Nizeyimana yamuritse igitabo cya Kabiri yitsa k’ubumwe bw’Abanyarwanda muri Repubilka ya mbere n’iya kabiri

Umwanditsi akaba n’umushakashatsi ku mateka y’u Rwanda, Innocent Nizeyimana yamuritse igice cya kabiri cy’igitabo yise "Ubumwe bw’Abanyarwanda mu mateka yabo: U Rwanda nyuma y’ubukoroni na Politiki y’amacakubiri yagejeje kuri Jenoside yakorewe Abatutsi mu Rwanda”.

Umuhango wo kumurika iki gitabo wabaye kuri uyu wa gatanu tariki ya 13 Ugushyingo muri Lemigo Hotel. Iki ni igice cya kabiri cy’ubushakashatsi bwe, kikaba gikurikira icya mbere kivuga ku ruhare rw’ubukoroni mu macakubiri ashingiye ku moko yatangiye kuba agatereranzamba kuva mu gihe cy’ubukoroni bw’Ababiligi, ubwo izari inzego z’imibereho y’Abanyarwanda zahindukaga bitewe n’impamvu zitandukanye.

Izo nzego Nizeyimana akomozaho cyane cyane ni izatumaga umuntu ajya mu cyiciro runaka kuko umutungo wiyongereye cyangwa wagabanutse, cyangwa se ubutwari ku rugamba bukaba bwatuma ugabirwa ukava mu rwego rumwe ukajya mu rundi. Muri iki gitabo gishya, umwanditsi agaragaza uburyo ibyo byiciro byahinduwe ubwoko, mu 1930 bagatangira kubishyira mu ndangamuntu.

Muri icyo gitabo kandi agaragaza impamvu zateye abakoroni b’Ababiligi kubikora batyo ndetse n’ingaruka byagize ku Rwanda ndetse no mu karere.
Iki gitabo cyitezweho gukomeza gufasha abantu gusobanukirwa n’amateka y’u Rwanda ya mbere ndetse no mu gihe cya gikoroni.

Umwanditsi Innocent Nizeyimana yagize ati"Iyo dusobanurira urubyiruko amateka y’igihugu cyacu, tubagaragariza uburyo amacakubiri yatangiye mu gihe cy’ubukoroni ariko bakatubaza ukuntu byagenze kugira ngo habeho Jenoside yakorewe Abatutsi kandi hari hashize igihe abakoroni baragiye. Usanga kandi bafite amatsiko cyane ku ihanurwa ry’indege ry’uwari pPrezida w’u Rwanda, Habyarimana Juvenal."

Ku bijyanye n’ihanurwa ry’indege ya Habyarimana, Nizeyimana yavuze ko yagiye agaragaza ibintu byinshi bivugwa kuri iyi ngingo, n’ibyibazwa n’abantu batandukanye ariko ko adatanga umwanzuro ugaragaza uwahanuye indege ahubwo afasha uzagisoma kwifatira umwanzuro uko abyumva akurikije amakuru yose akubiye muri iki gitabo.

Mu gitabo cye, umwanditsi akomoza no ku ruhare rw’Ikinyamakuru Kangura mu kubiba amacakubiri mu banyarwanda, uko Jenoside yakorewe Abatutsi yateguwe mu buryo budasubirwaho.

Ni umuhango wari witabiriwe n’abayobozi batandukanye barimo Umunyabanga wa Leta muri Minisiteri y’umuco n’urubyiruko, Tito Rutaremara, Rucagu Boniface ndetse na Fidel Ndayisaba uhagarariye Komisiyo y’ubumwe n’ubwiyunge.

Nizeyimana avuga ko kugira ngo iki gitabo kijye ahagaragara yabifashishijwemo n’Umuryango Aegis Trust ndetse na Komisiyo y’Igihugu y’Ubumwe n’Ubwiyunge.

Abayobozi batandukanye bari bitabiriye uyu muhango

Innocent Nizeyimana umwanditsi akaba n’umushakashatsi ku mateka

Genesisbizz

Related Articles

Igitekerezo cyawe kirashyirwaho aruko gisusumwe

TANGA IGITEKEREZO