Icyasha muri ruhago Nyarwanda! Umunyezamu wa Gasogi yaciye Mukura miliyoni 2 ngo abihere amanota

Ni kenshi hagiye havugwa ruswa mu bakinnyi no mu makipe yo mu Rwanda ariko gihamya zikaba iyanga n’ibimenyetso bibonetse ntibigire icyo bitanga kuri ubu noneho byageze I wa Ndabaga aho muri Shampiyona y’icyiciro cy’amakipe arwana no kutamanuka mu cyiciro cya 2 igeze aho umwana arira nyina ntiyumve, buri umwe aritabaza intwaro afite, umunyezamu wa Gasogi United yashyize hanze amajwi bamwe mu bantu bo muri Mukura VS bafitanye umukino ejo bamusaba ko yazitsindisha akabaha amanota.

Kugeza ubu ikipe ya Mukura VS ni imwe mu makipe ahabwa amahirwe menshi yo kuba yamanuka mu cyiciro cya kabiri, iri ku mwanya 7 n’amanota 4 ari na wo mwanya ubanziriza uwa nyuma, ni mu gihe isigaje guhura na Gasogi United ejo i Huye, Gorilla FC na Kiyovu Sports.

Umuyobozi w’ikipe ya Gasogi United, Kakooza Nkuriza Charles [KNC], yashyize hanze amajwi ya bamwe mu bantu bo muri Mukura VS bavugana n’umunyezamu we Mazimpaka Andre bamusaba ko yazabaha igitego.

Umunyamakuru akaba n’umufana ukomeye wa Mukura VS, Horaho Axel, yumvikana abwira uyu munyezamu ko nk’ikipe yakiniye adakwiye kubamanura ahubwo yazabafasha bakabona amanota 3.

Ati”umva urashaka kumanura ikipe wabereye kapiteni koko?” Mazimpaka ati”izamanuka, none se barampemba koko?”
Axel akomeza agira ati”umva ikipe wabereye kapiteni imyaka 2? Ikipe ya perezida wa federasiyo urayimanura koko?”

Mazimpaka yahise amubwira ko yamubabaje bitewe n’ibyo amusaba kuko atari ibintu yasaba inshuti ye, Axel yahise amubwira ko hari umuntu witwa Hussein wamusabye nimero ye ndetse akaba yazimuhaye.

Uyu mugabo witwa Hussein ukora muri Volcano na we akaba yahise ahamagara Mazimpaka

Ati”Axel yari yambwiye ngo yakubwiye, tuvugane se niba udahuze”? Mazimpaka yahise amubwira ko bavugana nta kibazo ari mu cyumba.
Hussein yahise amubwira ko akeneye ubufasha ku mukino bazakina akabaha ibitego.

Ati”ndashaka ubufasha, ndashaka ubufasha bwawe niba uzaba uri mu kibuga, uzadufasha iki? Turashaka intsinzi dufashe, uzareke ibitego byinjire ndetse n’abakinnyi ubahagarike nabi, nk’umuntu mukuru, dushaka igitego niyo cyaba kimwe kiguturutseho, nyuma umpe nimero ya konti.”

Mazimpaka Andre yahise amubwira ko ari miliyoni 2, undi amubaza niba ari ay’igikombe. Mazimpaka yahise avuga ko kandi bagomba guhita bamuha miliyoni 1 ako kanya andi bakazayimuha nyuma.

Hussein yamubwiye ko ayo mafaranga ari menshi niba atagabanya babireka, ndetse amubwira ko bazabatsinda, Mazimpaka ababwira ko nibamutsinda azareka umupira.

Mukura VS ibinyujije ku rukuta rwayo rwa twitter, yatangaje ko yitandukanye n’aba bantu barimo gushaka gutanga amafaranga ngo ikipe ibone intsinzi.

Yagize iti” ubuyobozi bukuru bwa Mukura VS & L, bwamaganye bwivuye inyuma abiyitirira izina rya Mukura VS & L bagakora ibikorwa bigayitse kandi batatumwe nayo. Uzafatirwa muri ibyo bikorwa azakurikiranwa ku giti cye. Mukura VS & L ifite umuvugizi nta yindi ntumwa igira.”

Kugeza ubu ntiharamenyekana ikigomba gukurikira cyane ko umunyamakuru Axel yihakana ibi byose; mu gihe KNC umuyobozi wa Gasogi United atarafata umwanzuro wo kurega Mukura VS mu ishyirahamwe ry’umupira w’amaguru mu Rwanda Ferwafa.

Mazimpaka Andre yasabye miliyoni 2 Mukura akabihera amanota

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO