Impamvu z’ingenzi zituma Umuhanzi Nyarwanda azima

Iyo umuhanzi amaze kumenyekana ku rwego rushimishije cyangwa se kuba umu super Star nk’uko bivugwa mu mvugo y’abahanzi, usanga akenshi yirara akumva ko yageze iyo ajya bityo ugasanga aragabanya ingufu yashyiraga mu gukora ubuhanzi bwe. Ibi rero usanga bitera gusubira inyuma ndetse rimwe na rimwe kwibagirana.

Iyo hajemo uko kwirara bigira ingaruka kuri uwo muhanzi ugasanga arazimye cyangwa se aribagiranye muri urwo ruganda. Hari benshi byagiye bibaho ariko yagaruka bikanga agakomeza gukora indirimbo ariko ntizimenyekanye.

Muri iyi nkuru tugiye kurebera hamwe bimwe mu bintu abahanzi bajya bakora bikabaviramo kuzima.

Kudakorana neza n’itangazamakuru

Nubwo abahanzi benshi batabiha agaciro, gukorana n’itangazamakuru ni kimwe mu bintu by’ingenzi umuhanzi yakagombye guhora azirikana. Umuhanzi ugitangira akenera itangazamakuru ngo rimuzamure.

Birababaza iyo usanga umuhanzi atagiha agaciro itangazamakuru mu gihe ibikorwa akora byose biba bikomeza gukenera itangazamakuru. Bamwe mu bahanzi nyarwanda bamaze kuba ibyamamare usanga batagifata umwanya wabo uhagije wo kwegera itangazamakuru ngo bamenyekanishe ibikorwa byabo nk’uko mbere babikoraga bakiri gutangira.

Gusesagura amafaranga

Bamwe mu bahanzi bamaze kuba ibyamamare usanga batangira gukoresha amafaranga menshi cyane bitari mu rugero kandi ugasanga ibikorwa byabo bitabaha arenze ayo bakoresha.

Kudakorana n’abandi bahanzi

Hari abahanzi usanga ari ba nyamwigendaho bikaba bigoye kumubona mu ndirimbo cyangwa se mu gikorwa cya mugenzi we. Ibi akenshi usanga biterwa no kuba umuhanzi runaka atifuza iterambere rya mugenzi we bityo akumva ko kumufasha bizatuma atera imbere akamucaho.

Kudafasha cyangwa kudakorana n’abahanzi bakizamuka

Bamwe mu bahanzi bibeshya ko kuba icyamamare bisobanura kudakorana n’abahanzi bakizamuka.

Usanga hari abahanzi bumva ko kuba uri icyamamare ugakorana n’abahanzi bataramenyekana bikwanduriza izina nyamara usanga ari bumwe mu buryo bwo gukomeza kwigarurira abakunzi ba muzika ndetse bakanakubonamo umuntu ushishikarira gufasha abandi bahanzi bityo urukundo bari bagufitiye rukarushaho kwiyongera.

Kutagira udushya mu bihangano bye : Abantu mu miterere yabo bakunda ko ibintu bihora ari bishya. Umuhanzi kimwe n’abandi banyabugeni, aba akwiye kugira udushya mu bihangano bye kugira ngo akomeze ashimishe abantu. Iyo ukomeza ukora ibintu bimwe mu buhanzi bwawe, abantu bagera aho bakaguhaga kabone n’ubwo waba uri umuhanga bingana gute.

Kutumva impanuro uhabwa

Hari abantu benshi usanga bavuga byinshi (ibyiza n’ibibi) ku bahanzi gusa buri munsi ntibiba ari ukuvugwa gusa kuko hari ubwo usanga ibyo bavuzweho biba ari ukuri.

Umuhanzi rero yari akwiriye gufata umwanya we agasuzuma ibimuvugwaho akareba niba hari ibyo yaba akwiye kubyaza umusaruro.

Kudakora ubuhanzi nk’umwuga

Ubuhanzi ni umwuga nk’iyindi, iyo bukozwe neza bushobora gutunga nyirabwo ndetse ku rwego rurenze kure uko indi myuga yatunga ba nyirayo.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO