Imyaka 109 irashize ubwato bwa Titanic burohamye, Kuki amateka y’abwo adasibangana?

Birashoboka ko waba wararebye filime ya Jacques wakunze Rose ndetse akamwitangira cyangwa se warabonye ku gifuniko cy’amakarita aya bakina ukumva ugize amatsiko yo kumenya byinshi abo bantu nanone birashoboka cyane ko waba wararebye Filimi yitwa Titanic ariko ukagirango ni bimwe bya Filimi, Aha kuri iyi ya Titanic yo ndagirango nkubwire ko ari Filimi y’impamo cyangwa se ibintu byabayeho.

Ni byinshi waba uzi kuri ubu bwato kuko ubusanzwe Titanic ni ubwato buzwi cyane mu mateka nk’igikoresho cyakozwe n’ibiganza by’umuntu cyashoboye kugendera ku mazi arikinini bwa mbere mu mateka y’isi n’ubwo urugendo rwayo rutayibereye ruhire.

Titanic ni ubwato bwa mbere bwabayeho mu mateka y’isi bunini kurusha ubundi bwose. Ni ubwato bufte amateka menshi cyane kandi akomeye bwakozwe kw ‘Itariki ya 15 Mata 1912 bukaba kugeza ubu bumaze imyaka 109 burohamye mu Nyanja ya Atalantika nyuma yo kugonga ikibuye kinini cy’urubura.

Titanic yakorewe mu gihugu cy ‘Ubwongereza yubakwa n’abantu basaga ibihumbi 15 ariko bigoranye cyane kubera ubunini bwayo kuko yari ifite metero 268 z’uburebure na metero 30 z’ubuhagarike igapima Toni 52 310 z’uburemere, nkuko tubikesha wikipedia.

Ubwo bwato bw’ubatswe n’ abakozi basaga ibihumbi 15, bivugwa y’uko mu iyubakwa ryayo abakozi basaga 246 bakomerekeyemo, 28 muribo bahuye n’imvune zikomeye ku buryo bwabaviriyemo ubumuga bwa burundu, ndetse abandi 9 bahasiga ubuzima.

Izina “Titanic” ryahawe ubu bwato nk’izina, rikomoka mu rurimi rw’ikigereki rikaba risobanura “ikintu kinini” Ubu bwato bwubakiwe mu gace ka Belfast muri Ireland , bukaba bwari ubwato bwa 2 muri 3 bwa mbere bwariho ku isi bunini bukora ingendo zo mu mazi, aho ubwa mbere bwari Olympic naho ubwa 2 bukaba Britannic bukaba bwari ubw’ikigo gikora ingendo zo mu mazi cy’Ubwongereza kizwi ku izina rya White Star Line.

Ku itariki ya 31 Gicurasi 1911 ahagana isaha ya saa sita n’iminota 15 z’amanywa (12:15 PM) nibwo Titanic yashyizwe ahagaragara umuhango witabiriwe n’abantu barenga ibihumbi 100,000 bari baje kureba ubu bwato bw’igitangaza.

Titanic nkuko twabivuze haruguru bwari ubwato bunini cyane kuko bwari bufite ibice 9 bigerekeranye harimo icyo hejuru cyashyirwagaho ubwato bw’ubutabazi ndetse n’icyo hasi cyabikwagamo imitwaro, 7 byo hagati bikaba byari bigenewe abagenzi. Bukaba bwari bufite ubwato buto bw’ubutabazi bugera kuri 20.

Nyuma yuko imuritswe ku mugaragaro ku itariki ya 10 Mata 1912 nibwo Titanic yahagurutse I Southampton yerekeje I New York muri Leta zunze ubumwe za Amerika, yaririmo abantu b’ingeri zose ariko by’umwihariko bukaba bwarimo abakire ba mbere ku isi muri icyo gihe bari bagiye mu ngendo zo kwishimisha.

Ubu bwato bwahagurutse burimo abantu bagera ku 2202 harimo abakozi babwo bagera kuri 885 n’abagenzi 1,317.bukaba bwari buyobowe na Captain Edward John Smith nawe waguye muri iyi mpanuka.

Ubu bwato bwari bwiganjemo abantu b’igitsinagabo, dore ko mu bagenzi bari baburimo 66% bose bari abagabo.

Nyuma yo guhaguruka I Southampton tariki 10 Mata bwerekeje I New York aho byari biteganyijwe ko buzagerayo nyuma y’iminsi 10 (Tariki 20 Mata), buri mu Nyanja rwagati mu majyaruguru ya Atlantika bwaje kugonga ibuye rinini ry’urubura iyi ikaba ari nayo mpamvu nyamukuru y’iyi mpanuka.

Hari ku isaha ya saa tanu n’iminota 40 z’ijoro, ubwo uwacungiraga ubwato icyerekezo Frederick Fleet yabonaga ibuye rinini ry’urubura imbere hafi neza y’ubwato akagerageza kumenyesha abari batwaye.

Umuyobozi wa mbere w’ubwato William Murdoch yategetse ko bakatisha ubwato ndetse bakagabanya umuvuduko mu buryo bwose bushoboka ariko igihe cyari cyarenze ubwo ubwato bwari buri hafi cyane y’iri buye.

Bagerageje gukatisha ubwato ariko uruhande rumwe rugonga iri buye bituma bwangirika ndetse hacukuka imyobo ku bwato ku gice kiri mu mazi.

Uko umunota ku wundi washiraga niko aya mazi yagendaga abona inzira acamo maze igice cyo hasi gitangira kuzuramo amazi kugeza ubwo byaje kugaragara ko butangiye kurohama.

Ku isaha ya saa munani n’iminota 20 za mu gitondo (tariki 15 Mata) nyuma y’amasaha 2 n’iminota 40 bugonze, bwatangiye kumanuka mu buryo budasanzwe aho igice kinini cy’imbere cyari kimaze kwinjira mu mazi kugeza ubwo moteri zabwo zatangiye kugaragara hejuru ndetse uko amazi yakomeje kubukurura bwaje gucikamo ibice 2.

Abantu benshi bagiye bashaka kwikiza ku bwabo, bakagwira ibyuma by’ubu bwato ubwo bwari bumaze kwicurika, ndetse abandi benshi bapfuye bazize ubukonje dore ko muri ako gace hari kuri 2 munsi ya 0 ku gipimo cya Celsius aho icyizere cyo kubaho muri ubu bukonje kiba ari iminota 15 ku muntu muzima.

Ku bijyanye no kurokorwa iyi mpanuka, ubu bwato bwari bufite ubushobozi bwo kurokora abantu bagera kuri kimwe cya 2 gusa mu bari baburimo muri iki gihe.

Mu gukiza abantu hibanzwe cyane ku bagore n’abana, ariko hirengagizwa abakene bari baburimo aho bafungiranywe aho bari bari bagaherayo benshi bagapfa bagerageza kwirwanaho abandi bakicwa n’amazi n’ubukonje.

Kuba iyi mpanuka yarabaye mu buryo butunguranye, aho abayobozi b’ubwato batari bazi neza icyo bari bukore, ho abakozi batari barahuguwe bihagije mu gutabara abagenzi mu gihe cy’impanuka biri mu byatumye abantu benshi bagwa muri ubu bwato.

Nyuma y’uko iyi mpanuka ibaye hakagira bacye bakirizwa mu bwato bw’ubutabazi buto, hafi aho hari ubwato bwa Californian ariko nti bwabashije gutabara. Ku isaha ya saa kumi za mu gitondo, nibwo ubwato bwa RMS Carpathia bwabashije kugera aho impanuka yabereye nyuma y’uko buhamagawe na Titanic imaze gukora impanuka.

Abantu bagera kuri 710 babashije kurokorwa batwarwa na Carpathia berekezwa I New York, naho abagera ku 1500 bose bari bamaze kuhasiga ubuzima.

Nyuma y’iyi mpanuka igifatwa nk’impanuka ya mbere yo mu mazi yahitanye abantu benshi mu mateka y’isi, ubwato bwa Carpathia bwatabaye bwafashe iminsi 3 kugira ngo bugere i New York butwaye aba bantu bari barokotse, bitewe n’ikirere ndetse n’amazi mabi bwacagamo yari yuzuyemo amabuye menshi y’urubura.

Nyuma y’iyi mpanuka, imiryango itandukanye yagiye ishyirwaho mu rwego rwo gufasha abarokotse iyi mpanuka ndetse no gufasha ababuriye ababo muri iyi mpanuka.

Ibice by’ubu bwato byaguye hasi mu nyanja, kugeza ubu bikaba biri mu bujyakuzimu bw’inyanja bugera muri metero 3 843.


Filime yakozwe kuri ubu bwato ni imwe mu byatumye benshi bamenya aya mateka atajya yibagirana

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO