Imana niyo yabigiyemo ngo AmaG yiyunge na Bruce Melodie

Umuraperi Amag The Black na Bruce Melodie ni abahanzi binjiye mu muziki ari inshuti magara zimwe zisangira akabisi n’agahiye. Nyuma baje gushwana kugeza naho baterana amagambo bakajya banatukana mu ndirimbo. Ubu bariyunze, Amag avuga ko ari Imana yabigiyemo.

Benshi mu bakukirana imyidagaduro cyangwa umuziki Nyarwanda bazi ikibazo cya Amag the Black na Bruce Melodie dore ko nabo ubwabo bishyize hanze batangira no kubiririmba baterana amagambo.

Iki kibazo cyaje nyuma y’ubukwe bwa AmaG yakoze mu Ukuboza 2017.

Intandaro yacyo yari yavuye ku murinzi wa Bruce Melodie wahawe akazi mu bukwe bwa AmaG ngo biza kurangira atishyuwe. Iyo yajyaga kwishyuza Amag ngo byasaga nkaho abizanyemo na Bruce Melodie bituma uyu muraperi bose abijundika.

Nyuma yaho Amag yagiye asohora zimwe mu ndirimbo yari afitanye na Melodie ariko we atabizi ngo kuko yagiye azisohora batabyumvikanyeho na we akamwihorera.

Ntabwo byarangiriye aho kuko bakomeje guterana amagambo kugeza nubwo Amag avuze ko Melodie yiyita igitangaza kandi ataricyo.

Ati “Ni gute umuntu yiyita igitangaza kandi na Yesu wakoraga ibitangaza atarigeze abyiyita.”

Melodie we yavugaga ko ntakibazo afitanye na Amag The Black ko ahubwo ko Amag ariwe ukimufiteho.

Bariyunze ubu bari no gukorana indirimbo

Nyuma y’iyo myaka isaga ibiri aba bahanzi badacana uwaka, baje kwicara nk’abagabo bacoca ikibazo bari bafitanye ubu ngo babanye neza cyane kuko bari no gukorana indirimbo izasohoka vuba.

Amag The Black aganira na Genesisbizz yavuze ko nta kibazo agifitanye na Bruce Melodie.

Ati “Ubu mwese mubimenye ntakibazo nkifitanye na Melody, Imana yabigiyemo irabirangiza.”

Amag avuga ko mu gukemura ikibazo cyabo nta numwe wari wabiteguye ahubwo bahuriye ahantu baraganira birikora.

Ati “Agatotsi kabaho mu mubano ariko ikibi ni uko kagumaho biriya ni akanyuzemo nizereko batwihanganiye.”

Mu bikorwa bye bya muzika uyu muraperi avuga ko mu minsi yavuba agiye gushyira hanze indirimbo nshya yise ‘Nemeye icyaha.’

Uretse umuziki Amag kuri ubu ahugiye cyane no kuri Filime ye anyuza ku rubuga rwa You tube yitwa Ngunda.


Aba bahanzi ubu bariyunze kuko bari no gukorana indirimbo izasohoka vuba

Agace ka Ngunda imwe muri filime ikorwa na AmaG

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO