Image Rwanda yateguye ibikorwa byo guteza imbere abafotozi bo mu Rwanda

Mu gihe mu Rwanda bari kwizihiza icyumweru cyahariwe abafotozi bw’umwuga ndetse n’abakizamuka mu Rwanda ikigo cya Image Rwanda cyateguye ibikorwa bitandukanye byo guteza imbere abakora umwuga wo gufotora .

Mu bikorwa byateguwe na Image Rwanda harimo amasomo ya buri munsi kuri interineti, Kujya muri Studio, amarushanwa y’abafotozi b’umwuga ndetse n’ibindi bikorwa bitandukanye ku bakunzi b’amafoto.

Image Rwanda ni ihuriro ry’ubuhanzi rigamije kwerekana ubwiza bw’u Rwanda binyuze mu mashusho. Ifite abanyamuryango batandukanye batanga umusanzu mu gutanga amashusho atandukanye harimo n’amafoto meza agurishwa binyuze ku rubuga rwayo.

Ku munsi w’ejo hashize tariki ya 16 Kanama 2021 nibwo iri ruhuriro ryatangije gahunda y’icyumweru yahariwe ba gafotozi aho bateganyije ibikorwa bitandukanye mu rwego rwo gufasha abafotozi bo mu Rwanda.

Mu kiganiro na Jean Luc Habimana, washinze Image Rwanda yadutangarije ko iki cyumweru hari byinshi bari gutegurira ba gafotozi bo mu Rwanda mu rwego rwo gukomeza kwiteza imbere.

Yagize ati “Iki cyumweru cyose ntabwo kiri mu rwego mpuzamahanga ariko twe nk’abanyarwanda twahisemo kukigira icy’ibikorwa bitegura umunsi wo gufotora kw’isi ubusanzwe uba tariki 19 Gicurasi buri mwaka.

"Muri iki cyumweru twateguye amarushanwa yo gufotora aho abafotora batandukanye bazerekana amashusho yabo, abazaba baratanze amafoto meza kurusha ayandi bazahembwa mu mpera z’iki cyumweru."

Mu bihembo bitandukanye bazahabwa harimo no koroherezwa mu ngendo zizabafasha gukomeza kwihugura mu bijyanye no gufotora.

Habimana Jean Luc yakomeje avuga ko atari ibyo bikorwa byonyine kuko hari n’ibindi bikorwa bizaba mu cyumweru cyo gufotora.

Ati: "Mu bindi bikorwa dufite harimo gahunda ya buri munsi ku mbuga zitandukanye nka Instagram, Clubhouse na zoom. Isomo rya mbere ryerekeye abagore mu gufotora - Aho haza kubaho ikiganiro gitangwa na Cynthia Butare nk’umushyitsi mukuru."

“Ikindi gikorwa ni ugutanga studio muri iki cyumweru, aho Abafotora bashobora kubika no kuza gukora imishinga yabo ku buntu."

Ihuriro rya Image Rwanda nyuma yaho rishingiwe mu mwaka wa 2017 na Jean Luc Habimana na Innocent Ishimwe kugeza ubu rifite abafatanyabikorwa barenga 100 aho bose bashobora kubika amashusho cyangwa amafoto yabo mu bubiko bwabo mu Rwego rwo gukomeza kumenyekanisha ubwiza bw’u Rwanda binyuze mu mafoto.

Biteganyijwe ko icyumweru cyahariwe abafotozi mu Rwanda kizasorezwa mu karere ka Musanze ahazabera umuhango wo gufungura ku mugaragara ikigo cya ’The Creative Corner’.


Jean Luc Habimana na Innocent Ishimwe bafunguye Image Rwanda

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO