Ibyo wamenya kuri Kenneth Kaunda wabaye Perezida wa 1 wa Zambia witabye Imana ku myaka 97

Kenneth Kaunda wabaye Perezida wa Zambia kuva yabona ubwigenge mu 1964 kugeza mu 1991, yitabye Imana mu rukerera rwo kuri uyu wa 17 Kamena 2021 azize uburwayi bw’ibihaha.

Inkuru y’urupfu rwa Kaunda yamenyekanishijwe na Hakainde Hichilema uyobora ishyaka ritavuga rumwe n’ubutegetsi bw’icyo gihugu (Party for National Development), wasobanuye ko yaguye mu bitaro bya gisirikare bya Maina Soko biri mu Murwa Mukuru Lusaka, aho yavurirwaga nk’uko byari byatangajwe n’ibiro bye ku wa 15 Kamena uyu mwaka.

Abinyujije ku rukuta rwe rwa Facebook, Hichilema yanditse ati “N’agahinda kenshi, twamenye iby’urupfu rwa Perezida wa mbere wa Zambia akaba n’uwatangije impinduramatwara, Dr Kenneth David Buchizya Kaunda. Yitabye Imana mu mahoro uyu munsi mu Murwa Mukuru Lusaka, nyuma y’uburwayi bw’igihe gito.”

Kaunda yavukiye mu Karere ka Chinsali gaherereye mu Ntara ya Muchinga ho muri Zambia ku wa 28 Mata 1924.

Ni umwe mu bafatwa nk’intwari zaharaniye ubwigenge bwa Afurika ikigobotora ingoma ya gikoloni bari bakiriho, kuko abenshi nka Nelson Mandela wa Afurika y’Epfo, Patrice Lumumba wa RDC, Kwame Nkurumah wa Ghana, Julius Nyerere wa Tanzania n’abandi bitabye Imana.

Yashakanye na Betty Kaunda mu 1946, waje kwitaba Imana muri Nzeri 2012. Urugendo rwe ku Isi yarwibarukiyemo abana bane.

Nyuma yo kuva ku butegetsi mu 1991, yagiye akora ibikorwa bitandukanye by’ubugiraneza birimo no kurwanya SIDA.

Yagiye yandika ibitabo bitandukanye birimo “Zambia Shall Be Free” cyo mu 1962, “Kaunda on Violence” cyo mu 1980, “Letter to my Children” cyo mu 1973 n’ibindi.

Yagaragaye kandi muri filime yiswe “Comrade President” mu 2012, yagarukaga ku buryo bwo kurwanya ubukoloni.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO