Indaya zigezweho ku mbuga nkoranyambaga ziratumaraho abana zibinjizamo

Iyi ni inyandiko n’igitekerezo bwite cya Batamuriza Clodette yatwandikiye bitewe n’impungenge aterwa n’ibyo abona bikorwa n’abana bakiri bato muri iki gihe bigira ku bakobwa bikimero bagezweho ku mbuga nkoranyambaga.

Inyandiko ye yagiraga ati “Mwiriwe neza bakunzi ba Genesis TV, Amazina yanjye ni Batamuriza Clodette ndi umubyeyi wubatse ariko ndifuza kubasangiza igitekerezo cyanjye.

Sinzi niba ndi buvuge ko nasigaye inyuma ku bijyanye na Tekinologi, gusa mfite umwana w’umukobwa uri mu kigero cy’imyaka 16, iyo ntashye mvuye ku kazi buri munsi antira telefone ngo ajye ku rubuga rwa Instagram arebe amafoto y’icyamamare akunda kandi ngo yigiraho byinshi.

Naramubajije nti ese uwo muntu ukunda ni uwuhe, akora iki, inshuro zose se wamurebye n’iki umaze kumwigiraho?

Umwana yansubije ko icyo akundira uwo muntu (Twagize Ibanga) ari uko agira amafoto meza, kandi ko akunze gutembera isi yewe akajya no muri Hotel zihenze ku Isi ikindi ahorana n’ibyamamare ku rwego rw’isi n’abaherwe batandukanye.

Muri make namubajije akazi yaba azi uwo akora ansubiza ambwira ngo Ntabwo azi icyo akora!!

Aha byanteye kwibaza…Ese uwo muntu umwana wanjye afatiraho urugero abayeho gute ku buryo uko afashe Telefone abariwe areba kugeza naho avuga ko ashaka kuzamera nkawe mbese akabaho ubwo buzima.

Ibi byatumye niyambaza musaza wanjye muto kuko njya mbona akurikiranira hafi ibijyanye n’abasitari.

Yambwiye ko uwo muntu koko amuzi ati “Ni icyamamare ku mbuga kuko akunda gushyiraho amafoto yambaye ubusa gusa aba agamije kureshya abagabo kugirango abone abamwishyura ari nabo bamutembereza aho hose gusa ni uko abantu baterura njye mbifata nk’ubundi buryo bushya bwo kwicuruza (Uburaya).”

Ibi byanyibukije inkuru y’abakobwa bafunzwe umwaka ushize bazira kwambara ubusa ku mbuga nkoranyambaga bakavuga ko babikoze batazi ingaruka bizagira, bitwaje ko nta tegeko bari bazi ribahana kandi mu byukuri abana bacu baba bari kubireba. Hari abo numvise ngo babikora bashaka kugira ababakurikirana benshi kuri izo mbuga.

Ibi byatumye nsobanukirwa mpita ntangira kwibaza ku babishinzwe - rwose bagire icyo bakora kuko usibye kuba ari uburaya butwicira abana kuko hari ababakunda bahura nabo bagatangira kubinjiza muri uwo mwuga.

Nakwanzura mvuga ko imbuga Nkoranyambaga zikomeje guhindura imibereho y’abatuye Isi muri iki gihe, bamwe bazikoresha mu bucuruzi abandi bakazifashisha bagaragaza ibyo bakora no gusangiza abandi ubuzima babayemo.

Ikiri ukuri, ni uko benshi bamaze kwangirikira muri ubu bucuruzi, abakobwa bamwe banze kuvirira bati “ukena ufite itungo rikakugoboka”, abandi banga gukorera ayo bita “intica ntikize” mu gihe hari menshi babona nta muntu ubasaba raporo ya buri munsi.

Birakwiye ko hashyirwa imbaraga mu gukumira ubu buraya kuko bukomeje koreka benshi, ubukangurambaga ku bakiri bato mu kwirinda ibishuko nk’ibi nabwo bugashyirwamo imbaraga kandi n’ababyeyi bakagaruka ku nshingano zo gukurikirana abana babo, babagira inama, babereka ko iraha n’ubuzima bworoshye nta kindi byabagezaho kitari ukubicira ejo hazaza.

Murakoze kubwo kwakira igitekerezo cyanjye. Nizereko muzakigeza ku bakunzi ba Genesisbizz/TV n’Abanyarwanda muri rusange.

Impungenge ku muryango Nyarwanda

Igiteye ubwoba ni urwo ruhererekane rw’indaya zizana abana b’abakobwa zitwaje ko zigiye kubagira nabo ibyamamare bakabacuruza babashukisha ko bazabahindurira ubuzima. Hari abata amashuri, n’imiryango ngo baje gukorera amafaranga bicuruza.

Umwe mu babyeyi twaganiriye, avuga ko inzego zinyuranye cyane cyane izifite abari n’abategarugori mu nshingano zikwiye guhagurukira gukumira uru ruhererekane rw’indaya ziriho zizana abana bo kuzisimbura.

Yongeraho ko izo nzego zikwiye gufata ingamba zo gukumira icyo kintu haherewe kuri abo bana.

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO