mbosso yagize ati: “nyuma y’iminsi ine, yaje muri Tanzania, icyo gihe twarahuye ubwo najyaga gusuhuza Diamond, nyuma y’iminsi itandatu yahise ahagarika kunkurikira ku mbuga nkoranyambaga zanjye, ndibaza nti niba adakurikira Se w’umwana we, njye ndi igiki kuri we? Nanjye mpita mpagarika kumukurikira, gusa nta kibazo dufitanye.”

Mbosso yasobanuye ko nta mpamvu yarasigaranye yo gukomeza gukurikira uwari umugore wa boss we ku mbuga nkoranyambaga

Mbosso yongeraho ko nubwo we na Tanasha batigeze bagirana amakimbirane, ariko batanigeze bicara ngo baganire cyangwa se ngo banabe inshuti zisanzwe, bahuraga gusa yagiye kureba boss Diamond.

Diamond icyo gihe we yatangaje ko yagize ikibazo gikomeye cyatumye ataboneka mu gitaramo cya Tanasha ahubwo agasubira iwabo.

Yagize ati: “Bitewe n’ikibazo ngize mu rugo, bibaye ngombwa ko nsubira Dar Es Salaam kugira ngo gihite gikemuka, nshobora kuza kugaruka ntinze muri ‘DonnaTella EP cyangwa se ntibishoboke’.

Diamond yongeyeho ko uko byamera kose, igitaramo cyo bari bugikurikirane kuri Televiziyo ya Wasafi kubari mu rugo, yibutsa abantu kutagicikwa.

Nyuma y’ibyari bimaze kuvugwa byose, benshi bemezaga ko impamvu nyamukuru yatumye basubika kucyitabira aruko Tanasha atabarizwaga muri label ya Wasafi.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO