Ingaruka iterambere rya Tekinoloji na Murandasi byagize ku bantu bo mu kinyejana cya 21

Ikinyejana cya makumyabiri na rimwe nicyo gihe isi yagize iterambere ryihuse yaba muri tekinoloji n’ikoranabuhanga rya murandasi yihuta ku buryo uyu munsi byoroshye kuba wavugana n’umuntu uri ku wundi mugabane imbonankubone kandi amashusho adacikagurika.

Mu kinyejana cya cumi n’icyenda ibi byasaga nk’inzozi, ntawari uzi ko tuzagira iterambere ryo ku rwego rwo hejuru, tukohereza ibyogajuru mu isanzure, tukagira murandasi yihuta ku muvuduko mwinshi, tukavugana n’abantu bari ku yindi migabane, tugasura indi mibumbe igaragiye izuba n’iyitaruye kure cyane y’izuba.

Iri terambere twagezeho ryadufashije byinshi byiza gusa nanone ryatugizeho ingaruka mbi zikomeye ndetse ryatumye duhindura uburyo bw’imibereho. Reka muri iyi nkuru turebere hamwe ingaruka mbi iterambere rya tekinoloji na murandasi byagize ku bantu bo mu kinyejana cya makumyabiri na rimwe.

1.Umuco wo gusoma ibitabo waracitse

Tuvuze ku ruhande rw’abana bato bari mu mashuri, iterambere rya tekinoloji ryatumye habaho gukora ibikoresho by’ikoranabuhanga bimeze nka telefone nini bita tablet, aho uyu munsi abana bato bashobora kuzifashisha basoma.

Uyu munsi tekinoloji yatumye bamwe mu bana bato batunga telefone zigezweho bita smartphone, ibi byabaye nk’ibiyobyabwenge ku buryo umwana muto yumva ko kumuha ’tablet cyangwa smartphone’ ariho yasomera ibitabo neza kurusha kumuha igitabo gisanzwe.

Ikibazo ni uko izi tablet zikora nka telefone zisanzwe aho umwana muto zishobora kumurangaza akaba yazikoresha ibindi nko gukina imikino ikamurangaza aho kugirango ayikoreshe mu myigire ye. Ndetse si abana gusa n’umuco wo gusoma ibitabo ku bantu bakuru ugenda ucika buri munsi kuko ibyo dukeneye byose tubishakira muri telefone na mudasobwa dutunze.

Abantu ntitugishishikazwa no gusoma ibitabo, dusoma ibiri mu bikoresho bya tekinoloji gusa.

2.Umuco wo gusurana waracitse ndetse abantu ntibakigira urukumbuzi

Ahantu henshi hari ikoranabuhanga rya murandasi ku buryo uyu munsi iyo umuntu akwandikiye ku mbuga nkoranyambaga dukoresha nka Whatsapp, Instagram cyangwa Facebook, akakubaza amakuru ukamubwira ko ari meza, ibyo bisigaye bisa nk’ibihagije.

Si ngombwa ko agusura kandi wamubwiye ko umeze neza, uyu munsi abantu bafata nkaho kwandikirana bihagije kandi nyamara iyo usuye umuntu ukamubona imbonankubone nibwo umenya ko ibyo akubwira aribyo ko ameze neza ko nta kibazo afite.

Ikindi kibazo ni uko niyo umuntu agusuye hari igihe utamwakirana urugwiro ngo umwiteho ahubwo ugasanga buri wese yubitse umutwe muri telephone ye ari kuri murandasi n’imbuga nkoranyambaga byamurangaje. Nanone harigihe usohokana n’umuntu aho kugirango muganire muhuze urugwiro, akarangazwa n’ibikoresho bya tekinoloji aho kuguha umwanya ngo muganire.

Murandasi yangije urugwiro abantu tugirira abandi

Abantu bafite abavandimwe cyangwa ababyeyi baba mu mahanga, uyumunsi iterambere rya murandasi rituma batakigirirana urukumbuzi ngo ukumbure umuntu kuko yagiye mu mahanga.

Uyu munsi hari ikoranabuhanga ritwemerera kuvugana turebana imbonankubone twifashishije imbuga nkoranyambaga zitandukanye ku buryo bwira uzi amakuru y’umuntu wawe uri mu mahanga, ukamenya ibyo yariye ukabona uko asa, niba yarabyibushye cyangwa yarananutse muri make bimeze nkaho muba muri kumwe umunsi ku munsi.

Ibi bituma urukumbuzi abantu kera bagiriraga abantu babo igihe babaga baragiye mu mahanga rugabanuka kuko uyu munsi dufite murandasi yihuta n’imbuga nkoranyambaga zitandukanye ku buryo burimunsi ushobora gukurikirana ubuzima umuvandimwe wawe cyangwa umubyeyi wawe uri mu mahanga abayemo ku buryo biba bisa nk’aho n’ubundi muri kumwe buri munsi, kuko burikimwe akoze ushobora kukibona kuko muvugana murebana.

Murandasi yatumye urukumbuzi hagati y’abantu rugabanuka kuko dushobora kuvugana imbonankubone.

3. Imikino y’abana yaracitse

Mbere y’uko tugira iterambere rya murandasi na tekinoloji yo ku rwego rwo hejuru nk’iyo dufite uyu munsi, wasangaga abana bahuzwa no gukina umupira w’amaguru cyangwa indi mikino nko kwihishanya, ubute n’indi myinshi cyane.

Uyu munsi bitewe n’iterambere rya tekinoloji ryatumye inganda nyinshi zikora ibikinisho by’abana kuburyo uyumunsi aho kugirango umwana ajye gukina n’abandi umupira w’amaguru, ashobora kwicara mu rugo agakina umupira w’amaguru ariko akawukinira kuri televiziyo cyangwa akawukinira kuri telefone.

Uyumunsi aho kugirango umwana ajye gukina imikino yo kwihishanya n’abandi bana, ashobora gukina imikino yo kwihishana ariko akoresheje tablet cyangwa telefone zigezweho cyangwa akanayikinira kuri televiziyo zigezweho izo bita smart tv.

Bitewe n’uko abana benshi bo mu kinyejana cya makumyabiri na rimwe usanga ibintu byinshi babikora bicaye, aho ashobora kumara umwaka wose akina imikino yicaye imbere ya televiziyo , ibi bituma bahura n’indwara z’umubyibuho ukabije kuko ntago iterambere rya murandasi na tekinoloji byemerera abana kwirukanka no gukora imyitozo ngororamubiri kugirango bishimane n’abandi bakinana imikino, kwicara mu ntebe agakina bitamusabye guhaguruka cyangwa kwiruka uyumunsi birashoboka kandi akishima.

Iterambere rya tekinoloji na murandasi byangije uburyo bw’imikino yari isanzwe iba

4. Murandasi yuzuyeho ibishobora kuyobya abana

Uyumunsi kuba abana bashobora gukoresha ibikoresho bya murandasi nka telefone zigezweho, tablet na mudasobwa kandi ahantu hose bakaba bashobora kuhasanga murandasi, ibi bihinduka ihurizo rikomeye ku babyeyi n’uburyo bagomba kugenzura ibyo abana bareba kuri murandasi.

Uyumunsi abana bato bashobora gufungura konti ku mbuga nkoranyambaga zitandukanye kandi kuri izo mbuga bashobora guhuriraho n’amashusho cyangwa amafoto ashobora kubayobya akaba yabashora mu ngeso mbi.

Hari imbunga nyinshi uyumunsi zisangwaho amashusho y’urukozasoni ndetse kuba abana bato bakoresha ibikoresho bikoresha murandasi biba byoroshye cyane kuba bashobora guhura n’aya mashusho y’urukozasoni kuko rimwe na rimwe bashobora guhura n’ubutumwa bwamamaza izo mbuga babufungura bukaberekeza kuri izo mbuga.

Ababyeyi bagirwa inama yo gushyira gahunda ya mudasobwa irinda amashusho n’imbuga zamamaza amafoto n’amashusho y’urukozasoni muri telefone z’abana babo.

Ababyeyi bagirwa inama yo gucunga ibyo abana babo bakora kuri murandasi

5. Abantu batakaje ubushobozi bwo kwandika

Bitewe n’ikoranabuhanga na tekinoloji abantu bavumbuye, uyu munsi mu bihugu byinshi byateye imbere abana benshi mu mashuri bakoresha ibikoresho bitabasaba kwandikisha intoki ku buryo bandika bifashishije ibikoresho bya tekinoloji nka mudasobwa cyangwa tablet zo kwigiraho.

Ibi bituma uyu munsi abana baratakaje ubushobozi bwo kwandika n’intoki. Amakuru dukesha urubuga rwa The New York times avuga ko hari ubushakashatsi bwigeze gukorwa mu mwaka wa 2016 aho abanyeshuri bangana na 40% bakoze ikizamini bagasanga nta bumenyi bwo kwandika n’intoki no gusoma bafite kuko bari baramenyereye kwandika mu bikoresho bya tekinoloji nka tablet na mudasobwa cyangwa telefone zigezweho ariko bagera ku rupapuro kwandika bikabagora.

Mu Rwanda abagerwaho na Murandasi barikubye

Minisiteri y’Ikoranabuhanga mu itumanaho na Inovasiyo ivuga ko abagerwagaho na murandasi mu Rwanda muri 2011 bari 7% ubu bakaba bageze kuri 52%.

Iyi minisiteri itangaza ko muri 2010 abari batunze telefone ngendanwa bari 33% mu gihe mu mwaka ushize bazamutse bakikuba inshuro zirenga ebyiri kuko bageze kuri 80.5%

Tekinoloji yatumye dutakaza ubushobozi bwo kwandika n’intoki

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO