Impinduka mu bikorwa byo Kwibuka ku nshuro ya 27

Komisiyo y’Igihugu yo kurwanya Jenoside CNLG yatangaje ko ibikorwa byo gutangiza iminsi 100 yo kwibuka ku nshuro ya 27 abazize Jenoside yakorewe Abatutsi mu 1994, bizaba hari ababikurikirana mu buryo bw’ikoranabuhanga ririmo, ibinyamakuru ndetse n’imbuga nkoranyambaga.

Umunyamabanga Nshingwabikorwa wa CNLG, Dr Bizimana Jean Damascène, Mu kiganiro yagiranye na RBA, yavuze ko iki gikorwa kizakurikira umuhango wo gutangiza icyunamo ari nacyo kizavugirwamo ubutumwa nyamukuru.

Ati “Ibyiciro byose by’Abanyarwanda bizahagararirwa muri icyo gikorwa kizabera mu Intare Arena, kirangwe n’ibiganiro, ubuhamya, indirimbo ndetse n’ubutumwa nyamukuru bugenewe Abanyarwanda, inshuti z’u Rwanda n’amahanga yose. Icyo ni igikorwa gishya ugereranyije n’umwaka ushize.”

Dr Bizimana yavuze ko abandi Banyarwanda bazakurikira ibi bikorwa mu buryo bw’ikoranabuhanga ririmo Radio na Televiziyo, ibinyamakuru ndetse n’imbuga nkoranyambaga.

CNLG ivuga ko ibikorwa bitandukanye birimo urugendo rwo kwibuka ndetse n’umugoroba w’icyunamo byose nta bizaba.

Ni mu gihe kandi icyumweru cy’icyunamo ibikorwa bisanzwe biba mu bihe bisanzwe byo kwibuka bizaba hatangwa ibiganiro mu buryo bw’ikoranabuhanga.

Nk’uko amabwiriza yo kwirinda Covid-19 avuga, ni nako bizagenda aho uturere twagiye tubona imibiri y’Abatutsi bishwe muri Jenoside muri uyu mwaka bizakorerwa ku nzibutso ariko hubahirizwa amabwiriza yo kwirinda ikwirakwira rya Covid-19.

Ati “Bivuze ko abaturage bafite ababo bataburuwe muri ibi bihe, imiryango izajya igena abayihagararira bakurikije umubare. Iki kizajyana no kuba abantu bajya gushyira indabo ku nzibutso nabyo ni ibintu bifasha kwibuka ababo, kuzirikana abacu, icyo gikorwa nacyo abantu bashobora kuzajya bajya kugikora ariko bubahirije nanone ya mabwiriza yo kwirinda Covid-19, birinda kugenda ari benshi, hakajyayo umubare ugenwe wemewe.”

Yakomeje avuga ko abantu bazajya basura inzibutso bagomba kuzajya banipimisha Covid-19.

Ati “Ni ukubashishikariza kubanza kwipimisha Covid-19 bakamenya uko bahagaze noneho kuba bagiye no kujya mu ruhame icyo bakacyubahiriza kandi bakirinda kugendera rimwe ari benshi.”

Ibikorwa birimo urugendo rwo kwibuka ndetse n’umugoroba w’icyunamo byose ntabwo bizaba

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO