Igitaramo cya ba Misigaro n’icya Kayirebwa byahagaritswe

Benshi mu bari biteguye kwitabira ibitaramo byari biteganyijwe kuri iki cyumweru taliki ya 08 werurwe batunguwe no kumva inkuru yuko byahagaritswe habura amasaha make ngo bibe, mu rwego rwo gukumira icyorezo cya Coronavirus(COVID-2019)

Nk’uko byatangajwe n’ubuyobozi bw’umugi wa Kigali, ibitaramo by’imyidagaduro, n’ibindi birori bihuza abantu benshi byahagaritswe guhera taliki ya 08 Werurwe kugeza igihe kitazwi , uyu mwanzuro ukaba washyize mu gihirahiro abahanzi, abakunzi b’imyidagaduro n’abandi bafite aho bahurira n’uruganda rw’umuziki mu Rwanda.

Mu bitaramo byari biteganyijwe kuba ariko bikaza guhagarikwa harimo ikiswe Each One Reach One cyari cyateguwe na Adrien Misigaro afatanyije na Gentil Misigaro.

Aba ba Misigaro mbombi nti byakunze ko bataramira abakunzi babo kubera impamvu zatangajwe n’Umugi wa Kigali zo kuba leta ikomeje gufata ingamba zo gukumira ahashobora kwandurizwa icyorezo cya Coronavirusi nubwo kitaragera mu Rwanda.

Hahagaritswe kandi igitaramo kiswe “Ikirenga mu bahanzi” cyari cyatumiwemo umuhanzi Cecile Kayirebwa wari no guhambwa igihembo nk’ umuhanzi wateje imbere umuco abinyujije mu buhanzi.

Abahanzi n’abakunzi b’umuziki muri rusange baribaza byinshi nyuma y’iki cyemezo kizakoma mu nkokora imishinga imwe n’ imwe yabafite aho bahurira n’ uruganda rw’umuziki mu Rwanda cyane ko muri iyi business ibitaramo biri mu bibinjiriza amafaranga atari make.

Amaganya y’abahanzi ndetse n’abakunzi b’umuziki muri rusange kubera ihagarikwa ry’ibitaramo akomeje kwiyongera hibazwa igihe ibitaramo bizakomorerwa abahanzi bakongera kwegera abafana babo ndetse n’abakunzi b’ umuziki bakegera abahanzi bakunda kuko iki cyorezo cya coronavirus kiri kurushaho gukaza umurego kinasatira umugabane wa afurika n’u Rwanda ruherereyemo.

Igitaramo kiswe ikirenga mu bahanzi cyahagaritswe ku munota wa nyuma

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO