Ikipe y’igihugu cya Tchad yakuwe muri AFCON kubera leta yivanze

Ikipe y’igihugu ya Tchad yakuwe mu makipe azitabira imikino ya nyuma yo gushaka itike yo gukina y’igikombe cya AFCON cy’umwaka utaha kubera Leta yivanze mu by’umupira w’amaguru.

Ni nyuma yaho ikuwe mu majonjora n’impuzamashyirahamwe y’umupira w’amaguru muri Afurika (CAF).

Tchad yari isanzwe iri ku mwanya wa nyuma mu itsinda A, idafite n’amahirwe yo kuba yakomeza ngo izitabire iyo mikino ya CAN iteganyijwe kubera muri Cameroon.

Ubu ntabwo igikinnye iyi mikino ya nyuma yo muri iri tsinda A yari kuzayihuza na Namibia na Mali.

Ahubwo, izajya ihita iterwa mpaga y’ibitego 3 - 0, intsinzi ihabwe ikipe bajyaga gukina.

Iki cyemezo kije nyuma yuko ishyirahamwe ry’umupira w’amaguru muri Tchad rihagaritswe na minisiteri ya Tchad ishinzwe urubyiruko n’imikino.

Amashyirahamwe y’umupira w’amaguru agendera ku mategeko akaze ahana igikorwa icyo ari cyo cyose cya politike cyo kwivanga muri ayo mashyirahamwe.

Itangazo rya CAF rigira riti: "Nyuma yuko Minisiteri ya Tchad ishinzwe urubyiruko n’imikino ihagaritse ishyirahamwe ry’umupira w’amaguru muri Tchad, CAF yafashe icyemezo cyo kuvana ikipe y’igihugu ya Tchad mu majonjora y’igikombe cy’Afurika cy’ibihugu cy’umwaka wa 2021".

Mali - yamaze kubona itike - ubu iyoboye itsinda A n’amanota 13 mu mikino itanu imaze gukina. Guinea-Conakry ni iya kabiri n’amanota umunani mu mikino ine imaze gukina.

Guinea izakira Mali ku wa gatatu ndetse yahita ibona itike yo gukina CAN itsinze uwo mukino, ariko uko uwo mukino warangira kundi kose bizatuma ijya muri Namibia gushaka itike mu mukino wo ku cyumweru.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO