Ibyo ‘Huza Arts Rwanda’ yungukiye mu nama y’abarwiyemezamirimo bakiri bato muri Ghana

Ba rwiyemezamirimo b’urubyiruko bakomoka mu Rwanda bihurije hamwe n’abandi bava mu bihugu bitandukanye bya Afurika bitabira inama ya Youth Connekt yabereye muri Ghana bungurana ibitekerezo.

Mu Rwanda havuye ba Rwiyemezamirimo barenga 30 harimo na Jean D’amour Imanishimwe ukuriye Inzu y’ubugeni ya Huza Arts Rwanda bitabira inama ya Youth Connekt yabaye taliki ya 20-22 Ukwakira 2021.

Iyo nama ya Youth Connekt yari ifite insanganyamatsiko ivuga ku kuntu urubyiruko rwiteje imbere mugihe cya Covid-19, bitewe nibyo banyuzemo ndetse bakagenda banungurana ibitekerezo, ababiciyemo neza bagasangiza abandi ibanga bakoresheje.

Imanishimwe yagize ati “Njye nahagiye mpagarariye abahanzi ariko mu gisata cyo gushushanya. Muri iyi nama twagiye tuganira mu buryo butandukanye harimo kungurana ibitekerezo kugirango ubumenyi bwiyongere. Bamwe batubwiraga uko bari babayeho mubihe bya Covid kugirango dufashanye wenda hazemo no kwagura imipaka kuri bamwe mu rwego rwo kwagura ibyo dukora tukabigeza n’ahandi.”

Nk’urubyiruko rwari ruhagarariye u Rwanda avuga ko mu mbogamizi batanze bagiye bahura nazo harimo kutoroherezwa mu ishoramari.

Ati "Hagomba gushyirwaho ubufatanye mu rubyiruko n’abashoramari hakabaho imikorere yagutse hagati y’ibihugu. Muri ibi bihe bya Covid ntabwo urubyiruko ruhozaho ibi kandi bituma batakaza uko biyumvamo uwo murimo bikadindiza umugabane wacu."

Akomeza avuga ko uretse ibyo biganiro bagiye basura n’ahantu hatandukanye muri icyo gihugu harimo no gusura inzu ndagamurage ya Nkwame Nkrumah ufite amateka akomeye muri Ghana.

Muri iyo nama abashyitsi bakuru bari bitezwe harimo Perezida wa Repubulika y’u Rwanda Paul Kagame na Perezida wa Ghana Nana Akufo-Addo.

Aba bombi ntabwo babashije kuboneka kuko bohereje ababahagararira aho u Rwanda rwari ruhagarariwe na Minisitiri w’Urubyiruko Mbabazi Rosemary.


Iyi nama yitabiriwe n’urubyiruko ruturutse mu bihugu bitandukanye byo muri Afurika


Imanishimwe wari uhagarariye Huza Arts Rwanda avuga ko bahaserukanye umucyo


Minisitiri w’Urubyiruko Mbabazi Rosemary nawe yitabiriye iyi nama

Inkuru yanditswe na: Roseline GASIRABO

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO